0504的晚餐 ~ 黃金豆腐 梅菜冬菜蒸肉餅 香草雞翼 火腿炒蛋

放完假又係時間煮番住家飯,實在太耐無新搞作,好悶呢....今日手痕想試下整自己諗既黃金豆腐(其實即係咸蛋黃炒豆腐)....不過最後失敗左~~

今日放工搭巴士我又瞓著左,不過好似瞓得比平時耐喎...原來彌敦道封左路勁塞車,結果我早左一個站落車,唔等佢行啦....仲比平時遲左成15分鐘先落車呀~

返到屋企,吳爸爸已經接左囡囡番屋企,所以立即同囡囡沖涼...沖完我又要去煮粥仔,餵完再埋身餵媽媽奶,終於8點左右囡囡瞓左勒....而吳爸爸因為黎緊星期日要去飲,於是就出左去剪頭髮...咁我就終於可以開始準備晚餐~

蒸肉餅,煎雞翼都無難度既....只係第一次整既黃金豆腐就衰左,賣相差,不過味道還算可以,睇黎要諗下點樣可以煎得靚d豆腐,我又唔想炸喎~好在呢碟餸成本只係$4.5,失敗左都無咩所謂~

因為新菜式唔得,最後唯有煮多碟火腿炒蛋補番數,我仲加埋隻咸蛋既蛋白,炒左出黎又幾好味喎,哈哈~吳爸爸剪完頭番黎,我岩岩就煮好晒d野勒,時間岩岩好~

就係咁今日有4個餸,當然可以留到兩個豐富飯盒啦....呢餐成本價都係三十幾蚊~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~

節瓜肉碎粥

菜心沙孟魚粥已經食左一星期,係時間又要轉轉新口味~

今日係Threesixty買左節瓜同豬肉,呢個星期囡囡既餐單就係 ~ 節瓜肉碎粥

今次係第一次食肉,之前就算有落肉都係用黎出味,無俾囡囡食架~

第一次食肉無咩問題喎,瓜類亦係第一次食既,之前都係食菜葉,囡囡一樣食得好好,一大碗好快就食晒勒~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~

She Mom試用大使の超聲波驅蚊器

唔知大家知唔知She.com既She mom頻度有得登記做試用大使,可以試用唔同產品,有適合大肚媽媽既,有岩唔同月齡BB用既產品.....慳家c9如我,當然第一時間登記啦~

終於收到佢地既email話有產品可以試用,每期都有大約5款唔同產品選擇....呢期我選左兩樣,一樣係驅蚊器,一樣係餵食用具,最後我被分配試用驅蚊器~~

佢地好好既,唔使麻煩你去拎,會送件產品去你辦公室....係佢定既限期前寫番篇用後感就可以架啦~~件產品佢亦唔會收番既,即係你可以免費擁有左佢lor,哈哈~

我對今次呢個驅蚊器都幾滿意,原價都要成一百蚊架~以下就係我既用後感

"陽光燦爛既日子,最岩就係同BB出去郊遊呼吸下新鮮既空氣,不過最怕就係郊野地方好多蚊,針到BB成身蚊癱就一定好心痛~

今次試用呢款超聲波驅蚊器效果都好似唔錯,我見好多遊人都話有蚊針,我自己都有少少痕,不過BB就一D事都無,睇黎應該係有D用既~

呢個驅蚊器都算細細個,帶出街都好方便...佢有個夾,我就用黎夾係BB後衫領位置,因為BB睇唔到唔會用手搞...不過就要簿衫先得,因為都幾難夾~

呢個驅蚊器開左會有V V 聲,都幾大聲架,所以一定係戶外用先岩,咁樣就唔覺太騷擾...不過開關既感應方面好似差左少少,有時想熄要襟幾次先可以確定係咪熄左機~不過整體黎講,我覺得都唔錯,起碼真係無被蚊針到....我會繼續使用~"

睇完啦喎,大家仲唔快d去登記~

BB衫入貨場@赤柱

素聞赤柱買BB衫又平又抵又靚,但係我真係唔知地頭,所以諗住由熟路既Vamama帶領...不過最後都係得番自己去搵....當然我都打左電話俾Vamama問路,終於搵到條賣BB衫既巷仔~

本來我係打算由尾行上頭咁睇既,點知行到最尾開始睇時,買左3件之後,吳爸爸就話轉出去睇其他....shopping真係唔岩同吳爸爸一齊啦,都係約媽媽級朋友好d~結果最後只係買多左2條褲咋~

可能係無咩時間睇,我又格唔到價,又得自己盲中中咁行,所以我並唔覺得赤柱既BB衫特別平,價錢只屬一般...因為我係網上買BB衫,通常都係等到人家清貨大減價先買,所以好多時$30就買到條carter裙仔~

今次係赤柱我買左

白色baby gap裙仔:我覺得幾靚,係polo衫個d質地~

粉紅first moment開胸夾衣:吳爸爸要求買d開胸夾衣,咁見呢件幾得意就買左

紫色碎花carter夾衣裙:我好想買夾衣裙....因為我其實好怕就咁著上衣會令囡囡個肚著涼,所以一定會俾夾衣佢著~~宜家要著裙,入面都會著年夾衣打底,但係咁樣即係著左2件衫,有時都會驚囡囡太熱....所以想買夾衣裙好耐,不過網上唔多覺有得賣,或者有又太貴,最後買左呢件~

呢3件夾埋都要$167,我覺得一d都唔平呀....係我講價之後先平左少少,但係都要$155呀...不過入到黎赤柱無理由空手而回架,所以都係買左lor~

之後想搵Vamama話佢常幫襯個間,但係我搵唔到...只係一間叫S-Mart既買左2條carter褲仔($58),就係買左呢幾件咋....諗住大出血既我只係買左好少咋~

大家其實有邊間推介呢?下次再去一定要買d又平又靚既先得~

泗益@赤柱

5月2日安排左呢個假期最精彩既節目,就係約左Vamama,彤媽,是加力佢地入赤柱shopping BB衫,最難得係吳爸爸今次答應一同出席....點知彤彤出玫瑰疹,呢個假期要閉關....Vamama又病倒了....於是通知是加力,最後決定擇日再去....Vamama,我地要再約過呀~~

雖然節目除消了,不過我們一家三口依舊打算出發赤柱....相信最高興是吳爸爸吧,他不用應酬我的媽媽級朋友...哈哈~

雖然一大早就起身,不過幫囡囡沖涼,吃奶奶,又要準備粥仔,幫囡囡換套靚衫,忙這忙那的,可以出發時已經是中午12時了~

今次我們放棄吃赤柱那些舒適餐廳,因為我和吳爸爸已經想吃泗益的西多士很久了....今次一早已決定要去會一會它~~

看了不少電視介紹,終於知道泗益的位置,平時我們真的沒有留意....1時去到要排隊啊,好像等了半小時左右,我們叫了西多士,沙爹牛治烘底,沙爹蛋牛麪,凍奶茶同熱茶走~~

味道是不錯的,不過沒有我想像的好味...而且價錢也不算便宜,這樣就已經要$73~~不過在赤柱來說已經是很便宜的了,下次或許可試試後面的民益魚蛋粉,好像也不錯似的~

不過真的很多人來吃,人手又不多,那塊西多士真的等了起碼20分鐘才有得吃呢~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳家吃喝(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~