弊傢伙...搞大咗(Knocked Up)

我見前排openrice又有推廣咪係咁易出左一篇食評,點知咁都中左戲飛喎~

今次送既係星期四晚係奧海城既《弊傢伙...搞大咗》優先場,我同老公放左工都番左屋企先再出發去奧海城~因為有張$20現金卷,所以就去魚米家食晚餐,不過一d都唔好食,係個魚湯飲得下,其他野一律唔掂,下次有coupon都唔會再去~~

優先場內預留左後排中間個行俾vip,見到謝安琪(真人又好似無雜誌影得咁肥喎)同埋sunboyz steve個家姐(個樣超普通,係魚米家食野時都已經見到佢入黎架啦,不過無人有反應)

老公話套戲既片名用黎形容謝安琪就o岩晒啦

好多影評話套戲好好笑,不過我覺得好多都係d低級趣味,全片充斥住粗口對白,對我黎講真係聽得好"銀"耳...而且片中間又似乎拉得太長...所以我覺得麻麻地咋~~最難忘就係片尾真係影住女主角生bb,好得人驚呀

老公仲睇到縮埋一舊添呀~~

如果大家想去睇,不如等出碟先啦~~好在我今次係用贈卷咋~

東京誘惑

今日唔知係咪掛住做野連晏都無食,所以放工之時覺得頭暈暈又四肢無力咁喎~~老公知道叫我唔好去買餸,叫外賣食休息下~我見天色又唔多好仲落雨,所以都決定叫外賣算數~

食完飯盒醒起老公個同事係東京買左份手信,叫東京誘惑呢打開就見到個美女勒,你地睇下吸唔吸引~

再進一步解放,結果係...........wow~~

係2杯好軟滑既焦糖雞蛋布丁...好好味呢

日本人係得既,簡簡單單既布丁都包裝得咁誘人,佩服佩服~

Nokia N70

老公既手提已經神神地架啦,今日乃10月之始,吳家支出重新計算...所以就同老公去睇手機勒~

本來老公屬於自己台既0機價手提既,不過要轉一年貴plan,計落呢度都成千蚊唔係好抵~~晏畫係Elements間豐澤見到新張既手機優惠,所以係佐敦道睇唔o岩,食完車仔麪就去番Elements睇勒~

最後買左呢部Nokia N70,售價係$1980,較正價平左1千蚊呢~~而且新張開幕仲送左枝紅酒喎,真搞野~

買完手機就差唔多時間放煙花,於是我地就係Elements望海個邊既大窗睇煙花勒~~雖然有d反光,不過都睇得好清楚,有冷氣又唔迫人,睇得不知幾舒服

圓方Elements

吳家附近既大型商場《圓方Elements》今日終於開業啦~~我同老公期待左好耐架啦,等到頸都長晒,今日一早就決定去踩場~~就等我呢個特約記者為大家報導下啦(老公拎住部Nikon相機真係俾商場公關誤以為係記者呀,勁搞笑~)

對比Megabox開業時既宣傳,Elements明顯低調好多...我覺得咁樣仲好,唔使引晒d人黎湊熱鬧,淨係樓上幾個豪宅既住戶都夠照啦,遲d個2座辦公大樓都入埋伙就真係不愁無人流啦~

Elements既定位係走IFC路線,所以場內都係高檔商店,對我黎講其實就唔係太o岩既,不過我深信自己有做闊太既潛質,所以都應該會成日黎行架(齋行無損失)

我最在意既係場內既大型超市,之前極之希望係吉之島,可惜吉之島都係擠身唔到呢個級數既商場,最後入主既係主打賣有機食物既ThreeSixty~~不過我都會去幫襯既,畢竟佢都係最近吳家既大型超市~~

另一個令吳生吳太極有興趣既就係呢度既戲院勒 - The Grand Cinema (係屬於MCL既)~~比Megabox仲勁呀,因為唔止睇3D,係睇4D呢(最勁係有個音響系統配合震動座位的設備 , 比4D仲要勁喎 ?! 因為它能因應人耳聽不到的超低音頻產生震動 . 即係話架火車未到站 , 你就可以首先感受到震動喎,真係唔知真唔真)~~仲諗住今日去先睹為快睇場戲,點知原來未開張不過佢地收緊會員喎,今日仲免入會費添咁我同老公當然唔執輸,第一時間填表入會做The Citizen Grand,仲即日拎到會員卡添~~免會費就當然無入會迎新禮物送啦,不過會員生日月份有電影贈卷同爆谷卷送,平時買飛有9折,小食部有8折,屬於戲院既Cafe de Grand同埋Wild Ginger餐廳有9折,消費可以儲分換野,都幾好呀~

我問職員幾時開,佢話10月18日就有得做3D既The nightmate before christmax(怪誕城之夜),11月就會正式grand opening喎~~11月尾前,只要買2張戲票就可以免費入會,仲送50分積分添...大家唔使急住黎啦~

呢度仲有個花園平台,老公話可以約朋友黎呢度飲野吹水,咁近吳家飲幾夜都唔怕喎~~

老公見呢度有溜冰場又話要重拾呢個運動嗜好,我又睇下佢係咪真係識溜~聽聞呢度可以用八達通俾錢,而且一蚊一分鐘,離開溜冰區,例如去洗手間或者休息係唔計錢架喎,好似好先進咁呢~

另外得到我地垂青既仲有呢間Metro books,我會當佢係圖書館,得閒就黎做下文藝青年

講真呢個場都幾好行,又大又舒服,最重要係吳家附近~~各方好友黎開行街咪順便上黎吳家坐下,探下我地lor~~

仲有呀,其實商場都有免費接駁巴等大家方便d黎既(單程架咋) ~上車地點分別係海防道(新港中心對面)、佐敦道(九龍佑寧堂門外)、黃埔新村(紅磡道巴士站)、窩打老道(豪華酒樓門外)同埋九龍塘火車站多福道出口(耀中國際學校外避車處),11:30至20:30,假日15-20分鐘一班,星期一至五視地點而定,由15-30分鐘不等(而窩打老道只在假日先有車)~~

下圖咁精美既曲奇係一間好靚既餅店出品,我地見咁靚就影低左佢勒,有機會都有買黎試下~~

 

Wildfire@Elements

新商場Elements內都有好多食肆,不過都幾分散架~唔係未開業就係要等位,而且普遍都係貴價餐廳,稍為平d既就引黎好多人等位~

最後我同老公去左食wildfire,叫左

Caesar salad with chicken ($99):雞肉是熱的,並不是一早拌在一起呢,老公對此深表讚賞,味道也不錯,不過我覺得價錢太貴了,份量一般,不太值呢~(如不要雞肉會減$20)

Black forest pizza ($122):老公叫我係呢個或者bbq pizza之間擇其一,我見bbq pizza係全肉餡,好似成日都食類似既pizza就決定試下呢個Black forest pizza~~好得意呢,餡料係菇菇,松子同埋呢d樹葉...不過味道一d都唔單調喎,仲有份清新感覺,好唔錯

好在我有帶Igor group既Elite card,所以有折扣,最後埋單$201