囡囡一個月大,係時間去健康院打針啦~
今次要打既係乙型肝炎第二針,不過打針之前又係磅重時間,原來囡囡已經有4.04kg
...即係8.9磅~~初生時6.6磅既囡囡,一個月已經去到差唔多9磅重,足足重左2磅,成績令人滿意~
跟住又去見個位無料到既男醫生,d黃已經退晒,醫生話唔使再check黃啦~
之後就等打針勒...個個BB都喊晒口咁出打針房,我仲估囡囡一定會喊到拆天,但係出乎意料之外,囡囡竟然只係叫左幾聲咋喎~
基本上姑娘打針時,囡囡作勢要喊,谷到塊面紅晒,正想喊出聲時,姑娘打完,我就用紗布按住囡囡大腿上既針口,佢就無喊出聲,不過塊面就"拿"埋晒...可以係痛到出唔到聲,哈哈~
之後佢肚餓反而仲喊得大聲呀~~
總括黎講,今日打完針無出現不良反應,亦無特別發脾氣,算係好叻女架啦~
真係好叻女喎，抵錫...........
回覆刪除[版主回覆10/28/2008 11:55:00]係呀,無喊到拆天真係抵鍚~
有D bb打針後會特別扭計，囡囡好乖。
回覆刪除[版主回覆10/28/2008 21:52:00]係呀,我都諗緊囡囡會唔會特別扭計,好在又無~
你會唔會同你個bb打5合1/6合1？其實有咩分別ga？幾時要打ga？打左係咪唔使打健康院個d ga？
回覆刪除[版主回覆10/28/2008 21:55:00]你可以唔去打呢個乙型肝炎第二針,咁就可以出去私家打6合1~如果打左就兩個月時出去打5合1....
如果出去私家打就唔使番健康院打架啦~