今日我全面發揮工作小宇宙,2點郵車到之前入晒二百幾封信同封口,上畫仲開左個會,所以晏都無食係咁衝...終於搞點晒d野,覆晒所有電郵,留言,今日總算唔使留堂勒~~至於個條友仔竟然索性請假喎,佢係得既~
放到工就梗係去買餸煮飯啦,雖然放工已經唔想諗煮咩,不過都總算有新菜式:
北海道牛奶薯仔雞煲:係北海道買左個白汁番黎,原來係好似朱古力咁一格格架...呢道用左半盒,再落d牛奶一齊煮,好味道喎~~不過半盒整出黎都好多汁,所以我留起左一半,或者聽日可以用黎煮意粉~
另外加多個麻婆豆腐啦,同個雞煲味道兩極化,不過水準依然保持得幾好,yummy~
飯後仲有無核青提子食呢,老公有住家飯食不知幾風騒
本來媽咪係定上星期五晚做節既,不過因為要奔喪,所以我就出席唔到~~所以改左正日做節~~
正日酒樓爆晒啦,所以阿媽改左去食越南野...太古城既東蜆越南軒~
今餐就係傾我地全家既旅行大計,10月尾去曼谷呀
負責是次行程者就係我啦,百忙之中我已經訂好左package啦...遲d補番篇blog講package詳情啦~~
不過要等我搞掂公司單野先可以詳細計劃行程,如果各位有曼谷書記住借黎睇睇呀(因為我d珍藏曼谷書借左俾老公個朋友之後就無回頭啦
今餐都唔係好貴,食物不過不失啦~~最重要都係同屋企人食o者
點解有d人係要人發火先會收斂一下行為既呢
個位廢到唔恨既友仔(請容許我用一些比較粗鄙既形容詞去稱呼呢位ACO),今日中秋節竟然要我大動肝火
上年搞嘉年華,個二百幾封信根本就唔係我負責...自從同呢條友仔唔妥之後,我都費事搵佢幫手做野,琴日我已經自行搞點個二百幾封信~~之但係得我一個人搞咁大既嘉年華,真係唔得閒再將d時間用黎打信同印信(雖然d信係由director逐封簽),老闆亦有睇到我忙既程度同佢不相伯仲...於是琴晚我忍唔住要求老闆將呢二百幾封信既address label交俾個條友仔做,老闆一口答應~~
講真,我絕對覺得呢d工作應該由clerial既同事做,只係老闆唔得閒理同分配...而且個位人兄又唔係忙,日日係度搞自己既私事(唔係講裝修就係收傢私),再唔係就係度煲電話粥...俾d野佢做有咩問題呀~~
今朝一早老闆就同佢講叫佢幫手整label,聽到佢既語氣唔多好架啦,不過老闆叫到佢當然答應啦~~隨後老闆就去開會,大家應該估到呢條友仔有咩行動啦...無錯,咪就係打電話同人講我壞話lor
本來我都習以為常架啦,不過我真係忙到好"炆",仲要俾佢講我既壞話係度騒擾喎...大大聲話我唔早d準備名單,做唔切就拋俾佢做....嘩,激到我呀~~佢唔知個名單已經來來回回搞左幾個星期老闆先批就唔好係度話我無做野啦...又話個名單用唔到合併列印,唔整個excel~~呢樣野我都想話佢呀,個名單係用上年個份去更新既,而上年份softcopy咪就係佢負責架lor,就係因為用唔到合併列印搞到我要逐封剪貼印個二百幾封信出黎呀
我既包容程度有限,容忍指數已經超標...等佢收線我就起身鬧佢勒(我真係鬧佢架
我都有多謝佢幫忙,不過我話份名單係用上年既softcopy做,唔係我既問題唔用excel~而且份名單幾星期前已經更新緊,唔係今日先做而推俾佢~我話佢唔知就唔好亂講,而且唔該佢唔好係我面前講我壞話,我係完全聽到架~~
佢既回應竟然係話我做咩偷聽佢講電話...哈哈,佢既回應真好笑勒~我答佢你講咁大聲,我行去你個位唔使3步,難道你覺得我會聽唔到咩??
佢又話上年佢做既野唔代表係佢負責...佢呢句真係金句呀,唔通番工時間搞自己既私事先係佢既真正工作,咁當然我無駁佢啦(佢咁既概念點駁呀)
最後我話佢呢個係當事人面前講人壞話既行為係一個無人格既行為,敬希自重~~就唔再理佢勒~
講真,佢要講咩我都無權理,佢鐘意係佢朋友面前講到我點衰都無所謂,之不過要講亦唔係工作時間講,仲要係我面前講,你無野呀
經此口角佢收斂左少少,不過依然有係電話同佢朋友講"我同你講電話俾人鬧呀!"...頂~呢條友仔可唔可以尊重下自己,尊重下人地架~~
中秋節既氣氛就咁俾佢破壞晒,真激氣
今日要出成2百幾封信,director又要執呢樣又要執個樣,仲有九萬幾樣野要覆人,無可奈何之下唯有OT啦...咁仲唔止,走得之時又遇上塞車,結果8點幾先番到屋企~~
我都已經買定少少餸係屋企諗住今日煮餐住家飯慶祝農曆結婚2週年,點知加班搞到我買唔到其他餸~~老公又打黎叫我唔好買...原來老公又襯我未番靜雞雞落廚煮飯,佢就係煮左我預先買既材料~
蒜茸炒菠菜:老公一向炒菜都唔錯架,只可惜最先煮好碟菜,所以食得之時已經凍晒~
煎豬扒雞扒:塊雞扒我本來打算切件煮既,老公就照一塊咁煎,不過都醃得唔錯~~而d豬扒就煎得乾左少少~
雜菜湯:罐頭貨色,不過老公落水既份量比我少,所以我就覺得味道太濃,不過佢就好鐘意~
炒公仔麪:老公唔鐘意食飯所以整左炒公仔麪,不過就連佢自己都覺得炒得太咸,好勉強先食得晒喎~雖然係咸,不過我唔知點解又接受到,仲好快就食晒成碟麪添...唔通充滿老公心意既晚餐真係令我連味覺都變得唔正常
老公既護膚品又差唔多用完啦,咁o岩呢幾日Origins係海港城有推廣活動,所以就同老公去入貨啦~~
Origins一向都無折扣既,一係就等聖誕買優惠套裝,一係就儲印花換現金優惠...好似今次既推廣活動真係唔多架~~除左幫老公補貨之外,因為冬天又就黎啦,所以順便買冬天用既護膚品~~
睇睇下,一口氣買左3款套裝,盛惠$2115,簡直失血過多啦~~不過除番2個人又除開最少3個月,價錢都ok既~~起碼今次都可以慳到大約四百蚊左右,算係唔錯架啦
呢期興環保袋,買一套就送一個,今次就俾左3個我呢...個款都ok架~~
