首映:《盜墓迷城 3》(The Mummy:Tomb of the Dragon Emperor)

今年既生日節目係去The Grand睇《盜墓迷城 3》既首映,呢2張首映飛用左成粒幾鐘排架,所以無理由唔去睇啦~

前2集既Mummy都有睇開,今次第3集轉左中國風,玩兵馬傭,場面係幾宏偉既,不過其實我覺得中國既彊師接近木乃伊多d,哈哈~

劇情其實都係公式化啦,盜墓-->Mummy復活-->激戰-->勝利,不過特技幾出色,而且係The Grand睇有個好處,就係張椅會震,每逢係d爆破,雪崩等大場面,張椅都會配合震動,加埋The Grand既一流音響效果,絕對知道點解要去戲院睇戲~~

今集實在好多亞洲演員,估唔到梁洛施既戲份真係幾多,而且都幾搶鏡,算係做得唔錯呀,更加估唔到佢d英文都ok喎...反而楊紫瓊講既英文怪怪咁,逐個字讀出黎一d都唔流利~~不過當中亦有d唔合情理既地方,點解梁洛施同楊紫瓊會識講英文?佢地明明係講普通話架喎...楊紫瓊第一次念咒明明用大家都聽唔明既梵文,點解第二次念咒會轉左講英文?呢d地方錯得太明顯,連我呢d一向都唔會挑剔劇情既人都發現就知道幕後人員係幾咁大意....不過點都好,我覺得都值得入戲院睇下既~~

 

 

 

0729的晚餐

其實耐唔耐老公都會煮飯俾我食既,不過我見來來去去都係個幾味,所以都無特別post上blog...今日係我既農曆生日,老公特登煮番餐住家飯我食,仲買左西瓜俾我消暑添~~

我們的低能婚禮

星期一老公約左同事去書展,我嫌人迫所以唔去,番左娘家食晚飯,之後先會合老公一齊番屋企~~

老公話俾左入場費,點都買番本書喎...最後佢竟然買左呢本 ~ 我們的低能婚禮...其實之前我係地鐵見到廣告,咪指住同老公講呢本書好似好搞笑,老公話呢本書一定o岩我睇,所以就買左啦~~

書展有8折,我番工一程巴士就睇晒成本書啦,都真係幾好笑,仲係會心微笑個隻...因為某d情節都曾經係我既婚禮發生過~~

BABY SLING 育兒揹巾 親子教室

我一直都有留意揹帶呢個產品,知道宜家流行一種叫Sling既揹帶,但係亦有好多唔同款式,價錢亦有平有貴,加上運用上似乎需要學習,所以遲遲都未買~

咁o岩見到Baby Outlet會係8月8日會展既BB用品展內舉辦BABY SLING 育兒揹巾 親子教室,所以就想參加~~

適逢8月8日係我去廣華覆診既日子,所以老公決定請假陪我去完廣華就去睇BB用品展,呢個教室時間o岩o岩好啦....雖然要俾$50報名費,不過佢包左2張8月8日既入場門卷同埋一張Baby Outlet既$100現金卷(不過只可以用黎買sling揹巾)....如果當日如期出席仲會有Healthy Times有機嬰兒糊仔一盒(價值$36)同埋嬰兒護理用品試用裝一套添,咁我覺得都唔算貴,今日就同老公去左報名啦~

聽聞上年既BB用品展超多人,淨係排隊都成粒鐘,宜家預先有左門票,咁到時就唔使排隊買飛勒(雖然排隊買飛好似亦有贈品送)...如果大家有興趣又預左8月8日去行BB用品展既話,可以考慮下參唔參加喎~

詳情如下:

Sling 嬰兒揹巾能增強父母及嬰孩的親密關係, 

有助安撫嬰孩情緒, 其輕巧設計方便攜帶, 

是現代父母的至型選擇。

因反應熱烈，Baby Outlet 將於８月份再度舉行 Baby Sling 親子教室，

為一眾新手的 Sling 用家示範使用技巧，

包括 Hug、Cradle、Explore、Adventure、Hip、Kangaroo

以及 Back 等各式不同的揹法。

報 名 辦 法

	日期：	０８年８月８日 (星期五)
	地點：	香港會議展覽中心 Hall 1 (講座區) (於第１６屆國際嬰兒及兒童用品博覽期間舉行)
	時間 :	下午 3:00 - 3:30
	參加辦法：	(1) 親臨 Baby Outlet 各分店登記報名; 或 (2) 轉帳或存現金到本公司的匯豐銀行戶口 (817-011067-838), 再以電話確認
	截止日期：	８月３日 (星期日)
	留 位 費：	每家庭組別 $50，報名時並可即時免費獲贈： 1. 嬰兒用品展之入場門券２張 2. Baby Outlet $100 現金代用券 (適用於任何 Sling 款式) 一張
	其他優惠：	參加者將可於活動當日免費領取 (每戶一份)： 1. 美國 Healthy Times 有機嬰兒糊仔一盒 (價值 $36) 2. 嬰兒護理用品試用裝一套
	額滿即止, 請各位有興趣的爹地媽咪提早報名

不錯的信用卡禮品

已經好耐無申請信用卡啦,一來好多都俾我申請左,二來d禮品好似無以前咁吸引~

近期老公收到Manhattan既邀請,預先批核左張Titianium卡,我見買BB用品既支出都應該唔少,所以就叫老公出左呢張卡....估唔到呢張卡都幾多推廣,雖然我地只係簽左佢要求拎迎新禮物既金額,不過d單仲可以用黎換其他野...結果就拎左上圖既禮品勒~

免費薄餅卷一張

The Grand Cinema贈卷2張(迎新禮物)

MCL贈卷2張(迎新禮物)

Mummy 3首映戲票2張

好耐都無試過換咁多信用卡禮物啦,好開心

Red Stone Bar & Grill@尖沙咀中心

上完堂之後又係食晏既時候勒~~今日終於同老公去左尖東間Red Stone食set lunch啦, 聽聞呢度晚餐都幾貴架,所以食晏試下就夠勒~

其實我想去食好耐架啦,因為有goodtime卡,可以有set lunch買一送一優惠,食埋呢次,我張goodtime卡都差唔多回本啦~

呢度有兩層,下層太開揚啦,夜晚就好feel,坐底食lunch就似乎太熱啦...所以我地上左2樓,有冷氣舒服好多...加上一樣可以坐係window seat,有陽光有海景真係好環境~~而且我地好似包場咁,因為得我地一檯客咋...係食到中途先多左檯客咋,環境寧靜,超正~

未叫野食,待應就已經送上一碟focaccia麪包,配上黑醋檻欖油,好美味

頭盆:老公要左沙律,我要左個湯,兩樣都唔錯

主菜:老公要左個pizza,呢個pizza好健康架,因為一d肉都無既,全部都係蔬菜,所以味道好清新,好味道~($98)

而我就要左個野菌意大利飯,碟飯都幾多架,鋪滿芝士片,味道唔會過濃,o岩o岩好,我覺得好好味喎($108)

當然亦有配飲品,如果想食埋甜品就要加多$30,不過我地都飽,所以就無加啦~~埋單只係$119咋,好抵呢~~

第四堂廣華講座 - 初生嬰兒的護理

星期六又係去廣華上堂既日子啦,今堂係最後一次啦,因為我只係報左4堂咋~

呢堂都幾多野學,最感興趣就係學幫BB沖涼,因為有片睇呢,大家都有起哄喎,真搞笑~

老公睇得好留心,希望佢可以成為expert啦~~

今堂又有豐富既禮品派發勒,就係上次拎既Huggies禮品包,唔少得既就係次次都有既強生用品啦~~

你高清左未?

睇番d網誌,原來我屋企部LCD TV已經睇左2年有多架啦...當時仲未知會有高清廣播呢樣野,所以自然無理到full HD或者HD ready既分別啦,不過我地部電視係有個HDMI輸出既功能架~

雖然屋企既地區係第一批接收到高清廣播,但係大廈既天線就未整,所以一直都無理會~~前排老公係大堂見到通告,原來大廈已經整好左接收高清廣播既天線接近兩個月,我地宜家先留意到....承辦商仲以優惠價出售高清機頂盒俾住戶添,於是老公就開始去留意唔同牌字既高清機頂盒同埋價錢~

經過一輪格價同埋口碑調查,最後決定買"Eight"呢隻牌子,而咁o岩承辦商就係賣佢喎,仲係最新型號HD2008添....宜家用$1650就買到,仲送HDMI cable同埋高清接收天線(部天線可以用係房部電視機呢)....有專人送貨仲幫我地安裝埋添,唔錯唔錯~

我覺得最好係可以睇多幾個台,至於你話高清畫面既質素,我覺得都唔錯,趕得切用黎睇奧運啦

 

 

救命呀~好熱呀~

我深深體會到大肚婆係幾咁怕熱,加上係呢個最熱既天時陀BB,真係熱上加熱啦

呢種熱係自內在發出,所以就算開左冷氣我都依然係覺得熱架...而今日就更加熱得辛苦,番到屋企立即走去沖涼,點知沖完都只係稍為紓緩一下,汗還是不斷在冒出~~

救命呀,真係好熱呀...我d皮膚更因此再變得更差,仲變得好痕,好辛苦呀...有無解決方法呢?

大學同學聚會

今日去左一位大學同學位於馬鞍山既新居,同學於5月頭結婚,我地今次係去睇下佢既結婚video同埋結婚當日既相....又順便係我生之前見下面啦,睇怕下次聚會最快都係囡囡出世之後黎探我啦~

其實今日仲有一位男同學架,不過佢約左外母食飯,咁我地當然要放佢走啦,哈哈~~仲有一位好耐無見既做左madam既同學,實在難得呀~~

不得不提係阿雪同學首次炮製左沙律拎黎請我地食,好味道呀~~開開心心又過左一晚啦~~

芝士燒烤爐

因為老公其中一張信用卡已經upgrade左做白金,咁張普通卡都唔會再用,但係d積分又唔可以轉去白金張卡到,所以唯有睇下有咩野換啦....由於分數唔多,就連最普通既現金卷都唔夠分換,而我又唔興積分加現金換禮物,最後夠分換而又吸引少少既就只有呢個芝士燒烤爐~

部機好細部架咋,適合係屋企玩下爐端燒或者自家韓燒,相信油煙唔多卦~~不過睇怕都要我再重出江湖掌管番廚房先可以做呢樣野勒....即係就排先會試部機啦,哈哈~

第三堂廣華講座 ~ 產後護理及營養

今日又係去廣華上堂既日子啦,今次係聽產後護理及營養~

其實內容大概都了解既,不過一講生完之後每日只係得6-8點可以有屋企人黎探病,其他時間都係一個人係產後房,我就覺得有d無助lor....點解唔可以隨時都可以有人黎探我呢,不過公立醫院就係有咁多限制架啦,都預左~~

不過我諗對住囡囡都唔會悶既,因為有好野要學,學餵人奶,學幫囡囡沖涼....我諗d時間都好快過既~~

講座後一樣有強生禮品派呢~

ETnet舊同事@Wildfire

上星期突然想約下ETnet既舊同事,其實係想係我生之前見下伴郎同埋舊老闆~

因為湊夠5個人,所以就可以用我張elite card既生日優惠...九龍區只係得Wildfire比較合適做聚會地點,老闆覺得諾士彿臺比elements方便d,不過呢間就無提供免費開水,一定要叫飲品呢~~

今次既優惠係可以係張單扣減$300同埋送個生日蛋糕,不過因為無水提供,淨係叫飲品都用左$200呀,如果去elements間wildfire相信會再抵d~~

今日既食物分別有香脆蒜茸包,野菜特色沙律,燒豬肋骨,大蝦闊條麪,pizza....大家對食物評價都唔錯,而我地亦傾得好開心,特別係老公佢成日都話無我舊老細就無囡囡,因為舊老細算係我地既媒人麻,哈哈~~

而個生日蛋糕都幾靚喎,味道仲不錯呢...埋單係$600,如果唔使叫野飲只係$400架咋,不過宜家人均消費$120都唔算好貴....

時間真係好快,轉眼呢班舊同事已經識左8年啦,不過大家個樣都無老到喎,仲係咁年青,哈哈~~

 

第七次私家產檢(30 weeks)

不經不覺原來已經步入3字頭啦,已經陀左囡囡30週了~~

感覺離囡囡出世時間不遠矣~~不過要準備既野都只唔知有無5成,希望8月頭既BB用品展可以一次過搞掂晒d野啦~

今日可以照下超聲波,醫生話囡囡已經轉左頭啦,同上次廣華姑娘講既一樣喎...囡囡真係大左好多呀,宜家去到3.5 lbs啦,比上次重左成1.5 lbs,勁呀~~不過囡囡都唔算大碼,我只希望佢出世時有6-7 lbs就夠啦,唔好太大呀~

今日老公有陪我呀,醫生本來想影張4D相俾老公睇,不過照左好耐囡囡都要用手遮住面仔,最後都係無影到,老公話囡囡一定想第一張相由爸爸影,所以唔肯俾醫生影喎,哈哈~

而我呢,體重已經累積增加至30 lbs啦,睇黎到生得之時應該會共重40 lbs~~

令人擔心

老公公司既老闆知道佢將會係9月榮升爸爸,為左分擔老公既工作量,佢將老公其中一部份既工作轉左俾另一個同事,而兩位幫老公做野既下屬亦改為同時幫老公同另一個同事做野...可惜事與原違,呢個安排反而令老公更加忙碌,因為另一個同事俾得太多野兩位下屬做,搞到無時間幫我老公做野,結果老公仲要做埋本來係下屬做既工作,真係好心做壞事.....老公以前都無同我講工作辛苦,但係呢排成日都聽到佢係度呻,而且又早d番工清野,為的都係想準時放工番黎照顧我~

唔知係咪因為公事又忙,家事又忙(佢做晒所有既家務,有時仲煮埋飯呀),結果身體仲差過我呢個大肚婆,上星期病完,琴日唔知做咩又肚痾,半夜都要起身去洗手間,又驚d菌會傳染我,係都要出廳瞓梳化,搞到我不知幾心痛~~

今日老公去睇醫生仲要打針添呀,又無胃口食野,真係令人擔心....希望老公快d好番,養番好個身體,唔係囡囡出世之後,我地都唔知有無精神照顧囡囡呀~~

好抵既西松屋紗巾

早前從9月靚太處得知原來BB因為皮膚幼嫩,係唔可以用我地大人用既毛巾架~~

原來係要用紗巾呢樣野既,而且仲見佢地大手大手咁入貨,咁我一直都有留意呢樣物品...好多樓上舖都有得買,不過一定係網上買既價錢抵好多~~

而大家都話日本西松屋既紗巾好,而且又有可愛既公仔pattern,我都諗住買架啦...有日無意中見到有間既網上價係10條只售$30,仲要包埋郵費,係我睇過最抵既網上價,所以決定買10條~

第一次上網買BB野,要入錢先既,不過第二日我就收到紗巾啦,效率好高呢,即刻開黎驗下貨,質素無問題喎...10條內共有6款公仔圖案,唔錯唔錯,睇黎可以試下多d係網上買野勒,哈哈

產假‧續約‧加薪

最初知道懷孕時,第一時間就梗係計下幾時有得放產假啦~

點知囡囡既預產期係9月尾,而我份合約剛剛是9月中到期,當時我打去人事部問呢種情況如何處理,得到的答案是我最遲要6月申請產假,而我係符合資格放有薪產假既,不過如果唔續約,咁合約期完後既產假就無人工出啦~~其實我一向都唔擔心續約問題既,不過撞正放產假既問題搞到我都驚驚地....如果係私人機構大條道理話合約完,想告佢懷孕歧視都唔得添喎~

好在我呢度唔係私人公司,我諗應該都唔會咁衰想慳番個產假而唔同我續約卦~~不過一向都係最後個月先會簽續約文件既,我都急唔黎,唯有唔好諗佢啦~~

終於6月尾前遞紙申請產假,7月頭人事部出信俾我話批左70日有薪產假啦,我會放前2後8,9月16日開始,o岩o岩可以放埋中秋節既公眾假,唔使蝕左3日假俾佢,即係我13號就開始放假啦.....雖然我合約到期日係9月17日,不過既然佢批得70日有薪產假,續約既事應該係無問題啦~~

果然今日收到續約文件,仲唔拿拿聲簽左佢咩,而且新合約竟然加左人工呀,都有12.5%喎,簡直係意外驚喜啦

最開心係呢度既有薪產假係full pay既,唔使打8折架,加上仲加埋人工,真係估唔到我放產假既時候收入仲會多左添,哈哈哈,實在係太開心啦~~

囡囡,你腳頭都幾好喎,我除左係轉工情況下會加薪超過2位數既百份比之外,從來都未試過同一份工可以有呢個加薪幅度架,而且我係合約員工,一早對升職加薪無任何冀盼....可能就係呢份心理狀態令我好易滿足,所以今日見到呢個offer不知幾開心

時新快餐店

長期高據openrice最多好評既食店 - 時新快餐店,賣的是港式漢堡包,想同老公去試好耐架啦...不過硬係唔o岩時間,就算身處紅磡總是無緣一試~

今日終於搵左下午茶時間去試食...入到去好迫,超舊式既快餐店格局,不過好多人喎,店入面坐滿,店外亦有一批人等外賣~~

我地少少地只係叫左一個雙層芝士漢堡($13)同埋炸雞批($10)share食,因為即叫即做,我諗都等左5分鐘有多....兩樣食物,我覺得漢堡出色d,佢塊牛肉加左洋蔥粒好香口,肉汁豐富,加上沙律汁真係幾好食喎,十三蚊絕對唔貴啦,好食過麥記多多聲~老公就話港式漢堡包係咁上下,不過覺得佢塊漢堡比人厚,唔錯~

至於隻雞批,我覺得同細過食既味道好相似,但唔係話好出色,不過肉質幾嫩滑,唔會炸到乾晒....如果再黎食我諗我會試下其他漢堡~

Simplylife Bakery Cafe@又一城

老公今日放工之後話不如去又一城行下,都好呀,我地平時都係油尖旺活動又真係悶左d既,估唔到又一城人流好多下喎~~

我地睇左幾間食店,因為消費普遍都較高,既然係咁我就選左Simplylife Bakery Cafe試下...其實想試佢好耐架啦~~

這裡的 set lunch 叫brunch喎,分 1. 湯/沙律, 2. 主菜, 3. 甜品, 每份brunch均配飲品,

2 + 1/3 only....$92, 1 + 2 + 3...$102 (另加一收費)

我地都叫全套brunch,個湯係磨菇湯,質地偏杰,味道不錯...至於個餐包就麻麻勒,仲以為佢d麪包好好食,不過呢款唔o岩我口味,可以我鐘意食鬆軟既麪包,呢個食落覺得"un un"地,好似有d怪~

老公要左芝士牛肉漢堡(6安士),塊漢堡真係好厚下呢,老公話好味道喎~

而我就要左雞扒凱撒沙律,今日竟然好想食多d菜,所以罕有地叫左個沙律做主菜,平時我諗一定唔會既,哈哈~~佢個沙律都唔錯,幾fresh,好大碟,食得我好飽呢~

甜品就係芝士餅同朱古力蛋糕,不過係超迷你既,不過味道都幾好...而今日既special餐飲係蘋果茶,我見好似幾靚就要左,我覺得幾好飲呢....呢度環境幾好,feel到陽光,梳化又舒服,雖然就貴左d,不過食得好開心呢~

上壽司@美麗華商場

星期五做完檢查之後食左d野就番左屋企,老公打算同我去食下午茶,最後去左美麗華商場間上壽司,因為3點至5點全場半價,咁就去食下啦~

腐皮烏冬($10), 牛肉烏冬($10), 玉子壽司($6) x 2, 粟米沙律壽司($4.5), 吞拿魚沙律壽司($4.5), 三文魚壽司($4.5), 芒果花之戀($10)

雖然半價後烏冬只係十蚊,不過其實好細碗架咋...壽司份量應該同平時一樣既,整體味道還可啦,不過半價之後只要$66都算抵食~

走佬袋

我一直都賴賴閑,走佬袋既野一樣都未準備...不過琴日睇左一個7月尾預產期媽媽既blog,原來佢既bb早產,係35週幾就搶閘出世,由7月bb變左6月bb,早左一個月喎....睇完即刻好驚啦,我咩都未執,如果早產真係幾狼狽喎,所以今日即刻同老公去買部份入院用品~

之前見唔少人都買入院套裝(網褲x4,床墊x4,護康瓶x1,產婦衛生巾12片裝x2),我都諗住一包搞掂,睇過唔同地方,好似護協最平,只係$125....不過最後我決定散買,最主要原因係上次聽講座,廣華既姑娘話最好準備一包有扣既產婦衛生巾,一包黏貼既產婦衛生巾,因為套裝既只有黏貼一款,結果我就決定散開黎買,價錢都係貴左$6,$131無所謂啦~

Kotex有扣產婦衛生巾(10片) - $18

Kotex黏貼產婦衛生巾(10片) - $18

網褲 x 6 - $52

床墊 x 10 (43cm x 60cm) - $21

護康瓶 x 1 - $22

不過我既走佬袋仲未完全ready喎,但係我已經覺得好似要帶好多野入院咁啦~

 

第四次廣華產檢(29 week) - 血糖測試

星期四返左娘家食晚飯,順便行下新裝修完既康怡吉之島,最大既改變應該係foodcourt,開左好多新店,個feel有d似一田既foodcourt呢...而且開左d新餐廳,有板長壽司,大江戶等,好似好吸引呢~

好耐都無食阿媽煮既飯啦,囡囡都係第一次品嚐呢~~不過食完之後我就唔可以再口痕食其他野,因為今朝要番廣華做血糖測試,為免超標都係唔好食咁多野啦~

老公未試過陪我去廣華做檢查,佢知道我今次要抽血就請左假,而且佢連續2日都工作得好辛苦仲病病地,咁佢放假休息下都好既~~

真係好怕抽血呀,好在今次姑娘手勢都幾好,唔係好痛亦無瘀到....原來個杯超甜糖水並唔係今日飲既,姑娘話如果d血驗完有問題就會call我番去飲糖水,如果無問題跟番下次既覆診日期就ok....希望我順順利利唔使飲糖水啦~~

老公因為第一次黎所以順便補填番佢既資料,姑娘同我檢查囡囡心跳時都有問我老公聽唔聽到,一如以往無問題...今次姑娘摸完我個肚仲話囡囡應該已經調左頭,不過因為週數尚早,所以話可能都會轉番上去,要睇定d先喎~

0/3 Baby Collection ~ Peter Rabbit Bedding Series

雖然我地仲未買BB床,不過屋企竟然出現左呢盒彼得兔6件嬰兒被套裝~~

話說姑奶既信用卡積分將近到期,於是就話換份禮物俾我地,當然姑奶係想換份BB用得既野啦,其實可以選擇既BB用品只係得highchair用埋嬰兒被,仲有d玩具咁既...我地就同姑奶講已經買左highchair,不過我唔知最後老公話要咩,原來姑奶換左呢set Peter Rabbit Bedding Series~~

• 套裝包括 : 多用被(x1), 嬰兒窩枕(x1), 床圍(x2), 床笠(x1)及枕套(x1)
  
• 可加被芯於多用被內
  
• 床圍內棉加設蜂巢式透氣孔，讓嬰兒睡眠時有足夠空氣流通

今日老公換左粉紅色番黎,都幾靚呀~~點都要多謝姑奶既心意,因為除左要扣積分,仲要再加$460架,都係比出街買平少少咋~不過我地仲未買BB床呢...其實咁o岩我地都睇中左0/3 baby既BB床($18xx)同埋沐浴櫃($24xx),不過價錢都唔平,我仲睇緊有無其他地方可以平d或者大家有無0/3 baby既vip卡呢?

送左黎啦

Aprica既highchair終於送左黎啦~~

我地當然要試下有無問題啦,老公好厲害,呢度摸摸,個度睇下就知道點樣操作~

老公好鐘意佢個水平式同搖籃式既搖擺功能,仲話架highchair好靚好公主添呢...睇黎老公好滿意我既選擇喎~

宜家我地包好左架highchair放係書房既一角,不過好快佢就會大派用場架啦~

峇里餐廳

晏畫食完懷舊酒樓,估唔到夜晚又食左間懷舊印尼菜館,就係佐敦既峇里餐廳~

因為佢既位置唔顯眼,所以我地成日都唔記得佢既存在,一直都未試...終於琴日醒起就去試下~

我要左個黃薑飯($48),有7款印尼餸,味道都唔錯呀~

老公就要左個公司飯餐($69),包羅宋湯,瑞士雞,咖哩什菜,鹵蛋,燜牛腩,老公話味道似曾相識喎,唔知係咪即係正宗口味呢~

紫荊閣

係廣華上完堂之後就去食晏啦,今次去左附近既一間懷舊酒樓 - 紫荊閣

我叫左春蛋蒸燒賣同埋雞球大包呢兩款懷舊點心,老公又叫左個咸菜豬肚黎食,仲有奶皇包,牛柏葉,雞絲粉卷,山竹牛肉,炸兩,味道都ok呀.....仲好飽添,埋單$123~

第二堂廣華講座 ~ 分娩的認識

星期六又係去廣華上堂既日子勒,今次呢堂相當重要,因為老公一定要上呢堂分娩的認識先可以陪產架~~

其實內容大致上之前都已經了解,不過最好就係可以知道廣華既產房佈置如何,入院程序如何,知多d點都無咁驚麻~~

今次上完堂有huggies既NB同S既尿片試用裝同埋濕紙巾呀咁,仲有買1送1coupon添呢,so good~

功夫熊貓 (Kung Fu Panda)

哈哈,7.1放假當然又係時間搵節目啦...上次睇唔成功夫熊貓,今日再黎過,因為The Grand無早場(佢個早場都呃人既,永遠都無想睇既戲會有早場)...結果老公話去UA黃埔睇早場(每張飛只係$35)~~

好在我地琴晚去黃埔食野順便買定飛,今朝去到勁多家長帶同小朋友排隊,結果係full house呢~今日真係合家歡早場,個個都係帶住小朋友去睇既,一家幾口咁,好鬼嘈~不過我地其實都算係一家三口呀,哈哈~

呢套功夫熊貓都幾好睇,有幾個笑位都好正架....不過因為d小朋友實在比較嘈,我地都唔係好聽得清楚d對白,睇戲既mood係影響左d lor...或者我地唔應該去UA黃埔,可能UA朗豪會好d~~