農曆結婚一週年紀念

今日係我同老公既農曆結婚一週年紀念

點解連農曆都會記得之唔係因為今日係迎月日,中秋節前夕一定記得啦...所謂人月倆團圓,個時定中秋既日子結婚都有呢個意思架~~

西曆個日同老公講安排唔合格,今日果然有驚喜...老公買左玫瑰花送俾我呀好耐無收過花啦,而老公又知送一紮紮既我又會肉赤,結果佢去花墟散買,我一樣咁開心

老公今日下畫安排左出街做野,貪可以早d搞掂有時間去買禮物送俾得...點知我今日去睇牙變左早過老公番屋企...老公無帶某張信用卡,買唔到禮物,諗住番屋企拎完仲夠時間再出去買,點知見我已經係屋企,所以佢就拉我食完飯出去買禮物...就係呢個手提電話勒....係我呢期鐘意既款呢,手上用緊既係個任何功能都無既手提,仲要係結婚個時用信用卡換既贈品(話時話個贈品手機都用左年半有多啦)

買完禮物,老公仲拖左我去九龍公園睇花燈...今日仲有迎月嘉年華,有遊戲攤位,不過要有飛先有得玩同換禮物,不過我已經好開心

老公話農曆結婚週年紀念係迎月日感覺好似周圍都有慶祝活動,好似好多人同我地一齊慶祝咁...唔知有無關係呢,不過我今日真係好開心呀,多謝老公