小店@九龍城

難得去到九龍城,於是叫老公放工之後直接黎瑤瑤媽到接我同囡囡,順便就係九龍城食晚餐啦~

九龍城最出名就當然係食泰菜啦...不過我地反而去左食西餐,其實就係想試好耐既"小店"勒~(好友菇時都有推介過,阿蘇都有介紹架)

我叫左個鮮磨菇芝士龍蝦燴天使麪($128),呢個價錢係半隻龍蝦既份量,咁當然亦唔會好大隻啦,雖然就真係好少龍蝦,不過都好鮮味....天使麪雖然唔係煮到最perfect,不過都ok,唔會太淋,不過最正係佢個汁....芝士迷既我真係覺得好正,好味道~~

老公就叫左蘋果焗豬柳批($128),我都試左一啖,幾好味....我相信老公係超鐘意食,因為平時唔會食埋汁既老公,今次食到隻碟好乾淨,簡直就係美人照鏡~

我地每人都加左$30轉餐,有湯有餐茶,老公既青豆忌廉湯同我既南瓜忌廉湯都唔錯~

最後唔少得既就係叫佢出名既甜品啦...我地叫左個拿破倫餅($38)share食,嘩,好好食呢...非常脆口,吉士又夠,超正~

呢度唔使加一既,雖然埋單都要$351,不過我同老公都食得好開心,好滿意(囡囡都好乖睇住我地食)....食得好滿足呢~

6個月發展監察期

今日星期二係囡囡去健康院既日子,我特別請左日假做呢件事~

不過上畫依然送左囡囡返嬰園,因為我要去香港個邊處理晒我既獎品,所以一早已經好忙碌:

8am:吳爸爸同囡囡出門口-->9am:我之後番上床再瞓下,9點先起身-->9:30am煮左個麪做早餐(會當埋午餐架啦)-->10am出門口行去搭船-->係ifc連卡彿拎skin care sample-->行去上環拎40片裝思詩樂乾棉同2片大王NB試用裝-->搭叮叮去灣仔又拎40片裝思詩樂乾棉同2片大王NB試用裝-->11:45am行去cwb既bioslim做免費去肚紋treatment-->1:15pm做完搭mtr去嬰園接囡囡去健康院

一朝早就係咁無停過,好似做左速遞員咁,不過唔係派件而係拎禮物,因為全部都要平日office hour先可以拎,今日唔去就唔會有時間再去架啦,無左d禮物就唔抵啦,不過我仲爭個1 GB USB禮物未拎,好在呢個可以星期六都拎得,所以等下次先啦~我仲估唔到bioslim咁好,一d都無sell我呀,可能我已經擺晒款趕時間,做完無興趣join卦,不過佢一d都無sell我我反而對佢有d興趣,因為做完都好似有d效果咁,之但係佢得cwb一間我就真係唔會join lor,如果係tst有既話或者都有得諗下,哈哈~

比我原定計劃既2點早左20分鐘到達嬰園,姑娘話要等等,因為囡囡去左大大呀,仲話好勁下添~本來2點囡囡夠鐘食奶架啦,不過因為要去健康院唯有晏少少先食啦~就係呢兩個情況之下,去到嬰園磅重,囡囡就唔合格啦~

6個月零7日大既囡囡

體重:5.75kg = 12.65lbs

身高:61.5cm

磅重時姑娘話囡囡好定好乖喎,點知隔離有個bb勁喊,嚇到囡囡都喊埋一份,不過我抱番起佢就無野勒~之後就去見姑娘啦,姑娘一見到囡囡就話佢條頸好有力,非常好,一抱起佢就話囡囡好大力添...同佢試坐都話佢坐得唔錯幾定...不過姑娘俾玩具佢,佢就無理到,只係望住其他姑娘傾計,要d時間囡囡先有動作,不過都做到晒要求,包括主動去拎同埋雙手一齊去拎~之後我問姑娘想度高,不過佢話今日都係唔會度喎~

姑娘話囡囡一切發展都好好,就係磅數唔合格,比上次4個月時仲輕左dd,剛剛出左生長線添呢~所以都要見一見醫生~

醫生見到囡囡就問呢2個月有無大病過,例如發燒嘔吐,咁就梗係無啦~之後又問佢肯唔肯食,囡囡從來都無厭奶既情況,好肯食架喎,係嬰園仲已經食到7安一餐媽媽奶添架啦~於是醫生就話同佢度下高,結果係61.5cm,岩岩合格,係最低個條生長線...之後就體重身高一齊睇,醫生就話咁樣睇囡囡既比例又非常標準,所以其實都無問題~

醫生就話如果我都俾緊糊仔囡囡食,就叫我加多d用肉同菜煲既粥仔俾囡囡食,宜家齋食媽媽奶都唔夠營養喎~佢話咁樣應該可以追得番~

其實我又唔太擔心喎,因為我都唔覺abby瘦弱,佢只不過係細粒左少少o者...我之後講俾一向超緊張既吳爸爸知,佢都無咩反應,因為佢都覺得abby只係細粒左d,無問題~

不過既然醫生咁講,我打算下星期開始就煲d豐富d同營養高d既粥仔俾囡囡食啦,我相信下次再去健康院時應該追得番架啦~

0330的晚餐 ~ 金粟西芹炒雞柳 粉絲白菜芝士腸

放完假又係煮番下住家飯食既時候啦~

又係普通行貨,志在唔使叫外賣食咁啦,今餐成本價大約廿蚊左右~

Two Girls

原來雙妹嚜呢隻百年寶號都改行trendy喎~

之前無意中係d website見到隻新品牌skin care叫Two Girls,見佢包裝好似幾靚咪睇下lor...點知原來係雙妹嚜既新line,仲話係瑞士製造架~佢有2條line既,一條sell 保濕,一條sell anti-aging~睇下價錢,其實都唔平架喎,咁就睇過就算勒~

咁岩又俾我見到佢呢期既promote係帶其他品牌skin care既吉樽就可以當$88使,咁又好似幾吸引喎~

因為洗面同toner遲下都要補貨,於是就決定買佢黎試下...而我就想試佢保濕個條line~

星期日同囡囡玩完playgroup就去左買勒,一枝cleaning gel,一枝toner,扣左2個吉樽,最後只要$254咋....為起都係百二左右,算係好抵下架啦...不過就唔知好唔好用~佢仲送左個雙妹嚜卡片套俾我添~

Triple O's Lunch

星期日出左去facesss到幫老公補購Origin既Make a different同埋我用既白茶精華,就咁無左$640,好貴呀))))))))而買滿$500出示海港城張office club卡就可以係counter做個簡單facial,都好過無啦~

之後用goodtime卡去左triple O買包做lunch,goodtime卡既offer係買一送一(只限早餐combo),於是要左2個breadfast club combo,因為呢個早餐包最好味,有蛋,有脆脆煙肉同埋薯餅呢,仲有薯條同雀檸....外賣返屋企.....嘩,個包真係好大個,好飽呀))))))))

本來要過百蚊既lunch,宜家只係$53咋,抵呀~~

New York Fries @ Harbour City

本來囡囡打完針,我想帶abby去join波媽既赤柱之旅~不過打完針既囡囡好似好攰,見天氣又唔多好,加上今晚又要去文化中心間映月樓飲宴,所以最後都無去到赤柱,囡囡返到屋企即刻就要眠一眠啦~

我同老公今朝食完早餐先出發去同囡囡打針既,之後返屋企,囡囡瞓,吳爸爸又瞓,跟住連我都瞓埋,結果都無食到午餐...最後我地決定去飲之前行下海港城,順便去試New York Fries做下午茶~~

其實我想試好耐架啦,不過一直無機會...去到要排隊呀,不過都排得好快...我地叫佢出名既The Works(Regular Combo) $44一齊share食~

味道無我想像中咁好味(因為我真係以為會好好食),不過其實都唔差既...d薯條好似食炸薯皮個隻feel,d醬汁都好多種,但係好似食唔出mix埋既效果,好似各自為政咁lor...不過都係好味既~而飲品可以選雀檸架~~

我諗我唔會特別想再黎食啦,因為都幾貴而又唔係話超好食個隻...不過未試過都值得去試下~

打針針@6個月

6個月又係打針期啦,照例約星期六12點去打針,因為吳爸爸都可以一齊去~

今次係打六合一針同埋肺炎鏈球菌針,呢次係由第一次同abby打針既姑娘負責~

呢位姑娘係唔介意我地拍囡囡既,所以今次又可以拍到囡囡打針既情況~

唔知係咪大左怕痛左,今次囡囡喊得好淒涼,不過都算好快冷靜到,算係咁啦~~

最搞笑就係呢位姑娘啦,佢話囡囡標緻喎...不過我覺得佢見個個bb都會讚既,但係我聽到依然會好開心呢~

囡囡第一個戶口

拖左成2個月,今日我終於都去左同abby開戶口啦~

因為我只係星期六先有時間去銀行,其實之前去過一次想開架啦,點知個次唔記得帶出世紙...之後好多個星期六唔係有節目就係我唔願起身,好在今日要去同囡囡打針,所以順便去開埋個戶口啦~

呢期最紅既兒童儲蓄戶口非Doraemon莫屬啦,所以我都選佢做囡囡第一個戶口~不過我諗可能下年有其他兒童戶口吸引d就會同佢轉架啦...不過今年就用住佢先啦~

開戶口送左個錢罌,開張Doraemon Visa送個水樽....如果戶口個5千蚊擺多過一個月就送多個Doraemon公仔大錢罌,而張Visa頭兩個月簽夠$2800就送個Doraemon旅行箱~~

囡囡既利事錢四千多,我補左d差額夠5千,咁就搞點左個公仔錢罌勒...而張visa就睇下到時簽唔簽得夠啦~

見到戶口有囡囡個名,感覺真係好特別...好似真係好大個有屬於佢自己既野咁呢~

0327的晚餐 ~ 火腿豉油皇炒麪併煎餃

星期五因為接囡囡放學,所以又無去買餸...本來諗住返99度痴餐順便等佢見下個孫...點知老公話唔想返咁密,所以話留係屋企喎....咁咪睇下廚房有咩可以煮lor~

結果搵到兩包幼麫,一包火腿同埋餃子....簡簡單單炒左佢就當晚餐lu~

豚肉飯專門店BTU

上次Emax搞$1優惠,我就試左Hot Dog Formula....原來3月都一樣有$1優惠,而且仲加多左幾間食肆添...3月就黎完啦,於是我又試下其中一間啦,今次就試"豚肉飯專門店BTU",佢有2間分店,一間係Emax,一間係Megabox....哈哈,專係搵埋d人流少既地方開舖咁得意既~

張coupon係買一個set dinner加$1送多個set dinner...佢既set dinner係$35包咖啡或茶~

我就叫左個日式叉燒併炸蝦飯餐,加$1轉豆漿...另外加$1要左泡菜豚肉飯,因為呢個飯唔係set dinner,所以無飲品跟...$37就搞掂左今晚餐飯啦,都幾抵呀~

至於味道就普普通通,好一般咁lor,但係$37兩個飯都唔可以要求咁高....如果平時$35個飯呢就貴左少少勒~

不過份量都好多,所以食得好飽,唔好忘記個天使蛋糕仲未食晒呀...但係都真係食唔落,要夜d先可以食蛋糕呢~

囡囡叻叻

今晚打開囡囡本手冊見到嬰園既姑娘寫左d野喎~

睇真d,呢句好厲害,係寫住"自己會扶著奶瓶,叻!"

嘩,感覺就好似自己俾人讚咁開心呀~~

因為係屋企都係埋身餵囡囡,所以其實都唔係太知道佢識唔識自己扶住奶樽架~原來囡囡已經識咁做,等我遲d叫囡囡示範俾我睇下先....哈哈~

0325的晚餐 ~ 炸魚丁拉麫配五香牛展

因為吳爸爸話d同事叫佢聽日出去食晏,所以唔使預佢留飯盒....再加上個天使蛋糕都未食晒,所以都唔煮飯啦~

簡簡單單係超市買d方便食物,一包2人份既拉麪,一包炸魚丁,一包即食五香牛展,廿蚊鬆d就搞掂呢餐勒...食完仲要食天使蛋糕當甜品...嘩,飽到唔郁得~

個蛋糕聽晚仲要繼續食...所以abby 1歲前都係買蛋糕仔慶祝算啦,哈哈~

第一次食香蕉蓉(附video)

324係囡囡6個月大既日子呀,星期日已經帶佢去參加左盛大既0809bb半歲party,正日就一家三口靜靜的過~~

半歲啦,都叫大個女啦....所以今日特別炮製左香蕉蓉俾abby食,當係慶祝佢6個月生日既大餐啦~

我第一次整果蓉,決定整個容易d handle既香蕉...abby第一次食就整住半條先啦,切片後蒸一蒸,再用研磨用具磨蓉,搞掂~

食之前俾abby睇下香蕉係咩黎既先,俾佢摸下睇下聞下先開始食~~個傻妹以為就咁就食得....哈哈~到真正試食時又出現怪樣啦,睇黎abby好似唔係太鐘意食香蕉咁喎,無理由架,吳爸爸好鐘意食蕉架喎,abby無理由唔鐘意既...睇黎佢又要好似初初食米糊咁要幾日先習慣d味~最後食左好少咋~

第一次在家睡BB床和看音樂轉轉(附video)

囡囡其實唔係第一次瞓BB床,因為係嬰園佢都有自己張BB床既...不過其實真正係吳家屬於囡囡張BB床都係呢日323先第一次瞓咋~~

事關由囡囡初生回家起,吳爸爸就把囡囡放在他身旁睡,不過由於我們的床褥太軟並不合嬰兒睡,所以本放在BB床的床褥就放了在我們的大床上,囡囡睡時升高了,也不怕我們會壓到她,所以囡囡是照睡在屬於她的床褥,不過沒有放在BB床罷了~

唉,其實這個安排我是不太願意的,我並不是害怕囡囡因為這個安排而將來不肯自己睡BB床(因為係嬰園佢都係自己係床到瞓)...最大原因係放了囡囡的床褥後,我們的大床就只剩下半張,等於一張單人床大小,卻要睡著兩個人....真係轉身都難呀,瞓到我腰酸背痛~~我已經叫左吳爸爸好多次搬番囡囡落BB床瞓,但係佢都係唔肯,話唔放心喎...真係唔明佢點諗,放係BB床咪仲好,宜家既囡囡係唔識爬出張BB床架麻...反而係大床都有機會碌左出黎...所以我地平時要用好多枕頭被舖放係另外半邊床黎阻住囡囡碌出黎~

終於因為天氣太熱,吳爸爸肯將囡囡放落BB床啦...天呀,張BB床足足等左半年有多先用呀~~囡囡放左落BB床無扭計呀,而我地終於可以將朋友送既音樂轉轉掛飾玩具裝係BB床到比囡囡睇,囡囡係第一次睇呢樣玩意呢....佢眼定定咁望住,好似覺得好新奇咁呀,哈哈~

而我就終於可以舒舒服服咁係大床瞓啦,我都覺得自己可以瞓係咁狹小的地方大半年好厲害~

0323的晚餐 ~ 煎黑椒雞翼 梅菜蒸肉餅 菜圃煎蛋

又係懶人晚餐,諗唔到煮咩,就煮最行貨既雞翼,肉餅同煎蛋~

雞翼其實好耐無煮,老公見到都話好耐無食啦喎~~之前一pack三包既菜圃煮埋今次終於食晒~~最後就係蒸肉餅啦,估唔到老公激讚,仲話個肉餅汁好好味,佢用黎撈晒d飯食喎...雖然行左d,不過老公都食得好滿意~

今日成本價三十蚊都唔使呢~

唔轉又轉(附video)

(Day 180 @ Home)

自從見過囡囡成功轉身之後,已經好耐無再見佢轉啦,所以想同佢拍video都拍唔到~

囡囡雖然唔轉身,但係總會左扭右扭,而且勁鐘意打側身,但就硬係唔轉多少少,唔肯趴係度~

星期日一朝早囡囡就瞓醒左,係張床到嘈嘈弊,於是吳爸爸就起身同佢出廳玩,我就繼續瞓~~~點知今次俾吳爸爸拍到囡囡轉身喎,睇佢轉得幾淡定,好似好不經意咁呢~

之後成朝就係咁轉,真係俾佢吹漲....忽然愛上左轉身~~

女仔總係善變既,bb都唔例外....哈哈~

 

第一次參觀幼兒園

素聞九龍塘名牌幼稚園林立,什麼根德園,基督堂...一大堆陌生的名字,我這個新手媽媽總要了解了解....不過為了配合我的照顧方式,我是一定要找家全日制的....看了整個九龍塘的幼兒園名單,就只有啟思有全日制,於是就睇下佢既資料,發現佢主張愉快學習,語言學習並不像其他那麼艱深,我幾鐘意佢呢個教學方式喎~~適逢今天九龍塘啟思幼兒園開放日,於是我便決定親自去走一趟,實地視察,了解了解~

平時去九龍塘最多都係去又一城,今日我好似大鄉里出城咁,原來係九龍塘既學校環境真係好唔錯....沿途見到耀中國際學校,約克幼稚園咁,單睇外表已經令人心動...哈哈~

去到啟思啦,一入去就係個大花園,好多攤位遊戲,囡囡太細未能參予,如果帶2歲既小朋友黎應該會玩得好開心...根本就好似一個嘉年華會咁~

呢度有2層,而且非常透光,感覺好舒服...而且佢地好體貼,有飲品免費提供俾家長同小朋友呢~~

由於囡囡實在太細都無野岩佢玩,於是我就去問下資料啦...一問之下實在大失所望,因為佢地上年開始已經無辦全日制幼兒園啦...佢地話雖然佢地有牌開全日制,不過因為實在太多學生報名,為左收多d學生,所以分上下畫班,唔開全日制啦~~

哎呀,咁樣我連唯一一間可以考慮既九龍塘幼兒園都無埋啦~~

離開之時仲送左隻video俾我(人人有份既),唉,唔好對我咁好啦,我好想囡囡可以係呢度讀但係又唔可以,個心真係好失望呢~

第一次意外

今日如常開糊仔俾囡囡,份量增加到1湯匙~~

本來一切正常,我一放囡囡落high chair,佢就知道有糊仔食,已經打開個口仔等我餵~

於是我咪快快手餵abby lor....點知可能糊仔比平時熱左少少,佢既反應大左d,隻手就fing起,仲打起左隻碗仔....我無為意囡囡有此反應,只係輕力hold住隻碗,就係咁捉唔實,隻碗仔反左上囡囡塊面呀)))))))))))))))))))))))))))

嘩,囡囡即喊,我就嚇到心都離埋....好在另一隻手已經拎住條沙巾,即刻抹走d糊仔...抱佢去換片墊到用濕棉同佢印面仔...好在囡囡識合埋眼,d糊仔都無入到眼咋~抹晒d糊仔後,見到眼周圍既皮膚紅左少少...真係心痛死我lor(好在吳爸爸無鬧我咋)

囡囡仲未收聲,於是抱起佢安撫下,好在一陣就無野啦...真係不幸中之大幸~~d紅左既皮膚隔左一陣都散左紅啦,不過我唔敢同囡囡搽野住,都係睇定d先~

好在今次既事件無令囡囡有陰影,安撫完再餵佢食都無問題,佢仲食得好快添,一啖接一啖,停下都唔得呀~

今次記錄低等我唔好再犯同樣既錯誤...唔會再有下次架啦~

囡囡,對不起啊

茶點時間

今日又係我接abby放學啦,每個星期五去接放學都係我好期待既事呢~

接囡囡時,姑娘話今日同abby試食粥水呀,仲話囡囡好肯食,唔錯喎....當然啦,我早一星期已經開始同囡囡試糊,唔係邊食得咁好呢....哈哈~

所以宜家囡囡係嬰園,除左2包媽媽奶正餐之外,中間仲會有茶點時間食粥水...遲d應該仲有果汁試添~食得好,遲d就有一餐正餐改食粥架啦~

今個星期囡囡愈食愈好,開2茶匙米糊都好快食晒,睇黎可以再加到1湯匙既份量勒~

買鞋‧買鞋再買鞋

實在係太耐太耐無買衣服鞋襪類既東西俾自己啦,我懷疑已經有年幾既時間~~

本來依然無諗住要去買既,不過見公司附近既E-max開左Fiorucci既outlet,見d價錢真係好抵,所以決定去睇下,如果岩款就買啦~

我未幫襯過Fiorucci,平時見佢d鞋都唔平,好似連入去睇都無試過~~今日去睇d鞋款都唔錯,高跟鞋就唔岩我啦(因為我d平衡力真係好差,而且著高跟鞋實在太辛苦啦),所以我都係睇平底,矮跟既款式~

呢間outlet都係賣斷碼款,好彩我隻腳夠大,39呀,40呀既size就最岩我勒,試邊款有邊款~~最平每對$150,不過$300就可以買到3對$150既鞋款啦,咁即係每對$100,呢個價錢買到Fiorucci,實在係超值啦....況且我真係想買鞋好耐架啦~

最後買左呢3款:

粉紫色矮跟鞋:呢對d料著起好舒服呢,斯文款返工去街都得...返屋企睇張單先知呢對鞋既原價竟然要$1198...嘩,唔係呀,咁貴~~

船踭涼鞋:因為已有2對密頭鞋就決定買番對涼鞋款,而且夏天又到都係時候買涼鞋啦~呢對鞋頭既裝飾好有夏日feel呢...而呢對原價就係$598,都唔平呀~

深紫平底鞋:呢對既原價最平,只係$290...不過我覺得佢隻色好靚,而且鞋邊係無縫既,應該唔會挖腳~簡簡單單最百搭~~

其實都仲有d款鐘意架,如果可以再買多3對就好啦....哈哈哈~

0319的晚餐 ~ 酸辣湯烏冬

聽日星期五,老公又同同事去食晏啦...所以今日唔使煮咁多,於是決定煮簡單既麫食,就酸辣湯烏冬啦~

放工直接返屋企,唔使買餸添...估唔到老公話想食粉絲做底喎,於是佢就係酸辣湯粉絲啦~~用埋屋企既物資加餸,有雞蛋,魚蛋同火腿...夠晒飽lu~

如果計番成本既話,今餐都唔使廿蚊~

0318的晚餐 ~ 麻婆豆腐 滑蛋火腿 蒜蓉白菜

今日工作好忙,忙到個腦都唔係好諗到野....不過一樣夠鐘就放工,長命工夫長命做,聽日先做勒~

係毫無頭緒之下,買左盒免治牛肉($12),火腿($12)同埋白菜($3)...買多磚豆腐($3),求其煮左好行貨既三味餸 ~ 麻婆豆腐,滑蛋火腿,蒜蓉白菜~

呢餐唔使$30(因為只係用左半包火腿),好在都留到兩個飯盒~~

0317的晚餐 ~ 泰式青咖哩雞 銀絲貢丸 菜甫煎蛋

今日無咩頭緒,諗唔到想煮咩餸...結果係超市左睇右睇,最後決定買包青咖哩整泰式青咖哩雞,老公話d青咖哩都辣辣地喎,不過味道ok~

之後買左包特價貢丸,最後用左黎配粉絲炒埋一碟,好味架...加多味菜甫煎蛋就夠餸留飯盒勒~

今餐仍然係四十蚊有找

幼兒潛能訓練課程

"幼兒潛能訓練課程"係由香港基督教服務處開辦既,簡稱"幼潛"~

認識幼潛始於舊同事JJ媽的blog,還記得那時是06年9月左右,JJ媽同Joey去上呢個幼潛playgroup,從JJ媽的描述我覺得這個playgroup很不錯,而且見Joey也上得很開心,那時就想如果將來有小朋友一定學JJ媽咁帶佢去上幼潛~

上年懷孕留意多了一些媽媽blog,發現這個幼潛playgroup真的很受歡迎,竟然有媽媽凌晨3,4點已經去左排隊報名,仲見話報唔到既家長情緒激動...真係嚇死我....心諗使唔使咁誇張,我覺得我應該未去到咁瘋狂既程度,起碼唔會凌晨走去排隊卦~

囡囡出世後都有諗住同佢報下playgroup,不過都要等6個月之後先考慮...咁岩0809mami club話包班報幼潛喎,實在太好啦,唔使自己搞,有人幫手報,我當然留位啦....終於2月中分好組去包班報名,不過我個組既媽媽傾傾下又唔想報住,結果我就無得經包班呢個方式報名啦~可能我無參予媽媽們既討論,所以我對幼潛依然係好有興趣,我唔太清楚令佢地唔報既原因,不過既然係咁我就唯有以個人名義去報名啦,畢竟我已經因為想報名而交左$100會費做會員(因為要係會員先可以報名),無理由放棄架麻~

而且宜家改左機制,唔再係先到先得,而係用抽籤形式,就算報左都要抽中先有得讀,抽唔中就無架喇~呢期有你份,又唔代表下期抽籤有著數喎~~所以我都係抱住一試既心態,仲要係deadline之前2日先去交表添~

其實我都睇左好多坊間唔同既playgroup資料,我覺得幼潛係比較特別既,首先佢唔係商業機構開既,雖然設施方面就一定無得同人比,不過我覺得內容比設施黎得重要,其內容初初係用黎幫一d有障礙既小朋友,因為真係有成效而獲得良好口碑,漸漸更開辦埋俾正常幼兒添,所以我覺得同坊間既playgroup唔同~

另外幼潛開宗明義,服務對象並唔係小朋友,而係家長...一個鐘既課堂唔係比小朋友上,係比家長上,唔係同小朋友玩,係玩一次比家長睇,比家長知道呢個年紀既小朋友有咩能力應該達到,而又未做得好,可以點樣係屋企幫佢....做得唔好,又對小朋友將來既發展有咩影響~~~所以,學野既係我~呢樣絕對係無其他playgroup能夠做到既,我覺得其他playgroup主要係俾個環境俾小朋友開開心心咁玩,同其他小朋友交流下...因為玩而學到野其實係bonus....有時我會覺得自己約其他小朋友去玩都可能有呢個效果~

所以我其實唔係好明媽媽們最後唔報既原因,係覺得小朋友太細想遲d先報(因為其實1歲以下既playgroup真係好少地方有)還是有其他更好既playgroup選擇...至於師資方面,我唔敢話幼潛既一定比外面既好,不過我覺得去邊個playgroup都唔能夠保證老師既教學方式如何~

講左咁多,其實我今次抽唔抽得中呢?佢地上星期一抽籤,叫d家長星期五可以打去問籌號,而我琴日先打去問,結果職員話我既籌號係"58"~~職員話58係好前下,應該會編到班,叫我月底等通知信喎~~

之後我又上網search下啦,原來今期係有8xx幾個申請,只係收一半....我係8xx幾之中排58又真係幾前喎....我好開心呀,起碼有個機會俾我,吳爸爸同埋囡囡一齊去學野...我期待緊收到正式既通知~

如果真係無問題,囡囡5月尾就會去上幼潛,到時已經8個月大呢~

0316的晚餐 ~ Mushroom & Herb Fettuccine with Cheese Sausage

上星期煮左4日中菜,今日想食下西菜,於是決定煮意粉食~

我只係買左一盒菇,一包芝士腸仔同埋一樽意粉醬,四十蚊有找~~係屋企開左包扁意粉,就係咁成為左今晚既Mushroom & Herb Fettuccine with Cheese Sausage啦~~

好味道,簡直係快靚正...另外仲煮多d用黎留飯盒添

一切從糊仔開始 ~ 試糊第五回(附足本video)

(Day 171 @ Home)

試下試下,已經去到第五回啦....今日仍然係開1茶匙米粉,吳爸爸幫手拍低整個食糊仔過程,個video係足本黎架,用左5分鐘食晒呢個份量...睇黎下星期可以開多1茶匙米粉俾囡囡食勒~

雖然beanstalk好多0809既BB都唔鐘意食,不過好似abby又ok喎,係開頭第1,2次食既時間個樣就差d,今日都無左個d怪樣勒...不過次次同佢抹嘴就係度發忟憎,呢個囡掂下佢都唔得,真係巴閉~

扭扭樂

(Day 170 @ Home)

囡囡雖然反到身,不過其實佢好少反...自從第一次見到佢反之後,都好耐無反啦,淨係鐘意打側瞓,唔鐘意反到趴係度~

除此之外,囡囡好鐘意扭黎扭去,佢真係扭到好似條蛇咁呢....去片~~~

我係度諗,如果將佢反轉而佢又係咁扭,係咪即係學緊爬呢?

等我放假開張地墊俾囡囡試下先得~

0312的晚餐 ~ 濕炒咖哩肉碎腸仔粒烏冬

今日老公打俾我話星期五會同同事食晏,所以唔使帶飯盒...叫我唔使煮得咁豐富,佢話我一煮就失控,煮好多喎...哈哈,邊係呀~

佢言下之意即係想食番d簡單野,咁就煮佢鐘意食既麪類啦~

既然唔使咁豐富,我都無去買餸,用左前晚留低既半包法蘭克福腸,琴日留起既半包免治豬肉同埋半包菜心,加埋屋企2包烏冬...仲有前晚既咖哩汁(一兜咖哩汁食左3晚終於食晒)...就成為濕炒咖哩肉碎腸仔粒烏冬勒~

再加上琴晚煲既木瓜雞腳湯,依然係好豐富又好味既晚餐~

一切從糊仔開始 ~ 試糊第三及第四回

(Day 169 & Day 170 @ Home)

好耐無囡囡試糊既消息啦~~

其實係因為吳爸爸唔想囡囡咁快食糊仔,既然係咁,我就停左試糊行動勒~

轉眼又到囡囡5個半月大既時間,睇黎都係時間要開始番試糊大行動~

第三回 (11.3.2009)

其實屋企盒beanstalk只係開左少少,所以都係照開黎俾囡囡食啦..今次我用左2個湯匙既水開1個湯匙既米粉,呢次好成功開到糊仔狀,不過又好似太杰,下次試下放多少少水先~囡囡都係食得麻麻地啦,未至於典黎典去,會開口食,不過個樣就唔多鐘意食,有時仲會吐番出黎添~

另外,因為晚餐煮薯餅,我留起左幾匙薯蓉,都俾囡囡試下...好似鐘意食多少少,不過個樣都係一般,唔覺佢特別鐘意食~

今日各食左3小匙就收工,之後當然係食媽媽奶時間...abby個樣即刻唔同晒,食得好陶醉,真係爭好遠咁喎~

睇黎要努力d等abby習慣下食媽媽奶以外既野啦~

--------------------------------------------------------------

第四回 (12.3.2009)

今日繼續試糊,我今次用左1茶匙粉,用2湯匙水黎開,呢次稀杰度岩岩好~

今日俾囡囡食,佢食得好左好多...雖然佢扭緊眼瞓,係度eerr,不過只要佢食完口中既米糊就會開口食第二匙....今日可以食晒我開既份量,唔錯呀~

如果唔係扭緊眼瞓,我諗囡囡應該食得更好~

再補媽媽奶,立即就進入睡眠狀態啦~

3月天之出血日

今日本來要返工既,不過因為琴晚太夜瞓,囡囡又太早醒左(5點幾),所以我都無咩點瞓~吳爸爸當然知道我既苦況,為免我在如此精神狀態下返工,於是叫我不如請假休息下...嘩,吳爸爸從來都唔鼓勵我偷懶唔返工架...今日出自佢把口,我當然好聽話啦....其實我都真係好攰,特別係肩膀位,真係好酸痛架....結果我決定請假(其實宜家d假都係用黎當無人湊囡囡時用或者用黎自我休息,都唔會儲黎去旅行架啦)

吳爸爸照舊帶左囡囡返嬰園,我就繼續瞓....瞓呀瞓呀,瞓到中午12點幾先捨得起身呀(其實可以繼續瞓落去),真係好爽呢~不過難得平日放假,我決定要去CWB一轉,因為要去買波媽介紹既地墊呀,順便去埋Sogo用d coupon買野俾囡囡(由於吳爸爸不習慣過海,所以真係好少去CWB架)

為左慳多少少,我決定來回都去搭船,今次CWB之行既交通費只係$4.4咋,行下又當減肥lor~

我想買地墊好耐,不過睇黎睇去都好似唔岩心水...因為要考慮既野實在太多,例如質素,厚度,尺寸,一幅過方式,砌圖方式,圖案,價錢等等

我都睇左好多地方,又上網睇,又去舖頭睇咁,真係頭都大埋....平既呢質素又唔得(因為多係大陸製,有陣臭膠味唔在講,仲可能用埋d有毒物料,真係唔多好,而且好多時都係用老翻公仔添),貴既呢又好似唔太值(ella店最多,韓國製既,不過去到差唔多成五百蚊一張),因為我覺得地墊都係用一段短時間,投資太多又唔多捨得~

好在波媽有好介紹,因為咁我先咁想去CWB,因為要係CWB一間樓上舖買既~波媽買既一張一百蚊有找,不過因為係薄身(0.3cm)...所以我同老公都覺得厚身比較好,保護性強d(我家abby無denden咁多肉麻~),於是要俾多一百蚊買張0.7cm厚既~

雖然thomas & friend好似岩男BB多d,不過我覺得無咩所謂,都無話女BB唔用得thomas既野,而我要左農場款,可以俾abby數下綿羊同牛牛咁都幾好呀~(咁當然如果佢有其他公仔又唔同講法,哈哈),最重要都係價錢抵,質素高,呢張地墊仲係原裝正版日本製架,尺寸又夠大,6" x 4"係其他地方買點都過二百啦~

一幅過既地墊果然係好方便,而且呢款係摺疊式收藏,唔係捲埋既,所以一打開已經好平,收埋都好慳位呢~

我除左係呢間舖買地墊之外,仲買左3對襪仔($45再9折),一隻Hello Kitty 3號學習杯($88),一隻鴨咀nuk學習杯($28)(呢隻用黎俾abby返學用)....加埋晒都係$355.5,都幾抵呀~

之後我再過sogo,其實主要係想買Mustela既cream俾abby用..咁岩見到arau呢隻2合1沐浴洗髮泡泡就買左一枝同埋一包補充裝(因為屋企宜家都係用緊2合1沐浴洗髮泡泡,吳爸爸覺得唔錯,不過就係思詩樂既,個時係BB展買既,好似係街唔多見有得賣,而且就黎用晒,所以就買呢隻arau試下,仲有補充裝都幾好)~

諗住就係買咁多啦,點知sales姐姐話買滿$200 arau產品送熊仔沐浴玩具喎....其實我都想買沐浴玩具好耐架啦,見到呢set熊仔幾得意所以再睇下有咩買啦,結果買左枝organic既body lotion俾abby,仲係薰衣草味,可以幫助入睡架~

其實好多abby初生時買黎用既野都開始用得7788,要進行補購啦...好似用緊枝QV cream咁,又搽面又搽身已經所餘無幾,所以就想試下mustela既面霜,估唔到就咁買埋body lotion同埋2合1沐浴洗髮泡泡...我用左$300 sogo coupon(都係之前小學同學送既),只係補$7就走啦,so good~

0311的晚餐 ~ 木瓜雞腳湯 免治薯餅 乾炒咖哩雞 菜心炒肉絲

今日放假無理由唔煮飯,我仲想煲番個湯添,好成功咁煮左3餸1湯出黎勒~

木瓜雞腳湯:好耐無煲老火湯啦,今日煲得唔錯...而且d人話木瓜雞腳湯應該可以增加乳汁既,唔知有無效呢?

免治薯餅:琴晚留起左一個薯仔,所以今日決定買免治豬肉一齊整薯餅食~今日整得好成功,都煎得唔錯,好味道~

乾炒咖哩雞:我留起左琴晚煲咖哩薯仔雞既汁,今日用黎炒雞件,唔好浪費麻...炒黎食又有少少唔同,不過一樣好味~

菜心炒肉絲:點都要炒番碟菜既,所以煮埋呢樣~

食得好滿足,又填滿左兩個飯盒,成本價都係四十幾蚊咋~

0310的晚餐 ~ 咖哩薯仔雞 螞蟻上樹 滑蛋腸仔

今日繼續煮,為左可以有兩個豐富便當,所以選擇左煮好大兜既咖哩薯仔雞,都好耐無食啦,雖然就無拎去焗,不過都好好味~

琴日買左一包6個裝既粉絲,所以今日又諗下煮咩粉絲菜式,最後決定煮又係好耐無煮既螞蟻上樹~~今日d粉絲炒得非常好又入味,連一向不太好粉絲既吳爸爸都食左好多...仲要未開飯就走左入廚房偷食添~

其實兩味餸都好夠,因為份量預多左,不過唔知點解我又驚唔夠,所以都係煮多一味滑蛋腸仔~

今晚實在太豐富,兩個飯盒已經放到漲卜卜,但係我地兩個仍然食得好鬼飽,不過當然無浪費,一樣食得晒 ...因為今日真係煮得幾好味呢~

0309的晚餐 ~ 菜甫煎蛋 梅菜蒸肉餅 芝士腸白菜粉絲

終於的起心肝煮晚飯,因為今次要留埋老公個飯盒,所以d餸既份量都預多左,不過成本都唔係好多,呢餐都唔使三十蚊~

菜甫煎蛋:第一次煮,非常容易...如果用平底鑊煎應該個形狀會好d,不過今次都叫ok~

梅菜蒸肉餅:宜家鐘意蒸球狀肉餅,食落鬆化d~

芝士腸白菜粉絲:呢味純粹為左夠餸食而煮,加上都要煮番d菜既~

今餐留完飯盒都食得好飽~

識玩‧學坐‧要企

Day 166 @ Home

囡囡真係愈黎愈大個,今日係屋企同囡囡玩,佢已經識得自己拎住個o朗o朗黎玩,唔再好似以前咁只係無意識地拎住...仲見佢將個o朗o朗由左手交俾右手,好叻呀(不過只係得一次)~不過佢跌左個o朗o朗就未識自己去執番,唔知幾時佢識得自己執番上手呢?

除左玩o朗o朗之外,又同佢試下坐啦...其實好早囡囡就已經可以挨住野黎坐,宜家我通常都會扶住佢坐,如果唔扶佢就會向前"忠"或者向側邊跌,向後瞓亦都會....不過我有時都會試下放開手睇佢坐唔坐到,之前都坐到1秒架...哈哈~今日仲厲害,坐到幾秒添,真係好叻啊~

坐得耐囡囡就會扭要企,佢都企得幾型架,真係腳踏實地個隻,唔係用腳尖掂下咁企架~今日仲大字形咁企,紮晒馬咁,就黎可以一字馬添....哈哈哈~

等我買左地墊就會俾囡囡學爬架啦,又睇下囡囡學爬會點?

真的聽得懂?

今天一定要記下這件小事~

星期五又是我負責接囡囡放學的日子,和她回家後一直與她玩耍,而她心情也大好,不停以甜美笑容回報我這個媽媽~

玩著玩著,囡囡開心得手舞足蹈,她的手一揮就把我的眼鏡拍下,眼鏡飛脫不止,我也給她拍得痛叫起來~我沒有大聲的罵她,因為我知道她也不知道是怎麼一回事...只是我也停止了和她玩耍,收起了笑容,向她說"你看,你拍甩了媽媽的眼鏡,也弄痛了媽媽啊!"....沒想到囡囡也收起了笑容,樣子好像有點詫異的看著我...可能我依然維持在這個狀態(其實我想一分鐘也沒有),囡囡的樣子開始扁嘴,好像知道我在說她不是....慢慢地又由扁嘴變成想哭的樣子,跟著開始小聲的哭,眼淚開始流出...真的好像知道我在說她做錯事呢~

囡囡的表情變化是如此的清晰,給我留下了極深的印象~~其實我都沒有罵她,只是用了嚴肅的語氣罷了,她就知道是她犯了錯嗎?還是見媽媽沒有和她玩而哭呢?

哈哈,真的不知道囡囡是不是真的懂...見她哭的樣子怪可憐的啊~~於是我也即時逗她了,不過吳爸爸笑說我見她哭就即哄她會縱壞她呢....哈哈,這不過是一件小事,囡囡也不是故意的,用不著想得那麼嚴重啦~(我覺得吳爸爸也是乘機話下我,換著係佢咪又係咁)~

0305的晚餐 ~ 臘腸蒸雞飯

唉,呢期真係好忙,連飯都已經成個星期無煮,就算有都係煮下簡單麪食~

真係唔得啦,要煮下飯....不過又要慳,因為呢個月已經超晒支(只係月頭咋)~

結果又唔捨得買餸之下,只係買左$16雞胸,加埋屋企既臘腸就整左臘腸蒸雞飯...雖然簡單,不過都好過食外賣啦~

變賣物資

自從吳家多左寶貝之後,每月開支無可避免地要增加...從前的我以每月開支不超過5位數為目標,間歇性地都可以達標的~

可是現在根本不可能,這已經是一個不切實際的目標...現在每月基本開支一定超過5位數,就連吳爸爸都覺得開支一下子大了很多,前幾天更向我要求增加帶飯番工既次數呢(之前吳爸爸很少要求帶飯的,多是我強迫他帶,哈哈)

就像這個3月,短短首星期還未完,吳家開支就已經超過了5位數....很恐怖啊~

由於新買的Sony DC也有拍攝高清video的功能,和吳爸爸之前買下的Panasonic DMC-FZ28功能相約...由於因為機身大的關係,我很少用,雖然吳爸爸每次拍片也會用,但畢竟拍片的次數不太多...如果帶了Nikon D80也就不會再帶這部機在身,因此吳爸爸決定襯它還有市場價值時賣出,沒有必要同時擁有2部具拍攝高清片的相機~

而我當然贊成啦,因為我真的不太用這部機,可以賣出的話,就等於一機換一機~吳爸爸將此變賣行動交給我負責,我決定比半年前買的價錢平一千元出售,想不到反應非常熱烈,很多人問呢...雖然很多都會壓價,但我是鐵價不二的,最後當然也能按我定的價錢成功出售...扣除買入Sony DC的價錢還有餘錢幫補下呢~

賣開有癮,於是將吳家的無用物資賣出,短短幾天成績如下:

5斤甜醋(因為坐月時吳爸爸買多了剩下):套現$90

4罐400g奶粉(是奶粉會送的):套現$200

1罐400g奶粉換領卷+買一送一表格(亦是奶粉會送的):套現$60

都算唔錯呀,不過放工仲要搞買賣,又要約交收,其實都幾攰下...所以已經成個星期無煮飯啦,都係煮麫食就算~

暫時容易變賣的東西就是這些,遲d再睇下有咩可以賣,再幫補下咁啦~

Sony Cyber-shot DSC-T500

其實吳家有3部相機,用黎影靚相既當然係吳爸爸個部Nikon D80啦,而為左同囡囡拍高清片,吳爸爸係囡囡未出世既時候已經買左部Panasonic DMC-FZ28,而我呢就一向都用部細機Panasonic Lumix DMC-FX 9...係呀,已經係幾年前既機款黎架啦...不過細細部方便麻~

其實之前部細機既扭扭制已經鬆鬆下,成日扭錯位,不過見影相無問題就一直用落去..但係2月中既時間部機個mon突然變黑,我初時以為無電,但係叉完電個mon都依然黑蚊蚊咁,我諗都係夠期要換啦~吳爸爸話拎去整就無謂啦,因為可能補多少少錢已經可以買部新既DC~

其實我可以用拍高清片個部Panasonic DMC-FZ28,不過我又嫌佢太大個,真係唔係好方便...於是我都諗住買番部細DC~咁岩舊同事屋企人係公司春茗抽中左部Sony DC想放,於是就促成左呢次交易勒~

一向都好少睇Sony既相機,不過佢既機款又真係幾型既...加上呢部機都可以拍到高清片喎,都唔錯呀...最特別係呢部機用touch screen架,幾得意呢~

當然價錢方面就比市價平啦,呢幾日開始用黎影相啦...都幾好,吳爸爸仲話手感都唔錯喎~

如何不敏感

其實上星期初囡囡有點鼻水有點咳,於是不敢怠慢,立即去看了醫生,醫生說只是普通的傷風...我們又見囡囡依然精靈活潑,有玩有笑,不過把所有藥水吃光也還未完全康復過來~

這兩晚,囡囡半夜睡著時也因夜咳而睡得不穩,看著她很是心痛,卻幫不了她~

今天決定帶她去看另一位醫生,這位醫生第一次看會比較貴,診症也詳細很多,之後再看就收回普通診金....原來囡囡並不是受細菌感染而得傷風,因為醫生說她沒有發燒,有胃口,很精神,他說如果是受病菌傳染,這個月齡一定會發燒的~

原來這一切都是因為敏感而起,

因為鼻敏感所以有鼻水

因為氣管敏感所以有咳咳 ~ 因為醫生說囡囡的扁桃腺沒有發炎紅腫

因為皮膚敏感,所以耳珠旁及下巴有敏感濕疹 ~ 因為醫生說濕疹是全身都有的,不會只是耳珠旁及下巴那麼局部)~

醫生說這些敏感在早上和晚上最明顯,因為8am至8pm這段時間BB自己身體會產生物質去應付敏感,所以好像不太嚴重,但其他時間就會嚴重很多...無怪乎嬰園姑娘說只有輕微咳咳和鼻水,而由我和爸爸照顧的時間就明顯多了~

醫生詳細的解釋令我了解囡囡的情況,知道不是受病菌傳染証明囡囡身體很健康,不過因為敏感而起的咳和鼻水卻令我擔心吃藥也不能完全痊癒~

初步相信是天氣忽冷忽熱而引起敏感,希望天氣快點穩定下來就好了~

探望Jobi小BB

今日我帶左囡囡同埋舊同事一齊入大埔探望JJ媽一家,因為Jobi小BB已經差不多2個月大啦~

不過因為囡囡有傷風,所以我都唔敢行近Jobi,驚傳染佢呢...又因為要抱住abby,加上我部相機又壞左,所以都無影番幅相留念~

但係唔緊要,因為我地黎緊321又會見到面,係舊同事結婚大日子呢~好期待呀!

仲要多謝舊同事於北海道的手信 - Miffy餐具,好靚呀...等abby遲d食野食得好d就可以用啦~

除左我地送俾Jobi既利是,估唔到JJ媽都封左封大利是俾abby喎...多謝晒,善忘既我竟然唔記得帶留起左既牛年利是俾Joey同Jobi,仲有鐵菇個份,真係無記性呢~