高登驗眼記

其實我已經想換眼鏡很久了,因為覺得遠看東西時有點蒙,數一數我現在的眼鏡也帶了7年啦,上年講到今年還沒有行動呢~~

前陣子看到高登眼鏡專門店用HSBC卡有折扣,最高達50%呢...其實已經和老公逛了兩遍,不過有老公在旁總是不能選定款式...今天可以自己一個行街街,終於給我物色到合心水的眼鏡了...而且還是半價呢~~

配眼鏡當然要驗眼啦,原來7年間我不過是加深了25度近視,視光師話我保養的不錯...原來現在還有驗青光眼的環節,我還是頭一次知道呢...會有些風直接吹向我的眼球,視光師話如果指數高於21就有危險,他說我現在的指數是16,很不錯呢~~

看來我的一雙靈魂之窗也還保養的不錯下星期五就可以拿新眼鏡了,可以帶著它去北海道呢

婚紗展的收獲

哈哈哈,結了婚的我又去婚紗展了...為的就是好彩酒樓集團的$100現金卷

因為收到婚展的免費入場卷,所以我又在想會不會有時間去拿那些現金卷~~今天老公約了同事回家打麻雀和玩Wii,所以只有我一個去中環兌日元...那麼我就順便去會展行一圈吧,還有一樽Black Coffee送呢....目標清晰的我只花了15分鐘就完成任務...那麼我又可以和老公去彩雲軒食晚飯了

我愛叮叮

叮叮 ~  電車的別稱是也(因為電車的腳掣會發出叮叮聲)

叮叮 =  我最有感情的交通工具

成為吳太前,我一直住在港島區...雖然我已經轉投九龍的懷抱,不過比較起來我還是愛住港島區多點,而且唯有這裡才能乘搭我鐘愛的叮叮

叮叮滿載著我對小時候的回憶 ~ 小時候我家環境並不好,麥當當的魚柳飽是我每年的生日蛋糕呢,很珍貴的食物啊~~平常也沒有什麼活動,最深印象的活動是晚上9點左右媽媽帶我們去遊電車河,我們會乘電車入跑馬地吃粥做宵夜...這時間的電車不多人,在上層看著五光十色的街燈,加上迎面吹來涼風,很是舒服~~加上可以吃到美味的宵夜,所以是我家三姊妹小時候最愛的活動,可是媽媽卻不常帶我們去,可能就是愈罕有愈珍貴,所以至今也沒有忘記~~

讀書時,放學後就會和同學坐叮叮回家,因為它的費用便宜(那時身為學生的我好像只是5毫子車資),而且不太快的車速可以與同學有多些時間談天說地...是一個很歡樂的時光

到出來工作我還是會搭叮叮返工的,因為要慳錢麻,現在的車資也不過是兩個大洋~~不趕時間的時候我也愛坐它,最愛找上層窗口旁的坐位,慢慢的坐到目的地真的感覺很好~~

除了些美好回憶,當然也有令人不開心的回憶,就好像小時候給人非禮,那一次的事我還歷歷在目呢,幸好沒有對我有不良影響~~

叮叮不像其他交通工具那麼侷促,感覺上看到的人生百態也比其他的多...自結婚後已經很少機會搭叮叮了,今天獨自在中環完成任務後突然想搭叮叮到灣仔,感覺很不錯啊

如果你在港島,不趕時間又適逢非繁忙時候,那麼不妨坐上叮叮,感受一下那獨特的電車旅程

 

北海道の初夏物語 ~ 前言(兌換篇)

仲有2個星期就出發去北海道啦

平日要返工無時間去銀行,只有星期六先可以去兌日元~~本來上個星期已經想去兌架啦(不過因為貪睡趕唔切)因為匯率跌左好多,之前有朋友3月尾去北海道匯率成0.067,佢話我地宜家呢個時間兌日元俾佢個時抵好多,不過就叫我快d換,佢話應該差唔多係時候回升喎~~

以前我都係去銀行兌換外幣去旅行,不過唔知幾時開始(只少都3,4年前)我就轉左去中環《百年找換有限公司》兌換外幣~~貪佢匯率比銀行好而且免收手續費,仲可以打電話落定order晏少少至去拎~~好似今日咁,老公10點幾打去落order,我成點幾先去拎呢,如果呢個時間去銀行既話就要食閉門羹了

呢個星期日日都睇住個匯率,估唔到今日係呢個星期最抵既匯率:0.0642

~~唔知仲會唔會再低呢不過我下個星期六又答應左去監個樂理考試,所以今日點都要去兌架啦~~

我兌左成廿幾萬日元呀~~哈哈哈,唔知夠唔夠洗呢~~如果洗晒都唔怕既,可以簽信用卡架麻,一卡傍身就世界通行~~

0601的晚餐 ~ 日式金菇咖哩烏冬併雞扒豬肉腸

之前係sogo掃既食物今日就派上用場啦~~今日既天氣好似係入夏以來最高溫既一日,加上我同老公又要打新game,又要睇溏心大結局,咁多因素之下咪整d方便食物lor~~

老公食左d烏冬之後問我今日既烏冬點解好似同平時既唔同...梗係啦,個烏冬就算特價左都要成十幾蚊包架(2人份),我都覺得d烏冬食落比平時買既滑,咖哩湯底一貫日式既味道,就係唔辣啦,不過就係好香濃既咖哩味...我同老公都幾鐘意個味道~~

老公試勻晒幾款珍寶腸之後,佢話最鐘意都係芝士味喎...其實其他都好好味,不過對於我地兩個芝士迷黎講,都係鐘情芝士腸多d

不過今日放工之時見到久違了的藍天白雲,好耐無見過香港個天藍得咁靚啦,所以想影低佢...如果d空氣可以清新d就好啦...係條街到真係吸左好多廢氣