1003的晚餐 + 明日宴客餐單

今日原本既晚餐唔係呢個雞扒炒一丁麪架,不過因為老公既一句承諾,我今晚就好多野要準備啦~~

今日如常7點先係公司走得,老公6點幾打黎同我講佢約左2個女同事聽日上黎屋企食飯,佢既女同事成日見我老公既飯盒好多款式好似好好味,所以想試我既手勢,而老公竟然一口就答應左

唉,知唔知準備一餐飯係幾咁花時間呢不過老公似乎無拒絕或改期既念頭,咁我唯有捨命陪君子啦

落車之後仲要去超市行一轉買定食材準備聽日宴客,由於我恐怕不能準時放工,唯有將d事前功夫今晚整埋佢架~~所以今晚既晚餐就變左快餐式既雞扒炒一丁麪~~不過老公話今日炒得好香喎

明日宴客菜式暫定如下:

芝士焗千層肉醬闊麪 (由於現成既肉醬唔好味,我今晚就預先煮定自家制既紅醬,都要煮成個幾鐘架)

芝士煙肉焗扇貝(老公話同事鐘意食海鮮,咁就焗扇貝啦...其實係因為買唔到生蠔/青口)

吉列豬扒(老公話想食喎,所以今晚預先整定,聽日就咁拎去炸就得勒)

如果唔夠食,我仲可以加多個咖哩薯仔炆雞翼既...就係咁搞下搞下就成11點幾啦...都無停過手...我同老公講,下次唔好叫人平日上黎食飯(指明要我煮個隻),好鬼辛苦呀!!!!(不過又唔可以唔俾面老公~~)