11月6日,星期六
這天吳爸爸長週,而我今天也有2個重要的任務!首先就是一早去又一村學校交留位費!由於天氣仍然有雨和較冷,帶著囡囡出外仍然有點狼狽!交留位費其實很快,因為流程和面試那天一樣出動全校老師,仍然列隊在校門口恭迎家長,感覺真的很好,哈哈~
由於下午2時有面試,交完留位費回到家已經11時半(很塞車呢!),就哄囡囡午睡,以免面試時扭眼瞓,很順利的11點9就睡著了!然後吳爸爸也下班回來,急忙吃了點東西就出發去面試!
是日面試是九龍塘傳統名校 ~ 國際英文幼稚園(簡稱SC)....我主力報考有全日班的幼稚園,半日制的幼稚園相對很少申請,真的是我很欣賞的才會報名!SC算是我唯一報名的九龍塘區傳統名校,因為我欣賞其英語環境,加上SC也很著重愉快學習,K2才學寫字,功課不多,沒有默書,有很多活動..感覺是學術和遊戲都平衡得很好!...不像其他傳統名校多功課又讀很深的課程,有些更沒有活動呢!雖然知道很難考上,但還是想給囡囡試下,也讓我見識下!
不過由一開始申請就已經讓我大開眼界!事緣SC的網頁一早已經寫上9月13日(星期一)開始接受申請其申請表(注意是申請申請表咋!),可以親身交文件或郵寄,接受申請日期只4天!可是第1天已經從網絡得知很多家長親身交文件,說人龍非常誇張!而我當然沒有請假親身去交,只是下班後才將文件放入郵筒!到第2天早上SC的網頁竟然寫上所有申請表已派發完畢!!!!這引來了家長的嘩然,不少打算第2天或之後才交文件的家長立即自責未能為子女爭取面試機會,而郵寄的家長也非常擔心不獲發申請表....這已經讓我見識到名校的威力!幸好最後我也收到SC寄來的申請表,面試日期就是今天下午2時!
由於昨天SC已開始進行面試,所以基本上都大約知道面試的過程...我們為免在校外排隊等得太久,只在5分鐘前趕到,那時in 1:45pm的家長正進入校園...而我們排了一會,in 2pm的人龍也開始移動了!吳爸爸聽到職員說昨天是in大仔大女,今天是in細仔細女,怪不得很多人也說SC不會只收大仔大女,原來一早已將學額分開了,非常公平啊!今次一樣就我陪同面試,吳爸爸在外等候...我沒有拿袋,只放了一細盒星星餅,一細盒朱古力奶,手提和紗巾於褸袋以備不時之需!
因為我一向都用廣東話和囡囡溝通,所以我選了考英粵班以廣東話面試...聽說選擇英普班的小朋友除了以英語面試外還要再以普通話面試呢,而且也等得比較長時間才能去面試!
入內後先在有蓋小操場排隊等候,可能是日都是細仔細女,也發現不少小朋友在哭...囡囡看到這情景,樣子好像有點驚慌和緊張,幸好校園內掛了不少手工勞作動物造型,於是我便和囡囡看那些有趣的公仔,她的心情看來放鬆了,有點笑容!很快就可以入課室對資料,不用等就可以進入第一部份面試!
Part 1
第一部份是group interview,一個課室內共有4張檯,每張檯有4個座位,放上玩具lego...囡囡的一組其他3位也是男生,老師就在旁觀察小朋友的情況然後評分,家長就要坐在檯後的位置....囡囡也算定定的安靜的在玩,唔有人搶她玩具的話應該可以平安渡過...同組其中一位男生超活躍,不肯坐下玩,那位媽媽不斷在旁勸說,跟著又把lego掉在地上,媽媽只好又不斷說no,stop等等,看到那位媽媽已經有點黑面呢,老師也忍不住叫男生試試坐著玩~囡囡看到其他男生不時都走到媽媽身旁,所以也不時看看我,我都只是叫她繼續玩,不過囡囡也有1,2次忍不住走來我身邊,我安撫一下也肯回去玩...囡囡砌了一點lego,期間也有男生來搶她的玩具,她有點不依,但叫聲沒平時大,還好,哈哈...接近尾聲,老師叫小朋友幫忙拆開lego,其中2位男生都跑回媽媽身旁,囡囡就拆了幾個,還拾起了地上一個lego放回檯上呢,我覺得她做得很好!
然後我們一組就比帶到面試室,內有3位老師也正在面見小朋友,其中一位是年青的姐姐,另外2位年紀比較大,但其中1位外表比較友善,另1位則較嚴肅...這位老師面見完後還會慢慢的給分數才叫下一位(另外2位老師很快就會叫下一位了!)
等候期間感覺囡囡好像有點緊張(因為氣氛實在很嚴肅,沒有笑聲很安靜的!),我便拿出星星餅給囡囡吃,讓她開心一點,這招對囡囡而言是非常奏效的!那3位老師面見完就叫我們的一組,可惜都沒有囡囡份,都是見另外3位男生...囡囡要再等多一輪,然後下一組的小朋友又進來了!
第1位男生面見完以為到囡囡,可惜卻是叫新進來的小朋友...唯有等另一位老師,結果另一位年青的老師又叫另一位新進來的小朋友,囡囡不幸的要面見那位最嚴肅的老師!終於第3位男生都見完了,還是等老師給好分數才叫她呢!
Part 2
SC的個人面試都有幾多task架,很長的面試實錄!
老師:午安
囡囡;.....(無回應)-->(因為我只教佢講早晨,無教過午安呀,哈哈)
老師:午安呀...
我:佢未識講午安呀!
老師:你叫咩名呀?
囡囡:(極細聲)阿Y
老師:(聽唔到再問)
囡囡:(仍然好細聲)阿Y
我:(同老師講)佢話叫阿Y
老師:(好似覺得唔答全名好奇怪)咁你全名叫咩呀?
我:(我心諗點解仲要問落去呢?)
囡囡:(都係好細聲)ABBY
我:(估唔到囡囡見佢問咁多次,轉口風答英文名)
老師:(聽唔明,繼續問)咩名呀?
囡囡:ABBY(仲係細細聲)
我:(同老師講)佢話自己叫ABBY呀~
老師:啊,你英文名叫ABBY呀,咁中文全名係咩呀?吳....
我::(真係心底好想叫唔好再問得唔得呀!)(同老師講)其實佢未係好講到全名...
老師:唔緊要啦,今日邊個帶你黎架(終於都唔再問叫咩名啦!)
囡囡:(用番正常聲線啦)媽媽...黎
老師:阿Y係男仔淨係女仔呀?
囡囡:女仔
老師:邊到你阿Y個"口"呀?
囡囡:指住自己個口
老師:咁"口"係用黎做咩架?-->(其實呢條我覺得有d深,都無咁樣教過囡囡)
囡囡:食野-->(估唔到囡囡識答,可能因為佢鐘意食野啦,哈哈)
老師:(拎出圖片配對卡,卡上有3個情景:小朋友正在梳頭,飲水和瞓覺,另有3張用具卡:梳,杯,枕頭..老師示範第一幅梳頭)呢個小朋友係咪用梳梳頭架,咁我地將梳放係張相下面,咁呢幅係用邊個用具呀?
囡囡:放左杯張卡係飲水照下
老師:咁呢樣野叫咩呀?
囡囡:....(唔答佢,反而指住小朋友正在瞓覺張相)瞓覺呀!
老師:係呀,瞓緊覺呀...但係你未答我呢隻係咩黎喎?-->(又開始不停追問!)
囡囡:(好似答左d野,不過連我都聽唔到佢講左咩?...仍然係咁指住瞓覺張相)
老師:咁呢張係用咩黎瞓架?
囡囡:放岩左枕頭張卡
老師:咁呢樣野叫咩呀?
囡囡:....(無答)-->(因為我都無正式咁教佢講過)
老師:你識唔識講呀?
囡囡:唔識-->(哈哈,估唔到囡囡竟然答老師話自己唔識,我覺得好搞笑)
老師:咁飲水個樣叫咩呀?--(又問番隻杯啦...)
囡囡:(又係唔知答左咩,佢明明識講杯架喎,但偏偏唔肯答,哈哈)
老師:(拎左張圖卡,左同右都係一樣既紅色花,中間都係花,不過就係藍色)呢度有邊朵花係唔同架?
囡囡:(猶豫左一陣,最後指住左藍色花)
老師:係唔同喎!
囡囡:(無郁到,繼續指住藍色花)-->(其實我都覺得呢條深深地,問唔同,仲要再質疑佢,估唔到囡囡答得岩!)
老師:(拎左紅,黃,藍既筒,另外有紅,黃,藍波板糖)你可唔可以幫我分番岩d顏色將波板糖放入去呀?
囡囡:(先拎紅色放入紅色筒),red red
老師:係喎,係red喎(笑住講)
囡囡:(放入藍色)藍....(放入黃色)黃-->(呢個task囡囡玩得最開心,可以分顏色最容易,老師未問咩色已經一邊入一邊講)
老師:好叻喎,咁你幫我拼埋呢幅拼板啦(有4個公仔圖案既拼板)
囡囡:(先拼好最右邊2塊,再拼最左邊1塊,但呢塊唔岩位,放唔岩)
老師:你轉下佢呀...
囡囡:(跟住轉,不過轉得太多,仍然放唔到)
來來回回轉左幾次都轉唔岩
老師:不如放左波波個塊先啦~
囡囡:(放好左波波個塊,再拎番最左邊1塊,終於都轉岩位,放好左)
老師:你咁叻,送份禮物比你啦...(拎左塊餅比囡囡),要講咩呀
囡囡:(笑住)多謝
老師:乖啦,不過宜家唔食得住喎...宜家老師要問媽媽野,你坐一陣啦~
老師:(問我)點解選呢間學校呢?
我:因為我幾欣賞你地既英語環境,不過除左學術方面,我亦好鐘意你地用活動教學,可以係兩者之間取得平衡,我覺得好好~
老師:呢個係假設問題,如果係街小朋友發脾氣你會點處理?
我:首先我會了解一下發脾氣既原因(老師點答喎),如果係因為唔舒服,病之類既原因,我會偏向遷就多些...但係如果只係情緒問題,我會解釋點解唔可以發脾氣...好似扭買玩具,我會話宜家唔係買玩具既時候,想玩玩具就番屋企玩,會堅持原則...
老師:咁好啦,我地今日面試都差唔多...結果大約係12月中公佈...拜拜
囡囡:拜拜
我:可唔可以拍好張椅先走呀?
囡囡:拍好自己張椅,再拍好我張椅
就係咁完成這個非常嚴肅和認真的面試!離開校園才2:45pm,不是等面試等多了一round,應該30分鐘就可以完成,所以我覺得流程也很暢順!
說真的,這雖然已經是第4次面試,但氣氛絕對比之前的嚴肅得多!抱著平常心的我也突然緊張起來,心卜卜的跳呢!加上這位面試老師務求要囡囡回答每條問題,不是正確答案還是不斷追問,實在加添了不少壓力...其實不要說小朋友,我在一旁都覺得這位老師問得太多了,不是答了嗎?幹嗎還再問下去...但我還是很欣賞其認真的面試態度,感覺比那試幾分鐘就完成的好得多...那些也實在太敷衍,如其等很久才問幾句,不如不要面試算了!
今天看到囡囡在壓力下也很盡力的表現,我實在很欣賞!離開學校後我便立即獎她喝朱古力奶,她的笑臉立刻就回來了,鬼馬精靈的她又重現眼前...真的不要少看小朋友,他們真的能感受到面試的氣氛啊!
*********************
11月30日終於收到結果!是備取生!坦白說,我是有一絲絲的失望!因為我真的覺得囡囡在面試中表現不錯...不過知道結果還是好的,起碼不用心掛掛!
