本來今日係想煮飯既,不過老公話已經睇中左個鏡頭諗住做佢既生日禮物,但係好似好貴喎...於是我當然要去睇下啦~~
就係咁去左旺角勒...老公睇中既鏡頭要成$46xx,好貴呀
...唔怪之得之前話請佢去生日旅行話唔好,去廸廸尼玩食buffet又話唔好....原來想要黎買鏡頭....算啦,見係老公生日就俾佢買啦~~點知...點知去到櫃檯話要,職員先話原來個鏡頭淨係出左配Canon,未出配Nikkon呀
....老公即時面色一沉,咁無法啦....天意黎既,唔係我唔俾佢買呀....睇黎老公又要費一番心機先可以物色到另一款心頭好啦~
今晚決定去Lafuma食晚餐,其實想試好耐架啦...雖然旺角咁旺,但係呢度完全唔似係旺角既餐廳,因為真係好少人,唔使排隊,我地食到尾都係得7檯人咋...仲見到洪朝豐黎食野添~
烤牛柳 鵝肝醬配千層薯蓉雜菜($128)
本來老公係叫左個$108既牛柳架,點知黎錯左我地都唔為意...老公照食埋單先知道原來係貴d個款(其實本來叫個款無千層薯蓉,老公食時都覺得奇怪架啦,不過因為太好食,佢就無出聲lor)~~
老公每樣食物都有俾我試,我覺得好好味喎...牛柳五成熟幾嫩滑,配上鵝肝醬好好味...而雜菜都好有心機煮,千層薯蓉更令老公讚不絕口,真係一片片咁層層疊架,唔怪得佢明知黎錯左都照食啦~~
法式乾封鴨腿意大利飯($108)
水準一樣唔錯,可能係乾封關係,無疑鴨腿係比較乾,不過味道都幾好....鴨腿面有d甜甜地既野同鹹味既鴨腿起左中和作用....意大利飯亦都煮得好creamy,軟硬適中...不過越食得多就開始覺得味道鹹左少少~但係我都好滿意~~
今餐其實係有主菜買一送一既優惠,因為我買左張叫goodtimes卡既東西,張卡既部份價錢其實係捐俾慈善機構,而張卡既好處就係有好多餐廳既優惠...遲d等我食到優惠cover晒張卡既面值再有得賺既時候,我就詳細介紹俾大家啦~~
本來同老公夾左每人都叫$108既主菜,咁就無蝕啦...點知老公又食錯左個$128,早知我就叫貴d既龍蝦意大利飯啦....不過其實鴨腿意大利飯都好好味....用左優惠呢餐只要$158(慳左$108)
其實呢間餐廳好唔錯,環境用左法國山區特色,全木餐檯....係度食飯好清靜呢,應該係旺角好難得既一間餐廳~
間餐廳同lafuma呢個牌子有關係嗎？？
回覆刪除點解妳成日都搵到新餐廳試食？妳真係有情趣～～
[版主回覆01/04/2008 23:25:00]有關係架...其實nike,lafuma,puma,cat等等既牌子都係一間叫toronto sports代理係香港開專門店架....呢間lafuma cafe係tornoto sports同lafuma合作,係全球首間法國山區概念餐廳,就係波鞋街之麻~~
樓下仲有間Lime@T5 是以健康飲食及免費wifi既sport cafe,聽聞都ok架~
我一向都鐘意周圍食,不過有時餐廳太貴唔捨得o者,我仲有大把想試既餐廳架~~有排都未食得晒啦~
嘩! 你不愧係優惠怪!!
回覆刪除我反而有興趣知洪朝豐個樣癲唔癲?
[版主回覆01/05/2008 00:52:00]洪朝豐佢紮左個"計"lor...打扮都唔算太激既~~
d 野食睇落幾漏咁...會唔會好濟?
回覆刪除[版主回覆01/05/2008 00:52:00]咁又唔覺得滯喎...份量o岩o岩好~
響旺角邊樹呀？好似幾正咁喎~~
回覆刪除[版主回覆01/08/2008 00:01:00]係花園街76A,3/f
依依依.. 你hubby想買邊枝鏡呀? 我今日都準備去買聖誕禮物俾部機~~~
回覆刪除[版主回覆01/08/2008 00:00:00]枝鏡係副廠騰龍新出既28-300mm,有防震個隻~~
好野呀
回覆刪除~~~~~~~~~
你無睇錯 , 亦不是我寫錯 ,
" 硫磺老火湯 "
可能平日你飲左都唔知呢 !
呢間食肆真係唔錯呀，年幾前試過佢0既set lunch，既美味又有誠意。
回覆刪除主菜買一送一，呢張咭看來值得申請喎，星期三有冇得帶個食肆list來睇0下，我怕剛好食中邊間就唔抵啦！
[版主回覆01/07/2008 23:59:00]無問題,張list我係跟身既