Abby yoga 六式

5個月既囡囡除左會扭黎扭去(注意:唔一定反身,不過就鐘意左擰右擰),佢呢期仲好鐘意做baby yoga...難得吳爸爸影左佢呢套招式,一於同大家分享下~

第一式: 平卧BB床

第二式:雙腿向上屈曲

第三式:雙手捉住腳仔

第四式:雙腿再向胸口屈曲

第五式:食手仔

第六式:回到第一式

5個月

(Day 155 @ Home)

2月24日,囡囡5個月大啦~

不過是日老公要去飲,本來仲被邀做兄弟架,但係因為要接送囡囡,恨左做兄弟好耐既吳爸爸都忍痛拒絕左~相信當晚吳爸爸真係玩得好開心,因為我第一次見到腳步浮浮飲醉左既老公番屋企呢~而我就約左媽媽食晚飯,因為囡囡差唔多成個月無見婆婆啦,要見多d先得~

就係因為咁,所以要遲1日先可以同囡囡影番d相,當然唔少得又有蛋糕仔啦,囡囡今次仲走去用手摸個蛋糕添~今次我買左芒果拿破倫,好味道,影完相就俾我一個人食晒,哈哈~

5個月大既囡囡終於識得用手捉住自己隻腳板啦,哈哈~不過難為了要負責換片既爸爸,吳爸爸話自從囡囡識轉身扭黎扭去就好難換片,就算唔扭宜家又會捉實腳仔,真係換條片都搞好耐呢...哈哈~

仲有就係5個月大既囡囡終於沖涼時唔喊啦,今日仲會踢水添,雖然就整到周圍濕晒,不過都好過次次沖涼都喊啦~

不少得就是5個月大的囡囡已經領了洗,可以跟爸爸上教堂,第日仲要返主日學呢~

很開心囡囡每個月都在進步當中,雖然我開始懷念初生的囡囡,不過我更期待囡囡將會給我的無限驚喜~

Cheer-O Cafe@YWCA

星期日同囡囡領洗完就去左其中一個教友屋企坐,夜晚大伙兒就去左何文田女青年會(YWCA)既趣屋餐廳食晚飯~

雖然細細間,不過都幾旺場喎...原來夜少少仲有民歌現場表現添架~呢度都好多set dinner選擇,由$6x至$14x都有得選擇...我就要左個焗脆皮牛柳($88),算唔錯呀~

其實呢度都幾近旺角,大家不妨去試下~

Abby = Colette

(囡囡對禮儀書很有興趣)

222都算係abby其中一個重要既日子,因為係abby領洗大日子呢~我幫囡囡悉心打扮過,穿上了細姨送的粉紅紗裙,大家都說abby很斯文漂亮呢~

雖然我就唔係教友,不過吳爸爸係喎...而我都好樂意讓abby加入天主教呢個大家庭~

我覺得abby都好似好鐘意加入呢,佢竟然好鐘意睇本禮儀書,比係屋企睇教材書仲專心呢~(真的不明白,全部都係字,又無公仔又無顏色但係睇得好專心)

(Day 152 @ Church)

成為教友是要改聖名的,吳爸爸的聖名是天使之首Gabriel...本來吳爸爸想用其他天使做abby的聖名,只是其他天使聖名都不合女仔用...最後吳爸爸選了Colette作為囡囡的聖名,話係法文好有型喎~

(囡囡領洗過程)

除了要改聖名之外,還要幫囡囡找個代母,代母的責任就是在宗教上給予abby指導...而吳爸爸請了chole做囡囡的代母,最大主因是夠年青啊,而且也是與吳爸爸一同成長的,很稔熟...哈哈,這樣不易有代溝麻~~

因為教堂是位於吳爸爸的母校,所以還碰上爸爸的同學,可以一起影相留念呢~

除此之外,就是吳爸爸的一組教友還有2位女bb和abby一同領洗,她們都是11月出生的,所以abby是大家姐呢~~

吳爸爸的一組教友陣容愈見鼎盛,很多新力軍啊~~真的很高興....願天主祝福大家~

現在的我(生理篇)

其實生完囡囡之後,我一直都想寫一篇關於自己既文章,因為我覺得現在的我完完全全是一個新的自己,好多新既感受,成為媽媽無論生理同心理都有好大既轉變~

生理篇

身型

最明顯當然係身型啦,特別係呢期0809媽媽們提出瘦身大行動,真係不得不面對呢個殘酷既現實~

實不相瞞,個人最瘦紀錄係113磅(不過已經唔記得係幾時既我),結婚時118磅,婚後體重慢慢爬升,足足重左10磅,懷孕前一直係128呢個磅數徘徊~可幸有番咁上下高度,勉強還不算太肥,而且也還未去到自己最肥紀錄的132磅~

可惜,整個孕期我共重了45磅,生完無左20磅,坐完月瘦左5磅,產假完時又少左5磅…結果復工時都仲有15磅跟住,一直都無點跌勒….所以之後我都唔想去知自己幾重~

只係覺得自己好肥,個肚又大又鬆又多肚紋,唔想去買新衫,因為一來覺得著起都唔靚,二來慳番d錢,三來我好想可以著番以前既衫褲~~

2月頭我再嘗試拎條牛仔褲出黎著下,今次終於著得落,仲扣得埋鈕添…我真係開心到飛起,不過感覺依然係迫迫地,不過著得番我已經好開心~

終於剛剛的星期日我去左做facial加通淋巴,再上磅,原來比之前輕左5磅,宜家仲有10磅要減呀…不過我唔諗住節食啦,因為其實我都唔係食好多野,而且仲要餵人奶,所以都係諗住從運動著手,希望每晚瞓之前做下sit up啦,減肥之餘可以收下個肚呀麻~

睡眠

相信每位新手媽媽都會認同,生完之後既睡眠時間真係少之又少….一直以黎我都係好爛瞓既,放假用黎瞓晒佢都得,老公曾經試過同我鬥瞓得耐,結果佢話我好恐怖瞓極都唔醒….原來後生時瞓得咁盡係要還架,宜家既我每日大慨只可以瞓4個鐘,因為我並無特別同囡囡戒夜奶,自己又遲瞓又要早起身泵奶,就算放假既日子也只可以多睡2小時,因為囡囡無論如何8時多都一定醒左要你陪玩~~以前朝早俾人嘈醒會發脾四,宜家唔發不得止,仲會笑住同囡囡講早晨,你話係咪變化得好大呢~

猶幸嚴重缺乏睡眠既我,樣子還算精神,可以頂得住...黑眼圈呢無我想像的恐怖,算係咁啦~

寒底變熱底?

其實我唔知自己究竟係寒底或是熱底,只是從前的我是個手腳冰冷的人...不過自懷孕之後已經無出現呢個情況,就算宜家生左都一樣,呢個冬天我都無點著過大褸,前幾日回暖我已經覺得好熱,夜晚瞓覺會出汗,簡直離晒譜,都唔知黎緊既夏天點算?

整體黎講,我覺得自己既身體並無因為生完而變得差左,或者都係因為我好乖咁坐月~不過,宜家既我真係好少運動,其實我都好想去跑下步,打下羽毛球,跳下舞咁....唔知幾時先做到呢?

Hot Dog Formula

琴晚99又話拎湯同飯餸上黎啦,其實真係辛苦佢,不過佢黎到都係為左見囡囡...不過琴晚99上黎時囡囡已經瞓左,99就話係屋企真係乖d,咁早就瞓著,由於無得同囡囡玩,所以好快就離開勒~

今日99無打黎啦,不過我都無煮飯...因為我買左熱狗餐俾吳爸爸食~

吳爸爸一向都好鐘意食包,特別係熱狗...都好耐無食熱狗啦~因為我有張coupon,可以加$1多一個熱狗餐,而且聽日就到期,所以就諗住今日用左佢~

呢間賣熱狗店叫Hot Dog Formula,就係我公司隔離既商場,都開左一排架啦,不過我都無幫襯過....佢sell "Make your own dog",即係好似食車仔麵咁，醬汁、香腸、麵包到配料都任你拼。醬汁十二款、配料十二款、香腸十款、麵包四款，左配右搭，拼出自己想食既口味，當然佢亦有廚師推介幫你配好。香腸款式包括紐倫堡腸、慕尼克腸、黑椒牛仔腸、雞肉蘑菇腸等。香腸口味多，醬汁也不少。單是芝士醬就分原味芝士醬和墨西哥式辣味芝士醬，又有日式芥辣沙律醬、韓式地獄辣醬肉醬、酸瓜醬、蜜糖黑醋等。

不過張coupon係要買佢既套餐既,於是我要左

芝士熱狗 + 迷你沙律 + 雀檸 ($41)

黑椒熱狗 + 磨菇湯 + 雀檸 ($1)

就係咁$42就買左今晚既晚餐勒,抵~不過平時無coupon其實都幾貴,所以都唔會特別幫襯~

返到屋企,我用焗爐焗番熱d熱狗,焗到外脆內軟,所以覺得好好味...不過如果堂食係無我焗番熱咁正,哈哈,因為我摸過只係暖暖地...都係要自己加工先得~

0216的晚餐 ~ 唿汁瑤柱絲辣肉腸粒炒飯

因為上星期五同朋友叫外賣剩下2盒白飯,所以留起左諗住用黎煮炒飯唔好浪費~

今日就用左上星期買落既特價辣肉腸,加埋廚房物資雞蛋,瑤柱絲同埋唿汁,咁就搞掂一餐飯,仲留埋飯盒俾自己,so good~~~

反瞓王

(Day 144 @ Home)

自從囡囡開始學轉身就已經無以前瞓得咁定...轉到身之後更加郁得厲害,有時仲會側身瞓添~

今晚忍唔住影下佢既粗魯睡姿,明明放佢落床係打直,瞓瞓下變左打斜(我相信如果張床再大d係會變左打橫)...本來放係床頭枕住瞓既兩個帎頭,變左東一個西一個,而張被就俾佢踢開晒...真係反瞓極

PS:今晚99又話煲左蓮藕湯拎上黎啦,搞咩呢個星期日日都要見囡囡呀~

三人世界之情人節大餐

今年情人節本沒打算慶祝,不過卻也過得非常溫馨~

琴晚過左12點就收到老公買既絲花玫瑰,估唔到仲有花收喎~

今天老公和我也不用返工,不過老公依然一早起床送了囡囡返嬰園,好讓我倆真真正正的睡過夠,過了一個二人世界的早上~

然後收到99的電話說打算叫KFC的桶餐做晏,不過得佢同細佬食唔晒,叫我地返去一齊食...咁就返去食滿足下99想見abby既慾望啦(呢個星期99實在係太痴纏啦)

之後就返屋企同囡囡沖涼,沖完之後,老公話出街買野喎~原來老公去買情人節大餐既材料...有湯有牛扒有配菜仲有薯條,非常唔錯呢...老公仲好有興致買左一枝白酒一枝紅酒番黎,我都破天荒飲左少少~

呢餐情人節大餐囡囡陪住我地食呢,哈哈,感覺好特別,有2個情人一齊食呢,名符其實左擁右抱呢~

今餐好好味啊~

第一隻牙 ~ 犬齒

(Day 143 @ Home)

琴晚見到ta媽話ta b出左犬齒,我仲覺得好奇怪,唔係應該出門牙先既咩?

點知今日情人節就俾我發現左原來abby都係出左犬齒先喎~

5個月都未夠就出牙仔啦,唔怪得之前口水長流又勁咬下唇啦,原來真係出牙仔~其實我之前都懷疑架啦,但係諗住係門牙,觀察左都係見到上門牙好似有少少白色,不過唔明顯...點知今日同abby抹面就俾我見到入少少既犬齒有好明顯既白點,睇真d原來真係已經出左少少牙啦,另一邊既犬齒位都一樣出左少少呢...即刻叫吳爸爸黎睇,仲影低佢...不過影相好難影得清楚呀~

肉眼睇清楚好多呢~

突然覺得囡囡好似大得好快,琴晚先轉到身,今日又發現出左牙仔,真係日日都有驚喜呀~

向左轉 向右轉

星期五晚老公有約,已經過左成個月仲有朋友請佢食生日飯,真巴閉~

於是我又約左朋友上黎屋企聚下,囡囡如常熟睡中~~10時左右我抱起還未醒的囡囡出廳,囡囡很合作的醒來並和兩位姨姨玩,非常乖呢~

朋友離開後,我便再哄囡囡睡覺...現在我已經轉左方法哄囡囡睡覺,不再抱住哄,而是放她在床仔上,而我就在旁陪著她,用手慢慢一下一下的掃她的肚肚,這個方法非常奏效,通常囡囡都會在15分鐘左右安靜入睡,不再喊得死去活來~

不過今次囡囡異常精神,並沒有意慾入睡,而且還有意轉身...於是我開番房燈,看著她努力的在嘗試,終於真的成功轉身...不過只是向右轉,沒有向左轉~

(Day 142 @ Home)

我見她成功轉了2次便打算拍下囡囡轉身情況,不過又係拍不成...然後吳爸爸回來也不肯再轉了~

可能是累了,所以就熄燈讓她睡,很快就睡著了~

能夠見證囡囡第一次轉身成功,我好開心呀~~希望快d拍到佢轉身既video俾大家睇~

不要再提請工人好嗎?

話說星期一晚同囡囡返左99度食飯,不過個晚囡囡只肯由我抱,又唔肯係麻麻度瞓,令麻麻好失望~

結果星期二99話拎湯同齋上黎俾我地,其實係想見囡囡...可惜因為囡囡正在熟睡中,所以99又無奈地離去~

天呀,今日99又話煲左花膠湯拎上黎俾我地...其實今日老公約左朋友食飯,不過因為約左8點,所以都俾99拎野上黎先~~

除左2壺花膠湯,99仲買左炸魚塊同埋蕃茄蛋豬扒俾我地做餸,叫我煲飯就得添~我地就唯唯諾諾咁話好,費時話佢知我地約左人~

99上黎時我地剛剛準備同abby沖涼,於是99就第一次睇住我地同囡囡沖涼勒~~今日囡囡有對麻麻笑,99即刻開心晒,仲話abby認屋企,係屋企就心情靚喎~

囡囡滿足左麻麻之後,麻麻開始轉移視線話我地間屋,呢度有無抹,個度有無洗,點解次次上黎都係一樣既床單.....跟住又問我地嬰園收幾多錢...呢一切一切就係為左鋪排叫我地請工人...其實99耐唔耐就提起叫我地請工人,每次見到都講,就算宜家返嬰園返得好地地都仲起要我地請工人,話有人幫我地做家務,又可以湊囡囡,又比嬰園平,覺得我地既選擇好奇怪~

夠啦夠啦,點解仲要係呢個問題上討論,我同老公講左幾百萬次唔鐘意請工人,工人唔可信,工人唔識湊,又要俾地方佢瞓...我地選擇已經好清楚,可唔可以接受唔好再提請工人呀....屋企係唔夠有工人黎得乾淨,不過我地覺得ok就得,你睇唔過眼就唔好摸上黎又話呢樣又話個樣,唔上黎咪大家都好lor,你又唔使覺得唔順眼,我地又唔使覺得好煩好討厭~

我真係唔想再聽到請工人呢三個字!!!!!!!!!!!!!放過我啦點解要迫我地喎~我覺得宜家咁樣幾好呀,我地都唔怕辛苦,你就唔好阻止我地啦~

 

換季大出血

天氣開始熱啦,睇怕都唔會凍番啦卦~

周圍都大減價,不過就算半價都無令我出血,其實我好想去買衫俾自己架,新年都無買俾自己,我估黎緊都唔會買住,哈哈~~

咁今次換季大出血唔係自己就梗係幫囡囡買衫啦~~原先諗住買左套Hello Kitty床品後,呢個月想唔再買衫俾囡囡架啦....點知俾我見到POPI做3折,咁今日就去左行啦~

唔知大家識唔識POPI呢間童裝店,佢既分店選址好奇怪架,最正常係中環萬年大廈間舖,其他分別係香港仔,北角,天水圍,將軍澳,而九龍就只係得一間係九龍灣,仲要係人流都唔多隻既Emax,你話奇唔奇?因為我公司就係Emax隔離,所以見到佢做3折,之前買個件斑點狗造型衫就係POPI買既(個次做半價),而且質地唔錯,所以今次見佢減到3折就襯lunch time去睇下~

基本上都係清冬天衫,d衫都幾靚,質地又唔錯,3折真係好抵買,不過天氣已經唔凍,我唔諗住買厚衫啦,睇下佢有無夏天衫就真~

夏天衫就真係唔多,不過都俾我買左呢幾樣:

一套2件短袖開胸短夾衣(size: 6 - 12 mth) $75.6 : 用黎著返嬰園做打底衫既 ~

短袖碎花上衣(size: 12 - 18 mth) $32.7 : 其實買黎係襯條牛仔裙架~

牛仔裙(size: 6 - 12 mth) $50.7 : 呢條牛仔裙我好鐘意呀,我覺得好靚呢,折左之後只係$50我覺得好抵~

Rainbow套裝(背心/上衣/短褲/長褲) (size: 6 - 12 mth) $74.7 : 一套4件,可以互相配搭,等於有4套衫咁呢~

總共用左$233就有8件,平均都係$29一件咋,而且仲買得好舒服添,因為真係好少人,哈哈~

如果大家想買定下年冬天著既衫,或者有行過都可以去睇下,3折做到呢個星期日咋~

0211的晚餐 ~ 臘腸菜心 火腿滑蛋

今日只係買左$5菜心就番屋企勒,因為琴晚99拎左壺湯同埋一盒齋黎屋企,當然主要目的係想見下abby啦...其實星期一晚先返過去99度食飯,不過個日囡囡唔肯俾麻麻抱,一抱就喊,我抱就無事...唔知係咪咁所以琴晚又黎睇下孫女,不過abby好夢正酣,麻麻又好無癮咁走左勒~

於是今日唔特別買餸,用尚餘既半包煙黑椒火腿炒雞蛋,夾埋碟菜就有三餸一湯勒~

慳水慳力就煮好餐飯勒~

0210的晚餐 ~ Carbonara with Chicken

今日想食意粉,所以去超市都係買整意粉既食材~

其實超市每日都有特價食材,所以我每日放工都係睇下有咩岩買...好似今日我就買左煙黑椒火腿(特價$9),辣肉腸(特價$11),雞扒(特價$11)...不過要睇清楚到期日,今日買呢d都仲有成個星期先到期,所以都ok架~

因為屋企無晒麪粉,所以唔可以自制白汁,咁我就買左包Carbonara意粉醬($13.9),用左半包煙黑椒火腿黎代替煙肉,但係無肉老公會覺得太寡,所以買雞扒一齊煮...當然係街食既Carbonara就唔會有雞啦,哈哈~

老公都話好香呢,我用白酒蒜茸炒過d意粉先架,味道真係唔錯,都幾似街食既Carbonara,如果屋企有mozorella芝士就好啦,一定更加好味~

今餐成本價$35,本來想留2個飯盒既,不過半包意粉只夠留多一個飯盒,下次要煮多d先得啦~

囡囡第一年的利是錢

其實我自細都無定話幾時先可以拆利是既,不過吳生佢就話一定要初十五先可以拆喎~咁就唯有等下啦...等呀等,終於等到呢日元宵佳節,可以拆利是啦~

其實今年我地好似無以往去咁多地方拜年,不過逗下逗下,abby d利是都好大疊下~

最大手筆當然係麻麻啦,一封千元大利是再加一對金器,勁~

而我同吳爸爸逗到既利是都撥歸入abby利是總數之中(雖然我地就只係逗得幾封咁大把),屈指一算,都有$4xxx喎...我諗呢個成績都算唔錯卦~

呢d利是錢就由媽媽代為保管住先啦,不過我都會睇下呢期邊間銀行既兒童户口做推廣,幫abby開番個(當然係由我管理啦)...暫時黎講好似多啦A夢户口最hit,如無意外,都應該開呢個架啦~

老公的第一次

熱烈恭賀吳生以90分鐘完成10公里賽事

雖然呢個全城參予既馬拉松比賽已經舉辦左好幾年,不過老公都係今年先第一次參加~

老公一直都有晚上跑步既習慣,當我地仲係兩口子生活既時間,我都有陪老公一齊跑下架...不過囡囡出世之後我已經無陪老公去跑步啦,不過老公仍然保持到呢個習慣,我非常支持~

希望第日囡囡大左我地可以一家三口一齊去跑步,或者一家三口去參加呢個城中盛事~

相信老公下年都會繼續參加,唔知佢會唔會向半馬挑戰呢~

Hello Kitty BB床上用品套裝

宜家屋企個套Peter Rabbit BB床上用品套裝係姑奶送既,而我一直都想買多套用黎替換,之前都見到幾次Casablanca既Classic Pooh BB床上用品套裝做特價$399,但係唔知點解最後都係無行動,可能心底入面唔係好想買Casablanca~

其實再早期時同老公去行過雅芳婷專門店,見到佢有好多唔同公仔既 BB床上用品套裝,好鬼靚架,仲心郁郁想買,點知睇一睇價錢要成差唔多成千蚊,個時唔知做緊8折淨係9折都講緊7百幾8百蚊,實在覺得太貴,於是放棄左~

姑奶送左套俾我地之後,購買意慾下跌左好多,不過每次拎套野去洗就要搵d毯舖住床裖頂住先,始終唔係咁好~~

琴日睇左Daisy個blog知道Megabox既Spotlight呢套雅芳婷Hello Kitty BB床上用品套裝做半價,今日lunch time即刻走入去睇下仲有無,好在仲有,不過得番10套,呢10套之中有2款尺碼,我打俾老公問佢買大d個套淨係細d個套,佢話買大d喎(比細個套貴$40),於是就買左套大既(1套7件,包括多用被,床笠,床圍,枕袋,枕頭,攬枕枕袋同攬枕),原價$960,宜家半價$480,真係平左好多呀,從來都未見過雅芳婷既 BB床上用品套裝會做到半價,雖然我唔係Hello Kitty fans,不過我都覺得呢套幾靚呀~

終於有2套可以方便替換啦~~

0205的晚餐 ~ 椰汁焗雞 菜心炒肉絲

睇開吳家食品既朋友相信都知道椰汁焗雞係吳生既至愛,由於好少餐廳提供呢味菜式,所以為左滿足老公口腹之慾,我將佢成為左我既招牌菜,耐唔耐都會煮下俾吳生食~

焗爐已經好耐無開啦,想煮椰汁焗雞好耐,今日終於見有雞件特價$10,所以就買黎煮下,買多2個薯仔($3),加埋屋企半個洋蔥同埋椰汁就夠材料整勒...雖然我無買到mosarella芝士,只係用屋企枝芝士粉拎去焗,不過都一樣咁好味,焗緊之時老公已經入黎話好香...結果今日老公添左好大碗飯呢~

咁大兜椰汁焗雞,煮多味餸就咩都夠勒,咁當然煮埋琴晚留起既半包菜心($3.5),本來諗住煮菜心炒牛肉既,不過見豬肉絲特價($6.5),所以就改為炒肉絲...呢餐成本價$23~

今日除左留我自己個飯盒,老公都想留添,不過因為佢話同事習慣星期五出街食,所以佢先唔留咋...老公話下星期開始可以煮多少少份量留埋飯盒俾佢喎~

一切從糊仔開始 ~ 試糊第二回

(Day 133 @ Home)

第一次試糊係初三,一來之後都有好多新年節目,二來囡囡反應麻麻,我就諗住遲少少再試~

不過停左呢幾日囡囡又有新發展,就係佢開始玩脷同埋咬下唇,呢d都係可以引入固體食物既訊號,所以我又覺得可以再試下,畢竟我要係育嬰園開始同囡囡試糊之前(5個半月)做好準備,都係早少少開始觀察比較好~

今日吳家開爐煮飯其實都有囡囡份,因為我用左之前買既煮粥器放入電飯煲同我地食既飯一齊煲...又睇下囡囡食我親手整既米糊反應如何~

呢個煮粥器都唔錯,我用佢既量匙放左1平匙米再加10匙水(1:10份量最岩初初試食既BB),放入電飯煲中央同我地食既飯一齊煮...煮好左我就放幾匙係pigeon既研磨碗仔入面,將飯粒磨到好似糊咁就可以俾囡囡食勒~

囡囡既反應真係好搞野,佢又唔係唔肯食,不過可能佢都係鐘意食媽媽奶,覺得米糊質感怪怪,所以做出怪怪既表情,我今次都係俾左2匙佢試咋,效果我覺得滿意,都係想俾abby試下個感覺,佢"妹妹"下咁食,遲d應該咀嚼技巧會更好,吞嚥能力我覺得都ok架啦...我諗試多幾次囡囡應該一定有進步,希望佢愈黎愈鐘意食啦~

感覺上好似自己整俾囡囡食好d,可能因此我會更有動力煮多d飯,因為唔煮飯就用唔到個煮粥器,哈哈~

0204的晚餐 ~ 蜜糖煎雞翼 咸蛋蒸肉餅 蠔油菜心

吳家終於係今日初十開爐啦~~

岩岩開番爐都係煮d簡單野就算....

蜜糖煎雞翼($10.5):真係用百花蜜去醃架,味道唔錯,好在無煎燶~

咸蛋蒸肉餅($7): 我覺得整成球狀既肉餅味道係有d唔同,食起黎多d肉汁,又係另一種味道~

蠔油菜心($3.5):其實一包7蚊既,我開左半包咋,超易煮~

今餐只係$21仲俾我留埋飯盒,仲平過我今日自己一個出街食晏呀,真係要煮多d煮多d~~