由於聽日就要去會展當值,午飯一定要幫襯會展既餐廳,我梗係唔會屈服啦....所以決定整個批做明天既午餐
昨日去黃埔食飯順便行左吉之島$10店,於是買左個一個批模,一個麪粉棍,一嘗我想試整好耐既焗批
今晚洗完碗,我就擺陣試整啦...之前買左急凍酥皮係屋企,就用佢做批皮(下次有時間先自制啦
嘩,出爐啦~~
呢個芝士粟米咸牛肉批~~好香呀~~好似好好味咁...似乎成功左喎
我偷偷試左少少餡,好似唔錯咁喎....老公話佢好想食,不過已經刷左牙,唯有聽日先試啦...
半個留俾我,半個留俾老公聽日食呢
2006年8月24日 星期四
824的晚餐
今日下畫要去會展set攤位,因為聽日就係一連4日既電腦節開幕,我搞個計畫都有個擋口,星期一我仲要有個講座環節要做添...唉,都唔知有無人會聽我講廢話,最好唔好問我問題,問著電腦問題就大煲啦,因為我一定唔識答都似....如果各位好友想去行電腦節,可以嘗試打俾我,睇下我帶唔帶到你入去呀(因為我唔係日日on duty架)
講番今晚餐飯,就係因為set up遲左,搞到我成8點先番到屋企...見雪櫃有塊雞脾扒,所以就整
芝士焗椰汁雞意粉:好好味呀,老公都話有水準,不過佢話多d汁就更好,梗係啦,佢係一個椰汁怪...至於我個人就認為今次整得好creamy,每條意粉都包住d醬汁(正
2006年8月23日 星期三
婚禮情緣
今日我有個大學女同學(以下簡稱V)約我食飯,其實我地耐唔耐都會約出黎聚下,不過都係1年1至2次左右,而且係大圍既聚會!
估唔到我結左婚之後,佢主動約我同另一位大學師兄(以下簡稱C)食飯(我同同學V都係佢既組女)...之前我都覺得奇怪架啦,因為我一向同呢位大學師兄好熟(佢仲義務幫我番中大影左輯婚紗相,所以我老公都識佢)好鍚我,基本上佢既愛情故事我都好清楚...係我結婚前佢仲係單身之中既,仲成日叫我介紹女仔俾佢識
2個月前同學V打俾我話打波撞到師兄C,順便打俾我約食飯,我都覺得有D唔妥架啦,一向佢地都無2句唔係太熟,但係突然打俾我傾3人會議約食飯,你話奇唔奇.....不過佢地都無同我講咩,我就當普通既聚會咁睇,唔特別諗咩野....
剛剛既星期一同學V又話約食飯,我都覺得幾突然,因為無耐之前先食過,正常情況唔會約得咁密,不過約到,我當然唔會拒絕啦,於是今晚我、老公、同學V同埋師兄C一齊去黃埔outback晚餐,好容易就屈到師兄C請客....點知之後番屋企,佢地又打俾我,奇奇怪怪吞吞吐吐咁,終於師兄C同我講話同學V好想多謝我,因為我請佢地黎飲,令佢地2個失左聯絡既人因為我既婚禮而重新聯絡,仲發展成情侶添
唔怪之得咁容易屈師兄C請客啦,平時佢好少被屈架麻...原來係想多謝我呢個新娘子既紅娘
聽到呢個消息我都覺得好開心,估唔到我個婚禮做就左呢對情侶,而且仲係好熟既朋友添...希望佢地可以開花結果,我同老公可以去佢地個婚宴啦
2006年8月22日 星期二
822的晚餐 ~ 洋蔥豬扒+五香肉丁炒蛋
今天的出品依次為
五香肉丁炒蛋:參考勞太菜式,簡單易整,不過老公一向不好辣,因此我喜愛此餸多一點
瑞士汁雞槌:上次整釀雞翼時剩下的,因此就用瑞士汁去煮,保持水準...老公說很入味
洋蔥豬扒:首次登場,豬扒略嫌不夠鬆軟,不過洋蔥欲煮得很好味
訂閱：
文章 (Atom)