大學師兄探訪

除左一班同級既大學同學之外,其實仲有唔少師兄/師姐/師妹/師弟都知道我生左囡囡既~

而當中最熟落既都係師兄啦,就算畢業之後依然會約下食飯架~今日就係好愛錫我既Clement師兄黎探我同囡囡啦....而身邊個位靚女Vivian都係我既大學同學,我地3個係year 1既細O同組,我地兩個係組女,師兄當然係輔導員啦~~至於佢地幾時成為一對,就要多謝我啦...因為我既婚宴令佢地重遇lor...哈哈~

為人師表既師兄非常繁忙,難得佢係我產假結束前黎探我同囡囡...仲送左好可愛既帽仔同口水肩俾囡囡...希望囡囡會鐘意戴呢頂帽仔啦~

吳家人奶庫

工作生涯中最長既假期終於都放完啦~

今日係產假既最後一日,聽日12月1日就要返工啦,囡囡亦係第1日返育嬰園既日子...雖然育嬰園有提供奶粉,不過為左囡囡可以繼續食人奶,係產假期間我都泵定一d人奶放係冰格做儲備~

聽聞某d bb係唔肯食冰奶既,好在囡囡之前已經試過食冰奶,一d問題都無~

為左方便起見,我用儲奶袋,每包有100ml(即係3.5安),不過某幾包只係有90ml(3安),又有某幾包有120ml(4安),視乎個日泵到幾多奶啦~

宜家吳家既冰格大約有30幾包奶,都算係一個人奶庫呀...哈哈~

唔知返工之後我既全人奶計劃又會如何呢?希望繼續順順利利啦~

蝴蝶‧樹 姊妹探訪

蝴蝶‧樹 班姊妹(因為大家都係蝴蝶‧樹影結婚相而認識)已經好耐無見啦,對上一次聚會已經係07年3月既時候,個次係探我地第一位既大肚媽媽~

之前其實都想約下d聚會,我記得想約去sonia既新居玩,不過宜家都唔叫係新居啦~而資深媽媽既囝囝chester已經差唔多歲半...第二位媽媽又係生囝囝喎,就係諾諾媽啦,今日仲好勁咁帶埋諾諾出席添...諾諾11個月大,好活躍啊...不過實在太痴媽媽,諾諾媽真係辛苦晒呀~

第三位媽媽就係我啦,終於有個囡囡出現呢~不過因為打完針,囡囡都唔係太鐘意其他姨姨抱,喊下瞓下喊下瞓下咁樣~

唔知第四位媽媽係邊個呢?sonia,lulu淨係stephanie?希望快d收到佢地既好消息..下次我地可以自組playgroup聚...哈哈~

我真係要多謝大家咁有心黎探我同囡囡,之前chester同諾諾都搞唔成探訪,abby真係多人錫呢~多謝諾諾媽既禮物,仲有其他姊妹既大利是~

打針針@2個月

(食緊輪狀病毒口服液)

剛剛電視既新聞透視先講完香港既兒童疫苗政策太落後,我深有同感~~因為原來好多兒童疫苗都係無包括,要打就要出去私家打...之前施政報告話將肺炎鏈球菌針納入政府提供既兒童疫苗內好開心,點知原來要出年第3季先開始,對我黎講即係無用啦,激死,仲以為可以慳番二千幾蚊添~

最初我只係諗住打政府包既防疫針,不過因為囡囡要番育嬰園應該接觸到病菌既機會高好多,所以最後都係決定幫佢打埋其他針以求安心~

最後join左係屋企附近既Kinetics打針package,用左Mamastation既優惠價,$5800包括有

口服輪狀病毒疫苗(2劑)

5合1疫苗 x 1 (健康院只係包4合1,少左乙型流感嗜血桿菌,而打5合1係因為第1針既乙型肝炎針1個月時已經係健康院打左)

6合1疫苗 x 3

肺炎鏈球菌疫苗 x 4

水痘疫苗

麻疹,流行性腮腺炎及德國麻疹疫苗(呢枝其實健康院都有包)

(呢枝係5合1針)

今日12點就上去打針啦,打針位姑娘都幾好呀,打針前講解得好詳細,例如打完針後有咩反應,又會引下囡囡,都唔錯呀~

囡囡未打就喊定先,打時喊左幾聲,塊面仲谷到紅晒,吳爸爸驚到唔敢睇(但係又拍得好清楚喎)...不過打完就收聲~

(呢枝係肺炎鏈球菌針)

so far到宜家都無咩不良反應,都好似平時咁樣啦~

兩個月發展監察期

囡囡今日本來係去健康院打4合1枝針既,不過我最後決定出去私家join打針package,所以今日只係去健康院做基本檢查~

婆婆今日黎陪囡囡一齊去健康院,估唔到連細姨都特登請假黎見下Abby喎~今日天氣凍左好多,吳爸爸已經不下一次提我要幫囡囡著多件衫,於是今日就拎左件靚靚厚衫俾囡囡著...不過囡囡一向唔鐘意戴帽,所以帶左之後不斷掙扎呢~

兩個月大既囡囡

體重: 4.85kg = 10.67lbs

高度: 57cm

頭圍: 39cm

姑娘知道囡囡係食全人奶,一d奶粉都無補既時候話囡囡重得好好呢~不過檢查佢髖關節時,囡囡係度喊,姑娘話佢好有中氣,好惡死喎...哈哈~

雙滿月

1124係囡囡兩個月大既日子,今日少少地都有件cake影番張全家福~

因為係囡囡既雙滿月,我準備左一個特備節目就係帶左囡囡去紅磡伊甸園觀禮勒~

由於今日係返工日,婚禮除左親戚同兄弟姊妹團之外,就只有我一個朋友到賀,仲要帶埋囡囡,所以都幾矚目架~

我最驚就係囡囡係婚禮過程中會喊,咁就尷尬啦...好在囡囡全程都無喊到,眼仔碌碌咁觀禮(不過佢係望住我黎觀禮,哈哈)~~禮成之後就瞓著左啦~

之後番屋企等老公既同事黎賀囡囡雙滿月,又玩左一晚呢~

p.s. 2個月大既囡囡宜家最鐘意就係食手手呢~

 

老公TWLD同事探訪

是日我要出席飲宴,囡囡就要交由老公照顧~

咁o岩老公既同事今日約左黎吳家探囡囡,所以好多人幫吳爸爸手湊囡囡呢~

我未出門口之前,囡囡係度扭眼瞓,所以唔肯俾人抱...結果放佢入房瞓下先~

之後跟據老公既說法話佢既同事都唔係好幫得手,成晚都要佢自己抱住囡囡先得喎~

我諗今次係囡囡係外人面前比較扭計既一次勒~

多謝大家既大利是同埋BB床吊飾~

楊梁聯婚@朗廷酒店

今晚係小學同學既小登科,糾察隊長一向人緣好,所以個個小學同學都出席,更有好耐無見既稀客添,整整一圍小學同學,一個字..."勁"~(我個時都係一圍小學同學架,哈哈)

而且糾察隊長同我一樣選擇左朗廷擺酒,今日我就以賓客身份出席,感覺當然唔同左,不過依舊好鐘意朗廷既環境,ballroom仲加多左幾部LCD電視添~

新郎哥今日好高興,興奮度爆燈...佢篇致謝辭真係應該錄低佢,正面咁黎吐苦水真係笑到我地死(因為我地太了解新郎哥啦)

新郎哥都待我地不薄,除左成長片段有我地既相,佢篇致謝辭都有多謝我地喎,真係受寵若驚呢~知佢好忙啦,所以我地自己玩,影左好多相呢~

好開心既一個晚上~

免費潤手霜

我好耐無去拎贈品啦,因為大肚時皮膚情況差到無得救,好多護膚品sample我都無興趣去拎...所以已經好耐無去搵呢類著數啦~

不過今次唔同喎,一來我d皮膚宜家已經回復番大肚前既9成狀態(我係指塊面咋,個肚d紋就無得救架啦),而且冬天黎緊,係時間搽番多d滋潤既野~

估唔到Crabtree今次咁好,寄黎既宣傳單張內有張免費換領25ml hand cream既卡喎...今日第一日可以換,我當然唔執輸去拎啦...因為我有2張所以拎左2枝,我去Elements入面間Crabtree換既,佢只係得Gardeners呢隻味,無其他味送,不過唔使錢,無所謂啦~

至於佢既其他野,雖然大減價,不過我都係咩都無買,拎左hand cream就走lu...哈哈~

 

老公朋友探訪

呢個星期六同日輪到老公既朋友黎探囡囡,一對係老公既大學同學,另一對係老公既中學同學~

星期六係大學同學黎,是日精華係吳爸爸幫囡囡剪手指甲,點知被朋友發現血跡~~原來吳爸爸剪損左囡囡左手既食指呀~但係囡囡竟然無喊度,仲照瞓可也,所以我地都唔知剪損左lor~之後囡囡仲好好心情,笑左好多俾姐姐哥哥睇添~~

星期日就係老公既中學同學,亦係結婚時既兄弟...呢晚我地四個游乾水,囡囡就放左入房瞓覺覺豬...雖然初頭囡囡都喊得好淒厲,不過我地照打可也,真係一對爛玩夫妻(其實係好耐無打牌就真)...不過無幾耐囡囡就好安靜,因為已經熟睡中啦~

產後檢查完結篇

睇怕呢篇都係吳太孕記既最後一篇網誌勒~(除非有第二胎啦,哈哈)

今日再去私家醫生到覆診,傷口已經咩事都無啦~

醫生用超聲波照下我既子宮,子宮已經回復正常(size係3.6cm x 5.7cm),厚度只有0.4cm....估唔到咁細既子宮原來伸縮性咁勁~~

醫生再照埋左右兩邊既卵巢都好正常,完全無問題啦~

之後仲同我做埋柏氏抹片檢查,抽取子宮頸細胞,不過報告要一星期後先知~

醫生又問下我BB情況,當佢知道我仲係餵緊人奶,佢好似有d驚訝,仲讚我叻添...不過我話只係2個月好多媽媽都餵到,醫生問我係咪身邊好多成功例子,我話都有唔少...睇怕醫生好多病人都係開刀,所以唔餵人奶卦~

最後醫生俾左幾份資料我,叫我必定要做會陰肌肉運動,佢仲話唔做產後運動修身都唔緊要,但係會陰肌肉運動就不可不做....就係咁我既覆診就完成啦~

UN咕咕?

雖然囡囡仲有4日先至夠2個月大,但係佢宜家成日都會講下BB話,好想同你傾計咁架~

有時我同老公都會聽到囡囡發出一d似是而非既字音,例如"係"...不過我相信都係我地既幻聽黎,哈哈~

不過今日婆婆黎探佢,囡囡竟然講左句"UN咕咕"喎

個一句真係我同婆婆好清楚咁聽到架,不過當然之後無再出現過呢,叫佢都唔識講多次...唔知幾時囡囡會有意識地講一個有意思既音,再唔係我既幻聽呢?

又一大學同學探訪

上次個班係我同一書院既同學,所以定期都會聯絡,好熟落架~

今次呢位同學雖然唔係同我一個書院,不過我地year 2既時候係同一組做輔導員,因此而熟悉,不過因為無咩組聚所以我地都好少見,但係佢都有黎飲我個餐架...咁o岩上次我做監考員佢就係我個組既考生,佢先知道我大肚,於是約左我生左之後就黎探我同BB~

今日佢放左工就同埋女朋友(係師妹黎既呢)一齊上黎,仲買左套Organic既衫仔添...真係多謝晒~

希望佢快d同女朋友拉埋天窗,我等緊飲佢個餐呢,好似話出年有機會喎~

山頂新娘BB聚

緣份真係好奇妙架,4年前既情人節我參加左一個山頂婚禮預演活動,呢個活動影響左我既下半生,當然亦令我結識左一班新娘子~當年都有幾位比較熟落,出過黎食下飯,仲出席過對方既婚禮...不過結左婚之後就無再聯絡啦~但係我地又係人生另一個重要既時刻重遇,就係生BB啦~

今日4人之中,3個生左BB,1個懷有6個月身孕,2男2女(仲有個女係個肚到)~Abby最大,之後係細3日既Oskar,跟住係細2個星期既Matthew,仲有出年3月出世既B女~

我同Oskar媽媽係廣華產檢時已經撞到,每次覆診都會遇見,係我出院之日仲見到佢老公,知道佢剛剛生左Oskar添呢~而Matthew媽媽就係我上網搵BB車資料時搵到佢個blog而相認既,佢都係廣華生架~(雖然到宜家我都仲未買BB車),至於大肚媽媽,就係佢搵到我個blog而同我相認既~

於是我就襯未返工約番次聚會,3個BB一齊真係好得意呀~雖然Oskar比Abby細3日,但係佢好肥大呀,已經重13磅,好勁呀~而Matthew就好好瞓,基本上佢都無醒過~

大家睇下Oskar同Abby相識既情境~Oskar見到Abby好開心,仲流晒口水添...而Abby呢就無咩反應,之後令開添,幾高竇...哈哈~

今日真係傾得好開心,見到咁多bb又好可愛,真係要聚多d先得勒~大家既bb年齡咁相近,相信一定可以keep住聯絡既,我打算新年黎次團拜,唔知搞唔搞得成呢~

未雨綢繆

對於保險我一向都覺得可有可無,不過隨住年紀漸長,想法有少許改變~~雖然我還是覺得那類人壽儲蓄保險作用不大,不過自己也於結婚後買了醫療,危疾和女性保,算是為自己和另一半添些保障~

現在囡囡出世了,計劃將來更不可少,但我還是不會買那些人壽保的~我叫了我的保險經紀給我一些關於教育基金的計劃書,經過幾日的講解及與老公相量後,今日終於落實幫囡囡買左份教育基金及一份醫療保~

至於其他保險我就唔會幫囡囡買啦,等佢第日大個覺得有需要就自己買啦~

今日經紀姐姐幫囡囡影左d相,囡囡真係好多表情,連環圖咁睇真係好搞笑~~

吳家玩具部正式成立

今日吳家玩具部終於正式成立啦,少少地有3大件玩具~~

Fisher-Price個份係一位畢業後今次第一次再見面既大學同學送既,佢已經有一個2歲既囡囡啦~

跳跳虎個份係ETnet舊同事兼大學師姐送既~

上面呢兩份都係要囡囡學爬先玩既,所以仲要等下先~

而中間最大盒既就係今日去sogo買既Disney益智嬰兒健身組合~~其實我一早已經想買類似既玩具墊,不過又覺得好貴,就算係賣二手玩具既Eco-Mama個d最平都要二三百蚊呢~

適逢又係每半年一度既Sogo Thankful Week,我當然又睇下有咩抵買既野啦~~其實星期五我已經去左一轉尖沙咀Sogo,有興趣買個Agnes B既袋,不過最後只係買左2盒北海道3.6牛奶咋(原價$29.5,特價$20.8)

可惜尖沙咀Sogo無玩具部同嬰兒部,我見到銅鑼灣Sogo有唔少玩具或者嬰兒用品特價,其中一份就係Disney益智嬰兒健身組合,所以襯住今日去左中環就落去買啦...嘩,銅鑼灣Sogo簡直係人山人海呀,所以買完即走,都唔想行啦~~好在我無自己一個黎買,因為份玩具真係好大盒呢,由原價$799減到$398...仲要我用小學同學送既Sogo禮卷買(雖然無得找番$2,哈哈),所以基本上都係小學同學送既禮物黎~

好心急想開黎俾囡囡玩下,不過今日出左成日街,我都好攰啦(因為揹住囡囡成日,膊頭都好辛苦,囡囡好重呀~)...所以都係聽日先玩啦~

囡囡第一輯户外照

今日老公長週,放工之後約左朋友係中環食飯兼洗牙~~

我就中午先帶囡囡去中環會合老公,係蘭桂坊食飯時,周圍既外國人都望住囡囡,"so sweet","lovely"不絕於耳...阿女你係得既~之後就上牙醫到....姑娘之前都有吩咐老公帶囡囡既相俾佢地睇下,點知佢地見到我帶左囡囡一齊黎好開心,姑娘同牙醫都話囡囡好得意,哈哈...出面d病人可能會覺得好奇怪,點解牙醫同姑娘咁興奮,真搞野~

老公原來帶左部單反相機諗住同囡囡影番輯相,洗完牙就去左香港公園,不過囡囡全程都瞓著左,都係影左少少咋...之後係太古廣場又影左少少聖誕佈置啦~

囡囡個樣就無問題,至於我就真係肥到死啦,見到都唔開胃...唔制呀,我唔要做咁醜樣既媽咪呀

CP舊同事探訪

星期五晚就係CP舊同事黎探我同囡囡啦...我知大家都公私兩忙,今次算係約得好快呢,仲送左封大利是俾囡囡添~

Joey媽:你係唯一一位朋友睇到Abby洗白白呢,哈哈

Jan:真係好多謝你咁攰都黎探我,仲要原來呢日係你既結婚紀念日,罪過罪過

Gwen:多謝你送既媽媽袋...祝你手術順利同埋開張大吉

Sher:難得你工作上咁辛苦都仲做搞手約大家黎探我,非常感激~

今晚囡囡無平時咁乖,喊左少少啦...我諗係因為Sher姐姐同Gwen姐姐都無抱佢既關係,哈哈~

兩位媽媽先後離開,而我就同兩位靚女去左Elements食晚飯,辛苦晒吳生自己係屋企湊女啦~今次應該係我產後第一次獨自同朋友去食飯,真係幾輕鬆呢~

ETnet舊同事探訪

終於都輪到ETnet舊同事黎探我同囡囡啦...今次仲齊晒人添,千禧年代既研究部同事就係我地呢班人馬啦(除左唔關事既老公)~

囡囡保持一貫作風,任抱唔嬲~~就算好似伴郎哥哥抱到咁雞手鴨腳囡囡都保持得體,只係出現唔舒服既表情並無喊到呢~人人一張抱B照,永不落空架,就算幾咁驚抱BB既都可以成功影到張相...哈哈~

當然最重要係見到得高望重既Auntie Esther啦,佢係令我同吳生可以相識既人物...老公成日都話Auntie Esther影響左佢既下半生~~~

大家見到囡囡都話似吳生,餅印一樣...仲誇到話抱住囡囡好似抱住左吳生咁,真搞笑~

仲有要多謝大家既禮物...不過我在此呼籲大家唔好再買尿片啦,M碼還可以,S碼就真係唔好啦~

育嬰園面試及取錄

一直以來我都沒有提及產假後的安排,其實早在懷孕時期我已經為此而苦惱,在香港多數的安排是:

1.辭工做全職媽媽

2.交由家中長輩(如奶奶或婆婆)照顧

3.請工人/褓姆

最初我真的有考慮過方案1的,而且也告訴老公我的想法...不過後來計計數,沒有了我的一份人工,每月就沒有餘錢可儲,而且似乎對老公的壓力也不少...所以最後還是打消了念頭~

因為娘家太遠不方便,而奶奶也表明不湊...加上也不想長輩們太辛苦,所以也不考慮方案2...只是後來62知道我的安排後卻命令奶奶來湊囡囡,不過還是被我拒絕了(其實我也不太想給奶奶湊)

雖然我的父母或者奶奶都非常希望我們請工人,但是我和老公一早就沒有考慮此方案...因為實在不喜歡家中有外人一起住,而且我也信不過工人,實在聽得太多不好的經驗,我不想麻煩啊~褓姆也太難找,而且費用不便宜呢~

最後我和老公決定了放囡囡到育嬰園,只是這個決定並沒有得到長輩們的支持~可是在我們眼中育嬰園卻是一個非常好的解決方法,只是在香港請工人太易也便宜,而且因為偏見所以覺得育嬰園不好~其實在外國請工人根本不可能,育嬰園才是主流呢~

大家不要將育嬰園理解做被人遺棄的小朋友才入讀的地方....育嬰園內的姑娘均是受過專業培訓照顧嬰孩的,比起家中的工人或者家中長輩或者是父母本身更可信賴~

而且育嬰園的生活非常規律,不會寵壞囡囡~又有很多同伴一起,可以早點學習社交呢~

我也上網看了很多評語,又問了朋友的經驗,沒有一個不稱讚的~

我想唯一的缺點是可能會令囡囡容易生病,不過我相信吃人奶的囡囡一定無問題的...而且遲早都會返學,遲早都會接觸病菌,問題不大,早d有抵抗力仲好啦~

因為香港育嬰園不多,而且名額有限,所以都要排隊輪候架~我就係陀住囡囡7個月時入紙申請12月入託呢~~終於星期一收到通知帶囡囡去面試...其實係要睇下BB係咪健康正常~囡囡當然合格啦,不過育嬰園仲要求有西醫發出既健康證明先會正式取錄~

星期一晚即刻同囡囡去左做健康證明,今日就去育嬰園辦入託手續啦~

好多文件要簽,好多野要知....總之好嚴格,不過我覺得咁樣證明呢間育嬰園信得過~就連書包都拎埋番黎添...哈哈

12月我番工之日就係囡囡入託之時...相信囡囡一定會鐘意育嬰園既生活~

一家三口食買玩

自從可以用條Sling揹囡囡出街之後,我就心郁郁想出多d街~~今日星期日,老公話陪我出下街,一家三口又出動啦~

今日天氣涼涼地,終於都有d秋意啦,好舒服呢~~

第一站去食lunch,我決定去食好耐無食既壽司,最後去左新港中心既峰壽司,貪佢唔多人知,唔使排隊等餐死~~囡囡瞓左,我全程都食得好自在,so good~~~

食完去左行玩具反斗城,睇下有無咩益智玩具o岩囡囡玩,因為屋企一件玩具都無呢,哈哈~~不過,囡囡好似仲未對d玩具有興趣,所以咩都無買...不過就見到大大隻Elmo,影左張合照...見到Elmo令我諗起Joey妹妹,唔知佢係咪成日都見到呢隻Elmo呢?

之後去左海港城既育嬰室幫囡囡換片同餵奶,海港城既育嬰室係扶手電梯底,裝修當然同elements無得比啦,不過只要有得用就已經好好啦~

跟住就係幫老公補購護膚品既時候,聖誕gift set已經推出啦~~不過今次最主要都係買Make a Difference,所以就要左呢set($480),淨係樽貨size既Make a Difference都要三百幾啦,所以都ok抵~~另外要買洗面產品,今次買左佢條新organics line既洗面,唔平架,要$235...不過好在我之前儲開印花,連埋今次既印花,加埋可以扣$110...所以最後呢度只係$605!

小學同學探訪

本來係約左上星期六既,點知原來老公已經約左佢既大學同學,所以我班小學同學就延遲到今日先上黎....

原本佢地話好多人上黎既,點知有人病左唔敢上黎驚傳染BB,有人要返工趕唔切,有人去左旅行撞期...結果就得番4個,不過唔緊要啦...雖然人唔到,但禮到,真係多謝晒~~~

大家又輪住抱囡囡影相,囡囡照舊歡迎無喊....不過後黎有d眼瞓,所以發左少少脾氣,不過都無大喊,一陣間就瞓左....

今次除左黎探我同BB之外,仲係我地既糾察隊長派帖呢...雖然婚宴個日就係囡囡雙滿月既日子,不過我都會去飲既...咁多年同學點都要去賀下佢啦~

大家閒話家常咁就過左2個鐘,佢地仲有下場就係去糾察隊長係元朗既新居玩同BBQ...雖然我都好想去,而老公都鼓勵我去玩下....但係我又點放心老公一個湊住囡囡呢,所以最後都係無去到,留番係屋企...等去飲個日先再傾過啦~~

神奇的廸士尼美語世界

今晚囡囡本來瞓得好地地,突然之間扎醒左就開始喊,仲喊到一發不可收拾~~

通常俾佢食奶,或者抱住行下,一陣就會平靜番...但係今次都唔work,咁睇下要唔要換片啦,又無特別喎~~

正當無計可施之下,我叫老公播隻廸士尼美語世界既CD俾囡囡聽,因為今日晏畫我第一次播既時候,囡囡好似幾鐘意聽,我仲一邊唱一邊同佢玩,好似好開心~

估唔到隻CD真係掂~~囡囡平靜番落黎,隻手仲好似跟住拍子咁郁,個口又會發出聲音好似想一齊唱咁~

老公話估唔到呢d CD真係有用喎,唔怪之得會賣幾萬蚊啦~

其實呢隻係佢地寄黎既sample,仲有隻DVD添,不過未開黎睇,唔知又會有咩效果呢~

囡囡第一次出街食晚飯

今日去左朗豪坊既粵江春食晚飯~係

囡囡第一次出街食晚飯

囡囡第一次搭地鐵(仲要係放工既繁忙時間)

一家三口第一次出街食晚飯

一家三口同公公婆婆第一次出街食晚飯

我產後第一次出街食晚飯

我條Sling揹帶又出動勒,睇黎我開始掌握到Sling既用法,囡囡係條Sling度瞓得好舒服...去到酒樓雖然醒左,不過都無喊,我都算係有安樂茶飯食~

唔知係咪好耐無去酒樓食野,今晚覺得每樣野都好好味~

鴨胸沙律

蟹子蟹肉粉絲煲

炸子雞

欖角肉鬆四季豆

蒜香炸豆腐粒

薑茶湯圓

飯後一家三口漫步番屋企,好耐都無拖住老公隻手行街街啦....今日好開心呢~

廣華產後檢查

今日要返廣華做產後檢查,所以叫左阿媽上黎屋企幫手睇住個女~

產後檢查係10樓北翼,首先係填問卷,睇下你情緒如何~跟住量血壓,磅重,驗小便~~

跟住就入房見助產士勒...姑娘同護士長都話認得我,不過就唔記得我個名~

入到房,有好多姑娘坐係度喎,起碼有成4,5位,我諗係學護黎旁聽卦~~

姑娘開頭問候下我照顧BB辛唔辛苦,跟住就開始問BB既情況,好似係咪食全人奶,幾重咁樣....跟住就輪到問我勒~~

之後就要按下胸,睇下乳線有無塞...再按肚睇下子宮收縮成點...再黎就係檢查傷口,姑娘按左3個地方問我有無痛,我都無痛,原來呢3處就係我既傷口...姑娘話傷口埋得好靚,問我期間有無事...我話我睇左2次私家醫生,佢問我咩原因...我咪話頭個次因為發炎,第二次就係d線唔溶...姑娘問我咁醫生開左d咩俾我,我話消炎藥水..咁姑娘有問有無問抗生素,我都話有...至於d線,外面既護士長聽到就話可以我d皮膚同d線唔夾所以唔溶...而姑娘就話d線無咁快溶,起碼都個零月喎....個零月咁我寧願快d去拆線勒~

檢查完,姑娘話傷口已經埋晒,亦唔見有線,非常好~~佢話我個子宮輕微前傾,不過佢話好正常,唔係前傾就係後傾喎~姑娘樣樣野都話非常好,唯獨就話我既體重好似重左d,不過佢話唔緊要啦,慢慢減....我都知我好肥架啦,唉~

最搞笑係問我會唔會短期內生第二胎,我即刻話唔會啦...後面班旁聽姑娘即刻笑,咁姑娘話如果無野問就第二胎先見啦...哈哈哈~

突擊檢查

上星期99同親戚番大陸,所以成個星期我都好free,因為唔會晚晚上黎睇BB~

享受左一個星期既自在,今日中午門鐘突然響起,原來係99啊~~

噢,無通知之下上黎睇囡囡,好在囡囡瞓緊晏覺,如果喊緊就麻煩勒~

其實可唔可以講聲先上黎,好在我無帶阿囡出街,唔係咪摸門釘lor~

希望唔好再黎突擊檢查啦~

好想做facial

大肚時面上皮膚變得很差,額頭很多粒粒,剛放產假時去做了1次facial,感覺舒適,只是維持不了2天,皮膚又變回之前的模樣~

生完之後,額頭上的粒粒自動退了,可是卻於面的邊緣(即係面與頸交接處)爆了不少瘡瘡~

唉,是我的產前產後荷爾蒙特別愛出粒粒嗎?

坐完月有很多事情想做,其中一樣是去做facial~~~

終於今天有老公睇住囡囡,我才可偷到3小時去做facial及通淋巴....超爽呢

通淋巴前上一上磅,再輕左5磅~~仲有15磅要KO...我要努力~~~

CUPHY同學探訪

今日輪到老公既大學同學黎探囡囡,其中一位係我中學同學黎架~

一班姐姐見到囡囡好興奮,爭住抱黎影相~~而且今日我泵左枝人奶,仲俾班姐姐試下餵囡囡食奶...呢個原來係一個好受歡迎既項目,大家七嘴八舌咁話呢個姿勢唔好,應該點點點,好搞笑~~好在囡囡都好大方,雖然係班新手姐姐手上點都無媽媽餵得咁舒服,但係佢都無喊喎,又令大家讚不絕口勒...囡囡,你真係好識社交禮儀呀~~

囡囡仲叻到識拎住姐姐送既大利是影大合照,真係唔讚你都唔得啦~

你的名字

拎得出世紙,表示我地已經幫囡囡改好左個中文名~

不過老公唔俾我公開喎,大家想知可以私人留言問我~

之不過提起改名,不得不記低當中既波折....

由於62一向對於命理深信不疑,囡囡未出世就已經同我地講改名既事,話姓吳五行欠金,個名一定要有金,仲要求成個名夾埋要31劃...個時62已經改左個名要我地用,就係

吳鎧伊:老公聽到即刻反對,我地覺得個讀音好怪~~於是62就話"鎧"字無得轉,只多俾我地搵另一個6劃既字,最搞笑係62後來提議叫"鎧兆",唔係呀,"海嘯"咁都俾佢諗到.........就係咁我地一直都用拖字訣,因為真係諗唔到~

到後期,62改變主意,話要睇埋囡囡既時辰...我地追左幾次,62先俾大師改既名我地,仲要無得選擇,就係

吳俊宜:唉,老公又係一聽就"唔鐘意"...囡囡係女仔黎架,又唔係男仔,點解用個"俊"字~老公就同62講,佢先係囡囡阿爸,當然要佢改先可以...之後62俾左本天書我地,佢話要我地改總共24劃,一個8劃,一個9劃既字,而且仲要o岩五行,真係好鬼煩呢~

終於我同老公諗好左之後都要俾62過目,62算完之後就話都勉強符合要求,老公話佢唔鐘意我地改個名咁女仔喎~~我真係唔明,女仔梗係改個女仔名啦,點解要改個男性化既名?我阿媽話可能佢想我地下個係仔,所以要改得男性化喎~

真名就唔講得,不過呢2個字既出處同意思係

第二個字出自"岳陽樓記"既"岸芷汀蘭,郁郁青青"~寄語囡囡健健康康,好似岸邊既植物生長得翠綠,散發香氣~~

第三個字希望囡囡可以係一個溫柔可人既甜姐兒~~

希望囡囡知道其名字的由來~~

囡囡的出世紙

終於今日同囡囡拎左出世紙啦~

出世紙要係BB出生42日內辦理($140),否則就要俾額外費用...數一數,下星期三就係42日啦...不過因為呢個重任係老公負責,而佢今日短週,所以對我地黎講今日就係deadline呢~

之前睇得太多9月媽媽話好多人拎出世紙(好多都係大陸人),未到9點就已經打晒蛇餅...因為今日一定要拎到,所以我就叫老公早d出去排隊~

點知人算不如天算....老公一早7點出門口,排到9點開始拎籌...但係9點3老公打俾我,佢話佢排錯隊呀...佢排左條拎回港証既隊,拿拿林轉去條o岩既隊...好彩最後都拎到今日既籌,都去到八十幾號啦...爭d拎星期一既籌呢,真係有驚無險,11點幾就輪到老公整出世紙勒~

原來宜家既出世紙咁靚既,我記得我個張係打橫既,d字係用手寫既...但係宜家既係打直既同埋用電腦打字既~