除夕晚餐@河泰國餐廳

其實我同老公好似已經好耐無出街食除夕大餐,通常係屋企食完先會出去街倒數~

不過今年唔同啦,囡囡咁細都唔o岩出去同人迫...不過吳爸爸話要應下節,出街食番餐喎~其實都無咩心水,唔想食咁貴...同老公去接左囡囡放學之後就去左始創間"河泰國餐廳"勒...今晚做任點任食自助餐,限時90分鐘,每位$138...呢個價錢係除夕晚黎講相當抵呀~~餐廳環境ok,食物都唔差喎,呢個價錢交足貨有餘~~

好在囡囡又係好快就瞓著左,雖然我依然係得單手食野,不過我都食得好多野,好飽...

呢個星期實在太多節目,我簡直身心疲累,今日返工老闆仲問我係咪病添,其實我只係好眼瞓,俾我瞓番夠就無事架啦...所以食完野即刻去搭小巴番屋企,我連街都唔想行呀~

返到屋企囡囡依然瞓到好似死豬咁,不過都要整醒佢同佢沖涼,因為吳爸爸話要乾乾淨淨咁迎接2009年喎~咁當然囡囡選擇左瞓覺去迎接2009年啦,哈哈哈~

除夕前奏@海港城

(Day 97 @ 海港城)

今年同囡囡去左好多商場影相,唯獨近屋企既海港城仲未影~~

因為驚除夕太多人,又驚過左除夕會轉新年佈置,所以吳爸爸就話今晚去影番d相~

囡囡開頭瞓著左,好在後尾影大門口時都醒左,不過就未瞓醒,表情呆滯左d啦~

1229的晚餐 ~ 酸辣湯烏冬 & 牛柳絲炒烏冬

由於星期六晚既BBQ派對剩低左d食物,屋主又食唔晒,於是參加者就要拎部份番屋企~~

我地就拎左d丸同埋牛扒...為免食物放得太耐,星期一晚就決定用黎做晚餐~~因為今晚會有人上黎屋企介紹教材,所以又要煮d快熟晚餐,諗左一輪決定買包烏冬同酸辣湯,用左十六蚊,就係是日晚餐 - 酸辣湯烏冬,加埋d丸做餸,搞掂~

另外就將d牛扒切絲用黎炒烏冬做飯盒,咁就可以消滅晒d食物勒~

除夕前奏@朗豪坊

(Day 95 @ 朗豪坊)

去完0809媽媽會既BB派對之後,老公就同我去左隔離既朗豪坊影相~~

不過因為我已經好攰,又加上佈置景點只係得一個,所以只係影左幾張就打道回府勒~~

BK0809媽媽會 ~ 0809BB 第一個聖誕Party

(大家估下banner上面邊個係abby?)

今日出席左一個好有意義既活動,就係BK0809媽媽會舉辦既"0809BB第一個聖誕Party"

吳爸爸一向都好少陪我出席網友搞既活動,今次一樣得我自己單刀赴會...抱住abby都無手影相,面對咁震撼既BB場面(有27個9月BB呀)都唔可以影多幾張靚相,真係遺憾

吳爸爸只係尾聲之時上黎接我,所以只係搵左幾個blog友BB影相咋(瑤瑤啦,小雞啦,靜怡啦)...派對期間只好靠其他爸爸既相機啦...我在此呼籲各位影到我同abby既話send番d相俾我啦,唔該晒~

我多謝君佑爸爸係我餵緊abby食奶既時候幫我拎飲品同食物,仲有小雞爸爸幫我抱左abby一陣等我可以休食食下野~~

不得不提就係與君佑媽媽相認,君佑同abby都係924出世架,而且君佑媽媽同我仲有共同朋友,真係好有緣呢~

原來0809既男BB係多過女BB好多好多架...Abby好矜貴呢...哈哈哈~~而且通常男BB都好大隻,好重磅又食得多奶...Abby既身形好嬌小呢~

仲有就係抽獎環節,abby又抽到1號啦....係fisher-price既玩具呀,so good

上次大肚時無去到0809媽媽聚會,好在今次參加到,真係好開心,最估唔到係自我介紹時大家對"吳家吾居"blog有咁大反應喎...哈哈哈~~多謝搞手fiona同埋eva呢....期待之後黎緊既其他聚會~~

麥當當媽咪會

之前見到麥當當既麥樂會同媽咪會招募新會員,不過個招募counter無人,所以拎左申請表返屋企慢慢睇~~

睇完覺得兩個會既優惠差唔多,不過對我黎講好似媽媽會既優惠實用d,而囡囡又未識食麥當當既野,所以最後決定只係參加媽咪會(會費要$30架)~

今日去0809媽媽會既聖誕派對途中見麥當當既招募counter有人,於是就交埋張form,拎左袋迎新禮物(字母餐墊 x 2, 濃湯寶, 司各脫軟糖,disney magazine 8折coupon同埋一本優惠卷)...其實單張入面寫既迎新禮物仲多左幾樣,不過全部都係寫明數量有限,我估間間分店都會有d出入卦~

不過最實際其實就係去食麥當當有野食送...哈哈哈~

1227聖誕BBQ派對@元朗

星期六有節目,就係去衛氏伉儷既元朗村屋開BBQ趴地啦~

著左幾日聖誕衫,今日就同囡囡做個新造型啦 ~~ 就係101斑點狗啦...哈哈哈~

不過好多朋友都以為係乳牛造型喎

今日有4個BB出席,最大既係歲半既Hilery,亦係唯一既男BB..之後就到3個月大既Abby,跟住就係個幾月大既沛盈同紀瑤(紀瑤係Hilery既妹妹黎)勒~~

不過Hilery似乎好鐘意abby,上畫既時間無人抱佢上梳化所以親唔到abby面仔,咁佢唯有親下abby既腳仔啦...如是者都親左幾次

到左夜晚Hilery被人抱左上梳化...啊啊啊...abby就俾Hilery錫左面仔啦,Hilery當然笑得好開心啦,而abby個樣就呆左lor...好搞笑,成班大人起哄添...哈哈哈~

吳爸爸同Hilery講,大個左就唔好咁啦,估唔到似爸爸既abby都一樣咁有吸引力

今日既趴地真係好好玩架,媽媽們仲一手抱住BB一手打牌添....呢個爛賭阿媽造型當然俾人影低做罪證啦,哈哈哈...不過幅相唔係我部機喎~

除此之外,就係交換禮物環節,我地抽到一盒Tumble遊戲同埋Body Shop gift set,而個茶壺就係上年既聖誕禮物(因為上年朋友唔記得帶,但係一年後先再見到面)...而對白色鞋仔就係衛氏伉儷送俾abby既禮物,仲有fisher-price係另一位教友送俾abby既,真係收穫豐富,滿載而歸呀

仲要提下就係今日食左Godiva既曲奇,好好味呀...唔知一盒其實要幾多錢既呢??

老公師妹探訪@Boxing Day

都話師兄師妹關係好架啦,今日老公既師妹一班朋友黎探囡囡~

最特別係呢位小師妹同囡囡係同月同日生架,不過相差左廿幾年...哈哈~兩位924既朋友當然要影番張合照啦~

今日係boxing day,囡囡就有禮物拆啦...就係呢對咁可愛既adidias波鞋仔~~其實我一直都心思思想買對adidias波鞋仔俾囡囡架啦,估唔到宜家有人送黎做聖誕禮物,真係太開心啦~~

My 1st Christmas

今日係聖誕節,我同囡囡換左套小熊維妮套裝,上面寫住"My 1st Christmas",好貼切架~

3個月啦~

3個月啦~3個月啦~

囡囡係平安夜呢日就3個月大啦...時間真係過得快~~

出左街食完聖誕大餐又影左聖誕相之後就要番屋企啦~~今日我又買左個蛋糕黎同囡囡慶祝,唔應該叫蛋糕,係一個應節既芝心雪人麪包先真~

囡囡對個雪人麪包都好有興趣咁架,不過無得食就扁晒嘴,哈哈~

雖然雪人麪包囡囡無份食,不過佢都有份大禮物喎~~就係之前係35日時幫囡囡做既手腳模送左貨黎啦~~份禮物真係好大架,拍埋一齊仲大過囡囡~~價錢係就係貴,不過手工又真係唔錯,我覺得好靚呢~~

3個月大既囡囡雖然仲未識得轉身,不過我已經可以打直抱佢啦,我諗應該唔使幾耐就可以轉到身架啦~

聖誕平安夜@Element

(Day 91 @ Element)

吳爸爸話今晚平安夜周圍都好多人,所以唔打算同囡囡去太遠既地方影聖誕相...於是食完聖誕大餐之後,我地就去左屋企附近既Element影少少聖誕相~

Element既聖誕佈置比較歐陸華麗,所以都唔多景點可以同囡囡影~~

不過著住聖誕裙既囡囡配起聖誕佈置又真係幾得意架~~

平安夜聖誕大餐@銀杏館

前個星期放工發現佐敦開左間"銀杏館"非常高興,呢間銀杏館就係專請退休人士做waiter個間,我其實一直都好想去試下,不過係中環唔係好就腳,估唔到佢係佐敦開分店喎...我個晚仲即刻同老公講話搵日去食番餐~

於是老公就提議平安夜去銀杏館食聖誕大餐,我當然贊成啦~我地無訂檯,所以我6點就去到搵位,原來佢只係留左2檯俾walk in客,我入去時已經有一檯walk in客坐低左,好在我都可以拎到位~

呢間銀杏館細細間,不過有兩層,但係都係逼逼地,不過環境其實幾舒服~今晚只係得一個聖誕餐供應,每位$398+10%(都可以接受啦,因為好似平時既價錢都要百幾蚊一個main course)~今日既menu係咁既:-

燒火雞雜菜松子仁沙律

焗蟹肉卷配黑魚籽

***

鮮龍蝦湯(我)

黑松露菌忌廉湯(老公)

***

煎彩虹魚配青口配意大利汁跟扁意粉(我)

炭燒頂級安格斯鮮西冷牛扒跟薯菜(老公要六成熟)

***

聖誕甜品

(上層cheese cake下層朱古力清蛋糕)

***

餐茶

仲有每人一份禮物包,其實係d聖誕帽,吹bb玩意既野~我覺得味道都唔錯,個魚好好味,個意大利汁配魚好夾,但係用黎配意粉就無味,所以其實應該跟薯菜好d,不過我自己鐘意食意粉...哈哈~

不得不提既就係waiter伯伯們啦,佢地雖然就真係慢手慢腳,不過食fine dinner又唔係食快餐無咩所謂...而且佢地真係好有禮貌,好有heart去serve你架,值得支持~

其實帶住囡囡去食fine dinner都驚驚地架,因為驚佢喊唔停嘈住人地破壞氣氛,好在囡囡都只係係頭盤時間喊左陣(個陣都只係有隔離檯),跟住就瞓左...而我就成晚都抱住佢,只係用單手用餐,好好功架呢~

到尾聲食甜品時,囡囡又醒左,餵佢食完奶就無咩事勒...伯伯們仲話佢都算乖,俾我地食到聖誕大餐喎...哈哈~

抵錫蝦子餅

這個12月因為是囡囡第一個聖誕節,所以我只顧著幫囡囡打扮及和吳爸爸計劃聖誕節目帶囡囡影靚靚聖誕相~

我是完全沒有想過要送聖誕禮物,也沒有要求老公送我聖誕禮物,因為今年的開支實在太多了,不捨得花錢買聖誕禮物呢~

沒料到老公還肯花心思送我聖誕禮物,是Burberry Blue Label的手袋呢

啊,實在太開心了....我想買個新袋子很久了,只是一直都不捨得,依舊用著那個連老公都覺得殘舊的Patrick Cox...哈哈~

老公對袋子的品牌不大認識,他說原想買LV,Gucci那類,不過價錢實在嚇了他一大跳...幸好有對名牌熟知的同事教路,最後買了這個粉紅色Burberry Blue Label手袋...我很喜愛啊(只是我也想知道價錢多少?要二千元嗎?)...真的是個抵錫蝦子餅

雖然我真的沒有聖誕禮物送給老公,不過我帶了老公去吃平安夜聖誕大餐也不錯吧,哈哈~

1223的晚餐 ~ 自家涮涮鍋

天氣咁凍最o岩就係打邊爐,於是我就鎖定今餐做呢個冬天既第一餐火鍋~

不過唔知點解今日放工好塞車,都未到平安夜,d人好似已經出動去玩咁,搞到我比平時遲左成15分鐘先落車,所以都無咩時間去買火鍋料...又因為肥牛無特價,於是買左特價既羊肉片,變左涮涮鍋~

其實今日只係買得好少野食,不過咁都好既,因為可以食得晒(只係剩低2包烏冬),而且只係用左五十幾蚊,又抵又飽又開心仲好溫暖添~

育嬰園的聖誕禮物 - Part II

今日返到屋企,老公拎左隻狗狗毛公仔俾我...原來係放學時育嬰園既姐姐俾佢既,仲話要洗左先好俾囡囡玩....哈哈,原來上次盒聖誕咭只係頭盤,主菜係呢隻豆豆狗狗毛公仔...仲代囡囡寫左張聖誕咭送俾我地~~

老公接到張咭既時候都不禁笑起上黎,呢間育嬰園真係好搞野,哈哈~

聖誕前奏@Lee Garden

(Day 88 @ Lee Garden)

今日係聖誕前奏第二擊~~

星期五已經返左夫家個邊食冬至飯,而是日冬至就約左返娘家個邊食飯(去左太古既哈魯邦食韓國菜),難得過海,於是決定帶囡囡去銅鑼灣影聖誕相~

多得之前agent姐姐既介紹,我決定今日既外景地係利園商場II期既聖誕佈置...雖然只係幾個車卡擺設,不過影出黎既效果都唔錯架~

今日我受到不少途人既注目禮,咁大個女除左結婚個日好多人望之外都未試過,皆因我幫囡囡著左條聖誕裙,做個聖誕可愛小B...所以其實係向囡囡行注目禮先o岩~~

好快就係利園影完相,見仲有時間就兜左去Time Square影下...咁出名既Carrie作品當然好多人影,不過我都係鐘意Lee Garden個邊既佈置多d,所以呢度只係影左2,3張就無興趣再影啦~~

老公中學同學探訪

今日又有朋友黎吳家探囡囡啦,就係老公既中學同學~

其中一位剛剛係8月生左個囡囡,叫睿琳...大abby1個月呀,原來1個月都可以分別好大架~不過睿琳真係好多頭髮,而且仲好熱底,黎到吳家一直流汗,不斷除衫,除到得番1件先好d咋~

兩個BB做左爸爸影相模特兒...初初未熱身,眼神呆滯~

一個O嘴,一個扁嘴...好似好無奈喎~

影下影下開始熟落,交d戲俾你啦~

abby仲挨左落去睿琳膊頭度添~

睿琳仲玩到瞓低左~~

吳爸爸除左自己個囡囡唔敢抱其他BB...咁我就抱住睿琳影番張相啦~

兩個家庭又影張啦,睿琳同abby一樣都係番育嬰園架,所以我地兩位媽媽好多野傾,哈哈~

1218的晚餐 ~ 香菇肉碎炒幼麪

煮左幾次都係飯,今日就炒個麪做晚餐啦...係超市見免治豬肉半價又見秀珍菇特價,所以就買黎炒麪~~開埋屋企盒壽x牌幼麪,所以今餐只係$15.5,咁當然預埋又聽日既飯盒啦~

雖然好簡單,不過老公話好好味,仲話好耐無食我煮既炒麪喎...睇黎佢真係好似好掛住我煮既野食喎...哈哈~

 

1217的晚餐 ~ 滑蛋牛丼

呢個星期仲未煮過飯,今日係超市見到肥牛特價,決定整滑蛋牛丼做晚餐~

屋企仲有盒東方紅既鮑魚燉雞湯包,今晚順便飲埋佢,一盒兩碗o岩o岩好,仲有湯渣食~~

牛丼好耐之前整過一次,今次係因為屋企有枝牛丼汁仲未用又就黎過期,所以諗住用埋佢,見到肥牛特價就二話不說買黎煮,買多個洋蔥就得,成本只係$16,仲有得留飯盒添~~

上次就咁牛丼,今次加埋雞蛋做滑蛋牛丼,味道更豐富...落埋七味粉,味道都真係唔差架