由於火槍已經到手,很想快點試做Creme Brulee這個甜品~
今天終於做好了,我覺得都算很成功呀....只是我的焗爐可能火力大了一點,焗好時面層已經有點焦...我要起了那層焦面才再做焦糖面,所以大家會看到邊邊有點焦,因為燒到了原先那塊焦面所致~
不過內裡是非常滑的,如果不是焗完個面焦了點點,應該是完美的(未做焦糖面前)
好了,燉好後就是用火槍做焦糖面的關鍵時刻....入gas都要入十幾分鐘呢(大家記住我那枝火槍是要用火機gas的,打邊爐用的gas是不能用的呀)....終於試槍了,不錯啊,火力調較容易,感覺安全....焦糖面也算不錯吧,只是未能做好邊邊~
而我是跟港台的美味DIY食譜做的,內有PDA版食譜和整個製作過程的video,只要跟著做一定能成功的~~
(雖然我和老公還在冷戰中,不過我還是拿了一杯放在他的書桌上...畢竟做了也是想他吃吧~)
本來今日下午和囡囡上的幼潛繼續停課,要下星期才復課...於是今日就用這個下午的空檔去換領各種的信用卡禮品~
之前幫囡囡開的Doraemon戶口,可以去領取原隻Doraemon錢箱(我真的打算教囡囡把她的零用錢儲入去架,不過唔知囡囡幾時會明呢?)...而順便申請的Doraemon信用卡,我都簽夠數可以換到Doraemon旅行唿啦~(兩樣都係油麻地MK1換領既)
另外,由於我張HSBC信用卡有4萬分7月到期,所以就諗住用左佢去換禮品...其實都諗左好耐換咩好,好似有d玩具都唔錯,不過換左囡囡都未岩年齡玩...所以又睇其他野,最後決定換幾款矽膠模具...係去星光行個間生活館取貨架,呢幾款就係
SILICONE ZONE
30厘米矽膠長方形萬用鍋 ~ 門市賣緊$218,要用32000分就可以免費換到...因為我無長方形既模具(只有圓形),所以都想買好耐架啦~
20厘米矽膠大牡丹花糕點模 ~ 門市賣緊$108, 要用16500分就可以免費換到...其實有時經過d烘焙店見到呢d大花模具都心思思想買,可以用黎做靚靚甜品麻~
8厘米矽膠花型鬆餅模 ~ 門市賣緊$108,要用16500分就可以免費換到....有時想試下整d蛋糕仔,不過要去買紙杯模...我懶,一直都無買到,宜家換左可以試整,而且用完可以再用,環保得黎又唔使下下去買...一盒有成8個架~
雖然要用既分都幾多,但係其實我既用卡年資可以打7折既,所以最後我好似係用左4萬4千分就換到呢3款模具,如果俾錢去買都要成4百蚊架~
仲有就係之前搞既火槍團購已經送左貨啦...我已經去買左火機gas啦,得閒就會開黎試下整甜品...哈哈~
今日換左好多野番黎,好鐘意,好開心,睇黎要快d諗下整咩食先得啦~
星期四那天,老公打電話給我說同事看了Transformer 2說很好看...於是打算星期六去看早場,那我於午飯時間就到Megabox去買票...原想買IMAX巨幕版,不過只餘下頭兩行...沒可能買啦,睇完一定頸都斷~
於是就買了普通版,9點4那一場,可以買到最後一行,而且只是$40一位~
好看嗎?我會說好看的,要看型格的變身和打鬥絕對能滿足大家...也沒有比第一集差的感覺...不過略嫌最後殺那個狂派領袖太快了,好像有點兒嬉呢~
不過無論如何都是非常值得去看的~
呢期Pampers推出了新尿片 - 特級棉柔,新產品上市當然大力推廣...之前已經見到網上舉辦至柔媽媽選舉,我本想參加的,只是我的會員編號不知為什麼不能登入...那我就放棄了,現在網上登記拿3片試用裝我也做不到呢~~
不過還是讓我遇上了拿免費尿片的機會,參加了Pampers舉辦的分享會,地點又是在灣仔,正正就是上次去拿SKII那座大廈~~
其實是次的分享會就是介紹這新推出的尿片和從前有什麼不同,送給媽媽們試用以了解產品不足之處再作改良...這款新產品最大特色是創新的彈性側腰位(不是huggies的彈性後腰設計),說是令BB郁動和吃飽後肚子漲大時不會壓住肚肚...第二是加強了吸濕珠珠,比以前吸得更多以及分了兩層能將吸濕分子向外散,不會只集中一個部份濕濕...還看試用後是否真的那麼好~(其間職員不否認pampers的初生/細碼尿片常有滲漏情況,說今次這款針對性設計,應該不會滲漏的了...哈哈,原來他們都知道其初生/細碼尿片的問題)
分享會都算很快完,大約40分鐘左右就派尿片了,每人一包,可選擇碼數...我就要了中碼,一包有56片,比大碼要多10片的啊!大家就拿著尿片開開心心的離開了,哈哈~~
已經個多星期沒有下廚了,之前一個星期患上偏頭痛,所以無心機煮...之後天氣太熱令到我唔想煮,結果就咁耐都無煮,只係煮囡囡既晚餐~
今晚原本沒有打算煮晚飯,因為我放工又去左做c9野,8點半才回到家...不過原來吳爸爸才剛有空休息(因為他要煮晚餐及餵囡囡,今晚還第一次獨自和囡囡洗白白,之後還要哄囡囡睡),很能幹的爸爸啊~
由於我歸家心切,所以也沒有在外吃東西就直接回家了...因為吳爸爸還沒有吃晚飯,就著我煮碗公仔麵醫肚算了...不過我見他那麼辛苦,只有公仔麵吃好像很可憐的,既然公仔麵都是要煮,就煮好一點吧~
於是就拿了之前在sogo買的熊本拉麵和蒜味香腸來做晚餐,加隻溏心蛋,總比公仔麵好吧~~味道很不錯,可以比美昨天的麵屋一平安啊,哈哈~
呢期好多媽媽都引入子母粉俾BB食,其實我之前都已經有類似既諗法,不過就打算係切碎d意粉既...不過見子母粉細細粒唔使自己切都係一個好選擇,加上咁岩係超市見到有得賣,所以就買左一包返屋企勒~
原來呢隻子母粉d子母真係好細粒,比子母罐頭湯既子母粉仲要細~~第一次煮諗住好似平時煮意粉咁樣,不過d水滾晒d子母粉好似都未淋,於是就焗住佢先啦...原來焗一陣就得,後來先知原來其他媽媽係話用保溫壺黎焗就ok架啦~
之後就煩湯底既問題,結果第一次我都係就咁用清水算,囡囡都照食可也,真係乖勒,哈哈~
之後我覺得子母粉係西式野,用黎配西式芝士應該比較岩key既,於是就用左芝士湯底...好香,囡囡都好鐘意食,不過子母粉應該係比平時煮既粥仔飽肚既...同粥仔同一份量,但係食到尾時囡囡可能已經飽,食得有d唔專心,不過都算係食晒既~
除左芝士,我今次買左青衣柳,貴野呀,2塊就要廿蚊架啦~
其實呢款新口味都已經食左幾日架啦,so far都ok...不過比起粥仔就乾身d,食完要俾囡囡飲番多d水先得~
嘩哈哈,我又c9上身勒....前排係she.com見到SKII既免費試用推廣,只要係準媽媽或新手媽媽就符合資格參加,條件只係要出席佢既講座同埋試用後接受電話問卷訪問就得架啦~~
咁荀,我當然第一時間就報名啦....好順利咁就收到email通知入選左勒~今晚就係要去聽講座既日子,地點係灣仔~
由於之前亦透過she.mom抽中左枝BB洗衣液,不過要去cwb領取....所以今晚順便去換埋,she.mom既試用大使們都幾讚賞呢枝洗衣液架....屋企枝威潔BB洗衣液用完就可以試下啦,呢枝都要成$52架~
講座時間係6點半開始,不過因為我去左換野,所以遲左15分鐘先到...好在都仲未開始,我坐底無耐就開始啦~
其實講座都係sell佢地SKII枝神仙水有幾巴閉啦,當然佢係講到好吸引咁,不過平時佢既價錢實在太貴啦...我只係結婚個期買過一枝SKII美白精華黎用咋,之後都唔再捨得買...佢枝神仙水就當然係未用過啦~
終於7點半講完,可以去拎試用產品啦~~分別有一枝75ml既神仙水,一枝30ml既神仙水同埋6塊面膜,佢話每塊面膜係含有30ml既神仙水成份架喎....佢地話呢set野價值一千大元,唔知係真唔係呢?不過我見有某幾位既試用產品特別大袋既,應該係再抽中左佢地寫用後感...唔知佢地仲多左d咩呢?
今晚我其實有伴一齊架,就係同我一齊參加山頂婚禮活動而認識,又咁岩係0809媽媽既kaman啦...大肚時已經係廣華傾唔停,雖然生完之後只係約過一次,不過今晚見到又唔停嘴咁係度傾湊B經...可惜佢要趕番屋企,唔係一定同佢去食埋飯既~
今晚開始就可以展開為期28日既神仙水美肌體驗勒...如果真係有奇蹟發生就好啦,哈哈~
這個星期被老公下令休息,不可下廚...因為長期缺乏休息,身體不時有點小毛病,前晚開始就出現偏頭痛...昨天昏睡了一天,今天已經好多了,只是老公不許我買餸煮飯,只許準備囡囡的粥仔就夠了~
沒有晚飯日誌可寫,就讓我介紹一下一本育兒書吧....不過這本書不是說什麼方法去教養孩子,反而是從了解自己開始,發揮自己當媽媽的天份及改善自己的不足...但不要勉強自己去符合人家主觀的好媽媽條件,我十分欣賞這個理念...每天就抽上下班乘車的時間來看,現在已經看了一半有多,只是近來因為太疲累,在巴士上也多用來閉目養神,看書的速度就減慢了~
回想初為人母之時(雖然現在依然是新手媽媽一名),我很愛看其他媽媽的blog從中學習,覺得很多都是好媽媽,又或看育兒書了解如何當個好媽媽....不過漸漸我發覺有些事情自己做起來很吃力,或是好似和自己心底的想法有出入....好像
1.人家很早就已經讓BB吃固體或者已經吃大人吃的食物,天天新款 ---> 我覺得那些媽媽很有心機,天天為著BB所吃費煞思量 (我曾經想像她們一樣天天新款,只是我真的覺得很困難) -->現在我對自己一星期一款餐單的安排很滿意,只是我堅持要自己煮的就好了~~
2.人家每每非常懷念BB初生時的一切,不想孩子想大的這麼快 --> 我覺得那些媽媽對BB充滿濃濃的愛 (我雖然也有懷念囡囡初生時的模樣,不過程度一定相差很遠...我反而期望著囡囡快些長大能和我溝通)-->我明白自己對囡囡的愛就好了,只是我非那種感性的媽媽罷了~
3.人家每個星期都和BB出外活動,每天一輯相 --> 我非常羨慕那些精力充沛的媽媽(實在我也很喜歡和BB外出,只是我還得配合吳爸爸的喜好)-->我時刻提醒自己不論什麼類型的活動,只要是開開心心一家人在一起的就好了~
4.人家每個星期都買新衣新玩具給BB,很開心啊-->這方面其實我有點內疚,我真的不多買衣服和玩具給囡囡的,要買都只等大減價才買一點點-->其實我已經比從前來得揮霍,足夠便可以了~
總之很多很多事情我都覺得應該好好學習...可是我最後還是做不到...有一刻我覺得自己很不稱職,不過後來我覺得每個人都不同,不只不要將BB比較,其實也不要將自己和其他媽媽比較....看了此書後明白更多~
畢竟每個人性格都不同,而且沒有一個人是完美的,沒有100分的媽媽,也不用追求100分的媽媽,否則孩子就會一模一樣了....每個人之所以獨特,就是因為不相同....了解自己的長處加以發揮(例如你是內向的媽媽,不打緊...你會更明白孩子所要的私人空間,你不會勉強孩子一定要去融入群眾之中)...當然有長處自然有不足,了解和明白自己的不足,盡量改善就好了~
誠然每個人雖然獨特,不過也不是各走極端的....很多時只是程度上的分別...不過從中就已經能分別出很多不同風格的媽媽...一邊看這書一邊找尋那個是自己,原來是非常有趣的一件事~
希望你也找到你自己的媽媽風格~
星期日,原先是非常期待的西貢旅行同樂日,好可惜前幾天收到通知因為天氣預報會有狂風雷暴而取消,非常失望呢~
可幸囡囡還不知道今天的活動,如果將來大個之後,會否以為媽媽不守信呢?
雖然活動取消了,不過心中那些活動細胞卻依然非常活躍,很想帶囡囡往外跑呢,決定打給另一位媽媽(本一起去西貢的),而她就決定如期入西貢去...而我之前沒有做什麼入西貢的準備,所以不打算自己去了...最後決定一家三口出外吃早餐,再跟吳爸爸一起上教堂去~
吳爸爸決定帶我們去吃上海式早餐,甜豆漿,鹹豆漿,餈飯,油豆腐粉絲湯.....一大早吃下暖暖的食物,很寫意呢.....而我還是第一次吃鹹豆漿,味道都幾特別喎~
悠悠閒閒咁就去教堂勒~
讀書時的我聽到停課安排一定歡喜若狂~
出來工作後的我聽到停課安排並沒有感覺~~
當了媽媽後的我聽到停課安排卻非常懊惱~~~
同一樣的事情在人生不同的階段果然有不一樣的感受~~~
令人除之而後快的H1N1終於都在香港爆發了....經過幾個月的認識,其實我覺得這個傳染病和一般的傷風感冒無異(因為我覺得傷風感冒傳染性一樣高,只是大家都不會在意那些傳染數字吧),可是大家好像都很害怕....政府因為沙士一役也變得非常審慎,第一時間就宣佈所有小學,幼稚園和幼兒中心停課~~
OH MY GOD
我和吳爸爸各自的大假也沒有14日那麼多啦....7月還有幾天是暑假,那來這麼多假呢?這個停課真的殺我一個措手不及~~
回家後打給媽媽,希望媽媽能幫上幾天忙(我比較信得過自己的媽媽,因為囡囡比較跟婆婆,而且奶奶好像上了大陸)...我和吳爸爸不奢求不用請假,只希望能少請一天得一天....知道要媽媽一早8時趕來會很辛苦(還要過海啊),不過也別無他法....媽媽答應了明天來幫忙,下星期則要遲些才知道那天有時間~
暫時解決了明天的安排....沒想到一會兒後就接到吳爸爸來電,吳爸爸接囡囡放學時再問清楚嬰園,雖然嬰園真的會停課,不過也會照常開放以供像我們這些雙職父母又找不到親友照顧的家庭作有限度服務~
何謂有限度服務?就是幼兒必須全面健康,任何流感病徵也不能有,一點鼻水,一點咳嗽也就不能回校(平時只有發燒才不可回校,一點病徵或還在吃藥期間也能回校的)....而且升降機會停止,回校要用樓梯,家長必須帶上口罩,另外所有活動暫停(例如大小肌肉活動)只提供基本照顧....幸好囡囡現在十分健康,所以還是可以在停課期間回嬰園去....thank god~~立即就告訴媽媽不用她一早走來了~
實在太喜愛這間嬰園的安排,非常體恤我們這些雙職父母啊,我想我真的沒有選錯它~
後記:停課不只影響正規的上課,就連囡囡其他活動也一樣要停課...好像幼潛要順延課程,YMCA的水上樂園要改到7月5日....很多本來安排了的活動全都要暫停了~
今日去旺角training,唔使返公司呢...lunch time仲走左去搵阿爸食飯添,very nice~~
本來打算上完堂就去買餸既,點知落堂時收到老公電話確定嬰園都跟隨政府指引停課兩星期...哎呀,點算呀...我同老公邊有咁多假呀~~
心情頓受影響,唔想去買餸lu.....結果直接行番屋企,心中不斷盤算應該如果安排這兩星期~但又要諗下今晚食咩喎...哈哈,結果決定整泡菜炒飯,一番到屋企就煲飯,醃好尚餘的半盒免治豬肉,將一條香草蒜蓉腸切粒....準備功夫做妥就等吳爸爸同囡囡番屋企~
同囡囡玩下,餵佢食粥仔,同佢沖埋涼,未夠8點就瞓左啦~~於是開工炒飯,新鮮煲既飯係無冷飯炒得咁分明架啦....不過今日d飯都焗左好耐,算係乾身,勉強合格....而味道都唔錯,用泡菜黎炒飯係好味過用黎炒烏冬呢~~
今日原本係約左去探朋友既BB,不過昨晚收到通知要改期,於是今晚繼續煮啦~
留起了昨晚餘下的梅菜,加上半盒免治豬肉($6)和炸豆腐($6),就做了這味新菜式 - 梅菜肉碎燴豆腐....加了肉碎後非常好下飯呢~
另外夏天時份又是消暑冬瓜當造之期,愛吃冬瓜的我就做了這個簡單的冬瓜($4)貢丸($10)粉絲($1)煲,做餸之餘還可以當湯喝呢~
今餐成本價$27,也留了飯盒啊~
為何那些一早約好的活動/節目,每每到最後一刻就要取消或改期呢????
為何偏偏是我那邊的活動才會發生這些事情???
是我性格太小器而有這種憤怒的感覺嗎?
如果是因身體不適或天氣問題而缺席或取消,當然沒有問題,我也會要求取消或改期~~但是為什麼要讓給後來者,即使那後來者是家人又如何?難道家人就不可以另約日子嗎?要改也不是前一晚才通知吧~
我不明白人家的約會準則,我卻是在夾日子時就已經會列明不能的日子,那些有機會有約會的日子(例如節日前後通常都要和家人吃飯),我盡可能都不建議或答應...但只要是落實了之後,我就會在日曆中寫下,其他後來者一律也會拒絕,就算是家人也會另擇日子(除非那是紅白二事則另作別論)~
遇上一次取消,我並沒有什麼....遇上兩次,我還是覺得算吧,人家屋企人畢竟比較重要....只是當接二連三的遇上改期取消的事情(不是同一人),我真的很不開心...只有你們才有約會活動嗎?難道我沒有嗎?我可是為你們而鎖定了日子和作出了安排(我要安排是否帶同囡囡赴約或要吳爸爸幫忙照顧)
為什麼現在的人那麼輕易說改就改...你報了旅行團也不能說改就改啦,不去就沒有了所交的團費,還要人家退款?害得大家不能成團了...哎呀,實在太多不同朋友的約會不約而同的在接近活動的日子才告知要告吹.....非常失望....為何偏偏讓我碰上,還給吳爸爸取笑我的約會總不能成功....很討厭啊~
真的對不起,或者你不是有心要改期或取消.....只是我滿心期待的在約會/活動中和你見面,到最後還是搞不成,我是多麼的失落....朋友們,可以像我那樣堅持約定的日子嗎?是我的思想太過時嗎?我以為約定就是約定,原來是可以改的嗎?
雖然如此,我還是覺得應該保持我現有的想法....我還要讓囡囡知道這是一種美德~
之前睇vyvy個blog,見到佢媽媽煮既梅菜鴨好吸引,而且原來個食譜都好簡單,所以心中已經打算有機會就試下整~
再加上買左Le Creuset 25cm橢圓湯鍋,用黎整全鴨或全雞最岩,所以好想好想挑戰下~
今日終於決定一試,買左一隻冰鮮鴨($28)同3棵梅菜($14)就番屋企煮啦,其他醬料屋企都有齊~
今次係第一次整全鴨,雖然話個食譜好簡單,但係都不免有d擔心...隻鴨都好大隻,要斬左個鴨頭先勉強放到入個Le Creuset煲~
引用vyvy媽媽既梅菜鴨食譜
梅菜鴨~食譜~
材料：鴨一隻、甜梅菜3-5棵
預備：
做法：
其實我買錯左鹹梅菜,唯有炒至乾身既步驟加d糖入去一齊炒啦,好在都無影響最後既味道~呢次好成功呀,老公都話好味道,唔係得個講字,老公用行動證明,就係添左一大碗飯食勒....因為佢好鐘意個汁呢,大大隻鴨都清晒(當然都留左2個飯盒)~
用Le Creuset既煲我就無放瓦匙免痴底呢個動作,而且一d都無問題呢,真係非常好用呀~只係隻鴨都幾肥,我撇左好多油架,所以先可以撈汁食飯,唔係既話d汁就太肥膩啦~
今日雖然得呢味餸,不過食得好滋味呢~~
琴日監完一日試真係非常疲倦,今日返工好辛苦呢...仲要勁多野做,而且今日比平時遲左少少走呀~
係巴士上其實已經倦極入睡,仲考慮緊好唔好去買餸...點知差唔多落車時下起大雨,老公又打黎話佢聽日約左同事食晏,唔使帶飯...於是都係直接返屋企就算~
不過我都係煮左晚餐,因為屋企既餐包到期要食啦,咁我就夾左芝士同牛油黎去焗,外面脆卜卜,入面軟綿綿,好味道~
之後用雪櫃內尚餘既半盒免治豬肉,加上係sogo thankful week買既意粉醬,就煮左呢個肉醬意粉...加塊芝士拎去焗就完成啦~
隻意粉醬味道唔錯呀,幾好食~~
不過天氣真係熱呀,今日係廚房煮飯,可能開左焗爐,真係煮到身水身汗呀...睇黎遲d可能會熱到唔想煮,要放暑假,哈哈~
之前係sogo thankful week已經買左sofina既防晒護膚套裝,相隔都無2星期又去sofina買左2枝very very控油粉末.....不過今次其實唔關我事既,因為要買既人係吳生~
睇開我blog既朋友應該都知道吳生非常注重護膚程序,佢用既野分分鐘比我仲多,而且非常勤力,每朝每晚都做齊d step,唔會好似我咁有時都會偷懶~
呢幾日天氣實在好熱,吳生已經不下一次同我講要幫佢買控油產品...係佢強烈要求之下,我決定今日就同佢去買,免得佢日日夜夜係度哦住晒~
以前已經買過very very俾吳生用,佢係激讚既...不過一枝其實都唔平,宜家要$250架~~好在今期做緊promote,控油套裝8折(sogo thankful week都係得9折咋),本來係一枝very very同一枝緊緻既,不過緊緻唔岩吳生啦,我又唔想勉強買黎用....好在sales話2枝very very都可以有8折,於是就買左2枝勒...夠晒吳生呢個夏天用啦~
星期六係我放假既日子,我通常都唔煮飯架啦~
今日睇完早場同老公去食晏,因為天氣實在太熱,於是想食d涼快d既野....結果就去左食壽司,呢期元氣勁賣廣告$9件,於是我地就去左食勒~
$9件既他他牛同炸蝦天婦羅都幾好味喎,總共食左8碟,埋單唔使一百呢~
之後去接囡囡番屋企,食完粥仔就午睡片刻,養足精神去上幼潛....上完去左行海港城,唔想等位決定早d食晚飯,今日去食翡翠拉麵小籠包...叫左雞絲粉皮,小籠包,回鍋肉薄餅同埋粒粒炒年糕....味道唔錯呀,不過就食左成二百蚊~~
前幾晚老公話想星期六去睇戲,咁我問佢想睇咩戲,佢話Star Terk....哈哈,我竟然唔知有套咁既戲,因為一向我都唔好d星球片既...老公話呢個故仔我地細細個時已經有電視劇做,非常出名~~~噢,真係唔好意思,我完全無印象,哈哈哈~
不過老公開到聲,我當然奉陪啦~於是今日一齊送左囡囡番嬰園,之後我地就去GH旺角買早場,點知撞著個麻煩師奶(其實佢都應該係三十幾個隻架咋),買張飛問長問短,又問個售票員邊行好,又話試過買左前面有野遮,總之就問好多好無聊既野...大姐,你唔係第一日去睇戲呀,使唔使問咁耐呀....結果2個櫃位好似得1個賣咁,大大話話賣左4個人次呢個師奶先決定買邊個位...點知俾完錢佢竟然仲係度問早場係咪平好多,哎,佢唔覺得阻住人架咩...好心佢就自己睇啦~
今次早場$40張飛,唔知係咪片長關係要貴d還是GH既早場係要$40既呢?
本來我都無咩期望,點知睇完又覺得幾好睇喎...而且主角之一"冼樸"呢個名好熟下喎,唔通真係細個睇過自己唔記得?
特技都幾出色呀,故事都算OK,雖然我唔明點解兩個冼樸最後可以係同一個時空出現....不過我覺得都值得一睇~
星期五又係我接囡囡放學既日子,通常都唔煮飯既,或者煮d簡單野...今日就決定煮拉麵做晚餐~
之前係sogo超市買既日本熊本拉麵,加埋豬扒,雞蛋同泡菜就成為今晚呢碗熊本豬扒拉麵勒~
麵質幾好呀,湯底都ok....都幾似係街食呢,而且仲有好豐富既餸,今餐都唔錯呀...每碗成本大約$15,抵~
果然在各方的特訓下,囡囡開始有進步了~
昨天我終於發現囡囡懂得做拍手的動作了,我可是示範了幾個月呢,終於都有點回報~不過有時叫佢拍手,佢會跟著拍,但有時又不會拍,所以都唔知囡囡究竟知唔知拍手等於佢做拍手既動作...我想等她真的懂了才拍下她拍手的video呢~
今日睇手冊發現老師都見到囡囡識拍手了,而且更用雙手撐起身坐著....這個我還沒有見過呢~雖然囡囡已經坐得非常穩,但她是不懂自己由瞓變坐,每次也是我們放她坐好的...所以在姑娘眼中囡囡依然要學坐的~
之前做評估時還說未可以,想不到一星期後就有了大躍進~~
今天手冊中的讚美字句:
"囡囡開始學坐,腰力開始有進步了!"
"囡囡今天很開心自己拍手手,用雙手撐起身坐著,叻!"
吳爸爸和我也十分開心,特訓看來有點效果啊,要繼續努力~~
老公聽日要去東涌既中心當值,所以唔使留飯盒俾佢...於是煮兩味就夠勒~
今日兩味餸都係新菜式,而且仲非常化算添呢~
泡菜汁燒銀絲豆卜
之前買包泡菜都仲有半包,今次呢味餸其實只係用d泡菜汁,不過我都放左少量泡菜一齊炒既...之前睇既食譜係就咁用黎配豆卜既,我見屋企有粉絲,所以加埋粉絲一齊煮....計埋都唔使$5呀~~食落原來係好好味架,應該早d煮黎食先岩,哈哈...推介大家煮黎試下~
鹹蛋蒸豬肉
鹹蛋蒸肉餅就食得多,但係鹹蛋蒸豬肉我都係第一次煮黎食咋...味道都唔錯,又係一味非常經濟既住家菜式....成本只係$10咋~
呢個火槍套裝好多煮食高手既blog友都有用架,好似大少奶,Vanlily.......
我對呢個套裝好有興趣,不過價錢太貴,只買一套，可在以下地方買到：
(1) 煤氣烹飪中心 - 銅鑼灣/ 尖沙咀，每套 $388
(2) PCCW 尊尚會，非會員價 $388，會員價 50分+$268
http://www.pccwshop.com/onlineshop/cms/main/product/t4_c/t4_c.jsp?cname=NO.1+SHOPPING+GALLERY&type=pd&lang=chi&id=294&itemCode=SG1768&
16套以上 $168一套-->現已改為24套才可~
8套以上 $188一套-->現已改為16套才可~
暫時我已經有5個朋友想買,連埋自己就已經有6套...但係距離目標仲差少少...所以係我blog呼籲下,如果blog友們有興趣請以私人留言留低email,湊夠團購數量我就會send email俾大家告知有關安排架啦~
-----------------------------------------------------------------------
注意:團購朋友請於6月20日前入數~
今日老公又有約會啦,今次係中學同學飯聚...由於今次地點係九龍灣,我無理由放工番左屋企又再去呢度食飯架....所以我決定唔做跟得夫人,留係屋企陪囡囡,等囡囡可以瞓得舒服d...今晚7點半囡囡就瞓左啦~
一個人的晚餐簡簡單單煮個意粉啦,用左carbonara醬料,所以好方便...煮多d順便番飯盒俾老公,所以煎埋雞扒同芝士腸俾佢~
其實又唔係話好耐無煮飯,不過好似好耐無煮餐正式d既飯,所以今晚就黎個2餸1湯勒~
猴頭菇鯊魚骨煲豬展
因為細細妹之前比左呢個湯包我,所以我只要買舊豬展去煲就ok啦~
咖哩薯仔炆雞翼
想炆野最快就諗到呢味餸啦...以前用普通煲,一路煮d汁就會一路收既,用左Le Creuset就一d都唔會,超能夠鎖住d水份同肉汁呢...所以今次比平時多左汁,下次可以落少d水去煮勒~
家常豆腐
因為有味咖哩,所以豆腐唔整麻婆啦...做番蠔油既家常豆腐啦~
今餐成本價大約三十蚊~~
