幼潛第5堂(July 09)

吃完午餐就去搭小巴返屋企,係小巴上聽到收音機話掛左3號風球,不過一d雨都無喎~

即時諗起下午仲要唔要番幼潛呢?我記得手冊寫住話3號風球係唔使番既~

本來都諗住唔使番,點知返到屋企發現我miss左個call喎,原來係幼潛既bonnie姨姨打黎,話今日會照常呀(可能因為之前已經停左課3星期,再停可能都無時間補堂啦)~

好在今次既3號風球無點落雨...我地出發同返屋企都唔使開遮呢~

可能都因為打風,今日得4個bb返黎,仲要有1個扭眼瞓,成堂都唔肯玩,結果就只有3名寶寶上堂勒~

開頭既唱下歌仔,摸下唔同質感既東西,之後就係推大波波勒~

今次推大波波,梁姨姨話係要bb學反手推個波出去既,因為平時都無咩機會用反手,abby都算掌握到梁姨姨有讚囡囡呀~之後就要bb扶住波波企係度,呢個環節abby做得最叻....一來波波係有一粒粒突起既,囡囡唔怕摸到...二來姨姨們係不斷係度拍打緊個大波,即係bb們係扶住一個震動中既波波,但係囡囡依然扶得好穩陣....三來我係無扶住abby架,只係係佢後面...abby表現出色,令兩位姨姨大讚(因為兩位姨姨都記得abby係唔肯爬既)

而今日既重點環節就係爬過障礙物,呢樣對abby黎講真係好有難度呢,因為abby仲未爬麻~不過abby一樣要試,仲要今日得3個bb玩,好快就輪到,要爬好多次呢~

梁姨姨個邊首先好似個小滑梯咁既,首先要爬兩級,之後爬幾步就落斜....然後相反方向,上斜先,之後爬幾步就落級....而bonnie姨姨個邊就好似跨欄咁,一個矮d一個高d,不過就係要爬過呢兩個欄~~

頭個1,2 round,abby都未有發脾氣,雖然郁幾郁又放軟左手腳,不過都算係完成到(唔好誤會,abby無爬既,係姨姨扶住佢黎郁)...不過到3,4round,可能開始攰加上佢本身唔鐘意爬,所以開始有喊下,或者成個攤係度休息,總之就唔願意玩落去....最後勉強叫完成左啦~

今日可能少人,最後梁姨姨都有少少檢討...abby呢,已經進步左好多,不過都係要係屋企同佢做多d爬既活動喎....希望囡囡keep住進步,下次上堂可以爬比大家睇啦~