1031的晚餐 ~ 菠蘿炒牛肉

今日既新餸係菠蘿炒牛肉:牛肉幾嫩滑,不過老公覺得味道有d怪,但係又講唔出點怪喎....而我又覺得無問題,仲覺得幾好味添喎~~

豆豉蒸排骨:由於落左都幾多豆豉同蒜粒去蒸,所以好香呢~~

最後又係最簡易既煎雞扒...呵呵,又完成一餐啦

Mos burger + RomaRoma

去到apm就諗起剛開既Mos burger,於是決定買個餐同老公share試下~~

嘩,條人龍好長下喎,正在猶豫等唔等之際...老公發現左隊中有佢個朋友,於是就托朋友買多份...咁樣我地就慳左半個鐘時間啦,有得食既時候已經係半小時之後既事...老公既朋友實際係用左1個鐘去排呢~~

老公想叫既辛辣漢堡未有得賣,結果要左元氣漢堡,加件炸雞同飲品,一共要$38....味道當然好味過麥當當啦,起碼塊漢堡真係食到牛肉味...不過排咁耐就真係唔值啦,而且價錢我都覺得貴左些少,唔係咁抵喎...試一次就夠啦

食完漢堡繼續行商場,行到8點差唔多食晚飯啦...本來想去試赤丸製麪既,奈何又係大排長龍...老公見狀已經唔想排啦,所以老公就話食第二間,最後佢話去RomaRoma,其實佢係貪唔使等位,所以對d食物都唔大期望~

我地叫左個2人晚餐,有

凱撒沙律:d菜唔夠爽,不過味道都ok

三文魚芝士焗薯皮:老公話比佢預期好味,不俗喎

羅馬雜腸薄餅:唔夠熱辣辣,不過真餅底真係好薄亦夠脆

磨菇雞扒忌廉意大利飯:d意大利飯幾"煙um"亦好creamy,我同老公都覺得好味道~~

估唔到食物水準都ok喎,原來尖沙咀間gaylord印度餐廳,赤柱間bayview都係呢個集團架,唔怪之得啦...呢餐盛惠$207

月底荷包失守

可能隻腳太酸痛啦,老公又唔想大家幫大家按摩咁辛苦,於是佢提議去展貿既家居展試用人家既按摩椅紓綬一下一雙小腿...哈,咁都俾佢諗到

我地去左試樂信牌既按摩椅,一個自動程式係15分鐘...嘩,按摩小腿真係好舒服...不過講真如果真係要買,我地都係會選擇OTO

跟住出番去德福,去左宜家食左2個熱狗餐頂肚,盛惠$18...就連淘大行埋都無咩o岩買,但係時間先係4點幾5點...最後我地決定去埋apm行下...因為平時好日都唔會落觀塘,見只係2個地鐵站就順便去行下...

結果我終於買到今個秋冬想著既褸啦,之前試左好多間都覺得著起太肥...今日呢間試起OK喎,價錢亦within budget~$390(原價$590)...所以荷包失守買左啦,真係又開心又肉赤

1030的午餐 ~ 咸牛肉炒飯

一朝醒來隻腳仍然好痛喎,結果用雪櫃既冷飯加咸牛肉煮左碟炒飯就算啦

西貢永和海鮮酒家

以海鮮掛帥既行山團最後係4點半到達西貢永和海鮮酒家,黎呢到食因為其中一個團友認識個大廚~~

呢個又唔算午餐又唔算晚餐既海鮮大餐有

手撕雞

好大碟呀,都幾得意架喎...有好多脆卜卜同腰果係到

呢碟係蒸蜆,我同老公都覺得味道淡左d,不過係送既~

當然仲有其他野啦,分別係椒鹽瀨尿蝦(不過我覺得唔夠大隻),蒜茸蒸開邊中蝦,豉汁蒸扇貝,豉椒炒蟶子...味道不俗,不過我同老公都覺得上次同屋企人去鯉魚門食海鮮好味d

不過呢度既乾炒牛河就好好味喎,最後每人$145...跟住仲去滿記食甜品....老公唔單止食榴槤pancake仲叫埋榴槤奶飲添....佢都不知幾滿足

不過我地隻腳就要好好休息啦~~

麥理浩徑第4段

今日既節目係去西貢食海鮮,搞搞下多左行山呢個節目...話行段2個鐘既山路到西貢再去永和食海鮮~~

今朝其實唔想起身去行山,只係想join去食海鮮算數,不過最後都同老公一齊出發,當然我地就遲到左少少啦(10點半先去到集合)~~點知大家對條山路估計錯誤,路唔算難行,不過原來無可能2個鐘可以行完,而且烈日當空晒到暈,所以都幾辛苦...我隻腳行到好似唔係屬於自己咁

沿途風光係唔錯,可惜行得太耐好肚餓已經無心情欣賞,我同老公仲要無食早餐添喎!!可能年紀已經大啦,體能果然無復從前...最後行左4個鐘先完成呢個麥理浩徑第4段到達西貢...時間已經係4點啦

1028 ~ 楊葉聯婚

IELP好朋友終於都小登科啦,雖然佢6月時已經註冊,不過擺酒就係1028既星期六~~

佢係北角一間酒店既中菜廳擺,個場都算唔錯呀...食物就一般啦

不過北角係我小時候居住既地方,幼稚園,小學,中學都係呢區度過,充滿童年回憶

我係新郎哥既朋友,不過新娘子原來同我同一小學及中學,係我既師姐~~

從新人小時候既相片,我發現我細個時成日都去既公園仔...好有親切感~~

好朋友結婚少不免會感動,估唔到好朋友原來係情人節係山頂求婚既...咁咪同我老公一樣

新郎哥~~好好照顧老婆啦

1026的晚餐 ~ 羅宋金菇貢丸烏冬鍋

今日比較懶又無去買餸,所以拎雪櫃內既金菇、貢丸同埋烏冬,用上羅宋湯做湯底就整左呢個

羅宋金菇貢丸烏冬鍋...砌得靚靚,如果係街叫黎食,唔知要幾多錢呢

1025的晚餐 ~ XO醬炒肉碎伴玉子豆腐

嘉年華會仲有唔夠2星期就到啦,呢幾日實在係好忙好忙....我覺得自己好似三頭六臂咁,實在好多野要準備,今日終於差唔多7點先走,不過我都照煮飯...今日新上場既係

XO醬炒肉碎伴玉子豆腐:呢味餸其實係我阿媽時時煮既,不過好耐無番娘家食飯,所以就自己煮黎食啦...不過我就用自己既方法煮,玉子豆腐蒸一蒸,肉碎就用XO醬炒好鋪面....老公話今次XO醬都落得夠,而且d玉子豆腐好滑...滑到會"sir"入喉嚨呢

當然又黎老公既至愛 ~ 芝士棷汁焗雞,有佢出現既話,就算得兩味餸,老公都不愁食唔晒d飯...因為有汁撈飯麻....水準仲愈煮愈好添

1024的晚餐 ~ 蜜糖豆炒雞柳、鎮江豬扒

今日既晚餐有2味菜新登場,分別係

鎮江豬扒:老公話好香喎,食落甜甜酸酸,不過又無糖醋或者咕嚕肉既味咁搶咁濃...豬扒亦算鬆化,成績唔錯

蜜糖豆炒雞柳:我就唔好蜜糖豆既,所以自己無食,不過老公都話味道OK...而雞柳就炒得好嫩滑...其實我覺得味道似乎淡左少少,不過一向食開濃味既老公竟然話夠味喎,真係奇怪勒

蓮耦豬肉餅:呢味係買半製成品番屋企煎架咋,不過配XO食,老公話好好味喎~~

再來"富田"

星期日晚行完永安plus都成9點鐘,我地仲未食晚餐喎...於是兩公婆就走左去富田食野啦,今次試左

和風脆牛卷:面頭個d好似係薯片碎,而d牛肉真係好似脆脆地咁架喎,連沙律醬食幾好味呀...老公都話幾特別!

咖哩吉列豬扒石鍋飯:熱辣辣,吉列豬扒都算juicy...唔錯唔錯~~

當然仲有每次必叫既三文魚壽司一客,今餐盛惠$98~~老公話呢間料理店真係唔錯喎,最衰佢要食滿$200先可以碌卡,我地2個平時又點會食成$200先得架....不過仲有好多食物未試...有排試啦

1023的晚餐

因為買左紅酒酒塞,老公今晚就急不及待開左枝紅酒慢慢嘆

老公話一日一小杯對身體都好喎...紅酒當然陪西餐啦~~

於是今晚整左白汁咸牛肉意粉+香草雞翼...老公話好耐無食呢個意粉,佢話好鐘意呢個汁喎~~

雖然簡單左d,不過都算係美酒佳餚呀