2011年4月13日,星期三
昨晚懶惰無煮飯,明晚要去奶奶家吃飯,後晚我約了朋友吃飯,所以只剩下今晚可以煮晚飯!這晚都有新嘗試,首先是豉味蒜香汁素翅炒雞粒!
自從知道TVB.com可以網上收看已播出的節目,我就不時去看看〈都市閒情〉邀請總廚示範的菜式!這個豉味蒜香汁都是從中學到的,特別之處是豆豉配忌廉,中西fusion醬汁令我很有興趣一試!示範之菜式是用來配煎鱸魚,而我就用來配雞肉!
我參考了總廚的做法再有些更改,我弄的豉味蒜香汁是這樣做的:
1.先爆香蒜蓉,後加入豆豉爆香
2. 加入忌廉和牛奶略煮即成
豆豉和忌廉的比例大約為1:1,牛奶是我自行加的,因為想多些汁!
豆豉和忌廉的味道原來都幾夾,比平常弄豆豉味的菜式來得滑口很多!吳爸爸也非常讚賞這個新醬汁!
而這個牛尾湯燴菠菜亦是新口味,做法是參考blog友比妮的牛尾湯蒸菜!不過我沒有蒸,是直接下鑊煮的,味道一樣好,連我不愛吃菜的都覺得好好食!推介大家試試,用的是中式罐頭牛尾湯,不是西式那種啊!
再加一碟囡囡最愛的蛋,今晚煮了火腿炒蛋!而最特別之處是囡囡負責這碟蛋的前半部份!學懂了打蛋呀!(好厲呢,我都好似好大個先識打蛋,哈哈)...不過未能拍下過程,有機會一定會拍低!然後也由她把雞蛋拌均的,所以煮好後,囡囡很開心,向吳爸爸說是她和媽媽一起煮成的,樣子流露出極大的滿足感!
值得一提的是這晚餐的成本價也是大約三十元啊,卻也挺豐富呢!我很滿意,呵呵呵!
ABBY 有無幫手~?
回覆刪除[版主回覆04/14/2011 13:48:00]係呀,佢一見我煮飯就入黎話要幫手洗米...洗完米仲未肯走,咁我咪俾佢試下打蛋lor~
好勁, 點解你買餸可以買得咁平~~~
回覆刪除$30...盒忌廉無用晒,淨咗諗住整咩呀?
Abby識打蛋, 好叻
[版主回覆04/14/2011 17:47:00]因為我真係見特價先會買架,所以我係唔會買定送係屋企既,通常都係即日去買即晚煮...今晚成本價係咁既
菠菜~特價$5
牛尾湯~$7.9
雞扒~$10.9
蛋4隻~$4
火腿2塊~$0(因為係前幾日買香腸送既)
其他野都係屋企既物資!
盒忌廉係上次你地黎開party時我買既,本來諗住整甜品,但最後無整就一直用到宜家...我都係用黎整醬汁多,哈哈~
我都估唔到abby睇我示範1次,佢試打1次之後就好成功咁打埋其餘個d,力度掌握得唔錯呢!
三十蚊整到三個好味餸, 通漲幾多妳都唔怕啦
回覆刪除[版主回覆04/17/2011 00:52:00]點會唔怕...愈黎愈難買到餸呀!
haha~~ abby咁細個就學煮餸了，就快叻過我喇！
回覆刪除[版主回覆04/17/2011 00:53:00]見佢鐘意咪俾佢試多d lor~
勁！真係抵你儲到錢。
回覆刪除我平均一餐餸要$100，剩係一條魚已經要三四十蚊。
[版主回覆04/17/2011 00:53:00]咁你加埋工人有成5個人喎,除開差唔多啦~
你真係好勁,成日可以用最少的錢煮到咁豐富的餸菜
回覆刪除[版主回覆04/17/2011 00:54:00]無辦法,我唔捨得買太貴~
中西合壁
回覆刪除[版主回覆04/17/2011 00:54:00]咩都試下麻~
呢個就係你堅持下廚的成果啦..囡囡都受你感染了..肯定她將來煮得一手好菜,和媽媽一樣嫁得好呢..
回覆刪除[版主回覆05/09/2011 00:31:00]係就好啦~