八王子拉麪@佐敦

同囡囡打完針之後,我地就去食晏勒~

老公諗起附近有間食拉麪既,於是就決定去試下~

老公叫左紫菜豚肉拉麪($43)而我就叫左個季節限定既仙台牛舌拉麪($42)~

呢度既賣點係牛骨湯底,其實個湯底都唔錯,不過唔知點解用黎配拉麪好似唔係太夾...老公覺得味道比味千好...不過我地都覺得最好味既拉麪依然係橫綱,呢間算ok啦,價錢都可以接受既~

打針針@4個月

囡囡4個月大,又係時間要去打針勒~

約左今日初六去打針,可能因為係初六,今日唔使排隊等電梯~~

今次係另一位姑娘幫囡囡打針,本來諗住今次又拍片既,點知呢位姑娘話唔俾,所以拍左2秒就要收機勒~

不過呢位姑娘都好有愛心,又係同囡囡玩下熟落左先...

首先係食口服輪狀病毒疫苗,雖然囡囡今次無上次食得咁滋味,不過都食晒,無浪費到咁貴既疫苗~

跟住就係打6合1針,吳爸爸驚到遮住左對眼唔敢睇,而我都驚囡囡肉地麻麻打針會痛d,點知囡囡好叻,無喊不得止,連叫都無叫一聲,面部表情亦無異樣,一d反應都無呢...姑娘話打完我都唔敢相信,吳爸爸聽到我話打完都好奇怪,點解聽唔到喊聲...梗係啦,因為真係無喊呀麻~

最後就係打肺炎鏈球菌針,姑娘話呢枝會比較痛,因為d藥比較"拿",咁呢枝就真係有喊...不過喊左幾聲好快就哄番佢笑勒~好快就搞掂晒走得勒~

今次同上次一樣都無咩特別反應,無特別眼瞓,無神情呆滯,無發燒,食得又瞓得...我仲帶左佢出去拜年都無問題呢~

4個月發展監察期

今日初五係番健康院既日子,因為4個月大要俾姑娘跟進下發展情況~

同舊同事食完晏就行過去健康院,可能今日初五,人流好似無以前去咁多人,好快就叫名入去磅重度頭圍~

4個月零6日大既囡囡

體格方面:

體重: 初生3.99kg(6.6lbs) --> 2個月4.85kg(10.67lbs) --> 4個月5.43kg(11.95lbs)

體重方面似乎增長得比較少,2個月都重唔夠2磅,不過姑娘話呢個磅數都好正常,無咩問題...咁我都唔太擔心既,唔知點解呢方面我同其他媽媽既心態唔同,其實我唔想abby太肥,呢個size咪幾好呀~

高度: 2個月57cm --> 4個月63cm(自己度)

我有問姑娘度唔度高,不過佢話上次度左正常,今次唔會度,要下次先度喎...咁唯有自己同囡囡度啦~

頭圍: 2個月39cm --> 4個月40cm

原來2個月頭圍都係多左1cm,不過唔知點解,我成日都覺得abby個頭都幾大,可以佢唔係肥bb既關係啦~

飲食方面:

姑娘照例都係問囡囡仲有無食人奶,我話有呀...咁佢就問我返工未?我話返左啦,於是佢就話泵出黎呀...咁我當然係答佢係啦~~之後問我有無補奶粉,我話無呀,佢話咁就要繼續保持去到6個月啦...無錯,呢個都係我既目標,哈哈~

發展方面:

姑娘拎左個啷啷出黎,點知abby一手就撥開左,連姑娘都甩埋手跌左落地下...哈哈,俾個下馬威姑娘睇~~姑娘唯有拎另一個啷啷啦,咁abby都拎得好實,左右手都試齊...之後就睇下囡囡識唔識用眼望住啷啷郁,又過左關....就係咁測試完,又到6個月大時先番黎見姑娘啦~

而就我觀察所得,4個月大既囡囡有以下特徵:

- 食手手情況減少左好多,宜家既囡囡鐘意玩手指多d(好似下面呢幅相咁)

- 手手拎野都好夠力,宜家有時仲會摸自己膝頭哥~

- 初生時一向都唔使用口水肩既,因為囡囡都唔會嘔奶...不過宜家就要用啦,因為佢成日都流口水,以前只會玩口水波,而家係口水長流~

- 皮膚都係麻麻地,特別係面珠時時都會紅紅地(以左面嚴重d),不過多數係因為佢用手係咁卒面既原故,如果無卒既話,基本上都ok既~

- 由初生開始abby每次沖涼洗頭都會喊,到宜家4個月大都係咁,洗頭還好喊少左,不過沖涼呢依然次次都喊,仲要一放落水即喊,一上水即收聲...都唔明佢點解咁驚d水...吳爸爸講笑話都唔知係咪前世遇溺所以咁驚水~

- 轉左用中碼片片之後已經無發生爆屎事件,不過囡囡便便時間不定,有時一日幾次,有時又隔日先有,好飄忽~而因為食人奶關係,便便依然都係屬於稀稀地既質地~

- 有兩個轉既abby頭髮生得好慢,而且仲會有d胎毛頭髮甩出黎添...後尾枕因為瞓得多所以特別少頭髮~

-成日都會EERR,同埋笑多左,無之前咁cool~~

-仍然係全人奶BB,係嬰園4個鐘食一次奶,每次6安(180ml),係屋企就埋身食...夜奶無特別戒,有時可以瞓成晚,不過通常都要半夜起1次俾佢食~

- 頸仔已經好有力,基本上打直抱都唔使托住頸仔,而且唔係咁鐘意打橫抱~~抬頭已經無問題,不過我好少反轉佢,費時佢流咁多口水....轉身仲未得,不過係換片床或者playmat上面成日都會打側身,好似就黎轉到咁,不過係床上就無呢個情況~

- 返嬰園既日子通常夜晚8點幾就已經瞓左,但係放假既話就會晏d先瞓...好多時都要抱住哄佢瞓,由佢自己係床仔瞓既話通常要忍心等佢自己喊大約15至30分鐘先會入睡~

- 暫時其他人抱佢都好少喊,其實只要抱佢既話多數都唔會喊....不過同唔同你笑就要睇佢心情啦~

全職爸爸

因為嬰園新年放大假,要初九先開,所以我同吳爸爸就要輪住請假係屋企照顧abby~

今日初四由吳爸爸負責,而我就已經要開工啦~

琴晚囡囡好叻,半夜無醒過(因為其實我都無特別同囡囡戒夜奶,所以多數都要半夜起一次身),由9點半瞓到今朝7點先叫下,我埋身餵完佢之後囡囡又繼續瞓過...吳爸爸話佢差唔多9點幾醒左,不過到10點幾先開始扭計~~

呢幾日放假發現囡囡唔多肯食奶樽,係都要埋身食,唔知係咪因為天氣凍埋身食舒服d既關係呢?所以今日吳爸爸用奶樽餵奶都要花d時間,而且每餐都只係肯食半樽(即係2.5安左右咋)~

中午,吳爸爸第一次獨自一個人帶囡囡出街(平時嬰園接送唔計),所以點都要記低落黎~

吳爸爸約左同事食晏,帶埋囡囡返公司逗利是....都逗左唔少呢,哈哈~仲要係公司食埋下午茶先同囡囡番屋企~

經過一日全職爸爸生活,吳爸爸話都幾辛苦,因為抱到佢手都軟晒,最開心係返公司有好多人爭住抱,佢話係今日最舒服既時間喎~

一切從糊仔開始 ~ 試糊第一回

年初三係屋企無咩做,決定試下開包米糊進行試糊行動~~

可惜首次行動失敗：

1. 開糊失敗：

包裝說明(雖然係日文,不過我都睇得明既)話4個月既BB食就用25ml熱水或者奶開1.3g米糊...不過1.3g真係好少,少到我本來想搵個磅量份量都無用,因為最細格都係指5g...結果我好少咁倒左半茶匙,再加15ml熱水同10ml人奶(因為資料話人奶有油脂成份會令米糊變稀,所以解決方法係用熱水開再加人奶...如果用奶粉水開係無呢個問題既)...唔知係份量太少或者係水太多,開左出黎真係好稀,完全唔覺係固體食物,似奶水多d...我嘗試加多少少米糊,不過情況無改善,依然係咁稀,睇黎下次要落少d水先得~

2.進食心情影響：

開完米糊之後諗住俾囡囡食,點知佢咁岩呢個時候係度喊,喊緊其實不宜進行試糊行動,不過都開左,如果等既話咪凍晒lor...所以都係照餵~可能係咁所以食得唔好~

囡囡第一次用餵食匙食野表現都算可以,都肯食幾啖,不過從囡囡既面部表情同反應,佢好似唔多鐘意食d米糊喎,雖然食左2啖就開始唔喊,不過個樣都係"拿"埋晒咁,好似覺得唔好味咁呢~~

我餵左4,5匙見左囡囡反應就停勒,佢宜家都係鐘意食媽媽奶多d,不過我會繼續試糊行動,希望下次有進步~

其實今次都有拍片架,不過因為拍得太長唔識cut短,而且都唔係食得好好,所以就唔post啦,等下次好d先俾大家睇啦,哈哈~

赤口晚飯@稻香超級漁港

已經係初三啦,不過我仲未有意慾開爐,但係又想食得好d,所以出左酒樓食晚飯~

今日去左彌敦道既稻香超級漁港,好多人食火鍋,佢既湯底好香,非常吸引呢...不過我地兩口子抱住囡囡都唔方便打邊爐,於是都係食小菜~

沙薑雞半隻

芝士淡水龍蝦球伊麪

石鍋金菇肥牛

囡囡中途都瞓著左,所以今餐都算食得輕鬆,食物味道都係普通,不過新年上酒樓食飯好似開心d,呢餐就食左$244~~

《海角七號》精裝版

今日老公買左海角七號DVD,要成$129...其實我覺得好貴,不過算啦,新年咪俾佢高興下~$129有普通版同精裝版,咁就梗係買精裝版啦...原來係扮戲中既郵包~

海角七號上畫時我係完全無興趣既,因為覺得會好悶...不過身邊好多朋友都話好好睇,咁又引起左我既興趣~~所以老公話買DVD我都無反對,因為我都想睇下~

夜深囡囡瞓左我地就開黎睇啦,睇怕以後想睇戲都要用呢種方式...去戲院真係比較難呢~

其實套戲既節奏都算慢,無耐性既真係會覺得悶架...而我就覺得要睇到後半部先覺得OK,都有少少感動既...有股淡淡既戲味~~

年初一夫家拜年

初一都係去老公個邊既親戚拜年,今年唔使去幾度,只係留係99屋企就夠勒~

囡囡當然係主角,成為眾人既模特兒...佢仲同姑丈玩得好開心添~

咁當然總有喊既時候啦,不過都算可以接受~

大年初一開年飯@CPK

大年初一起身,發現已經係十點半,嘩,超高興....我好耐無試過瞓到呢個時間起身啦~

今年係我最懶既一年,因為我連賀年糕點都無準備,所以我地決定年初一同囡囡出街食開年飯~

年初一就算12點幾出街都無咩車,無咩人,好好行,好舒服~

我地去左海港城,除左食中菜既地方普遍都休息之外,好多西餐廳都照常營業...最後我地決定去CPK食Pizza~~

最愛CPK既凱撒沙律,次次黎都會叫黎食~~而今次我地就試左個青檸雞肉pizza,口味幾清新,pizza中間有酸忌廉同埋牛油果醬,加埋蕃茄粒,自己按喜好再塗上塊pizza食,唔錯唔錯~

咁岩食個時係下午茶時間,只要加$10就有2杯飲品,我地要左iced tea,仲可以refill添~

CPK張檯夠大,我將囡囡放係檯上面坐,一邊食一邊同佢玩都幾好~~囡囡仲對杯iced tea好有興趣,我放枝飲筒埋佢嘴邊,佢真係好似想飲咁呀...哈哈~

食完就去影左幾張新春佈置相,然後慢慢行去99屋企拜年勒~

囡囡第一封利是

大年初一,恭喜發財

今年牛年係囡囡過既第一個農曆新年,第一封大利是當然係爸爸媽媽俾架啦~

囡囡對封利是好有興趣,自己拎住不特止,仲睇到實一實,點都唔肯望鏡頭...哈哈~

 

 

 

一切從糊仔開始 ~ 準備篇

因為見到有0809媽媽開始餵糊仔俾BB食,令我驚覺原來都係時候留意奶類以外既固體食物~~

於是又係搜集資料既時候勒,基本上BB第4至6個月都可以開始引入固體食物,咁到底幾時開始就要睇番BB本身既發展...普遍醫生或者健康院都係建議6個月先食固體食物既,因為覺得腸胃發展成熟比較好~

大致上我都諗住6個月先真正食固體食物,不過之前都要開始試下~~我睇番嬰園既時間表係5個半月就會開始同BB試糊,夠6個月就有固體食物餐單(都係d粥仔,果汁咁樣)~

作為媽媽,無理由唔係第一個見證囡囡開始食固體食物架麻,所以我都要比嬰園再早一步開始同囡囡試糊~~4個月同囡囡試糊既目標只係想佢學習吞嚥同咀嚼既技巧,所以份量只係諗住一至兩匙,慢慢再加,諗住到6個月時就可以減一餐奶轉食糊仔或者粥仔~

當然試糊前我一定要有充分了解同準備,經過2星期既研究我終於準備好相關用品~

用品篇:

Pigeon食物研磨套裝($80):

其實市面有好多BB食物研磨套裝,有平有貴,經過調查發現Pigeon既評語最好,物料好夠耐用...唔會好似其他用幾次就已經出現磨蝕既情況~而且Pigeon呢套研磨器仲可以砌到一隻杯咁,慳位又方便,我覺得唔錯~

格價資料: 永安最貴($169),吉之島同sogo一樣($139),最平護協($111)....不過我因為見到有網上舖大割價只售$80,超抵,好在得一套都俾我買到,仲係日版...我見街賣既都係英文字面包裝架~

Pigeon餵食匙($25):

餵食匙一樣好多牌子,不過我比較欣賞Pigeon,因為真係有設計過既,一隻係食糊仔用,一隻係飲果汁用...唔似其他牌子好似我地平時用既匙羹咁,只不過用左軟物料做成~

格價資料: 唔係度度都有得賣,我見吉之島同sogo都係賣$22...不過我因為同Pigeon食物研磨套裝一齊買,個時都唔知原來街賣仲平,不過包裝一樣係唔同既,我呢套都係日版..呢3蚊就當俾佢賺啦~

Richell煮粥器(只補$10,原價$110):

因為我想自己整米糊同粥仔俾囡囡食,結果俾我發現原來有幫BB煮糊仔/粥仔既煮粥器~用法係放入電飯煲同我地食既飯一齊煲,好似好易用咁,咁當然實際要等我試下先可以報告~

格價資料: 真係好少地方有得買,我係re-on見到有Pigeon煮粥器賣$88,可惜無貨....而yahoo拍賣見到一個賣$90(而呢款係sogo見到賣$108)...另外yahoo拍賣仲有個麪包超人煮粥器賣$109~~不過我最後係sogo買左Richell煮粥器($110),睇過好似質料最好,唔用都可以當食物盒...而且因為我手上有成$800 sogo coupon,所以決定用張coupon再補番$10就算~

食物篇:

雀巢米糊:咁岩前幾日收到雀巢郵件,佢就係寄左2包米糊俾我,相信都係知道我差唔多時間同囡囡引入固體食物...佢都寄得幾合時喎,囡囡間嬰園都好似係食呢隻既~

BeanStalk四式蔬菜糊:係我想引入固體食物之初,咁岩bnm做緊特價8折,心急既我見有8折咪想買定一盒,又因為貪心覺得一盒有4隻味好似抵d,所以就以折後$20.8買左一盒返屋企....不過後黎睇番d資料先知引入半固體食物一定要由米糊開始既,呢盒蔬菜糊就留番遲一步先食啦~(好在個食用日期係去到09年7月)

BeanStalk米糊:雖然我係想自己煮米糊或者粥仔俾囡囡食,不過總有d時間係唔會開電飯煲,所以都要準備一d即開既...一早都鎖定買BeanStalk,因為佢係無任何添加成份~~當我又四出格價之時,發現原來re-on買最抵,一盒只要$19,比bnm做8折仲平喎...不過re-on如果要送貨起碼都要買幾百蚊,但係我只係想要一盒米糊咋喎....好在佢門市係魚則魚涌個邊,即係我既娘家附近,於是叫媽媽幫我買一盒,咁就買齊晒勒~

一齊準備就緒,就睇下我呢個新年假有無時間同囡囡開始呢個試糊行動啦~

年三十夫家團年飯

年三十啦,今日吳家終於趕得切完成大掃除工作,算係有交代啦~

而我亦去左做facial,執下個樣靚靚過新年啦~~

做完facial就要出發去99度食團年飯啦...去到唔知做咩,囡囡中途狂喊,又唔知發生咩事啦,唔係要換片,唔係要食奶,唔係要瞓....但係又喊得好淒涼喎,完全解讀唔到~

大大話話都喊左成粒鐘有多,姑媽姑丈都唔敢去抱佢,就連麻麻都驚一抱就喊,結果我同吳爸爸就輪住咁抱啦~

最後我決定走去埋身餵奶俾囡囡食,等佢有番d安全感,結果成功,食完咩事都無勒...好開心咁又同姑媽麻麻笑~

希望囡囡呢幾日去拜年唔好發生狂喊事件啦,要開開心心去逗利是架麻~~

4個月

(Day 122 @ Home)

年廿九係囡囡4個月既日子呀,亦表示我當了4個月媽媽啦~

4個月既abby已經大個左好多啦,唔再係一個粉團....開始識得有要求,成日要人陪,總之係抱住佢,同佢玩,幫佢換片,食媽媽奶呢d時間多數佢都好開心(除左沖涼一定喊之外,我諗佢係一隻污穢貓,唔鐘意沖涼),一無人理佢就喊,仲要擺明係度扮野,一d眼淚都無個隻~

除非佢瞓著,否則真係咩時間都比晒佢呀~~不過唔緊要啦,媽媽好希望可以再有多d時間比你~~

至於囡囡既發展情況就等初五去健康院之後先報告啦~

年廿九一家三口團年飯@Sogo Cafe

年廿七娘家團年飯,年三十夫家團年飯,咁我地一家三口既團年飯就定係年廿九啦~

我地自己既團年飯就食日式西餐,因為要用吳爸爸張sogo白金卡既生日優惠呀~

吳爸爸係一月之星,呢個月可以免費去sogo cafe或者cafe royce食一客晚餐...我上網睇過,好似sogo cafe比較好味,所以book左sogo cafe~

免費套餐既主菜可選鴨胸或者龍脷柳...而我就食左龍脷柳配意粉,吳爸爸就另外叫左客羊扒套餐~~

餐湯係忌廉磨菇湯,味道唔錯~~我個龍脷柳配意粉都幾好,而吳爸爸叫左既7成熟羊扒非常唔錯,好嫩滑~~

除左當係我地既團年飯,今晚都係abby4個月大既日子,所以又當埋同佢慶祝lor~~abby對碟意粉都幾有興趣,仲手多多捉實個碟邊...睇黎再大d都要小心佢會拉跌晒餐檯上既食具呀~

餐茶叫左熱飲,有好靚既茶具呢....一壺可以沖成2杯幾黎飲呀,非常好~呢餐埋單係$176,如果唔係有一份餐免費左都唔平架喎~

媽媽髮型

其實坐完月之後已經好想去整頭,不過實在抽唔到時間,結果又係拖得就拖,拖到農曆年都黎啦,無論如何真係要去搞一搞~

上星期六其實已經有所行動,去左去開既hair culture,點知full booking,無預約一律無位整頭...唔係呀,去到都無得整,白行一趟,浪費晒我既時間,激死~

番到屋企老公叫我不如試下係elements開個間beijing hair culture,心諗都好喎,一來貪佢夠近(雖然去開個間都係係亞士厘道,不過來回都去左大半個鐘)...於是就打左電話book今日10:30am,唔好講笑,我10:30am去到已經好多人開始整頭,真係幾旺場~

呢間beijing hair culture比hair culture更貴,不過服務都好唔錯,洗頭時有埋頸部按摩超舒服...而我當然搵最普通既stylist就算啦,佢問我想點剪?其實我自己都諗左好耐點整個頭好,諗過做highlight,諗過電髮,希望整番個靚頭....不過最後我同髮型師講我要湊BB,想整個方便既髮型,唔搞電髮染髮既野啦~~

於是髮型師就話想方便既話當然剪短就最好啦,咁我都贊成...於是就決定剪短佢勒~

剪髮期間髮型師問我係咪將d頭髮染左黑色(下,原來有人咁無聊會去染黑色架咩?),我話無呀,髮型師竟然話我d頭髮好烏黑,仲要一條白頭髮都無....哈哈哈,我答佢應該好快就會有白頭髮架啦~

可能因為太攰,剪髮期間我瞓著左,釣下一條魚,釣下又一條魚,連髮型師都問我係咪夜晚湊BB好攰...唔知佢係咪第一次遇到剪頭髮會瞓著既客人呢~

大家睇相係咪覺得唔短咁呢,其實個髮型後面短而慢慢長番出黎,所以睇正面好似唔係剪短好多,不過實際上係剪左唔少架,只係我既面型襯兩邊長少少既頭髮比較好睇...剪完我覺得唔錯~

呢個媽媽髮型都幾靚呀(代價係$380再加2粒鐘)....哈哈~

年廿八:牛年紅封包

今日年廿八,老公有約會,因為佢係一月生日,好多朋友都會同佢慶祝,今晚佢就去左又一城同大學朋友食飯勒...而我就帶左囡囡番娘家食晚飯,新年點都要食媽媽親手整既發財豬手先得既~~囡囡亦係第一次去我既娘家,仲係我以前瞓張床到換片片添~~

呢個農曆新年實在比以往早左好多,竟然一月尾就到,而每年一月又有好多野要搞,再加上今年要照顧囡囡,根本就無時間準備過年要做既野~~

已經年廿八,吳家仲未大掃除,睇怕今年只多都係小掃除,但係仲未知有無時間整~

不過已婚者新年必定要做既就係封利是,點忙都要搞....終於番到屋企之後哄左囡囡瞓,我就著手封利是勒....封下封下,由年廿八封到去年廿九~~

今年牛年,主打當然係牛年紅封包啦...不過其實唔同面值係入唔同款既,有d就係上年用剩今年繼續留低既...相中既係我既,另有相同數量既準備左俾吳生,今年有囡囡幫手逗番d利是,唔知今年實際會派出幾多呢

年廿七娘家團年飯@朗豪坊粵江春

今晚年廿七係娘家食團年飯既日子,今次媽咪選左去朗豪坊粵江春...實在太好啦,第一次選九龍區,比去香港島個邊食真係方便好多,吳爸爸接完囡囡放學慢慢行去旺角都係最早到個個...如果去港島個邊就要趕好多啦~

今晚囡囡心情好靚,同公公婆婆玩左好耐,仲好罕有地好多笑容,非常難得~~只係到上菜時"褸"左陣計,係都要我同吳爸爸到d餸凍晒先食得~~唔記得講,今日係舅公第一次見abby,不過舅公唔敢抱佢呀~

不過今晚個金杯蝦皇翅真係好正,用杯上仲好方便我一手抱住abby一手拎住黎飲添...係呀,我第一次飲翅,哈哈~

飯後仲可以叫甜品,老公因為仲有咳咳,所以叫熱既西米布甸,個賣相好靚呢...而我就叫左個哈根大師雪糕甜品,入面仲有豆腐花,紅豆,西米,好豐富架...不過最好味都係哈根大師雪糕,我好耐無食雪糕啦,超回味~

今日年廿七,媽媽張信用卡仲有75折,埋單都係千五左右,都好抵食呢~~

0121的晚餐 ~ 忌廉火腿香草雞翼長通粉

年尾收爐,煮埋今晚咋....因為之後幾日唔係食團年飯就係有飯局...所以今晚唔煮中餐煮西餐~~

今日特價食材係$9一包10隻雞翼同埋$6一包4塊火腿,加多罐$9.9既忌廉雞粒磨菇湯就夠料煮啦~

煮晒尚餘既半包長通粉,用香草醃雞翼,煮時加多少少粟米,就完成勒....哈哈,我覺得好好味呀,yummy...唔少得仲留埋飯盒啦~~

 

學習時間表

買教材間公司既售後服務其實唔錯,為左唔想我地就咁將教材擺係度浪費金錢,佢地會幫每個客人tailor made個學習時間表~

送左教材黎之後,sales就叫我email囡囡每日既日常schedule俾佢,佢地有隊專人按住schedule黎編排學習時間,仲寫埋導讀方法,幾時由囡囡自己睇,幾時陪讀,幾時用重覆學習法,幾時聽CD,等家長有方法可依,好好運用教材達到效果~

份學習手冊仲親自送上黎添....睇一睇,佢真係跟住月曆編左成24個月既學習手冊~~因為我俾佢既schedule係平日要番育嬰園,所以佢編既日子往往都係星期六日或者假日,而且唔會太多,通常一早一晚咁樣,每次都唔多於1個鐘,通常都係15分鐘,都好似幾合用~

呢本手冊好似本guidebook咁,我覺得都幾好呀~

 

抵買BB食具洗劑

其實我一直都無買BB食具洗劑呢樣野,都係用烚奶煲就咁烚奶樽或配件,so far都無咩問題~

不過因為要準備同囡囡引入半固體食物,我開始物色相關用品~~

今日lunch time去左Megabox食麥當當(用媽媽會張免費套餐贈卷),順便就行下呢度間荷花....呢個時間無咩人行,staff仲多過客,行得好開心,因為可以慢慢睇,仲比我發現到荷花都有特價貨,就係呢枝BB食具洗劑,寫明係made in japan架喎,原價$89,但係宜家竟然賣$10~~~~~

嘩,咁抵,梗有d唔妥既....原來因為個3年保用期限,好多都係淨番2個月時間,不過比我搵到枝仲有6個月既,所以就買左佢,用黎洗下囡囡第時d食具都好呀....哈哈~

0120的晚餐 ~ 豆腐滑蛋牛丼

今日又整牛丼啦,因為仲有半枝牛丼汁未用....今晚煮完終於用晒勒~

呢次我仲無無聊聊咁加埋豆腐一齊煮,多樣餸好似豐富d呀麻...哈哈~

好味好味,呢餐廿蚊有找,仲留左飯盒,so good~~~

吳家人奶庫 (4mths)

(18包奶@19.1.09)

(3x包奶@30.11.08)

吳家人奶庫已經運作左將近4個月,等我又報告一下近況先~

相中可見吳家人奶庫已經換晒新裝,之前用既100ml儲奶袋已經不敷應用,一個月前已經轉左用Boots 250ml呢款既奶袋,咁當然我仲未多奶到裝滿250ml咁多一袋啦~

因為囡囡滿左3個月,育嬰園個邊要同囡囡升級飲奶時間,由3個鐘一次(10am,1pm,4pm)加到4個鐘一次(11am,2pm)...因為升左級,變相囡囡係嬰園只係飲2餐奶,而我亦要配合呢個轉變黎儲奶~

之前係拎3包各100ml既奶袋番去(有時多d奶可能會去到120ml一包),咁係嬰園即係一共飲300ml(即係10安)...轉左2餐之後,我已經將每袋奶入到150ml(5安)~~基本上我每日都會泵3次奶(上班前在家泵一次,中午lunch time係office泵一次,放工番到屋企再泵一次),岩岩好一共泵到300ml夠入奶袋,而囡囡係屋企就全部埋身餵,所以至今囡囡依然係一個全人奶BB,無補過奶粉架

不過前排病左,奶量有下跌跡象,唔係日日都泵到300ml,有時得番250ml,都有d擔心同唔開心呀....加上囡囡呢排好似大食左,上星期五嬰園既姑娘話囡囡飲我帶黎既人奶好似唔係好夠飽,叫我加多少少....所以我決定要將每包奶由150ml再加到180ml(6安)一包,不過我亦因此而要增加1次泵奶,每晚沖完熱水涼之後再泵多次(因為沖完熱水涼,d奶泵得順通d)...不過真係有d辛苦,因為好難日日都達標,好在病好之後,呢一兩日奶量開始恢復正常啦~

我見有0809媽媽已經開始餵米糊俾BB食,於是我開始考慮幾時引入半固體食物俾囡囡,不過我仍然希望堅持去到6個月,到時有多d固體食物既話,我就唔使再擔心d奶量啦~

揸得實啦

(Day 117 @ Home)

囡囡成日都會揸實我地既手指,好大力下架~

不過俾佢拎野,好多時拎左上手跟住就放手都唔拎得耐~

放假既日子總會同囡囡玩下,於是又俾個啷啷囡囡拎下,今次佢拎到好耐呢~

揸得都好實下,雖然其實佢唔係好有意識去玩個啷啷,不過都拎得幾好呀~

又係一個小小既進步啦~

老公生日飯@和民

今日係老公既生日呀...一早老公就番教會開生日會,雖然我去度既時候蛋糕已經食晒,不過都影左幅一家三口既大合照~我有嚐試教囡囡講生日快樂架,不過好可惜奇蹟無出現到,哈哈~

老公收到份名貴生日禮物,係飛甩雞毛既頸巾呀...成條頸巾都係個牌子,非常浮誇呢~

本來我都計劃去食餐豪既同佢慶祝下,仲係一個月前就打去半島酒店訂位添,可惜一個月前都滿座,咁無法啦...唯有另覓地方,原先我係屬意去雅谷餐廳既,不過因為呢個月實在超支得太多,而老公又未病好,唔係好有食慾,又唔想去咁遠,結果就好平凡咁用佢份生日優惠去尖沙咀既和民食生日飯勒~

雖然只係叫左4樣野,仲有杯生日贈飲,我地都好飽下~~扣左張一百蚊生日coupon,今餐生日飯六十蚊都唔使呀,超抵~~我都知好似求其左d,等老公好番,下個月又重新計數,我再請佢食番餐豪架啦,哈哈~

BB閱讀字卡 ~ Flashcard

哈哈,真係一不離二,買完教材之後,我竟然又有一大疊Flashcard出現係吳家~~

不過今次係唔使錢既,之前我提過我有6張the grand既贈卷月底到期,於是諗住上網賣左佢啦,可惜無人問津....於是我發現左交換網呢樣野,即係以物易物,唔係賣錢既,咁岩又俾我見到有Flashcard喎,我見都應該有用就提出交換請求...可能Flashcard都係新手媽媽先有興趣,無咩人想換,所以俾我用2張贈卷換到番黎~

雖然我唔知實際有幾多張,不過真係好多下,好在我帶左個車仔去拎咋,唔係都唔知點搬番屋企,因為真係好鬼重~~呢疊Flashcard都保養得唔錯,仲分開左一疊疊,寫左次序編號,順住同囡囡玩就得架啦~而d Flashcard係雙面印刷,中英對照前後印架~

Flashcard都係一個好有效既教具,同BB玩之餘又可以令佢地認字,本來買左教材唔諗住買Flashcard架啦,點知宜家唔使錢(其實係用左2張贈卷)又多樣教材,我好開心呀,哈哈~

我諗我都唔使買玩具啦,一來屋企朋友送既玩具都仲未開始玩,二來咁多教材都有排玩啦,哈哈~

0116的晚餐 ~ 博多拉麪

逢星期五我都會去接囡囡放學既,所以通常都唔會去買餸...今日本來諗住去6299度食晚飯順便又等佢地見下個孫女啦,不過老公開OT,夜得滯就決定唔過去勒~

問老公要唔要叫外賣或者煮琴晚買既另一包拉麪,但係就無咩餸啦,連餃子都清倉呢~

不過老公依然選擇食拉麪喎,咁就煮啦...呢包博多拉麪係豬骨湯底,比琴晚既喜多方拉麫醬油湯底濃,好似仲好味添喎~

本來唔打算出post架啦,不過呢個星期由星期一煮到星期五,連續5日都煮晚飯破晒記錄,當然要記低佢啦,哈哈

0115的晚餐 ~ 喜多方拉麪

因為放工係尖沙咀sogo落車買野已經無時間去買餸,買完野匆匆趕去搭Elements既shuttle bus,於是係Three Sixty買左2包特價$10既日本拉麪(原價成廿蚊一包架),再買多包香腸即趕番屋企~

今晚就煮喜多方拉麪先啦,一包二人分量,出盡廚房物資(粟米+雞蛋+餃子),都煮左碗豐富既喜多方拉麪,味道都唔錯,食完仲好暖笠笠呢

Sofina washing jelly

屋企枝origins洗面琴晚已經用完啦,但係又無存貨,係如此告急既情況之下,今日放工點都要去買番枝洗面用品~

之不過我真係唔想使咁多錢,好在之前我同老公新開既sogo白金卡迎新禮品共$500既sogo coupon 岩岩到手,所以就決定去尖沙咀sogo是但執一枝洗面就算啦~

結果我選左sofina專櫃,其實以前已經用過都覺得ok,宜家轉左包裝,$220一枝,用2張coupon俾多廿蚊就走得,yeah

Ladybird教材 ~ 小瓢蟲幼幼英文

買呢份教材可說是緣份,未懷孕前已經聽聞小朋友的教材非常昂貴,動輒數萬元...那時的我和老公都覺得匪夷所思,而且覺得那麼小就要學習很可憐~~

到懷孕時開始聽得更多有關教材的資料,而且發現愈來愈多品牌,價錢也在上升~心中開始不那麼抗拒教材,只是覺得太貴也不特別起勁的去了解,因為我想自己是不捨得買的~

囡囡出世後,我開始了解為什麼那麼多家長會花這麼多錢於教材上,因為當你有了自己的小朋友,你會希望好好栽培他,縱使你並不是要他成為天才,也不期望他會有什麼成就,只希望他開開心心健健康康~

不過我知道這時期的囡囡是一張白紙,而且好像海綿一樣,你給他什麼,他都會照單全收的,畢竟這是一個學習的黃金時間,錯過了就是錯過了…我也只是個典型的媽媽,所以希望把握這個機會讓囡囡學習,所以開始留意多了坊間的教材或教育方法~

市面的教材有:

Disney’s World of English (around $60,000 full set)

English Time (around $80,000 full set)

Noddy (around $3x,xxx full set)

Your baby can read (around $5,xxx for 5 DVD)

仲有咩apple tree, dr language…..仲有好多好多~

有朋友借過套Your baby can read俾我,不過只係得DVD,佢勝在平,不過其實得5隻DVD,計番都唔算平,而且我又唔想囡囡睇咁多DVD住,我想囡囡睇多D書先呢~

屋企有隻Disney’s World of English既demo CD,係英文歌,其實囡囡都幾鐘意聽,奈何6萬真係太貴啦~

English Time我又唔多鐘意D公仔~

Noddy好似都幾好,不過3萬都係唔多捨得~

其實我相信每套教材都一定有其用處,就睇你鐘唔鐘意佢個學習系統,present既公仔吸唔吸引呢類元素,當然最大既考慮都係價錢啦~本來都係諗住散買圖書俾囡囡睇架啦,點知因緣際會之下,原來幫囡囡整手腳模間公司近來搞合併,多左個圖書部…於是就話送手腳模黎屋企既時間順便介紹埋D教材同圖書,就係咁我同老公就聽左成晚教材介紹勒~

(全套40冊+40片英語CD+5片劇場CD+

5片劇場DVD+6冊親子手冊+54張認知卡) 

(因為真係好大盒,無可能拆晒出黎影相,所以用offical張相啦)

坦白講,呢套教材係香港真係唔多出名,不過其實負責研發既Ladybird係英國好有名既英文圖書出版社,我初初聽Ladybird都以為不知名既品牌,不過見到佢個logo之後(唔係小瓢蟲幼幼英文既logo喎),我就醒起自己細個時都好似睇過呢個出版社既圖書~

其實sales初初都present得幾好,令我同老公都了解其step by step既學習系統(分5個level),圖書設計有心思,公仔亦算可愛,亦有好多互動既地方….亦有讀卡機,真係由3個月用到3歲都無問題~當然價錢比起市面上既都要平,而且因為我幫襯過手腳模,所以有75折,不過就算折後都仍然係5位數…但係有咁多組件(全套40冊+40片英語CD+5片劇場CD+5片劇場DVD+6冊親子手冊+54張認知卡+1個互動語言學習機+5個學習主題卡匣+5個彩色圖卡組盒含460張圖卡),其實我同老公都覺得好合理,唔算貴~

1個互動語言學習機+5個學習主題卡匣+

5個彩色圖卡組盒(含460張圖卡)

不過到後期,sales姐姐係幾push下,感覺佢係都要你肯落單先走…呢方面我真係唔太鐘意…雖然我真係幾有興趣,但畢竟唔係買菜,成萬蚊點都要俾我考慮下,比我做多少少資料搜集先決定,我唔想俾人迫而買,雖然佢話宜家唔落單,之後做唔到呢個折扣,不過我相信如果我真係要買無話拎唔番呢個價既…最後當然成功脫險啦~.

之後sales梗有打黎follow up啦,我就唔聽電話住等我問下朋友拎意見同埋上網又睇下有無資料,結果發現香港就真係非常少人有討論,不過台灣就幾受歡迎,因為係台灣代理既…我睇過台灣既價錢,如果唔要讀卡機都係大約港幣六千幾,不過要埋讀卡機就貴成倍啦…宜家sales俾我個full set價比係台灣買仲平少少,加上我又去左唔少書店睇下ladybird圖書又睇下普通圖書價錢,覺得就算散買都唔係平教材好多,而且我又驚自己買會好雜亂無章,都係有系統step by step咁方便好多…於是我同老公都決定買呢套教材勒~

其實我只係當呢份教材係一套益知玩具,俾囡囡從玩當中學習,我唔期望囡囡會識晒d生字,因為有d連我同老公都唔識…不過我希望可以培養到囡囡既閱讀習慣,希望囡囡愛上書本,咁就已經達到我既目的~

當我決定買之後,第二日就送貨黎啦,效率奇高,當然佢仲有一系列售後服務啦…宜家我同老公有時間都開始同囡囡一齊睇書仔,囡囡既反應都算唔錯,起碼佢真係俾書入面既圖案吸引望到實一實啦~希望囡囡真係鐘意呢份教材玩具~

 哈哈,打左好長篇添….如果你真係想知實際價錢或者想我refer可以私人留言問我,不過真係要有心理準備present完之後會hardsell到令人反感,最好就了解左市面上既教材先決定啦~

有時間我會post下abby宜家睇緊邊本書,學到咩咁架啦~

0114的晚餐 ~ 火腿炒滑蛋 瑞士雞翼 蒜茸炒菠菜

要返工啦,不過今日無買餸,都係用屋企既物資~

一煲湯飲左3日,一斤菠菜食左3日,琴日煮火腿通粉既火腿加雪藏雞翼,如果計番,成本價應該係廿蚊左右啦~

雖然時間唔夠又只係用剩餘既瑞士汁煮,但係d瑞士雞翼都算入味,合格啦~

火腿炒滑蛋唔錯,都炒得幾滑~

簡簡單單又一餐~

魔法童話夜 (Bedtime Stories)

自囡囡出世後,我和老公都沒有時間去戲院看看電影,前陣子有2張贈卷到期也送了給爸媽看~~

不過今次我是有6張The Grand Cinema贈卷月底到期呢,都不知如何是好,不想浪費啊~

今天因大家都取了病假,囡囡又在嬰園,於是決定休息至中午就去The Grand Cinema睇戲,平日中午場次真的沒有人看,連我和老公只有4人一同看呢~

雖然我倆的精神都不在狀態,幸好這套電影也可以令我們提提神,笑位不少,睇得很開心呢~

0113的晚餐 ~ 火腿通粉

吳爸爸昨晚吃完飯之後就進入了昏睡狀態,一直到今早要上班的時間才醒來...但他看來仍然需要休息,所以最後我和吳爸爸今天都取了病假~

為使吳爸爸真的可以睡得安寧,我送了囡囡返育嬰園...就這樣因病而獲得了久違的二人世界~買了粥給老公做早餐,然後就到樓下看醫生,還打了特效針呢...回到家吃了藥又進入昏睡狀態...而我也加入齊齊休息~

沒多大胃口的病人,不吃粥就吃通粉吧...所以買了通粉和火腿回家,加上家中的雞蛋和菠菜,就是一碗清清淡淡的火腿通粉了,沒胃口的病人也可以吃光呢~~

經過一天的休息我和老公都已經好多了,不過吳爸爸吃完通粉又去昏睡了,看來,他是要睡回一星期的睡眠時間呢~