08吳家大事榜暨09展望

雖然好想去瞓,不過都係等埋count down先啦...而且屋企望出去個維港景睇count down煙花真係無得頂,老公連腳架都無set,就咁都可以影成咁,真係算唔錯啦...元旦一朝早仲見到2009年既字樣係IFC到喎~

祝大家新年快樂,2009年繼續精彩

呢期電視都做好多2008年大事回顧,無可否認2008年真係幾大上大落,好多大事發生,四川地震,北京奧運,藝人裸照事件,雷曼迷債,股票大跌,毒奶事件等等....不過其實對吳家就無咩影響,因為吳家係2008年就俾生BB呢件大事所掩蓋晒

吳家十大完完全全變了樣,所有野都同囡囡有關呢~

第10位 - 一次旅行都無去過呀,仲要因為發現有左而放棄左我既歐遊計劃,蝕左張機票~

第9位 - 發現有左被吳生勒令讓出廚房CEO一職,成年都唔俾煮飯~

第8位 - 因為有左,決定一動不如一靜續約唔轉工,結果連加2次人工,可以幫補下~

第7位 - 放左一個人生入面最長既假期,12個星期既產假,唔使做有糧出簡直快活過神仙~

第6位 - 經歷左身體懷孕既變化,體驗作為大肚婆既各種感受,整個孕期都係2008年開始同完成~

第5位 - 因為大肚令我體重上升,就算生完都仲係未收到身....2008年係我最肥既一年~

第4位 - 感受到身邊人既關心,沒想到這麼多朋友來探望我和囡囡...更加要多謝我的親人,辛苦了媽媽,奶奶,更辛苦了老公,多謝大家的照顧~

第3位 - 不會忘記於8號風球的午夜入院,經歷10小時的生BB痛楚~

第2位 - 係924生左abby,我既身份轉變左,2008年的我當上媽媽了

第1位 - 本來甜蜜2人世界既吳家變左溫馨3人行,一家三口樂融融

當然,不得不紀錄一下吳家既財政狀況,2008年吳家開支模式也來了個180度改變,全年開支比07年無可避免地上升了近20%,好在仲未突破3字頭...唔怪之得咁多人話養個小朋友要4百萬啦~

開支最大竟然係"保險"(26%),因為夫家要將吳爸爸份人壽轉會,結果係我地要俾過d保費...加上又幫囡囡買左份教育基金同醫療,所以佔左好大比例既支出~

第二大開支就係"BB既使費"勒(17%),包括我懷孕期內睇醫生,坐月食療,添置BB用品,打針,育嬰園等等既費用~~好在我係政府醫院生,如果係私家生,相信應該已經成為第一大支出~

第三大開支竟然係"膳食"(16%),最大原因係因為我無得煮住家飯,原來唔煮成日出街食真係貴好多架喎...希望09年煮番多d,慳番多d錢啦~

第四大先輪到俾兩家人既家用(16%),一向呢個項目都係三甲之內架,估唔到今年跌左出黎喎,其實都係比第三大輸少少架咋~

就係頭四項已經佔左全年開支75%啦,可以想像其他項目(依次為節日慶祝/打扮/醫藥/家品/交通/稅/旅行/娛樂)比例少左幾多~

猶幸儲蓄依然達標,雖然08年頭資產總值個base比07年頭既已經大左,但係08年既資產總值依然可以維持上升20%,可以想像實際金額其實係增長強勁架~(所以話呢,唔玩股票都唔一定係蠢既,哈哈哈~)

2009有咩展望?其實最大展望都係囡囡可以健健康康咁成長,我可以做個稱職既媽媽同妻子~~令一家三口快快樂樂咁生活就係我最大目標~