尿片研究

估唔到宜家既我會對尿片進行研究比較,真係做左阿媽係唔同d,哈哈~

基本上除左產前買過2包特價Huggies New Born之外,囡囡既尿片一直都有朋友們既贊助,到宜家都仲未用完~

初生時用左2包Huggies New Born(自己買),4包Pampers初生寶寶之後就同囡囡轉左用細碼尿片勒, 5大包細碼Pampers(每包72片),用到宜家都仲用緊,不過應該就黎用完啦~

雖然真正用家係囡囡,不過佢唔識表達,咁唯有我呢個媽媽幫下眼啦~

我覺得不論初生碼還是細碼,Huggies都比Pampers細,細粒B應該用Huggies fit d,不過我記得Pampers初生寶寶既尿濕顯示比Huggies New Born易睇,所以我覺得兩隻既初生碼都ok~

轉細碼時,第一次係用Huggies細碼試用裝,點知個次已經爆屎上背....跟住開始用朋友們送既Pampers細碼,細碼已經無左尿濕顯示呢樣野,不過我覺得防漏做得幾好,so far都無試過漏尿,就算瞓成晚(10個鐘)無換都ok~但係Pampers一樣成日發生爆屎上背事件,有排差唔多一日一次,真係激到想死....所以唯有同囡囡著得緊d,但係又令到大脾位紅晒,所以其實想轉中碼好耐架啦...後期唔知係咪我地識得同囡囡著,爆屎事件少左好多(不過都係爆屎既邊緣架啦),睥位亦無咁紅~

終於就黎用完手頭上既細碼尿片,我想同囡囡試下其他日本牌子,多謝之前朋友送左一包Neipi中碼,而相中包Huggies中碼就係Huggies promote送既,另外個包Merries就係琴晚路經卓悅見做減價買既,因為聽得太多人話好用,但係唔係度度有得賣,就算有得賣又話成日斷貨,所以好想買黎試下...琴晚係卓悅都係見到得番一包中碼咋....特價左都要$98(42片裝),其實我覺得好貴,不過同街價比好似已經平左,所以都買包番屋企試下啦~

唔知各中碼尿片既表現又如何呢?其實仲有幾隻牌子都想試架,好似GooN大王,Unicharm winnie the pooh....無諗到用尿片都咁多學問,大家又有咩心得呢?