做人新抱...艱難

很慶幸我的99很隨和,又或是我太鈍沒有意識到99對我有要求

昨晚聽到朋友說起她的婆媳關係及攻心計的大嫂

令我覺得我比別人少了很多煩惱

也令我反省我是否在新抱的角色上做得太少

通常都是99難相處的,然而我覺得相處較難的反而是老爺....

老爺的思想傳統而且極自我中心,他說的一定是對....

所以我從來不太回應老爺的說話,笑一笑,點點頭就是了

不只一次,老爺說我少幫99手煮飯,又問我懂不懂煮飯,我都只是說"不太懂,但會煮些簡單的"

算吧,不放在心上就沒有壓力,只要老公知道我為他煮了什麼就夠....

是非

昨晚放工番屋企既途中收到老公既電話

叫我唔好去買餸,因為99 call話一齊出街食飯

今次99仲提議去間叫"品味泰國菜館"試下

都好,我又慳番唔使煮

d野食都唔錯喎,叫左香葉包雞,肉碎生菜包,乾炒咖哩蝦球,菠蘿炒飯,炭燒帶子及生蠔各3隻,好豐富呀

間舖我同老公時時都經過但係就無諗住試,原來都幾好食....

席間99問起新年個時我地去探x爺(老公個x爺)時見到咩親戚,之後有無去姑x屋企食晚飯

(因為99同老爺新年都唔係HK,我地兩公婆自己去親戚到拜年)

交代完之後,99問我地表x個老婆(遲過我地3個月結婚)個晚有無幫下手執野洗碗,我同老公交換左個眼神,然後答99話"無留意喎",之後我問99點解咁問

原來剛才99去探x爺見到姑x傾開計,姑x話表x個老婆結左婚之後就唔幫手,食完飯就行開坐埋一邊,同結婚前係2個樣喎

我聽完之後好驚呀,點解要咁比較呢...跟住係度諗我又有無成為親戚之間評論既對象呢??其實我覺得表x個老婆個晚既表現一d問題都無,我都好似係咁上下咋喎,我有無幫下手呢?死啦,都唔係好記得,好似係咁易幫手執下張台咋喎....唉,下次再去親戚屋企都係醒少少至得!

最靚新娘係邊個?

今年雙春兼潤月,好多人結婚

每個星期六日出街好容易就見到正直大日子既新娘新郎

就算係平日放工行過d酒樓都見有人擺酒....

前幾日,老公突然同我講剛才回家時見到有人結婚

仲話見到新娘子個樣

我以為佢梗係讚人地幾咁靚啦

沒料到..老公竟然..竟然...對我講"老婆,你真係我見過"最靚既新娘""

oh,老公突然發自內心既說話令我好開心!!!!

佢好少會直接讚我靚架(仲要係自願既情況之下).....

其實老公你都係最型既新郎

 

車品品

認識車品品始於openrice

那時我還剛剛開始籌備結婚....第1次出席食友的聚會(暫時黎講亦係唯一1次)

就係去食車品品既野

一間小小並不起眼的小店,賣的是車仔面小食而且價錢也不算便宜

本來就是平平無奇的,但是因為老闆娘的熱誠與對食物的堅持

贏得一眾街坊和食友們的愛戴

而我和老公也很喜愛老闆娘及其食物,很可惜,天下無不散之延席...

車品品將於今天光榮結業

於是昨晚叫老公收工後就去買外賣,吃最後一次車品品出品既食物(我老公6點多到達已經要排隊等開舖,最後要成7點半先成功拎d外賣番到屋企,相信今日last day既情況一定更厲害!!)

招牌雜菜飯

(我好鐘意食架,佢d菜飯好唔錯,加埋腩汁絕對perfect...雜餸之中最出色既一定係蘿蔔,就連我呢個唔鐘意食白蘿蔔既人都覺得好好食,因為真係甜而無渣)

蝦子魯肉餃

(又係我既心水推介,一來d蝦子真係好多好香,老闆娘係唔會吝嗇d蝦子既,而d魯肉餃食落香甜之餘仲好juice,真係無得頂...雖然我老公唔食蝦子,但佢都會沖走之蝦子去食魯肉餃架....唉,無左車品品之後,唔知幾時可以有機會食到呢 )

碗仔翅

(呢個碗仔翅絕對貨真價實,足料非常....係我老公既至愛,溝埋福面黎食,別有一番滋味添)

阿婆甜蛋湯

(呢個都係第1次試,好味呀,真係相逢恨晚勒)

其實仲有其他好食既野,當中有秋梨茶(homemade feel得黎真係好清潤),粗芝麻糊(勁有口感),油渣粉仔配辣辣菜甫(雖然係用烏冬當粉仔,但無損其味道,我老公至愛佢既菜甫,真係多多都食得晒)......

希望老闆娘可以物色到新舖等我同老公有機會再食d咁特別既食物.....

(圖片取自openrice)

327的晚餐

晚餐係

蒜茸炒白菜仔(炒得幾好味....哈哈)

咸蛋蒸肉餅(都蒸得幾好,係隻咸蛋唔夠靚)

香腸炒蛋(呢個係正常啦)

繼續努力

小學同學BBQ

繼上次吳家聚會後

我們一班小學同學約定326去BBQ

一行9男女出發去大尾篤燒野食

嘩,好耐無BBQ啦,仲要同小學同學添...

而且最後仲演變成攝影圑

個個拎住部DC左拍右拍,連紅紅烈火都唔放過

大家嘻嘻哈哈咁,好似去番小學時去旅行咁....

之後仲去埋大埔出名個間"彩虹"食甜品....d甜品好味得黎仲好靚好可愛添喎

 

Feeling warm

星期六天陰陰又落雨

老公放工番黎都無意欲同佢出街街

而且仲有一大堆衫未熨,於是兩公婆食完少少野就開工做家務!

我熨衫,老公吸塵抹家私

我洗企缸,老公洗厠所

一面做一面聽歌

竟然...竟然...唔覺辛苦...仲覺得個畫面好溫馨添

一面做家務我竟然一面係度笑

唔知既仲以為我係傻既添....哈哈

芝士焗菠菜闊面

星期六晚決定煮呢個芝士焗菠菜闊面做晚餐

嘩,唔好講笑,我為左整呢個意粉竟然用左成個半鐘先完成

都怪我切野太慢啦

今次呢個意粉全部都係自己準備既,就連白汁都係自制,無買現成,所以整左咁耐

不過個賣相真係好似去餐廳食既咁靚,好開心,味道亦唔錯

但不足之處係白汁唔多夠,下次要整多少少勒!

10 lbs 的啟示

不知怎的,我的體重由結婚時最fit既狀態瞬間增長了10磅

天啊!短短半年就加我咁多肉,點解唔加我多d人工呀

呢10磅表示左d咩呢?

朋友話"表示你好幸福,婚姻生活愉快自然心廣體胖啦"

朋友話"老公養得你肥肥白白咪幾好,証明無刻薄你呀麻"

朋友話"你有肥到10磅咩?都唔覺喎,有d肉咪仲靚!"

似乎大家都唔太介意呢10磅肉,覺得係個好兆頭添!

但係作為受害人既我始終應為婚後唔應該變肥c9.....

呢d危機意識點可以無架......我都係"盡量"食少d野先得!

9月新娘聚會

自籌備結婚開始,在網上認識了很多準新娘,大家都為自己既大日子而努力

昨晚一班同在05年9月結婚既靚太來個半年慶祝聚會

又是一個講不停的晚上,交換相片,video sharing

很開心

緣份真的很奇妙,因為結婚認識了一批新朋友,還能維持下去呢

身為板主的我,期望這個Sept Bride由結婚分享-->發展到婚姻分享-->懷孕分享-->母親分享........

 

323的晚餐

成個星期無下廚點對得住老公呢

所以放工就去買餸煮番餐飯啦

蒜茸炒菜芯

蜜汁雞扒

生炒骨(呢個係現成買既)

飯後加碗冰糖燉燕窩(99提供既)

又合格左勒

幸福

呢期好多朋友聚會,而且都係上黎吳家一聚添

唔知點解"你好幸福"呢句說話不只一次,不只一人都不約而同我講

是的,我想我是幸福的

,多謝吳生.....也多謝吳太

...

成就了這一個幸福的家

但願天下所有夫妻也幸福快樂

天天掛上幸運的笑容

整餅團

估唔到我呢個整餅初哥咁快就開班教人整蛋糕

真係<蜀中無大將,廖化作先鋒>

承蒙各方靚女多多包涵給予讚賞

今次既整餅團聚會要特別鳴謝:

agnes親自下廚既3餸1湯家常便飯(紫菜肉片湯,香煎雞翼,家常炒蛋及蒜茸炒菜芯)

samming,weiwei既新鮮士多啤梨,薯片同檸檬茶

仲有老公既洗碗服務

至於我個video copy,我老公一定唔批準架,不如你地約埋老公上黎再睇啦.....哈哈

草莓凍餅

新鮮草莓凍餅成功登場

多謝各雙魚組朋友當taster

味道也不錯,只是不知何故今次的餅底很易碎.....

 

殷朱聯婚VS謝黎聯婚

318果真是嫁娶好日子

堂哥結婚一定要出席,

於是唯有犧牲老公好友的婚宴

但是我們一樣到賀觀禮送上祝福

看見各位新娘子,又令我想起自己結婚時的情景.....

在此祝福各位新人

執子之手,與子皆老

雙魚組

久違了的雙魚組組員

難得的聚會

阿Q

Joyce

Loretta

Vivien

Rachel

Teresa

Clement

重拾大學時的回憶,是珍貴,是難忘

 

３１６的晚餐

今日放假當然要準備好材料整番餐好餸等老公放工返黎食啦

一早就去街市，豬肉佬可能見我個樣細就叫我妹妹，

哈哈，原來去買餸都會俾人撩架喎

青紅蘿蔔瘦肉湯（火喉仲差少少，聽日會更入味）

黑椒雞柳（呢個差左Ｄ，下次唔買淘大既黑椒汁）

冬菇豬肉腐皮卷（第１次整，幾好味喎）

冬菇蒸飯（老公話好好食）

唔，今日既成績唔錯

檸檬芝士凍餅

昨天個肚飽飽滯滯，無咩胃口，無煮飯，不過就試整左檸檬芝士涷餅

賣相唔錯，味道都唔錯，原來齋睇食譜整都成功喎，好開心

老公都話好味道

黎緊我打算整草莓凍餅，睇下又成唔成功先

接吻魚

今日放工去左同老公睇魚仔

終於我地買左10條魚仔,包括

1對接吻魚

(當然係我話要買啦,不過老公都覺得幾特別,唔知點解之前都唔見有得買

)

1對花點雞泡魚

(本來我唔係好鐘意架,因為我覺得D花紋唔靚,不過老公鐘意佢肥o都o都,話好可愛喎....後來我見到佢做左個旋轉360度既高難度泳式,所以我就批准老公買勒....老公話條魚好似想吸引我買佢喎!!)

6條閃閃鳳尾魚仔

(呢幾條就勝在閃下閃下,幾靚呀!而且仲好活潑添....)