吳家吾居: 9月 2008

2008年9月27日星期六

初為人母的挑戰 ~ 餵母乳

從產房出黎之後就轉左去產後病房,我被編去了東翼3號房2號床....廣華東翼新裝修,格局好似私家醫院呢~~其實3號房只係得2個床位,不過同2號房打通左,所以即係一間4個床位既大房,一d都唔逼架~~

產後頭6小時只可以卧床,不過姑娘都有問我會唔會即刻餵哺母乳,我當然話好啦~於是2個鐘之後姑娘就抱住囡囡埋黎俾我試下餵奶勒~

囡囡只是稍為掙扎了3,4下就張開了小咀吸吮著,她似乎吃得不錯啊~~而我看著囡囡努力地吃著媽媽奶,心中也很安慰,而且增加了我的信心...雖然我知道這一餐是沒有多少奶水供應給她的~

之後每2小時姑娘就會抱囡囡來吃奶,終於吃第3餐時姑娘說我有奶水了....我初時還以為那是囡囡的口水呢...哈哈哈~

經過密密的吸吮,我的乳頭已經給吃損了...不過也只是頭幾口會覺得痛,而且相對之前生產的痛楚,這真的不算什麼了~

可是囡囡的黃疸指數每天都在上升,為了令囡囡去黃,姑娘建議補少許奶粉以增加排尿從而去黃...於是在醫院的第3天我終於第一次補奶粉,不過感覺和餵母乳真的相差很大啊~原來餵母乳感覺真的親蜜很多,而且我覺得比餵奶粉更方便...因為囡囡不太喜歡吸奶咀,所以吃得不多....而且餵奶粉又要幫囡囡掃風,唔多唔少都會有少少嘔奶,吃奶時間不見得比吃母乳少呢~

除第一晚由姑娘照顧囡囡之外,之後囡囡就會全程由媽媽照顧....就在這幾天我被訓練學懂了如何換片呢~

最後囡囡的黃疸指數要到兒科病房去照燈,我也就出院了....不過我知道黃疸係好普遍既,所以我同老公都唔係好擔心~

我回家後也有用奶泵泵奶帶回醫院讓姑娘餵囡囡的...由最初泵到50ml到第二天已經可以泵到100ml啦...而囡囡亦好叻,星期一就出得院啦~~

2008年9月24日星期三

生產篇 ~ 產房中

日期: 2008年9月24日

時間: 早上10時

入到產房終於有止痛氣俾我用啦~

吸第1,2啖既時候真係有少少暈暈地既感覺,不過好快就無野勒~

而止痛效果對我黎講都叫可以,起碼我覺得無係待產室個時咁痛咁辛苦~不過整個生產過程我都係只有止痛氣用咋~

老公亦都入左黎產房,不過我無捉住佢隻手呀...因為我知道如果我真係捉住佢隻手,佢隻手一定會俾我握到斷....所以我一手拎住止痛氣罩,另一隻手就扯住張產床~

助產士叫我試生,不過似乎未得,所以我只有繼續好似係待產室時咁樣等落去~老公就係旁邊幫我印下汗,按摩下手手腳腳咁~

時間: 中午12時

助產士都要去食飯啦,於是就搵左其他姑娘替佢...老公亦都出去洗手間,順便通知屋企人話我入左產房~

而我就痛到已經無晒力氣,我仲以為入左產房好快就會生到...點知都係一樣一路痛一路等...我聽到隔離產房已經有2,3輪BB出世既喊聲...點解人地生得咁快,我要生咁耐既呢?

時間: 下午1時

我相信大概1點左右終於露出曙光啦,助產士話我可以試生啦~可以用力痾啦....姑娘叫我唔好用谷塊面,下巴要貼住心口,用下面個肚出力...佢拉出產床既手握同埋腳踏,叫我手向後拉,腳向外撐....不過我隻腳唔夠力撐,姑娘話要大力到佢點都推唔郁我隻腳喎....終於我開始掌握到用力方法,不過我唔夠氣....每用完一口氣我就要回氣先得,但係姑娘話我用力時間太短,咁樣係唔得既,要一口接一口氣咁用力,唔可以回氣....我盡量嘗試,但係接連用了三四口氣力我也真的堅持不下去了....我見助產士既衣服變了樣,拿出了手術用具,載上了面罩,仲多左幾個姑娘入左黎...老公亦載上手套要準備剪臍帶~

時間: 下午1時XX分

大家都不斷叫我出力,加油,長氣D堅持出力....老公話見到頭髮啦...我感到頭仔出緊黎,亦感到姑娘剪左會陰,不過正如其他人話陣痛係蓋過左剪個一下痛既~~可惜我未能一股作氣,BB頭仔出左一半我就忍唔住要回氣,結果頭仔卡住左,唔上唔落....到我再一次宮縮用力,大家就話一定要堅持,我好似聽到話BB再卡住會缺氧,姑娘話呢一下力可以令BB出世架啦,佢話你想BB幾點出世呀...我好驚呀,就算無氣都唔敢回氣....終於BB出左黎,我聽到囡囡既喊聲呀~~姑娘話卡住頭仔個陣真係令BB有D缺氧,塊面有D藍呀,好在時間好短...出左世吸左1,2啖氧氣之後就無事啦,仲喊得好大聲添~

老公亦好成功剪左臍帶,仲見到姑娘推我個胎盤出黎添...老公話我個胎盤好大,好似個豬肺喎...佢一D驚既反應都無呀,幾勁~姑娘拎BB埋黎問我係仔淨女,不過我唔係好睇到個樣(我除左眼鏡呢)

之後老公就要出產房,佢去左食野...而我就要留係產房縫針,足足縫左半小時,好在縫針前有打止痛針,不過某D位都係會痛既,但係比起剛才生既時間真係微不足到啦....我一隻腳已經累到會自己發抖,整下呢樣整下個樣,結果2點7左右先至推出產房去產後病房~

生產篇 ~ 待產室中

日期: 2008年9月24日

時間: 凌晨5時

的士停在廣華正門,因為正門已經關上,我們要從急症室入口進入,雨水不停的打在我們的傘上,老公扶著我一步步的進入急症室....這個時間,急症室前所未有的寧靜,只有職員和1,2名市民~經過上次入院經驗,老公熟練的走到櫃位前辦理入院手續,而我就被人安排坐在輪椅上推我上9樓待產室了~

因為今次是陣痛入院,收症沒有上次那麼久,換了衣服和驗小便後便推了我入待產室駁機檢查宮縮情況和BB心跳~半小時後,姑娘說我會留在待產室,說我是第一胎,應該都要待上一段時間,叫我出外叫先生回家去~我勉強的行出叫老公番屋企先,咁老公就走先勒~

今次不像上次要轉出去產前房...即係話今次係堅架啦,我真係就黎生得啦~

時間: 早上7時

醫院派早餐,我勉強食左幾啖粥就真係痛到無胃口食落去(早知之後要用咁多力,我諗我會食多d既)~~之後就瞓係張床度捱痛勒....姑娘見我瞓係度就話我係第一胎,如果想快d最好出去行多d,唔好瞓咁多...但係我真係痛到唔想郁,所以都係繼續留係張床到~

我覺得痛楚好像頻密了很多,開始覺得好痛苦,忍唔住開始低吟...姑娘問我覺得幾耐痛一次,我只係話密左好多,都唔知幾耐一次....姑娘好似唔係好信我咁痛,佢睇住個圖表話我係有痛,但係唔算好厲害,只係話我既痛係密而短,而且佢摸我個肚話我個肚都係未硬晒,叫我忍下先~

我一向覺得自己算係抵得痛既人黎,但係呢d陣痛真係好難受....如果痛得無咁密我諗我會頂得住,但係回氣唔夠分幾鐘又黎痛過,持續咁落去就真係令我痛不欲生勒~

終於醫生黎檢查,佢都話我痛得好密,但佢無好詳細話俾我知我既情況,我只係係佢同姑娘既對話中知道我既宮頸入院時開左2度,要繼續等~

時間: 早上9時

我開始控制唔到自己,痛到好似癲婆咁叫...每次痛我就雙手緊扯床邊同深呼吸,成身都係汗,而且痛到全身顫抖...我咁大個女都未試過痛到成身係度震架~

終於有姑娘行埋黎睇下我,我就話我真係好痛,幾時生得...答案只係話無咁快,不過應該都會係今日生到架啦...佢問我要唔要通知老公黎等,我驚老公會番左工,於是叫姑娘通知定老公黎先~另外,我又問可唔可以檢查下...姑娘話唔可以檢查咁密,我要到11點先可以檢查喎...於是我就話我想止痛啦,點知所有止痛氣都已經有人用緊,要用既話要等人用完先得呀...天啊,有無搞錯~~咁我就話打止痛針啦,姑娘又講一大段野話打左可能影響BB,又呢樣又個樣....我都無氣再答佢...結果都係靠自己死忍~~~

時間: 早上9時45分

我又開始大叫大嚷,姑娘埋黎安慰我....但係我話我真係好痛,要求檢查宮頸情況...終於姑娘係我苦苦要求下幫我檢查,結果係原來我已經開左一半,即係5度啦....姑娘話我好叻,開得好快喎~~我見開左5度就問係咪可以入產房試生啦...點知得到既答案係我未穿水唔入得產房~~下,要穿左水先入得架咩?姑娘話係呀,未穿水就算宮頸開晒BB都出唔到黎架....我知道之後好失望,唔知仲要等幾耐....但係我已經痛到非筆墨所能形容~

時間: 早上10時

姑娘問我痛既時間有無想痾既感覺,我話有呀~而且仲不由自主地會用力想痾呢~說時遲那時快,我感到有一股暖流湧出黎,我同姑娘講,佢睇都無睇就話因為o岩o岩檢查完係分泌黎喎...但幾分鐘之後再湧更多出黎,佢地終於話我穿左水啦,可以入產房等生啦~

生產篇 ~ 半夜8號風球下入院

日期: 2008年9月24日,星期三

時間: 凌晨3時

22號晚出院後,23號整天我也不敢出街,只待在家中~老公番工去了,不過不時打回家看看我的情況~其實那天整日都只是肚底扯著痛,痛楚非常輕微的,不過就是沒有停止過~

這天最為人關注的相信是"黑格比"了,放緊產假既我對風球消息已經不敏感了,會不會掛8號風球也好,我還是要留在家中的了~不過老公放工回來後已經嚴厲的向著肚中的囡囡訓示不可以在打8號風球時要出世,叮囑她待風球走後才令媽媽作動啊~

可是囡囡又一次不聽爸爸的話,上次沒有在結婚紀念日出世已經令爸爸失望~而今次爸爸叫她遲些來卻偏要來呢~

我如常的上床睡覺,肚還是在扯著痛,只是痛的範圍已經不限於肚底了,但是卻不如入院時醫生姑娘所說的整個肚子由上至下在痛,我想只是由中至下罷了,便繼續忍著....可是我的輾轉反側令老公很擔心,他忍不住問我是不是陣痛要入醫院去~

由於痛楚依舊不規律,而且又正值8號風球,外面呼呼的風聲,橫風橫雨的,我便想再忍些時候~於是於凌晨3時決定計算一下痛楚相隔的時間,觀察了大半小時,痛楚大約10至15分鐘不等....最後老公還是決定和我入院去~

雖然痛,不過我還是走了去沖涼洗頭,哈哈....凌晨4時多和老公下樓去,幸好我家附近的道路不算太靜,打風期間依然見到有的士經過...老公截下了一架掛上暫停載客的的士,向司機說幫幫手"大肚婆就生得啦"...結果司機說要多付$50車資,我們也無奈答應,坐上的士入院去了~

後記:聽老公說,他的同事知道我是在8號風球下入院的,便幫囡囡改了個別稱:"風之女"...哈哈哈~~而且開心和興奮的程度比吳生還要大呢~

吳家寶貝出左世啦~

啊,幾天沒有update blog了,想必大家也猜中吧~~

對了,我又入院了而且順產誕下了囡囡:

出生日期: 2008年9月24日, 星期三

出生時間: 下午

出生醫院: 廣華醫院

出生體重: 2.99kg

我星期六晚已經出了院,不過因為囡囡黃疸指數升高要留在兒科病房接受光線治診(即係照燈),所以未能一同回家~~

而且吳生同我都因為實在太攰又太多野要搞,所以都未有時間上黎報喜呢~

其實我有好多野想紀錄呀,因為實在太多值得記下的事情,我會慢慢報上的了~~

這是囡囡出生那天的樣子,她非常愛哭呢~~

2008年9月22日星期一

入院演習

各位,我出左院番左屋企啦~~

因為除左見紅之外,其他分娩徵狀都未有...而醫生見我住得咁近就話可以選擇出院番屋企等...我又真係唔太鐘意留係醫院,所以決定番屋企勒~

不過今日入一入院就當係演習下啦,我諗無論如何呢個星期都應該生得啦卦,今日先星期一,等2,3日都係星期四o者~

等我講下今日既情況先:

8am:發現見紅,於是去左沖涼洗頭,準備入院

8:30am同老公出發去麥當當食番個早餐先入院

9am食完早餐仲慢慢行去廣華醫院

9:30am辦理入院手續之後就有個嬸嬸帶領我上九樓產科~首先要登記我同老公既身份証,跟住叫我換衫,磅重,驗尿,探熱,聽bb心跳...之後就帶左我入待產房做檢查,而老公就要係出面等~

姑娘同我駁機睇下bb情況,如果bb郁我就要按一下掣....呢個檢查要觀察最少半小時~其實我既痛好輕微,不過係我附近既孕婦就痛到不斷呻吟,而且要求打止痛針,聞止痛氣,真係都幾嚇人呢~我見我對面個位孕婦既陣痛指數去到一百四十幾,一個又一個山丘既線圖,真係登佢辛苦呀~最後佢慘叫左幾聲同姑娘講真係好痛,結果就推左佢去產房啦~

10:30am姑娘幫我解番駁機既腰帶,話要等醫生黎同我檢查再確實一下,如果無其他徵狀就會轉去產前病房~

11am醫生黎到問左我d徵狀之後就同我檢查宮頸情況...醫生真係成隻手咁放入去檢查,真係唔多舒服...不過我既宮頸仲未成熟,應該會轉去產前病房..不過仲話要等高級醫生黎再睇喎~我見老公係出面等左咁耐就問姑娘可唔可以出去行下,姑娘話只要唔好離開呢層就無問題架啦~

11:30am我同老公講應該有排都未生得,叫佢去返工...不過老公走之前都買定三文治同飲品俾我,仲睇埋我轉產前病房先走~

11:45am我就轉左去南翼9樓既11號產前病房3號床位勒~由呢個時間開始就好無聊咁係病房等,其間有派午餐黎,不過醫院既野真係無咩味道~好在都有電視睇下,3點幾瞓左一陣,真係唔知仲要等幾耐...雖然我個肚係有痛,不過醫生同姑娘都話我呢d痛唔算數喎~

5:55pm阿媽同阿爸黎左探我,不過因為未到探病時間,所以我就出左去陪佢地~~點知原來呢個時間有醫生黎睇,結果有位姑娘好勞嘈咁出黎搵我,跟住仲好似好嬲咁話我做咩周圍走...其實我又點知佢d醫生幾時黎先得架,呆左係病房成日都係得2次黎問下証咁大把,病人等就得,醫生得就唔得,使咩咁惡喎~

結果醫生話我仲未生得,見我住得近仲話如果我想既話可以出院番屋企休息....因為老公又黎緊醫院,所以我就等佢黎接我走啦~走之前仲食埋醫院份晚餐,雖然就唔多好食架啦,不過橫掂都要俾錢就食埋先走啦~

7:30pm就同老公一齊番屋企啦~

我入院啦~

琴日成晚都宮縮,囡囡郁得好勁,搞到我成晚都瞓唔到~

但係又唔算係規律既陣痛,所以唯有繼續攤係張床到~

今朝老公起身梳洗,仲吩咐我有咩事記住打俾佢~~

我8點起身去洗手間,噢~~終於發現見紅啦...仲係鮮紅,好似M到咁呢~

老公知道就話陪我入院,我就去左沖涼洗頭,宜家差唔多出門口啦~~

食埋早餐就入院,希望唔好係流料啦~

真係入左院就會通知屋企人,唔知今晚生得未呢?

2008年9月19日星期五

第十次私家產檢(39 weeks)

今日除左去廣華仲要去私家醫生度檢查~

因為醫生晏畫又有手術要做,所以又改左覆診時間去到夜晚8點~不過時間夜d又真係少左好多人喎~

估唔到2個星期時間我又重多左5磅啦...天呀,再重落去我都唔知點算啦~但係醫生竟然無話我太重,反而擔心囡囡太重我會好難生...因為今日囡囡已經達到7磅啦~~

醫生叫我唔好食咁多甜野,如果唔係囡囡太重就會生得好辛苦...醫生每次都話我咁高大,廣華一定會要我等順產,等到最後都唔得先至會俾我開刀喎....其實我好高大咩?醫生好似講到佢其他孕婦病人好少好似我咁高大咁,真係奇怪~

雖然仲有一個星期就係預產期,但係醫生依然開左兩星期既綜合維他命同埋補血丸俾我...醫生話因為生產過程唔多唔少都會流唔少血,而且如果之後打算餵人奶既話,補充多d維他命葉酸等等點都比較好喎~

最後醫生話下次覆診我一定已經生左,佢叫我出左院之後打去約10日後覆診,主要檢查一下傷口既情況~~希望一切順順利利啦~~

第九次廣華產檢(39 week)

39週了,又是時候回廣華做產檢~~出門前還落大雨呢,幸好屋企樓下有小巴直到廣華,不然都幾麻煩~

其實真的沒想到39週還要回廣華做產檢,都是慣常的檢查程序...助產士說囡囡比上次落左d,佢話落左5分2既盆骨位喎...不過並不能因此預計到囡囡何時出生,只說落得多既話產程就可以快d,落得少產程就耐d喎~

下次覆診日期就係囡囡既預產期啦,我問姑娘下次再見既話就係預產期啦喎~~姑娘話係呀,所以下次要見醫生,如果仲係無動靜就會約日子入院催生啦~

姑娘同我講話好多孕婦過左預產期都未生架,所以都係好正常,唔使擔心~~總之42週前出世都無問題既~~

其實我都係過晒預產期都未出世架,阿媽話我都係打催生針既~~唔通囡囡想學我咁...哎呀,唔好啦,我唔想催生呀~~囡囡,你不如乖乖地係預產期之前出世啦~~

2008年9月17日星期三

皮婚紀念@Caffé Vergnano 1882

3年前既9月17日係我既大婚之日,這麼值得紀念的一天應該好好慶祝一下....不過今年我們都只是簡單在家附近的Elements商場活動~

老公極希望囡囡能在917這個特別的日子誕生,昨天已經不斷呼喚囡囡,可惜囡囡似乎太喜愛媽媽的肚子,還是一點生產的徵兆也沒有出現~

雖然未生得,但係我們也不敢預早訂位去吃大餐...最後今晚去了Elements的Caffé Vergnano 1882食晚飯~

雖然這裡主打飲意大利咖啡,不過我覺得其食物亦很不錯,而且因為有Good Times卡既食品半價優惠,今晚既晚餐好抵食呢~

Chef Pizza:這個是最貴的pizza,要$160~~我想是因為pizza用上了parma ham的原故,味道不錯~

忘記這個三文治的名堂($59),不過用料新鮮,juicy的蕃茄,不俗不俗~

這個是carbonara($98),很香芝士和煙肉味,最愛creamy的汁料,正~~

雖然只是叫了3款食物,不過我們也很飽....另外我們也叫了兩杯飲品,因為老公不喝咖啡,而我又因大肚而不建議喝咖啡,結果未能嚐到這麼出名的1882.....我的是凍朱古力($39),老公的忘記了名字($43),不過味道比我那杯甜一些,也很好喝~

當我們進食時,待應說他們正進行一些電力裝置或許會停電片刻,沒想到我們打算結脹時真的停了電,他們的電腦系統也沒有電,未能出單呢...結果就人手埋單付現金,不過卻因此連飲品也算了半價(本來只是食品有半價優惠),所以這餐只要$220咋,非常抵呢~

《 Mamma Mia!》(媽媽咪呀)

今日既皮婚紀念節目係去The Grand睇《 Mamma Mia!》~

其實係因為我張生日贈劵仲未用,但係9月尾就到期勒,而且又唔可以星期六日公眾假期用,於是決定今日用左佢lor~

我地補買多張飛,信用卡優惠不適用於呢套戲,不過因為係The Grand既會員可以有9折,結果$54就可以睇到《 Mamma Mia!》啦~

歌舞片我一向都鐘意睇既,呢套一樣深得我心...而且入面既歌都幾耳熟能詳,加上出人意表既結局(雖然我知呢套係出名既舞台劇劇目,但係其實我唔知個故仔係點架),真係睇得好開心...囡囡都好似好鐘意呢套戲呢,因為佢好耐無郁得咁勁啦~

我誠意推介俾大家,真係幾好睇架

2008年9月16日星期二

產假正式開始

選擇放前2後8產假既我,今日終於踏入產假既第一天啦~~

不過其實我已經休息左一個星期...雖然好多人都話放產假好悶,但係我又幾享受喎,睇黎我都係天生唔鐘意返工架啦~

雖然放假既日子確實無咩實質既野做,但係我知道囡囡出世後呢種悠閒既假期將不會出現,所以我幾珍惜呢個假期架~

每日抽2個鐘左右出去行下街,一來當係運動下,二來搵d野做下麻...好似去打下書釘,買下d濕碎野,約下朋友食晏...輕輕鬆鬆跟住就係時間番屋企休息架啦~

係屋企上下網,每日做少少家務(真係好少架咋,哈哈,基本上做左都唔會發現),我覺得好快就過左一日,絕對唔覺得悶呢...哈哈哈~

不過我好想囡囡快d出世,因為我想多d假期可以照顧囡囡,希望囡囡聽到啦~

2008年9月15日星期一

囍宴滋‧選

因為愈來愈近預產期,老公不再批准我周圍去,只能在家附近的地方作有限度的活動~

於是昨晚我和老公就去了Elements閒逛,Elements一向都行得好舒服,因為永遠不會覺得人多,不過購物的價位就不大合我們,不止購物,就算是食肆也多屬高價...今次我們選了囍宴滋‧選,價錢當然不可以叫便宜,不過亦非很貴,中等價位,不過水準真的不俗...看來可以再來吃~

香酥九製陳皮骨($78):今晚最出色的一味,雖說是骨但卻是啖啖肉的,而且真的很酥脆卻不油膩...味道帶有少少酸少少甜,真的有陳皮的味道,並不是綽頭啊...很好吃呢,要是份量能多些或價錢便宜些就更好了~

川味乾撈麪($52):我們要了少辣,不過我覺得一點都不辣,反而老公卻吃到辣味~其實汁料在底,真的要撈均才吃呢~麪質不錯,看似細細碗,不過也夠我們吃....雖說不上驚喜,不過也是水準之作~

XO醬星洲炒蘿蔔糕($68):其實我是想試其蘿蔔餅的,但是老公點菜時卻錯叫了蘿蔔糕~~算吧,蘿蔔糕我也愛吃,只是覺得蘿蔔餅比較特別所以想吃呢~這個蘿蔔糕也很不錯,吃來竟然覺得炒得很滑卻沒有削的感覺,份量ok,起碼不會食滯,哈哈~

這裡有很多甜品呢,特別是有很多口味的雪糕....老公本想試新口味腐竹銀杏的,可惜已經售罄,而我就點了私房荔枝雪糕pancake($42),也夠我們兩份吃~~

荔枝雪糕真的很清甜啊, pancake皮滑滑的,很捧呢~這餐吃得很滿意呢,雖然份量不多,不過我們也吃得很飽...下次要再試其他特別菜式~~

2008年9月14日星期日

中秋節@東寶小館及Neways

星期五已經和老公回了夫家食飯當做節,正日當天就約了娘家食飯做節~

媽媽很早就已經在北角東寶小館訂了檯,是晚菜式相當豐富:

黃金蝦

避風塘炒蟹

豉椒炒蟶子

椒鹽鮮魷

炸豬手

風沙雞半隻

琵琶豆腐

大肚婆炒飯

豉油皇炒麪

真的飽到不得了~~之後我們三姊妹就去了唱K,我想應該是我大肚時最後一次唱K吧...今次絕對覺得自己唱歌已經不夠氣了~

2008年9月13日星期六

Edith & Chris Wedding@Grand Hyatt

星期六和老公參加了他的教友婚禮,地點在灣仔君悅酒店~(是日迎月日其實也是我和老公的農曆3週年結婚紀念呢)

是次的場地是11樓泳池旁的玻璃房~~

君悅麻,我也是首次真正的入內呢~繼洲際,四季後,我又參加多一間五星級酒店的婚禮...唔知幾時有人請我去埋半島呢~~

不過呢,感覺還是四季最好,可能新舊的對比太強烈了吧~

在此祝Edith & Chris永遠甜甜蜜蜜

2008年9月12日星期五

第八次廣華產檢(38 week)

今日已經係38週啦,又係番廣華檢查既日子~

雖然一向幫我檢查既助產士都係度,不過今次見我既應該係護士長~~

護士長果然係嚴肅d既,而且仲會問問題考下你,要你答咩情況之下要入院...穿幾多羊水就要入院...係邊度辦理入院手續....好在我都一一解答,護士長都好滿意...哈哈哈~

護士長話我既驗血報告合格,所以唔使食藥...跟住又係摸肚啦,佢都摸左好耐下,不過都係一切正常,叫我下星期再番黎檢查~

不過我希望下個星期囡囡可以出世,唔使再做檢查啦~

2008年9月10日星期三

《蝙蝠俠－黑夜之神》(The Dark Knight)@Standard Chartered Starsuite

雖然今時今日先去睇《蝙蝠俠－黑夜之神》好似太out,不過今次係去左The Grand既尊貴影院Standard Chartered Starsuite睇喎,感覺即時型好多啦~

其實我想試下去Standard Chartered Starsuite好耐架啦,因為用渣打白金卡逢星期三可以享買一送一,雖然係$140一張戲飛,不過如果有買一送一既話,除番開都係$70張飛,仲要包埋每人一份爆谷 (大裝)同埋飲品添,咁唔係仲抵過平時睇戲咩~~可惜佢全院都係得23個座位,暑假個時次次都無晒位,買唔到呢,終於今日買到啦~

Standard Chartered Starsuite係另一個獨立入口既,一入去就有個bar檯位俾你選飲品(屈臣氏蒸餾水 (430ml)/果汁先生」(430ml) - 蘋果汁 / 橙汁/汽水 (中裝) - 可樂 / 零系可樂 / 雪碧 / 芬達 / 忌廉 / 雀巢檸檬茶)同爆谷(咸或甜)

我同老公都要左蘋果汁,另外要左一盒甜一盒咸爆谷~跟住有個等候區,有電視睇,有梳化坐...仲有洗手間添~

我地早左10分鐘到,已經可以入去影院內,咁當然要影下相留念啦~~張椅真係好舒服架,而且仲可以調較角度(背椅同腳踏),最盡可以成個人平躺架~

(我就係度玩緊張椅勒,哈哈)

今次既蝙蝠俠黑夜之神片長成兩個半鐘,不過我同老公就覺得睇得超舒服,好爽呢大家有機會真係要去試下呀~

講番套戲,我覺得幾精彩,小丑果然演得好出色,真係搶晒鏡~~香港個段太短啦,不過我都見到大茄陳冠希喎~

2008年9月9日星期二

CP舊同事飯聚@Ruby Tuesday

好耐無見既CP舊同事,今次既聚會又係約左好耐呢...應該都超過3個月~~

不過最後都係我生之前約得成~而且有2位大肚婆係好難得既組合,老公見到幅相話Joey媽點解咁瘦,又問我地有無指腹??我話唔知Joey媽既bb係男淨女,老公就話如果係同姓就指腹為姊妹,唔同姓先指腹為婚架喎....哈哈哈,咁都俾佢諗到~

今晚又係學野既一晚,事關兩位媽媽分享左好多育兒既心得...雖然我就仲未答到嘴,不過我好留心聽架...哈哈哈~

估唔到我生日已經過左個幾月都仲請我食生日飯,真係多謝晒

2008年9月7日星期日

爸爸生日飯@帝苑酒店東來順

今天一家人到了帝苑酒店的東來順預祝爸爸生日~

大家一見到我就話我個樣好攰,好似o岩o岩瞓醒咁~~唔係喎,我都無瞓晏覺,又唔算好攰,可以都係個樣太殘既關係啦~

今晚無影相,不過有d菜式都幾特別既,所以你地見到既菜式相都係取自openrice架~

今晚菜式如下:

口水雞:我覺得雞肉幾嫩滑

麻辣小象拔蚌:呢味幾特別,象拔蚌好新鮮

蔥爆牛肉:味道唔錯呀

炒鱔糊:都ok

砂鍋珍菌豆腐:呢味基本上都係我專用,我覺得豆腐幾滑,不過味道就淡左d

羊肉:呢味唔知咩名堂,不過我食左一小件,味道唔錯,食到有少少蘇味,不過我唔怕既~

鶴湖蟹影:呢味係得獎名菜,賣相已經拎滿分...味道就唔知啦,因為用上大量蟹粉我就無食到啦~

上湯娃娃菜:無特別

小籠包(10隻):呢度既小籠包麻麻地,好多地方都俾佢出色呢~

驢打滾:呢味係甜品,好似擂沙湯丸,不過係紅豆餡

麻辣小象拔蚌

鶴湖蟹影

(相片引用自openrice)

因為細妹有HSBC白金卡享有8折,折左$1340,人均消費大約$168,唔算貴喎...味道唔錯仲食得好飽添~

2008年9月6日星期六

「童裝舊換新」慈善活動

我又去左Hallmark Babies入貨啦,因為Hallmark Babies與救世軍合作舉辦「穿出你愛心童裝舊換新」舊衣回收換新衣活動呀~~

我係Hallmark Babies既fans,而且又係做善事,當然要去睇下啦~

顧客每捐一件衣服可作$100折扣優惠購買指定產品,產品餘額則只以現金支付,餘額既50%及捐贈既舊衣物將全數撥捐予救世軍~~

每次最多可以換$300(即係捐3件買3件)....我就買左一件6-12months既長袖和尚袍($168),1件0-3month綠色開胸bodysuit($138)同埋1件0-3month藍色背心仔($158)...折左之後只係補番$164咋,都幾抵呀,又可以做善事,值得支持~

而我其實係拎左d新既衫仔去捐架,因為99係大陸買左d半身和尚袍連褲仔,但係唔知點解d褲既設計係穿洞架(即係相中右下角既褲仔),我覺得好怪,而且質地又麻麻地,仲甩線頭線尾添...數量都有5,6件,所以咪拎3件去捐lor~

番到屋企俾老公睇,老公話d衫幾得意,而且忍唔住讚d質地真係好好多呢~~

其實可以購買既指定產品由0至6歲都有,初生既衫唔多,我見都有好多好靚既裙仔,其實都想買架,不過要2歲或以上著既,所以最後都係無買lor~不過呢個活動只限2間Hallmark Babies既分店,一間係黃埔花園,一間係將軍澳東港城,唔好去錯其他分店呀~

其實除左Hallmark Babies之外,我都覺得法國品牌Kaloo同埋Jacadi都唔錯呢,但係一樣係太貴,只可以得個恨字呢~~唔知幾時我又可以去呢2間入下貨呢,哈哈~

2008年9月5日星期五

第九次私家產檢(37 weeks)

今日除左去廣華,仲要去埋睇私家呢~

3星期後既我又重左5磅啦,即係話我既孕期已經一共重左40磅...唉,就算生完無左10磅,我仲要努力KO成30磅,點算

今日成個診所都充斥住普通話,好多agent好似帶團咁帶d大陸孕婦黎睇醫生,所以我今日等既時間仲耐過係廣華呀,成個半鐘有多呀...不過亦因此老公放工又趕得切黎見囡囡啦~

醫生見到我個肚都話大呀,仲話我d肚紋厲害添(連醫生見慣都咁講,真係好灰呢)...而且仲問我老公有無摸過我d肚紋,醫生帶點憐憫咁同我老公講"你摸下你老婆d紋,係"粒"落去架,即係皮膚組織因大肚而撕裂晒呀,好慘呢"....噢,聽完醫生咁講真係好感慨,我忍唔住咁問"咁點算呀?"....醫生話生完會縮番架啦,不過叫我一定唔好晒個肚,如果晒黑左就會好似西瓜紋咁好肉酸架啦....啊,收到收到,唔可以晒黑個肚,我會好好記住架啦~~

之後就睇囡囡啦,佢已經有2.9kg,即係6.38磅....醫生話雖然我個肚咁大,但係BB又唔算大碼,係中碼呀(同廣華姑娘講既一樣呢)...而我d胎水都好正常,真係唔知點解個肚會咁大,唔通多出黎個d都係肚腩黎?OMG

因為我係放前2後8,但係呢期返工都好快攰,而且盆骨位又痛,特別係坐低起身個下真係幾難受架...結果醫生開左一個星期病假俾我,等我可以休息多d...咁咪即係放前3後8,實在太好啦~~不過我星期一都會番工執埋d手尾先既,好在琴日已經handover左d工作俾替工同事咋,yeah~~