4日3夜既合家歡曼谷遊圓滿結束,我地琴晚終於凱旋歸來啦
今次唔算買好多野,都係家品同食物為主~~
琴晚12點半先番到屋企,今日即刻就要番工呢~~行裝都仲未執好,睇怕旅行假期後遺症又發作啦~~睇黎呢個星期都唔會煮飯住架啦~~
今次既曼谷遊尚算順利,不過自遊行似乎唔太適合我班《情緒無定向間歇性失常》既屋企人
,佢地既特點如下:
爸爸:時間觀念極佳,好似好驚遲到咁~~
媽媽:唔等得,等耐少少就開始黑面碎碎念,有時又突然黑面,唔知道有咩唔滿意,唔知點樣先可以令佢笑番~~
(一個驚遲自然預多左時間,多左時間又表示會等,實在係太矛盾啦)
細妹:最正常既家庭成員,同我地旅行模式相似,可以相約去旅行~~
細細妹:最大問題係唔行得,行多幾步就開始發脾氣~~
老公:可能第一次同我屋企人日對夜對,佢竟然呷我屋企人醋~~話我唔理佢,搞到我之後2日要放番多d注意力係佢身上~~
加上我又要兼顧行程同財政,所以其實都有一定壓力架~~不過好耐都無一家人周圍去玩,不斷影相,所以都係值得既....之但係一次都好夠勒,下次同屋企人去旅行或者都係跟旅行團比較好
聽日係首次舉家(娘家)一齊去外國旅行既大日子
地點選定曼谷,貪佢價錢相宜又易於籌備行程,而且除左我去第3次,老公去第2次(老公上次都係停留左1日咋)之外,原來我一家都未去過呢~~加上佢地又參加慣旅行團,所以今次既旅程安排就落係我身上勒~~
其實想一家人去旅行夾左好耐架啦,不過始終得個講字~~終於9月頭又再提起,坐言起行麻,我就睇下d package啦,最後都成功夾到日子仲係我一手一腳去book呢~~
但係book好左package之後,我工作上又進入旺季,遲遲都未開始計劃行程~~終於今個星期先正式send email去book spa, book sunday brunch, book dinner cruise...原來6個人既booking係難d呢,如果早多一星期book應該好好多~~
今日先算做起左個行程咋,不過我都預左到時好大可能要臨時改動架啦,因為屋企人都未睇過,佢地唔鐘意就要改架啦~~不過,老公話如果我屋企人對個行程嫌三嫌四,佢可能會忍唔住話佢地喎,因為佢覺得我放左好多心機但係無人欣賞...希望老公忍得住啦~
其實計劃合家歡既行程真係好唔同呢,唔可以太自我出發,希望佢地喜歡我準備既行程,而且行程可以順順利利啦
4日3夜合家歡曼谷遊就快開始啦...無出post大家都黎坐下呀~~
多謝係城大工作既朋友A邀請,今晚我搵埋老公一齊去幫城大一班市場學系三年級的同學做有關ThreeSixty既discuss group...最重要當然係做完之後每人會有$200車馬費啦
係又一城EXP食完野就諗住過去城大勒,點知見到H&M,我又拉老公入去睇下,發現呢間既半價衫又同Elements個間唔同架喎~~之不過今次我買唔到,老公又買左下面呢件半價褸(原價$199),折左之後真係幾抵下呢~~
入到去城大見到好多人打晒蛇餅咁買手提電腦,好似話學生價平左好多喎~~之後就入左去今晚做discuss group既課室,原來仲要錄影低我地既討論過程架~~
呢班市場學學生著晒套裝,仲比我地呢d在職人士著得formal呢...而且又準備左飲品零食俾我地,都幾細心喎~~
4女2男,似乎ThreeSixty都比我地講到一文不值咁...哈哈,睇黎佢地份report出到黎一定有好多要改善既地方俾ThreeSixty參考~~雖然係discuss group,不過都傾得幾開心呀...8點開始傾到10點,之後$200既ThreeSixty Gift Voucher就袋袋平安勒,加埋老公個份就有$400啦
我見學生仲有好大疊ThreeSixty Gift Voucher,我諗佢地仲有好多discuss group要做,佢地先最辛苦呢~~加油努力呀~~
今日我搵左老公陪我去一個特別活動,位置係城大,所以就係又一城食晚餐勒~~
由於只係得1個鐘左右,但係我地又唔想食food count又唔想食得太貴~~於是醒起上次同9月靚太食個間EXP...而且老公又未食過,就帶佢去試下啦~~
6點半唔使等,就坐係溜冰場旁...老公睇到又話好想搵日去Elements到溜下喎~~
老公叫左個pizza叫「尋找咖哩雞」,都幾得意呀,而且味道唔錯,老公都幾鐘意食呢~~
另外叫左個香辣豬頸肉炒米線:呢個叫左唔夠5分鐘就上檯勒,不過又真係炒得熱辣辣架喎~~味道都唔錯呀,好惹味...下次可以試下係屋企煮
老公都覺得EXP唔錯,係又一城黎講呢度既價錢真係算好抵,今餐只係$125咋
琴晚問老公今晚想食咩,因為仲有半條法飽到期要食埋佢,所以老公就話食西餐,仲點名要配薯菜喎~~所以今晚係一個full set既西餐~
焗香草蒜茸飽
***
雜菜湯
***
香煎雞扒配Peperoncino意粉
***
粒粒芒果
唔好睇個set dinner好簡單,每樣配菜都要煮,兩個爐頭忙得團團轉,所以今次既香草蒜茸飽焗燶左呢
不過就好脆口,最後都食晒~~
本來無諗住有湯架,不過煮煮下老公入黎廚房問有無餐湯飲,咁我又開埋罐雜菜湯~~
原先想買一條條既波浪薯條既,不過搵唔到又見薯餅特價買一送一就轉左買薯餅勒~咁菜呢,我就想食粟米
薯餅唔用油炸改用焗爐焗唔使咁肥,而粟米就用牛油煮過~~
主菜都煮雞扒啦,用左雞蛋、黑椒、蜜糖、香草一齊醃架,老公話味道唔錯喎
其實意粉係用黎留飯盒,不過既然煮開就煮多少少...今次用左隻叫Peperoncino既調味包炒意粉,少少辣幾好味架~~
上星期細細妹拎左3個芒果黎,今日仲唔食就會熟到爛架啦...點知吳家大少爺要我切埋出黎俾佢食,所以又要入廚房切切切...今餐花左好多心機同時間呢,好在都幾好味
好似好耐無煲飯,見天氣涼涼地,老公前幾日又提起煲仔飯,於是今日就諗住整臘腸滑雞煲仔飯
不過搵左好耐都買唔到臘腸,於是就退而求其次用冬菇算勒~~再加多碟蠔油白灼菜心,簡直係又平又快靚正~~
呢煲既份量老公一個人就KO左勒,而我都食左2個普通飯碗呢~~加埋飯盒,今日係煲左4穀米呀...兩口子做左大飯桶呢
今日又係陪老公番教會既日子,一班兄弟姊妹一齊食完晏畫之後,我地兩口子就周圍行下街拍下拖咁啦
之後就番左屋企勒,晚飯老公拉左我去Elements,其實佢係見我琴日去左H&M買衫唔抵得,所以佢今晚又要去,結果買左一件半價既衛衣(原價$245)~~
老公話想試下Three Sixth既food count喎,最後試左佢既burger,不過我覺得一般咋...睇佢好忙咁即叫即煎香噴噴咁,可惜出黎個漢堡一d都唔熱,可以話係凍呢,嚴重影響味道~
希臘羊肉漢堡(配山羊芝士、紅椒、薄荷乳酪)(套餐$52):呢個係老公既,羊肉做餡好似好少,所以覺得幾特別...不過如果佢可以再俾d心機整應該可以好味好多~~
煙肉藍芝士牛肉漢堡(套餐$55):我覺得用藍芝士都幾特別,不過效果似乎麻麻地,同漢堡好似唔係好夾....而且牛肉唔夠juicy,整體又唔熱喎,所以味道真係一般咋...其實佢d材料都係靚野黎既,不過製作既人太唔專業勒
跟餐既薯條普普通通啦,不過係Elements食晚餐只係用一百蚊左右算係好平呢~~
上星期日幫老公既教友睇男禮,因為我們的意見夠專業,所以得到一對新人既信任邀請我們今晚幫眼新娘子的婚紗晚裝...本來我和老公各自有節目不能出席,不過因為我的約會由晚飯改了下午茶,那麼就有時間去幫幫眼...而且我也很enjoy觀賞婚紗晚裝呢~~
新娘子的婚紗很清雅亦和她很相襯呢,拖尾也見特色,我和新郎都覺得不用改選呢~
粉橙的晚裝我覺得普通了一點,不過最重要是新娘子喜歡,所以也照舊保留下來~~
另外選定的是一件紅色晚裝,不過我和新郎一致覺得太plain了...所以希望新娘子試試其他晚裝比較一下~~不過因為這一層的晚裝都是偏向簡單的,所以就去上了一層看了要upgrade的晚裝~~
這層果然不一樣,一看已經覺得款式特別很多~~新娘子只會要兩件晚裝,我建議可試著一些修身的,感覺會不一樣啊~~
結果最後選了粉紫色那一件,我覺得很不錯啊,有一份古典美呢....新郎和新娘子似乎也對這一件晚裝頗滿意,但就要加錢了~~
能夠近距離再觀賞這些婚紗晚裝,很興奮呢
琴日老公去左大尾督踩單車又好夜先瞓,今日又要一早番工,好辛苦呢~~
而我一早又要去中環兌全家人用既泰銖,身懷巨款既我兌換好就急急腳番屋企啦~~
既然係咁,今日就煮個簡便午餐,雖然唔係好健康,不過一餐半餐無所謂啦
老公鐘意食五餐肉就煎一罐啦,另外五香肉丁撈麪就係老公既,我就煮左個五香肉丁湯麪...食飽飽老公就去左瞓覺啦...睇黎佢真係好攰咁喎~
籌備結婚之時認識了不少志同道合的新娘子,除了9月靚太和蝴蝶‧樹姊妹之外,還有這班「幸福靚太」
不過這班幸福靚太很難約,今天的聚會也是拖了不知多少個月才定下來的...可是最後也要將時間縮短,由晚飯改為下午茶~~
今日相約來Elements逛逛一齊做闊太,首先出戰H&M,靚太N大換季,掃走一大袋戰利品~~而我都有小穫,就是一件半價了的Floral print上衣(原價$299),這是我首件H&M衣服呢~~
跟著逛了沒有收獲的Zara就入左Three Sixty行下~~結果我地都俾入面既La Rose Noire蛋糕吸引住,多謝靚太S請我地食左5個cakes~~我諗佢地係朱古力fans,所以4個都係朱古力味再加多個tiramisu~~
蛋糕真係好味道呢...不過食多幾啖就開始分唔清d味道勒,仲好飽添~~呢2日真係食左好多甜點呀,我諗已經係我一年食甜點既份量~~不過呢間La Rose Noire真係好值得推介
http://www.la-rose-noire.com/site_pages/contents.html
今日既飯聚係預祝茹時既生辰,因為今日主角要當值,所以時間稍為晏左少少~訂左8點半去又一城既Cova食甜品自助餐,而且有四送一優惠呢
我都係第一次去Cova食野架咋,平時行經都見到呢個buffet full house架...但係今日既入座率只係約4成左右,唔通今日重陽節大家都去左登高
呢個buffet,咸點甜點各佔一半~~我係咸點既支持者,事關我一向不太好甜,甜品一件起兩件止就夠勒....計落我今晚食既甜點只係有迷你忌廉撻、朱古力芭芙、四分一件芒果慕士蛋糕,對我黎講已經好夠勒
咸點呢,我就食左好多轉~~最欣賞芝士磨菇,好好味呢...不過只係出左一碟咋~~迷你三文治,凍肉,薯仔...都唔錯~~另外仲每人送左一杯開心果口味既雪糕,又香又滑,正呀
...不過食完都好飽下....飲品我要左蕃茄汁,剛上時凍凍地幾好飲,不過擺左一陣再飲就無咁好味lu~~
今晚Joey妹妹又跟媽咪一齊出黎食buffet,原來小小年紀既佢已經愛上左食自助餐,鐘意出去拎野食~~不過佢可能食得太多啦,走時竟然嘔番晒出黎...好在嘔完佢仲識得笑,唔係真係俾佢嚇死呀~~睇黎Joey妹妹真係太為食啦~~
之後我就係火車站會合老公(因為老公今日去大埔踩單車同食飯)一齊番屋企,係尖東站仲撞到堂哥志森同佢女朋友呢~~估唔到老公都認得我d親戚喎~~
