冬至 ~ 下午茶自助餐@怡東酒店

今日係冬至,前日和昨天已經分別和屋企人同99做冬...所以正日就係兩口子既二人世界啦

本來想過買豐富一點的餸自己煮做晚餐,不過最後我們只吃了一餐,就是於怡東酒店的Cafe on the 1st食下午茶自助餐勒~~

其實呢個自助餐係免費既(正價好似係$128+10%),因為係老公某張白金卡既迎新禮物...已經到手左好耐架啦,不過次次打去book都話full左...前幾日再打都係full左,話最快要1月27日先有位喎,咁我都訂定啦...Buffet係3:00至5:15,酒店話可以試下3:30walk in睇下有無位...於是老公就話今日試下去walk in喎~

walk in果然有位喎,不過就唔可以坐係睇海景個邊lor...係坐係扶手電梯附近呢~

我地係未食晏畫架,以下午茶自助餐黎講都算幾豐富呢~

沙律:薯仔沙律、叉燒沙律菜、粟米沙律等等

麪包:都有4,5款

壽司:三文魚壽司、腐皮壽司、熟蝦壽司、太卷等等

點心:牛肉燒賣、燒賣、蝦餃、小籠包、奶皇飽、叉燒飽、菜肉飽、雞絲翅

熱葷:燒雞、炒飯、炒麪、魚蛋、腸粉、雞翼、串燒、春卷、餃子、蘿白糕等等

即煮檔口:湯麪類、意粉類、生滾粥

甜品:朱古力噴泉、各式蛋糕、生果、雪糕、布甸、西米露、豆腐花等等

仲包一杯餐飲呢~

其實真係幾多野食,至於味道就正正常常咁啦...無話難食又無話好好食,不過每樣只係食一件都飽到上心口,仲要我地都未試晒所有食物添呢~

不過怕且最差既就係杯餐飲,老公話佢杯檸茶無茶味,檸檬好酸,就算落左糖醬味道都好怪,佢飲左2啖就唔想飲啦...而我杯奶茶都係麻麻地~

我地真係食到成5點,晚餐真係食唔落啦....兩個人無任何附加費,待應話我地就咁走就得架啦...食到咁飽一個仙都唔使,真係超開心...呢個冬至餐都唔錯呀