馬灣大肚相(36weeks2days)

呢期見到太多9月媽媽既大肚相,實在令我太羨慕啦~~老公見我睇到流晒口水咁,又見我不斷同佢講再唔影就影唔到我既大肚樣架啦....終於老公決定8月最後一個星期日同我出外景影最後一輯大肚相~

呢輯大肚相我有要求架,就係要同老公影多d合照,唔好只係得我一個,同埋要俾我著比堅尼影相~~哈哈,呢個要求真係堅持左好耐,老公先勉為其難答應架咋(基本上係整個孕期都在苦苦哀求)~~

最後老公定左外景地係無煙城市 - 馬灣(即係最美麗的第七天既拍攝地:珀麗灣),仲搵左佢個老死陳生做攝影師,因為咁樣就可以影多d合照勒~

(攝影師陳生,型唔型呢?)

個日真係又晒又熱,流左不知幾多汗...仲晒到我變燒豬添呀....原來都幾多人黎影相,馬灣公園仲貼左張告示話9月8日起要收$500先可以係公園入面影婚紗相或者進行專業攝影活動(即係用晒反光板個d呢)...好在我地早一步黎影咋~~

係公園影完相就去醫肚,食完個天都係好晒,所以去左百佳避暑(去百佳之前仲撞到舊同事岑太同佢老公黎影相呢...其實我係見到佢老公先架)...估唔到係百佳竟然俾我拍低左我一直想拍既造型 - 西瓜大肚相....我個肚真係比西瓜更大呢

(其實個西瓜都好重手架)

之後就去沙灘影埋我既比堅尼大肚寫真勒...我地當然去左比較偏遠既位置,以免引起大家對我個肚既注意啦(雖然依然吸引附近賓賓既目光,不過我都無理佢)....我仲要求吳生都除衫同我一齊影添~~快快手影左幾張就決定離開勒,因為真係又熱又攰,頂唔住啦~

可惜既係我唔可以俾大家睇下我既比堅尼相,因為老公唔鐘意我post,所以遲遲都唔俾相我,搞到我咁遲先可以寫呢篇blog~~我本來覺得無所謂諗住唔理佢架,不過吳生真係好似好唔開心咁呢...所以唯有自家珍藏啦~~