楊貴妃御宴@皇家太平洋酒店

2011年3月8日,星期二

是日三八婦女節獲she.com邀請到皇家太平洋酒店品嚐其新推出的楊貴妃御宴!

席間一半為she taste的blogger,一半為she.com的同事,還有酒店市場部的職員!

未開席先收到kathy的自家雪球曲奇,真有心!(第二天開後就忍不住一口氣吃光了,很好味呢!)

楊貴妃御宴,聽個名都知一定用名貴食材啦!而且貴為中國四大美人之一,酒店都以美顏滋補作為御宴賣點,令人非常期待!

金衣白玉 (凉伴蘆薈帶子滑豆腐)

第一道菜係冷盤,先講下有幾養顏先!蘆薈含有多種人體細胞所需元素,有助提高新陳代謝,保持肌膚紅潤...豆腐內的蛋白質同脂肪酸可以維持皮膚彈性和細嫩!

單睇賣相,有金箔係面即刻覺得好名貴!味道其實都唔錯,豆腐有濃濃的豆香,亦見嫩滑!不過我覺得用黎涼伴蘆薈同帶子既醬就太搶味啦....我覺得唔用呢隻咁搶既醬會更好,味道清淡d應該較合適~

雪裡藏珍 (燕窩炒鮮奶)

呢個乃御宴中的推介菜式!有燕窩,有牛奶,唔使問都知對肌膚有幾好啦!

呢個好味道,不過最出色竟然係個雀巢!脆卜卜又唔油....酒店同事話係用麵黎炸架喎!

參靈養生 (靈芝菇伴釀海參)

又一滋補食材海參!個汁清清地,唔算好濃味....

海參內釀有蝦膠,都幾飽肚架!

花樣年華 (蟲草花北菇炖鰵膠)

來到湯了!嘩,有花膠呀!豐富骨膠元我最愛!

雖然唔係用冬蟲草,不過我諗蟲草花都應該唔錯卦....

湯料十足,好大隻花菇,好大個花膠呀!正值喉嚨不適,飲完個湯舒服好多呢!

雪肌透紅 (米黃浸生班球)

食到呢個魚真係開始飽飽地....個魚好滑,最特別係個汁,原來係稀粥黎既,唔講真係唔知呢~

沙窗倩影 (高湯釀竹笙)

呢味用左露筍釀竹笙,露筍好嫩,竹笙就爽,配合得幾好....加上南瓜做底既上湯,味道都唔錯~

貴妃炒飯 (牛油果帶子炒飯)

用牛油果黎炒飯都係第一次食,個人覺得唔太夾,牛油果質地軟淋,配上帶子炒飯有一種淋patpat既感覺...炒飯味道其實唔錯,但咁樣配搭我就覺得影響左,如果放d有咬口既黎配搭應該會更好~

御庭貢品 (貢梨炖雪蛤紅蓮)

雪蛤應該都係第一次食....但我都唔知入面邊d係雪蛤,哈哈~

味道都幾薑下,好在我對薑味唔太抗拒,所以都覺得唔錯!

玉環美點 (圓肉桂花糕/北海道牛乳雪米糍)

最後既美點雙輝!

心形的桂花糕,清甜好味!

好美的粉紅雪米糍,超級好味!外皮煙un,內裡香濃的牛奶味,正正正!

精美鮮果盤

簡單不過的生果盤,無咩特別!

真係好少機會可以食到呢類咁有特色同主題的中菜!好榮幸成為坐上客!要知道用左咁多名貴食材,價錢應該都有番咁上下!原來每位淨價$688(2位起)!

你問我就當然覺得貴啦!但係又有金箔,燕窩,海參,花膠,竹笙及不同海鮮,咁我覺得價錢都算合理!如果想食番餐好,又想食完可以靚靚,都不妨考慮下呢個楊貴妃宴!

供應期有限,做到4月架咋!

今餐真係多謝晒she.com同埋皇家太平洋酒店!