老公鐘意食飽,因為今日要去買Origins幫老公補貨,所以我決定去試下Freshness Burger
雙層芝士牛肉漢堡($42)配A餐(細百事+細薯角)($20):呢個當然係老公食架啦,收成四十幾蚊份量都要有番咁上下先得既...都算佢無呃秤啦~~我試左小小牛肉漢堡,唔錯呀...老公都話幾好,不過佢覺得肉汁都係偏小,多d應該會更好味...而且freshness burger無咩醬汁,所以食到食材本身既味道比較多~薯角無薯格咁脆,不過薯味不俗~~
照燒雞扒漢堡($22)配B餐(細忌廉粟米湯+細薯格)($20):呢個係我既,個飽既生菜真係好fresh喎...果然係用有機蔬菜呢~~雞扒都唔錯,照燒汁剛好唔會太濃亦唔會食到成手都係~~至於佢既賣點南瓜飽,我唔係太食到南瓜味,不過味道都唔錯~~
忌廉粟米湯果然係日式style既粟米湯喎,i like it~~而薯格都唔錯,我覺得比薯角好味d添~~不過今餐要成$104似乎都係貴左d...不過都會考慮再幫襯既
食完晚飯就去花燈會啦,今日既會場好好行,一d都唔逼人...o岩晒我地試機影相呢~~
用呢部D80影夜景相比DC既質素真係靚好多呀~~呢d係部份作品(有相框既就係出自我手架啦)
我叫老公影張d人行黎行去既效果,下面呢張係試左好多先成功既效果,我覺得都叫ok啦,不過要再努力學習先得~~
其實會場花燈唔算多,不過我地左拍拍,右拍拍,好快就過左成粒鐘啦....如果平時我諗我地唔夠15分鐘就應該可以走得架啦...所以呢,我覺得攝影都係一個幾好既活動
老公話雖然大家用同一部機影相,不過好明顯我同佢影出黎既野係唔同feel...我都覺得係呀,我比較鐘意影近野,老公就鐘意全景多d~~
上面呢張一排既花燈相亦係我覺得今晚自己影得唔錯既相
後記:原來攝影都係一項要求體力既活動,揹住d器材成日都好辛苦架~~
係愉景灣食完晏hea左一陣,影下相散下步就搭船出番去中環,20分鐘船程其實都幾快呀,我同老公仲瞓左陣添
去到維園只係6點鐘,天都仲光光地,所以決定去食晚飯先~~不過我搵唔到想試既小白屋(唔知係咪搬左呢,我以前明明見過佢間舖架喎)...唯有係天后打轉啦...ironwood cafe貴左d,見隔離間長崎珈琲都好似ok就決定入去試下勒~
我要左個南瓜蟹肉鮮蝦焗飯($58),加$25轉餐~~餐湯係西蘭花忌廉湯,跟住黎既沙律竟然係醃青瓜蘿蔔,好似有d奇怪呢~~焗飯味道都ok呀,帶甜既南瓜汁用黎焗飯都唔錯喎,下次可以係屋企試下~~
而老公就叫左是日推介晚餐 - 五目石燒什扒($88),餐廳有8成人都係叫呢個餐呢...都等左幾耐架,我食完個焗飯都未黎呢~~
不過塊石(好似雲石咁架)又真係好熱喎,什扒分別係牛扒,豬扒,雞扒,司華力腸,跟薯菜....質素都唔錯喎~~我試左少少司華力腸,外皮好香脆呢~~
店名叫得長崎珈琲,我諗佢既珈琲應該唔錯,所以要左杯凍珈琲...我自己鐘意落多奶既,味道果然唔錯...呢間小cafe都幾舒服,不過我都係嫌貴左少少~~埋單$188
上一篇日誌寫左出走愉景灣既原因,其實仲有另一個理由既~~就係要為新買既Nikon D80剪綵勒~~買左部D80之後,老公每晚都會拎住部DSLR係屋企試影(屋企缸魚就係佢既模特兒),既然如此,一於定呢個星期六出外取景影下相啦~~
原來老公係第一次去愉景灣呢,佢好欣賞呢個地方...周圍都係外籍人士,真係好似去左另一個地方咁~氣氛好悠閒...不過如果無推廣既話,入黎都幾貴架呢,單程船票就要$27...淨係今日我同老公就慳左$108既船錢啦~
呢個係白沙灣沙灘,有人打沙灘排球,有人玩美式欖球,有人玩滑板,有人踩單車,有人玩風帆,有人玩獨木舟...真係各式其適...令人羨慕既生活~~真係對"尚堤"好有興趣,不過得個恨字~~
老公用D80試影既動態相,果然好出色呢~~呢d普通DC就一定影唔到勒....不過我就未拍到,因為成日都對錯焦
我都係影下d靜物先啦...見d荷花幾靚就影左幾幅~~有相框既就係我既作品啦
我對上面呢張有明顯景深既荷花相好滿意,都算係今日既得意之作....哈哈哈,大家多多包涵,唔好笑我幅相喎~~
前晚守夜食齋,琴日一早6點起身就去爺爺既出殯儀式,之後就上深圳大鵬灣落葬,爺爺可以入土為安啦~之後係小梅沙酒店食解穢酒,舟車勞動番到屋企已經5點鐘...梳洗更衣之後又要出發去九龍灣食做節晚飯~~一連兩餐都係中菜,食物又大同小異,老公同我今日堅決唔再食中餐
琴日咁辛苦,今日決定出走城外享受一頓悠閒午餐~~地點就係遠離煩囂既愉景灣Caramba Mexican Cantina勒
其實我對Zaks既興趣最大,不過張飲食禮劵並非所有餐廳適用,所以最後我決定去試下墨西哥菜~~
我叫左一個Brunch($99),有一杯特色飲品,我地要左Sanrgria,原來酒精極重,唔o岩我啦(我覺得好難飲),老公就ok,不過佢唔鐘意日光日白飲太多酒精既野,所以佢都係飲左半杯咋~~
跟住黎既係corn & jalapeno muffins:呢個muffin好特別,入面除左粟米之外仲有樣野辣辣地既,食類似蛋糕口感既muffin,但係又辣辣地咁,好搞野...不過都幾好味架喎~
brunch既主菜選左huevos rancheros:中文明明見到粟米皮既字樣,點知出黎好似普通早餐咁,香腸煎雙蛋再加d薯仔....原來塊粟米皮舖左係煎雙蛋既下面,不過一d特別之處都無...d腸就類似中國臘腸咁,硬硬地咸咸地,我就麻麻地勒...而薯仔呢亦不太特別....呢個主菜真係普通得滯~~
老公另外叫左個quesadilla chori($72),即係辣肉腸墨西哥薄餅...同我地平時食既pizza唔同,反而係似pizza既餡餅,幾得意...味道唔算辣,唔錯呀~
最後仲叫左個nachos grande($88),係墨西哥特色既粟米片...呢個好好味呢,雖然有好多餡料放面一齊焗,不過d粟米片依然非常香脆,加上新鮮蕃茄粒同埋綠色醬料,真係好正呢~~
除左個brunch既主菜有d失望之外,其他都好滿意...而且老公食得超慢,佢話係呢d環境一定要慢慢享受喎...o岩既,慢慢食慢慢嘆先似出走城外架麻
個brunch最後仲會包tea/coffee既,我地要左tea,慢慢飲,不知幾悠閒...so relax~~
埋單$285,不過扣左張飲食劵,呢餐最後實收只係$85咋...抵抵抵
因為今明兩日有免費船票推廣呀(