0610的晚餐 ~ 芝士焗肉醬意粉、可樂雞翼

星期六去左監一個5級樂理試,夜晚同老公既教會朋友去左旺角既Neways City唱K-buffet,估唔到食物種類比預期既多,味道亦比預期既好,7點唱到10點,每人$130,價錢都叫合理~~

今日一早天氣就唔好,雨下個不停,而我又被神經痛所煎熬...痛到唔願起身~~所以老公晏畫就自己煮野食...但係6月先剛開始就支出左好多啦,所以我都係想煮下野食做晚餐,慳番d留番旅行使呢~最後就煮左

芝士焗肉醬意粉:用上日清既意粉醬,我加左肉碎,豐富好多呢~~

可樂雞翼:第一次整架咋,味道都ok啦...不過用汽水煮餸,我個人就麻麻地鐘意~

彩雲軒

今日係happy friday,就提早放自己一日假,唔使做煮飯婆,出去同老公食餐好架啦~~

上星期拎左好彩集團既現金卷,今日順理成章當然係去新港中心既彩雲軒食飯啦~我地兩口子叫左好多野食呢~~

雞腳豬骨煲海螺頭$68:一向都好鐘意飲彩雲軒既老火湯,真係鮮甜好味架,就連老公都讚不絕口~~

重慶口水雞$28:老公點既冷盆前菜,好惹味呢...不過就太多雞皮,太少雞肉啦

帶子賽磅蟹$58:我一向都係賽磅蟹既擁躉,好耐無食啦,有得食好滿足,不過拌食既醋味道淡了一些~

韭菜花炒燒腩仔$42:呢味係俾老公食既,因為燒腩仔係佢既至愛...味道果然唔錯,對燒肉麻麻既我都覺得好味~

脆皮小棠菜$48:見到個餸名以為好多小棠菜既,不過其實小棠菜既成份唔多,但係脆口得黎都幾彈牙~

今日星期五仲會送份生果盆呢...真係超級完美既一餐,耐唔耐同老公去酒樓食豪d都幾開心,扣左現金劵承惠$207...其實我地可以叫少一味餸唔過二百都夠飽,但係又忍唔住叫黎食,不過我地碟碟都食到美人照鏡架

Kesalan Patharan Cleaning Oil

呵呵呵,吳太又發揮搵著數本色勒

因為係海港城Faces既會員,所以收到Faces既宣傳電郵,而我睇中左KP既贈品就係有成60ml既Cleaning Oil啦~~60ml都真係唔算少架,免費送俾你喎,梗係要去換啦~~

不過佢仲會幫你化個妝呢...一定要化先可以拎架...今次化既淡妝都唔錯,而且又快手,15分鐘就完成啦...開開心心又拎左樽Cleaning Oil番屋企啦,yeah

0607的晚餐 ~ 粟米貢丸味噌拉麪

今日無去買餸,唔想煮飯,唔想出街又唔想叫外賣...於是就煮左好多即食野醫肚做晚餐,偷下懶咁啦

~~

個味噌拉麪係上次sogo大減價時買既,老公話呢隻麪真係好好味,麪條同平時食既公仔麪唔同,而且湯底又夠濃o岩晒老公口味...不過特價左其實都要$4包,如果平時係賣差唔多$8包架,咁貴我就一定唔會買~~

老公話係北海道買d番黎喎,我諗佢真係好鐘意食~~個辣味珍寶腸同午餐肉都係老公要求煮埋黎食架,真係大胃王~~不過我無開镬煎就咁放入焗爐,無油都一樣脆卜卜...全部都係肉,我唯有開罐粟米黎平衡下啦~~

食完老公就嚷著要打Mario Party啦...呢期我地成日對打呢,鬥得好激烈刺激架

0606的晚餐 ~ 白酒蜆肉汁燴天使麪

老公今日被老闆拉左出去食飯,所以個飯盒就要聽日先食到啦~~既然可以留少個飯盒,又煮左兩日飯,今日就決定煮西餐

上次係sogo買左勞太推介既洋蔥蜆肉汁,所以今晚打算煮黎試下~~今日我第一次去街市買新鮮既蜆,唔同size唔同價錢,最後我買左中size既蜆,買左一斤承惠$18~~

第一次煮蜆成績都唔錯,起碼無食到沙喎,哈哈~~99平時成日都整豉椒炒蜆俾老公食,老公番到屋企見到d蜆就問我係咪煮豉椒炒蜆俾佢食,我話今日煮西餐,所以唔係豉椒炒蜆,老公好似有d失望呢~~不過老公食落話我買既蜆比99買既靚,蜆肉夠大又夠厚喎~~

天使麪都係第一次煮,比意粉真係難掌握d喎,煮好黎食既時候覺得都係淋左少少,不過第一次煮都算合格~

至於味道呢,除左現成既洋蔥蜆肉汁,我另外用白酒同檸檬海鮮汁煮過d蜆,又落左少少忌廉同麪粉等個汁杰d...效果都唔錯,我覺得味道幾好,不過老公食慣濃味,所以係都要再落d蒜鹽,真係比佢激死~~