神廚館

因為去奧海城睇戲,所以就諗下有咩好食既晚餐啦~~咁岩係openrice睇到呢間神廚館竟然有78(好評):1(劣評)既成績,所以好有興趣一試~~

街坊小店係正匯豐中心對面,相信應該唔少匯豐人食過啦,不過無聽細妹提過喎?我同老公六點多到達未有人,不過跟住就有2個banker入黎食野勒~~

老細大廚剛好行開左,得番老闆娘坐鎮,仲驚水準無老闆咁好,不過都無咩問題,而且仲好好禮貌添~~

我當然叫呢度個招牌菜 ~ 招牌煎蛋海苔窩燒墨魚餅飯($30)

墨魚餅真係一流呀,熱辣辣又彈牙,仲食到粒粒墨魚肉添架,而且仲好juicy呢,讚 ~~

另一邊既煎蛋同白飯就無咩特別啦,不過有佢既甜豉油撈飯食都ok既,不過又唔覺得隻甜豉油好特別,而且d飯唔係好夠熱~~

紫菜濃湯魚上骨湯:呢個湯係跟餐架,唔錯喎,一d都唔腥仲有d鮮味,最鐘意佢件豆卜,吸左d湯汁食,好好味~~

美極香煎薄牛扒飯($30) + 熱檸蜜($2)

老公唔飲魚湯,所以加2蚊要左杯熱飲~~之前同老公講話呢度既美極香煎薄牛扒好多人讚應該岩佢口味…佢一聽到美極就已經好期待…不過老公食完話其實唔係好食得出係美極,不過佢個汁連埋蔥撈飯食實在一流 ,三扒兩撥就食晒成碟飯勒~~我都試左個汁,我覺得幾好味,不過好似其他人一樣覺得有少少咸,不過可以接受…但係老公不知幾鐘意個汁,仲話一d都唔覺得咸喎~~至於牛扒呢就變左配角勒~~

有咁多好評果然唔錯呀,我諗我同老公都會再黎食既,下次想試下佢既咖哩,仲有椒鹽骨飯,唔知係咪都咁好味呢~~老闆娘話呢度收8點架,太晏黎就會摸門釘勒~