0520的晚餐 ~ 雞扒泡菜炒烏冬

老公下星期將被借調到長沙灣個邊個office做野,話就話借調2個月,不過老公話都唔知會唔會還番佢番去荃灣office,呢次借調又急,本來話即日就要走,幾經爭取先改做下星期...所以呢個星期老公都要同唔同既同事食晏,飯盒就唔使準備俾佢啦~

既然係咁,我就想煮d簡單野啦,不過又想有d新意....所以今日決定試下做韓式晚餐....哈哈,其實都唔係韓式,我只不過係超市買左包泡菜,諗住用黎炒烏冬...加多件雞扒做餸符合老公既口味勒~

泡菜我都係第一次買番屋企用黎煮架,因為平時我係唔食泡菜既...不過如果用黎伴住其他野一齊食,咁我又會食架喎....所以用黎炒烏冬都唔錯~

第一次煮,味道唔錯呀....炒烏冬呢個配搭都ok,老公都話幾好味~包泡菜都幾大包,我用左半包咋...不過因為泡菜比較貴,所以今餐成本稍高,大約$45...但係我都留左個飯盒俾自己,除開既話每份都係$15咋~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~

菠菜沙孟魚粥

翠玉瓜粥又食左一個星期勒,呢個星期回歸魚粥懷抱,感覺無咁寡之餘,我覺得營養係豐富d既....其實想買鯇魚,不過太遲去買已經無晒,咁就買番上次既沙孟啦~

今次我無之前整得d魚蓉咁碎,可以見到一塊塊小魚肉,而囡囡都食得好好~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~

0518的晚餐 ~ 黑椒脆皮腸餃子冷麪

今晚老公約左朋友食飯,又係一個人的晚餐時間,即係可以煮d老公唔好而我又想食既野最好時機勒~

今日天氣好熱,所以就諗起食屋企擺左好耐既冷麪....再加上廚房既物資 - 餃子同黑椒脆皮腸,咁就完成呢個豐富既晚餐~

每次煮冷麪我都會雪凍d餐具,所以真係夠凍架...加上日清冷麪汁,味道真係ok架~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~

《Angels & Demons》 @ 德福MCL

嘩,真係好耐都無入戲院睇戲啦,上一次應該係去睇Bedtime Stories,仲要個日係我地兩公婆都請左病假,病住咁去睇既,原來已經係1月既事黎啦~

因為我手上仲有2張MCL既禮卷,5月尾就到期啦...所以又係時候諗下用唔用到,唔係又要送俾阿媽阿爸用架啦~

終於吳爸爸呢個星期短週,就決定今日星期六送囡囡番嬰園,我地就去睇戲用左張贈卷啦~雖然用贈卷睇早場係好愚蠢既做法,因為早場價錢一向都有優惠,不過總好過用唔到張贈卷啦~

最近既MCL係德福,本來想睇翻生侏羅館2既,不過得TKO MCL上左,咁就改左睇Angels & Damons勒~

我覺得幾好睇喎,雖然有人話d密碼太簡單,不過我覺得ok呀,唔使搞到咁複雜既(不過我係無睇達文西密碼,所以無從比較)....套戲少不免提到天主教既野,我問身為教徒既吳爸爸有無覺得反感,佢話無因為片中提到既歷史係事實~

而並無任何宗教信仰既我亦無因為睇左呢套片而影響我對天主教既觀感,我還是一樣的尊重...講真,如果要我真的去信一個宗教,天主教會是我的首選~只是,我覺得自己還未去到那一步,就像片中Tom Hank被問到是否相信神時一樣,他的回答正正就是我的心聲,我對那一幕非常深刻~而最後那主教說的一番話大意是"宗教有缺點,因為人有缺點"也令我有點共鳴~

總之我好開心可以同老公去戲院睇番場戲....睇完又急急腳去接囡囡放學lu,短短的二人世界時間要好好珍惜....相信未來要去戲院睇戲都要咁樣安排先得勒~

0515的晚餐 ~ 芝士焗腸仔菠菜意粉

星期五又係我去接囡囡放學既日子,所以又無手去買餸勒~

於是今晚只係用廚房物資煮晚餐,咁最簡單都係煮意粉....就係咁芝士焗腸仔菠菜意粉就誕生左啦~

不過我今晚只係煮左好少白汁,所以比較乾身...應該多d汁會好味d,不過老公又話ok喎...梗係啦,我就係知唔夠汁,所以將大部份既汁都俾左佢個份呀麻,佢梗係話唔多覺啦~

平時如果煎芝士腸,煎得耐係會爆既...原來焗既話係唔會有呢個問題,老公仲話焗到個皮好脆添~

今餐如果計番成本既話就廿蚊左右啦,非常經濟呢~

*************************************************************

溫馨提示:

吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~