升做Lead Poctor

我已經當了CFA監考員好幾年了,終於今年我升做Lead Poctor啦!

因為第一次做Lead Poctor,考試局安排了一個比較少考生的section給我,只有40人!相對其他80人的section,我絕對是比較輕鬆的!可是跟我的3名監考員竟然只有1位出席,看看資料就知是年輕的一輩,真的太差了吧,竟然放飛機!!!如此情況根本找不到後備,向Chief Poctor反映,最後調了一位監考員給我,不過因為都是女的,如果有男考生要去洗手間還是要找隔鄰section的男poctor幫手,真麻煩!

而兩位監考員也是第一次監CFA,看來除了考生少一點外,這次做Lead Poctor也真的不輕鬆!不過做Lead Poctor除了外快比普通poctor多50%外,因為期間要填reports之類的工作,時間比較易過,也不會那麼容易打瞌睡...感覺較好!

午飯時兩位監考員也問我是不是教書的,她們說我實在太像老師了....是嗎?我真的很像老師嗎?是我比較撲素吧,哈哈~

急救證書

不知大家是否還記得我於農曆新年期間上了一星期的急救課程,今天終於收到考試的成績單!

筆試+心肺復蘇法實習+包紮實習=合格

3年期限的急救證書到手了,不過我好像已經把之前所學的忘記了大半,哈哈哈~

基本急救課程@醫療輔助隊

其實我的部門也有不少培訓課程供報讀,但在這裡工作了三年我真的不多參加...終於今次報了一個為期4天半的急救課程(有4天半不用回公司上班,哈哈),還要考試的啊!

其實報讀急救課程或多或少都因為囡囡,大家應該明白原因吧...只是我當然不想有應用的一天,但畢竟懂多一點是好的~

由於上課地點是何文田的醫療輔助隊總部,因此這天沒有把囡囡送到娘家照顧,改了給麻麻照顧(我是不太想的,但娘家真的很不順路!)

今天主要學心肺復蘇法,原來很花力氣的,而且第一次試真的有點混亂呢(還要在全班三十多人面前試)...但我還是得到導師的稱讚...看來我的學習能力並沒有衰退,哈哈!

是日的午餐去了吃四海遊龍的餃子,$24有8隻再加一碗麵,也算抵吃!

新上司

雖然我只是在這個部門工作了3年多,但是已經先後有2位Director退休...而我的直屬上司今天也調職了,新上司(我在這裡的第3位上司)也於是日上班...不知是否新官上任,今天就有突發大事要處理!(大家看新聞應該都看到很多有關報導!)

這位新上司看來也很平易近人(其實我覺得男上司多數對女下屬也很不錯的,哈哈),在工作如此嚴峻的時間,也不忘請我和同事吃午飯!

今天我們去了煌府飲茶,這裡的前身是君豪會,煌府是幾個月前才重新開幕...第一次來,翻新後光猛了很多,也明顯的是婚宴場地的佈置....點心原來也很不錯啊!怪不得新張不久已成為部門同事的飯堂!

吃飯期間,新上司很健談的和我們聊天....說著說著話題就轉到了小朋友身上,因為他看到我貼了很多囡囡的相片在座位旁,哈哈~

原來新上司也有個9歲的兒子,還說當年他湊仔也有一手呢....之後更問我聽過某某兒童心理學家沒有?(我忘記了名字)...他說這位學家很有名,每次開講座都很快滿額...但我真的沒有聽過啊!上司說他有一套這學家的理論,還說要借我呢....沒想到這位新上司那麼好,知道我放工後要照顧囡囡還說很辛苦呢...看來他應該不會對我準時下班的行為不滿吧,哈哈~

p.s.是日本來有2張免費優先場,9:30pm去德福MCL看《星級拍檔》...不過因為找不到人照顧囡囡(我不想找奶奶),而且德福又不近吳家,所以將戲票送了給朋友~

突然而來的外快

原本11月中收到考試局的邀請信當12月初的CFA考試監考員,這是我每半年一次的外快工作,當然立即回覆...但是遲遲也收不到確認信,最後忍不住打去問一下....原來今年報考人數少了一千多名,所以監考員也不用那麼多,聽說少請了百多人...而我沒有被抽中,所以收不到通知...但那職員很好的叫我留下資料,有需要時會找我補上~

本來已經將原留給監考工作的星期天變回放假的日子,但想不到在考試前的4天收到考試局的電話,說想找我幫忙....那當然非常好啦,監一天試能有4位數的報酬,可以幫補一下我的東京之旅旅費....即晚就去聽試前briefing了!

想不到的是另外也找我幫忙監考TOEFL,還要是兩個星期六的早上呢....真好,難得有外快機會...雖然辛苦,但我還是不想錯過!

今天老公長週,囡囡回嬰園,而我就去了監考....下午回復天輪之樂時間,外快工作沒有多大影響我們的親子日,so good!

3年‧加薪續約

今日是我在這工作崗位的3週年紀念,也是我工作生涯中最長的一份工~

我一向沒什麼事業心,初踏入社會大學的我還算不怕辛苦,肯學肯捱的...可是那時我卻很怕悶,很怕每天都是做相同的工作,一點新鮮感都沒有...所以那時的我常常轉工,每一份工大多做一年半載就會嫌悶....但又真的給我找到更好!

之後因為籌備結婚,所以那時期的工作崗位雖然做得很辛苦又很不開心,卻還是捱下去,因此那份工我做了2年多(因為籌備結婚也用了年多的時間),是現在這份工前做得最久的一份...一結了婚我就密謀轉工,很幸運地去完honeymoon不久就有好消息~

由於新工作是project base,所以其實沒什麼保障,那時的我只想盡快離開工作了2年多的地方....新工作做了大半年,某一天突然收到了現職的offer,因為我在waiting list而剛巧現職的同事要離開,雖然人工少了一點點,但起碼是份2年的合約,又會續約的...結果我還是轉了~

這份工作我算是喜愛,因為久不久會有新項目展開,但只辛苦很短的時間就看到工作成果,感覺良好,而且也沒有太複雜的人事關係...本來2年合約到期時,我也有考慮轉工的,但剛巧那時是我的產假,所以有想過完了產假才辭職的...不過最後一動不如一靜,加上續約加薪可觀,而且做了媽媽後真的對準時下班這要求很看重,難得這份工作九成時間都可以準時放工,所以還是繼續做下去了~

想不到1年合約期又到,又是續約的時間....今年依然有加薪啊,雖然沒有上年的可觀,不過有5.5%的4位數字還是值得高興的...但知道上司將會短期內調職,不知新來的一位新上司如何,最重要是一定要維持準時下班啊!

----------------------------------------------------------------------

P.S.大家可以到以下網址幫忙投ABBY一票嗎?(P.4,第二行第二個),謝謝!

http://www.threesixtyhk.com/babyphoto/votingForm.php?lang=en&page=37

P.P.S. 還有另一個活動幫忙投ABBY一票啊!謝謝!

http://www.baby-kingdom.com/customer/kodak/minisite0906/kodak_bigphoto.php?id=168

3年

星期日我又去左機場博覽館監考CFA勒...呢個係我每半年既外快工作,只做一日就有近4位數落袋架啦(仲包左你既午飯添)~

話時話,數一數,原來我已經監左呢個試3年....仲長情過做正職,哈哈~

今年我終於唔使做門口既check in崗位,不過也因為咁而第一次無撞到朋友~

雖然監考工作都係行行企企,但係經過接近10小時既行行企企,都唔好話唔辛苦~

番到屋企直頭好似做完劇烈運動咁,超疲累....

唔知係咪不再年青,好似覺得比以前辛苦咁啊~

 

令人失望的大學生

公司又係時候推出暑期實習計劃,老闆好似上年咁要求請2位暑期工幫手~~

人事部俾左份申請名單老闆,最後同事幫手約左9位同學仔黎面試~~

好啦,面試當日有人打黎話有其他offer唔黎啦,ok無問題,都算有交帶....跟住又有個打黎話趕唔切約定時間想改期,因為我地只會安排一日,所以我就話唔可以改第2日,咁佢話改晏d得唔得,咁我就話要問下先可以覆佢...點知佢話佢要聽talk會熄電話喎(點解要去聽talk之前同事約佢既時間唔講呀?),咁我只有話盡快覆佢啦...最後老闆話ok,咁就改左佢5點鐘黎in~~

終於到左開board時間,但係一個都未到喎,老闆話入房先,我話仲未有人黎喎...大家只有概嘆時下既大學生既時間觀念...等呀等,30分鐘過去依然無人黎到,於是就打電話問下啦...第一位無人聽去左留言,第二位話蕩失路,宜家係附近黎緊...唉,點解唔check清楚早d黎搵地方,搵唔到都好應該打過電話黎問下呀~~

終於有人準時到勒,呢位男同學仔好搞笑,係我引領個段路,佢同我講"我好緊張呀"...哈哈,真係初出茅廬勒,點會同我講d咁既野架,我唯有安慰佢話放鬆d就得架啦~~呢位同學仔誠意可嘉,可惜答問題唔識避重就輕,講晒自己d缺點出黎,睇黎佢應該去上下教面試技巧既course...in完我帶佢走,佢又問我"我in成點呀?"...哎呀,叫我點答佢好呢,我唯有笑笑口話ok啦~

遲到個位終於到左,不過佢竟然著T_shirt牛仔褲,雖然呢份係暑期工,唔一定要著套suit黎in,但係只少都應該斯斯文文,點會著到咁架...更何況佢竟然係中大既學生令我超失望,不過佢既對答係所有面試者之中最好,英文亦係最出色既一位,最後老闆都將佢排係第2位~~

另一位中大同學外表本來幾令人喜愛,但係佢既表現根本唔似中大人,每個問題佢只係答3至4個字,仲要超細聲,個幾隻字又唔make sence,根本就係答非所問,問到老闆唯有轉番中文同佢in,我懷疑點解中大會收左呢個學生呢?

另一位city男同學雖然就染左一頭金髮,不過表現淡定,我同老闆一致應為佢係咁多位之中最好表現既一位,順理成章佢排左第一位啦~

仲有一位女同學,好明顯佢既答案係背既,不過都叫有準備下呀,起碼有d誠意,穩穩陣陣...呢位排左第3位~~

跟住又有一個遲到,我又打去問下啦,點知佢話唔黎in喎...有無搞錯呀,唔黎又唔講聲,離晒譜~~而改左時間個位又再打黎問可唔可以改期,我之前咪答左lor,又問過,我最後就叫佢即刻決定,當然佢就話唔黎啦~~真係麻鬼煩,叫你黎面試好似求你咁,唔係1,2個既問題,係整體咁多個都有問題喎...呢d大學生其實點請得落手呀?

大肚監考員

我雖然頂住個肚,不過都依然決定去做CFA既監考員,無法啦,除左要好似某超市廣告咁慳得一蚊得一蚊之外,我都要賺得一蚊得一蚊,當係幫補下d奶粉錢都好呀~~

我諗都應該無咩大肚婆會做監考員,現場所見,我只係見到一位大肚既考生咋~不過我著左件螢光既監考背心就遮晒我個肚,d人都唔知我係一個大肚婆~~

今日有見到邊個我識既人既,就係老公既姐夫,我細妹既男友,兩個大學師弟,仲有一位大學同學...而且我既大學同學仲係坐係我監個組添喎,考完晒我地仲一齊去搭機鐵,順便傾下近況,因為自從係我既婚宴見過佢之後都無約過出黎啦...今日見到仲唔傾都夠~

不過話時話,今日既機鐵好多人,無論係我一早搭去淨係搭番屋企都無人讓坐,雖然我都唔係好恨有人讓坐個隻,不過話晒呢班車既乘客係CFA既考生,都算係有學識既一群,但係唔讓坐不特止,仲同我呢個大肚婆爭位坐,禮讓個位係我喎,咩世界呀~

就算俾你考到做到專業人士,咁樣既人格質素都唔方可以有咩作為啦~

另類聖誕禮物

其實月初已經收到消息,那位與我不咬絃的同事會調走呢...對我來說簡直是一個天大的喜訊,也算是一份聖誕禮物啊~

不過我也擔心調來的一位不一定與我夾得來...17號就已經生效了~~

雖然已經對調了,不過這陣子那位舊同事依然天天上來教導新同事...但是我的感覺已經好多了,起碼我可以每天早上以愉快的心情說聲早~

還記得舊同事在我部門上班的最後一天依然和GR吵架,回來一貫的打電話同人講,一句十分經典的對白給我聽到了 - 「我是不會做多工作的」...勁啊,實在不得不佩服她的工作態度...我真的恐怕她會將這些傳授給新調來的同事

調來的同事原是在會計部的,一個要十分小心跟足程序做的工作,聽聞舊同事覺得十分困難,而且亂按程序而出錯....希望會計部同事不會像我般吃盡苦頭就是了~~

我工作的部門只得3人,所以是不會有聖誕聯歡派對的,不過昨天老闆也抽出時間請我和新舊同事吃午飯當是聖誕聯歡呢~~不過因為老闆要趕回來工作,所以也只是去了展貿13樓的洋紫荊餐廳~

還看新同事是否夾得來吧~

新穎監考方式

今日又答應左去監考(無法啦,聖誕消費月係要搵多d外快幫補下)...不過今次既監考方式我從未試過既~~就係用電腦考TOEFL試勒...今次既試場係荔景新運作既考試局評核中心,港鐵有個獨立C出口寫明去考試局架,幾威~~

今次真係大開眼界呀,首先要幫每一位考生用電腦check in以便分配那一台電腦給他考試,還要即席給考生照相傳送到他用作考試的電腦呢~~

而我的工作就是帶領考生到被分配的電腦,然後幫他log in進入考試系統,考生就可以開始考試...由於要逐一安排,所以每位考生的開考與完結時間都不同,電腦會自動計時的了~~

先考listening(每位都有head phone同mic,坐滿晒考生時,試場好似個call center呢),再考reading...之後有10分鐘break,此時我就要幫考生收回及更換草稿紙,以及幫考生再次log in進入第二部份考試~~這部份就是speaking和writing~~

speaking:竟然連oral都可以用電腦考,真係好先進呀~~當不同考生都好投入咁講緊英文既時間,我覺得個場面好好笑~~不過對住電腦講感覺無對住真人咁驚喎,應該可以流利d呢~~而且新一代一定要打字打得快啦,唔係邊夠時間做writing呢~~完成就走得架啦~~

我監個試場總共有100個位,不過點都會留番幾個吉位既,不過都9成滿架...我地用左1個鐘先check in晒所有考生呢~~

唔係監考,我都唔知宜家考試既模式已經發展至呢個地步,真係與時並進呢~~不過我覺得咁留心睇住個mon,隻眼就會好攰lor~~

無望的面試

今日有個面試喎,所以請左一日補假~~

可能太耐無interview過啦,都幾緊張呢~~我對自己既表現只覺一般,其中一條problem solving問題俾主席challenge呢....唉,答得唔好呀~~

算啦,都係平常心啦~~況且又話我個CRE有問題喎,要我白白係出面坐左成20分鐘先in得,睇黎都係玩我多架啦~~又唔係未做過呢個post,就算考唔到我又唔會好失望既~~

本來諗住有時間去買餸煮晚飯,點知老公話99叫我地今晚番去飲湯食飯喎...於是我就瞓左成個晏畫啦呢個晏覺比呢幾晚任何一晚都瞓得更好,可能所有野都搞點晒,可以舒舒服服咁休息下~~

宜家我既首要任務就係全程籌劃我既合家歡曼谷遊,邊個叫我係大家姐,註定要接受呢個吃力不討好既職位~~

工傷

終於一連2日既戶外嘉年華圓滿結束啦~~而我就受到嚴重既工傷

兩日既曝曬令我變左黑炭頭,睇下我隻手就知啦...帶裱既部份白幾多,好多人見到我都話黑左好多呀

慘啦,都唔知要做幾多次facial,用幾多美白才可以白番呢

點解呢d工傷無得賠架~~~

Written test of Economist

世事無絕對,脫離有關金融經濟行業已久既我今日竟然去參加Economist既考試~~

我都係抱住志在參予既心態去試試,如果o岩o岩畢業去考反而無咁驚添~~

入到試場竟然見到大學時系內極受歡迎既tutor - Demond呀佢係監考員呢~~話時話,上次同大學同學食飯先提起過呢位tutor,只知畢業時佢入左HKMA(金管局),原來佢宜家去左EABFU(經濟分析及方便營商處)~~

請Economist果然係唔同d既,份卷真係考Econ concept架喎~~6條問題要全答,限時2個鐘~~6條之中,有2條唔識,因為真係唔記得左啦(雖然我記得係學過,只要俾我睇番下就一定記得),另外個幾條應該無問題卦

等我以有限既記憶寫低番呢6條問題,或者仲有機會再考Economist既話就有past paper參考勒(份卷寫住係January 07架,我諗係番用既)

1. a) Explain briefly what meant by "mutiplier effect" in nation income. b) In small and open economy like Hong Kong, is the mutiplierbigger or smaller compare with the big economy like U.S. c) If the mutiplier of infrausture spending in Hong Kong is 0.7, what is the effect of GDP if spending extra $100mn in infrausture.(11 marks)

2. a) China consumer price VS China consumer price inflation b) China consumer price VS HK price inflation c) Why it is possible if China conusmer price increase, the U.S. price level continous be lower. (18 marks)

3. a) Explain briefly on the layman's term of "Type I" and "Type II" error in decision making. b) Explain briefly on the similarity and different in coorelation and causel relationship for time profile of two economic variable. c) "Weaker US dolloar make oil price increase from $70 to $71" Use concept "b" to justify this statement and use concept "a" to explain the wrong expectation. (20 marks)

4. a) Note the diagram and indicate the 3 key observation. b)Why the rate of increase of employment earning of "All Worker" is higher than each catergory of education breakdown. (17 marks)

5. Please explain what economic effect if statuorary minimium wage for lower income worker applied.(16 marks)

6. "香港對國內的經濟地位及影響下跌,此情況將會持續,前景並不樂觀"請評論及提供理據。(18 marks)

就係上面呢6條啦(除左第6條用中文答,其他都用英文答),正確字眼當然有出入啦,不過大致上係咁既意思勒~~我就係唔識第1,3同埋4b勒~~其實我記得mutiplier effect好容易下架咋,不過突然之間問起真係唔記得晒~~而第3條呢,我對type I,type II error有少少印象,不過一向唔多用,所以真係唔記得勒~~4b又計唔到喎...oh,d野俾番晒老師lu...不過我諗未至於唔合格既,我見周圍d人交卷都好多空白左,睇黎大家都係唔識呢幾題架啦~~

你又識唔識答呢....如果識既話,你記住下次一定要去考Economist啦(不過剛畢業既就唔得啦,因為要5年以上工作經驗先申請得架)

 

 

不和升級

點解有d人係要人發火先會收斂一下行為既呢

個位廢到唔恨既友仔(請容許我用一些比較粗鄙既形容詞去稱呼呢位ACO),今日中秋節竟然要我大動肝火

上年搞嘉年華,個二百幾封信根本就唔係我負責...自從同呢條友仔唔妥之後,我都費事搵佢幫手做野,琴日我已經自行搞點個二百幾封信~~之但係得我一個人搞咁大既嘉年華,真係唔得閒再將d時間用黎打信同印信(雖然d信係由director逐封簽),老闆亦有睇到我忙既程度同佢不相伯仲...於是琴晚我忍唔住要求老闆將呢二百幾封信既address label交俾個條友仔做,老闆一口答應~~

講真,我絕對覺得呢d工作應該由clerial既同事做,只係老闆唔得閒理同分配...而且個位人兄又唔係忙,日日係度搞自己既私事(唔係講裝修就係收傢私),再唔係就係度煲電話粥...俾d野佢做有咩問題呀~~

今朝一早老闆就同佢講叫佢幫手整label,聽到佢既語氣唔多好架啦,不過老闆叫到佢當然答應啦~~隨後老闆就去開會,大家應該估到呢條友仔有咩行動啦...無錯,咪就係打電話同人講我壞話lor~~

本來我都習以為常架啦,不過我真係忙到好"炆",仲要俾佢講我既壞話係度騒擾喎...大大聲話我唔早d準備名單,做唔切就拋俾佢做....嘩,激到我呀~~佢唔知個名單已經來來回回搞左幾個星期老闆先批就唔好係度話我無做野啦...又話個名單用唔到合併列印,唔整個excel~~呢樣野我都想話佢呀,個名單係用上年個份去更新既,而上年份softcopy咪就係佢負責架lor,就係因為用唔到合併列印搞到我要逐封剪貼印個二百幾封信出黎呀

我既包容程度有限,容忍指數已經超標...等佢收線我就起身鬧佢勒(我真係鬧佢架)

我都有多謝佢幫忙,不過我話份名單係用上年既softcopy做,唔係我既問題唔用excel~而且份名單幾星期前已經更新緊,唔係今日先做而推俾佢~我話佢唔知就唔好亂講,而且唔該佢唔好係我面前講我壞話,我係完全聽到架~~

佢既回應竟然係話我做咩偷聽佢講電話...哈哈,佢既回應真好笑勒~我答佢你講咁大聲,我行去你個位唔使3步,難道你覺得我會聽唔到咩??

佢又話上年佢做既野唔代表係佢負責...佢呢句真係金句呀,唔通番工時間搞自己既私事先係佢既真正工作,咁當然我無駁佢啦(佢咁既概念點駁呀)

最後我話佢呢個係當事人面前講人壞話既行為係一個無人格既行為,敬希自重~~就唔再理佢勒~

講真,佢要講咩我都無權理,佢鐘意係佢朋友面前講到我點衰都無所謂,之不過要講亦唔係工作時間講,仲要係我面前講,你無野呀唔好以為我唔出聲就係怕你喎~我去csb投訴你都仲得呀!

經此口角佢收斂左少少,不過依然有係電話同佢朋友講"我同你講電話俾人鬧呀!"...頂~呢條友仔可唔可以尊重下自己,尊重下人地架~~

中秋節既氣氛就咁俾佢破壞晒,真激氣

認同感

2位暑期工妹妹為我呢2個月既工作帶來不少生氣(是生氣盎然的生氣啊)

本來我們只是聘請1位暑期工的,不過老闆見合心水又多野做,所以申請請多位...本來後來批准的空缺我是支持一位CU的男生,不過老闆都是喜歡女生多一點,結果就依老闆請了2位HKU的女生了~~

她們真是幫了我很多的忙,分擔了我不少繁重的工作,工作態度也是一流的~~最重要的是可以和我傾下計呢~~又有好多零食分享,真係開心好多架~~

今日請佢地食晏時都有問及她們對這份暑期工的感受,估不到她們也感覺到那位ACO的為人如何~~這是有點令我意外的,因為我眼見ACO對她們也不錯,常常請她們飲野,有講有笑呢~~

有人認同我的感覺實在很開心,於是我終於可以滔滔不絕向她們訴說我的遭遇,她們也有告訴我她們的事件,真的估不到那個ACO連暑期工都一樣卸責

下星期辦公室又回復死寂,我想我會十分掛念和她們一起工作的日子~~

真的很不爽啊

基本上現在的我工作上是個獨行俠,這樣也無不可,如其要和那個令人厭惡的ACO合作,我寧願大家各自為政好了~~

可是每天我也要被逼聽著她用電話來說我的是非,真的令我很不爽啊雖然她明顯的壓低了聲調,可是她每一句話也走進我的耳裡~~雖然我不太在乎她對我的評價,然而每天都要聽著這些關於自己的是非,心中難免覺得不舒服...可是我卻做不出像她那樣在當事人旁和別人竊竊私語地說三道四,而且我那有朋友這麼多時間可以在辦公時間與我討論是非呢

就算在平常和朋友聚會時的聊天時間,我也不欲將話題轉到這麼一個無關痛癢又令人討厭的同事身上~可是每天聽著聽著也實在要把這口屈結舒緩一下,那麼我唯有在這裡用文字表達出來吧~~

我不知道我的前任同事是否和她很夾得來,只知道她常常對人家說我和前任同事的差別...什麼前任同事會幫她處理些難題而我不會(當然不會啦,我這麼做不是自討沒趣嗎,要怪就怪她一開始怎樣對我吧,我是記仇的啊~事不關己,己不勞心也是從她身上學會的呢~~)

我真的很想送這一句說話給她~「要別人怎樣對待你,請想一想自己怎樣對待別人」

雖然和她不投契,但是每天上班時經過她的坐位,我還是會禮貌的說聲早晨,只是經過幾星期對著空氣自言自語,我覺得再沒有必要做下去,不然我會覺得自己是個傻子~~所以你可以說我對這位同事連基本禮貌也沒有,可是卻是她自己一手做成的~~

什麼時候我的耳根才能清靜呢

 

很勞累的監考工作

昨天就是CFA的監考日子,清晨6時就要爬起床了,幸好吳家極近九龍地鐵站,所以乘坐機場快線入博覽館只需大約半小時的車程...不過班次不多,要查定班次時間呢~~今次是第2次坐機場快線,要不是因為對CFA的考生或監考員有優惠($42來回),相信也不會再搭呢~~

今年我又被安排做Check-in了,一如往年講到口水乾又企到想死呢,不過又給我看見大學師兄師妹,仲有細妹呢~~今年又是我核對考生的身份,竟給我發現真的有人姓名用上發達兩字,這樣的名字不太好吧~~

考試分開一個個section,每個section大約100人左右....竟然有一個section只有3位考生來應考,嘩,那個section的監考員一定做得很輕鬆了~~午膳時間又因為一些section效率慢而減少了,半小時的午膳時間實在不太足夠呢~~終於5點4左右完成所有工作,可以放工了...不過我就想同細妹一齊走,不過佢個section放最遲,所以等左佢好耐呢...而且考生太多迫爆左機鐵,所以搞左好耐先上到車呀,仲要無位坐...好辛苦呀~~

今日仲要番工無得休息下...我好想

又係搵外快既時候

今年6月又可以去做CFA既監考員,又可以為北海道之旅幫補一下~~

今次考場定左係機場博覽館,噢,路途好遙遠喎~~不過開左咁耐都未去過,就去見識下啦~~

好在都有交通津貼,咁都無咁傷~~

今日下晝就要去上training briefing啦...雖然只係2個鐘,不過就咁無左個下午啦~~

 

為自己平反

今日我終於忍唔住同老闆一五一十咁講清楚我同另一位同事既問題,令我有呢個行動既導火線係咁既~

有一個其他部門既同事想製作類似我地部門出既folder,所以搵我幫佢手想要個spec.黎做參考...我地部門既folder係我入職時已經存在,我唯有睇下舊既檔案有無資料,睇晒係我地間房既舊檔都搵唔到...我唯有打俾前老闆問啦(新老闆同我一樣點會知呀,另一位同事問佢只會自討沒趣,所以最直接既方法就係問舊老闆,佢咩都記得架麻)....舊老闆都忘記左幾時整(我諗真係整左好耐),不過就講左係邊間公司幫我地整...咁都好,我就打俾間公司諗住叫佢地俾番個spec.我地啦,點知佢地check完話無呢個record喎...咁我都無辦法,於是覆番個同事話幫佢唔到,不過我都搵左幾間會整folder公司既資料俾佢,等佢聯絡叫d公司send個spec.俾佢參考啦,本來應該告一段落架啦~

點知位同事打俾我個同事問同一個問題,我知佢都想多個搵到既機會...位同事收到電話就俾說話我聽,好大聲講話呢d野係我跟既,應該搵我(我相信對方應該同佢講話已經搵左我,不過無成果)~~同事再提高聲線答:佢做左幾個月啦喎(我諗對方應該係話我新,唔熟資料啦),再講:咁我幫你再睇下啦,其實都係睇同一樣既舊檔搵,就睇下大家思路同唔同,搵既野一唔一樣啦(我聽在耳裡覺得佢係話我做唔到野lor,哼,我心諗你咁叻咪搵出黎lor),就咁佢同對方既對話就收線啦...點知更令人發怒既說話在後頭

佢唔知打俾邊個啦,跟住都幾大聲講話"佢又卸d野俾我做啦....痴線架~"(我相信佢應該知我會聽到)~~

嘩,我聽到呢到火都黎埋啦,我邊敢卸野俾你老人家做呀~~就係呢一刻,我覺得我唔可以坐係度繼續忍,我決定放工之後同老闆講(我估計佢一定會同老闆投訴我卸野俾佢做,如果俾佢搵到資料既話,仲會踩多我兩腳添)...於是佢咪不斷係度搵檔案睇,最後當然無功而還啦...不過佢仲call唔知邊到再要d仲舊既檔案(我覺得佢係想證明自己一定會搵到,我實在無時間搵得咁舊,而且我亦唔知可以再call更舊既黎睇)

放工啦,我等佢走左就去搵老闆傾啦...呵呵,真相大白啦,原來有人告狀先...老闆話其實佢上次問我同佢既溝通問題係因為佢寫左一大篇email俾老闆,老闆仲印左出黎俾我睇添~~可能個位同事既心目中,我都係一樣咁衰,成日"卸野"俾佢做...點都好,我原原本本將我受到既對待講左俾老闆知,我唔知老闆信唔信我所講既,不過我只係要求我想維持番寫紙仔或者電郵既溝通方式,因為我真係唔想睇人面色(佢又唔係老闆,只不過係ACO咋)...同埋表明今日既事件我完全無叫同事搵佢幫手查野,我仲同老闆講我預計佢之後同你講既版本係點~

老闆同我講話俾多2個星期時間再睇下情況,因為同事屋企發生左d事(老闆都有講俾我知係咩事,咁當然我會當無聽過啦),可能影響左佢既情緒...雖然我覺得佢既不禮貌並唔係呢排先係咁,不過我都唯有勉強自己多2個星期啦~~

好彩我決定同老闆講咋,好人真係唔做得...況且佢都當我衰人架啦,睇佢係俾老闆封email寫話樂意幫助我,真係不禁失笑...原來"呢d唔係我負責架喎"、"你自己睇file啦"、"我唔識架喎"係幫助我既說話黎既,真係佩服佩服,小妹果然係咁拜下風