橫掃工展會

今日係工展會既第一日,我同老公已經去入貨勒~~今次係老公提議去架,佢話想去買平野入貨喎~~

既然要過海,咁一早我同老公就番娘家約阿媽去彩雲軒飲茶啦...臘腸卷、春卷、叉燒腸、鳳爪排骨、牛肉球、煎芋餅、菜肉雲吞、乳鴿....食左咁多野連埋茶錢加一都係一百一十幾咋,好抵呢~番左娘家坐就出發啦,老公話天氣好所以就話行去維園喎...我地經過北角仲行去睇下我細個住既地方同小學中學所在地添,好多舖頭都轉晒呢~~

雖然今日係首日開幕,但係都好多人係會場...以下就係今日係工展會既使費勒:

入場費 = $10 x 2

東方紅湯包 x 3 (鮑魚燉雞、花旗蔘田七燉雞、花膠燉乳鴿) = $100 (老公試飲完之後覺得唔錯,所以就買左lor~~而且平時一盒都要$45架,所以都算平呀)

壽桃牌炒生麪皇(粗2盒,幼1盒)、烏冬、鮑魚麪、蝦子麪、簥麥麪、XO醬各一 = $50 (之前我炒過一次生麪皇既粗麪老公覺得好好食,所以就話要買勒...呢度都幾平呀)

初榨橄欖芥花籽油3公升 = $65 (咁o岩我前日用晒d油正想買,呢枝比係超市買平左三十蚊有多呢~~)

美味棧龜苓膏9杯 = $25 (龜苓膏就係老公要啦,舊年都有買架,今年依然咁平,平均都唔使$3杯,真係好抵呢)

同珍(豆辦醬、南乳吊燒醬、蠔油) = $11 (豆辦醬又係用晒要補貨,係同珍有豆辦醬賣,而且十蚊任選兩款,老公就要左南乳吊燒醬,加多一蚊仲有枝蠔油添,真係好抵呀)

天壇牌火腿豬肉(大、中、細各一),2包榨菜 = $35 (呢排午餐肉好多風波,我其實都好少買,不過老公鐘意食,佢見到就話想買~~我見平時天壇牌都賣得幾貴架,呢到都算平呀,於是又買~)

阿波羅士多啤梨荔枝雪糕 = $20 (每次去工展會都會幫襯一次架)

左顯記蠔油 x 2 = $0 (因為係大會抽獎抽到架,搞到好多蠔油添,有無人要呀~~)

比起上年,今年買多好多野呀...而且o岩o岩有d又要補貨,實在太好勒~~其實好多醬油都好抵,不過真係唔用得咁多...其實淘大有個入廚四寶都幾抵架,只係$20就有蠔油、生抽、瑞士汁、鎮江排骨汁,都值得買呀~~相反李錦記就唔掂勒,佢咁多款式,但係會場只係得幾隻賣,仲要係d唔太愛歡迎既呢~~