吳家吾居: 9月 2007

2007年9月30日星期日

0930的晚餐 ~ 粟米咸牛肉焗意粉

前兩日因為煮北海道牛奶薯仔雞煲留起左一半白汁,琴日又去左阿甘蝦食左成四百蚊咁多,所以今晚就用碗白汁配意粉煮黎做晚餐勒

無特別去買配料,只係開屋企罐粟米同埋咸牛肉,咁就煮好左個意粉,拎入焗爐焗一陣就食得勒~老公話好好味喎...味道都真係唔錯架,唔好睇少d咸牛肉,都好飽肚下架

廣東茶居

星期六行完山頂之後就番屋企休息下,其間老公個朋友打黎話約夜晚食飯,我地又無特別訂位,所以最後一行6人去左海港城既《廣東茶居》食晚飯~~

呢間唔使點排隊,仲俾到張海景圓檯我地添~~我地叫左

白灼豬潤:呢個大家都好驚喜,味道出奇的好~~老公同我都唔好豬潤豬腰既,不過見佢賣相幾靚就即管試下,估唔到真係整得幾好食喎,老公讚左幾次呢~

咕嚕蝦球:普普通通

蜆介鯪魚球:熱辣辣都唔錯~

貴妃雞半隻:雞味一般,不過味道都ok既~

粉絲什菜煲:無咩特別啦

肉絲炒麪:呢個唔錯,好大碟十分足料,不過麪條並無被醬汁整淋,鐘意食淋既就撈多d汁lor~

之後我地仲每人叫左個甜品:生磨杏仁茶x2,杏仁豆腐花x2,楊之甘露x2~~人均消費$105,都唔算貴啦~~雖然味道一般,不過都算坐得舒服又唔使排餐死,都ok呀~

2007年9月29日星期六

新晉髮型師

呢幅相究竟影咩呢

其實呢d就係吳生既頭髮勒

操刀者係一個完全未經訓練既新晉髮型師 ~ 吳太

吳生既頭髮生得好快,佢差唔多個個月都要去修剪既...唔知佢係咪嫌煩啦,前排買左個刨番黎(大約二百幾蚊啦),仲叫我用黎幫佢刨喎...佢話佢個朋友都係用呢個刨黎剷青,好方便好易用~~

終於追月日老公見無野做就叫我幫佢剪頭髮,其實我真係無咩信心,不過點都有第一次既,況且唔係刨我個頭就無所謂啦...我對自己既評分係麻麻地,其實我覺得自己刨得唔係幾好架,不過要用心睇先會發覺刨錯左既地方...吳生話新手既我算交到貨喎~~

以下係吳生對呢位新俊髮型師既評語,節錄自吳生日誌:

「以第一次刨頭黎講, 只係少少一岩一慘, 少少左右不平衡, 其實我都已經好滿意的呢, 而且最重要就係我鍾意呢一種一點點的不平凡, 一點點的不同, 一點點的獨特, 使我看起來有一點點的 special.」

睇黎我遲d就會成為一位一流既髮型師勒

0925 - 0929的作品

其實中秋節做節之後,我同老公去左大坑睇舞火龍~~咁大個女我都係第一次去睇咋,咪又係因為想去影靚相lor~~點知去到既時候已經堆滿晒人,一道道既人牆,我同老公根本就唔夠高影...呢2幅算係勉強睇得到做緊咩野啦~~(都係我影架,因為老公仲無我企得高呀)

其實個火龍都真係幾巨形架,呢幅其實係舞動中既火龍龍頭,不過影得好抽像

追月日同老公去左行西九花燈會,我同老公都覺得無咩野睇,都係維園靚好多~~是晚最滿意既作品係老公用廣角鏡影既夜景~

而今日山頂行最大得著就係影水珠效果,好好玩呢~~

阿甘蝦 Bubba Gump

一部DSLR就影響晒我地假日既活動勒~~因為今日我一早要去灣仔考試,所以就決定係香港呢邊食晏~~

老公琴晚已經問我去邊度好,睇黎佢又係想去取景影相啦,於是我提議去山頂行下...因為我想試下呢間"阿甘蝦"餐廳...哈哈哈

凌霄閣自從裝修完之後都未黎過,今日再去其實格局唔係改左好多,只係上面個幾層全部都係d新餐廳~呢間"阿甘蝦"以阿甘正傳做主題,牆上有好多劇照同戲服,有間房仔仲舖左阿甘間睡房既牆紙添~~

呢度都幾得意架,大家都知阿甘鐘意打乓乓波,所以呢度就有個乓乓球拍既飲品menu~~另外想叫待應,只要反出紅色個塊stop forrest stop既牌,咁待應就會停低serve你架啦~~但係我就唔知點解檯面會有幾包梳打餅,唔通係阿甘鐘意食?

我就叫左個fried shrimp($148),我見好多人都有叫黎食呢~~我數過架啦,一碟有成14隻蝦呢~~味道唔錯呀,繼とん吉之後,呢間係第2間老公肯食晒成隻蝦既餐廳~~不過老公話都係とん吉好d,因為大隻d呀...不過呢度雖然細細隻,不過勝在份量多...個碟沙律椰菜都好好食呀~

老公就叫左fried chicken($138),雖然呢度主打係蝦,不過都有其他食物既~~呢個南部雞扒都好好味,薯茸亦不俗...咁大碟老公都清晒呀~~

我地都有叫到飲品,我個杯係mango sparkler($38),不過一d芒果味我都飲唔到,反而好重檸檬味...但係用黎配炸蝦食都唔錯~

老公就叫左杯jenny smoothie($42),呢杯甜甜地,好好味呀,可以一試呀~

整體黎講呢度既食物質素好唔錯,又有維港全景睇,好正呀...夜晚黎睇夜景應該更有情調~~

Written test of Economist

世事無絕對,脫離有關金融經濟行業已久既我今日竟然去參加Economist既考試~~

我都係抱住志在參予既心態去試試,如果o岩o岩畢業去考反而無咁驚添~~

入到試場竟然見到大學時系內極受歡迎既tutor - Demond呀佢係監考員呢~~話時話,上次同大學同學食飯先提起過呢位tutor,只知畢業時佢入左HKMA(金管局),原來佢宜家去左EABFU(經濟分析及方便營商處)~~

請Economist果然係唔同d既,份卷真係考Econ concept架喎~~6條問題要全答,限時2個鐘~~6條之中,有2條唔識,因為真係唔記得左啦(雖然我記得係學過,只要俾我睇番下就一定記得),另外個幾條應該無問題卦

等我以有限既記憶寫低番呢6條問題,或者仲有機會再考Economist既話就有past paper參考勒(份卷寫住係January 07架,我諗係番用既)

1. a) Explain briefly what meant by "mutiplier effect" in nation income. b) In small and open economy like Hong Kong, is the mutiplierbigger or smaller compare with the big economy like U.S. c) If the mutiplier of infrausture spending in Hong Kong is 0.7, what is the effect of GDP if spending extra $100mn in infrausture.(11 marks)

2. a) China consumer price VS China consumer price inflation b) China consumer price VS HK price inflation c) Why it is possible if China conusmer price increase, the U.S. price level continous be lower. (18 marks)

3. a) Explain briefly on the layman's term of "Type I" and "Type II" error in decision making. b) Explain briefly on the similarity and different in coorelation and causel relationship for time profile of two economic variable. c) "Weaker US dolloar make oil price increase from $70 to $71" Use concept "b" to justify this statement and use concept "a" to explain the wrong expectation. (20 marks)

4. a) Note the diagram and indicate the 3 key observation. b)Why the rate of increase of employment earning of "All Worker" is higher than each catergory of education breakdown. (17 marks)

5. Please explain what economic effect if statuorary minimium wage for lower income worker applied.(16 marks)

6. "香港對國內的經濟地位及影響下跌,此情況將會持續,前景並不樂觀"請評論及提供理據。(18 marks)

就係上面呢6條啦(除左第6條用中文答,其他都用英文答),正確字眼當然有出入啦,不過大致上係咁既意思勒~~我就係唔識第1,3同埋4b勒~~其實我記得mutiplier effect好容易下架咋,不過突然之間問起真係唔記得晒~~而第3條呢,我對type I,type II error有少少印象,不過一向唔多用,所以真係唔記得勒~~4b又計唔到喎...oh,d野俾番晒老師lu...不過我諗未至於唔合格既,我見周圍d人交卷都好多空白左,睇黎大家都係唔識呢幾題架啦~~

你又識唔識答呢....如果識既話,你記住下次一定要去考Economist啦(不過剛畢業既就唔得啦,因為要5年以上工作經驗先申請得架)

2007年9月28日星期五

0928的晚餐 ~ 濕炒白菜肉碎牛根丸烏冬

今日happy friday,不過因為呢個月實在支出太多,今晚又要臨急抱佛腳溫書(因為聽朝要考有關經濟既試,睇黎要惡補下咩叫QDII同CEPA先得勒~),雖然我諗個考試都係志在參予多架啦

琴晚食左飯,老公一定想食下麫類啦...買到既餸又唔襯意粉,結果煮左炒烏冬~~

今次試下用濕炒方法,幾成功喎,又唔會水汪汪,但係又無干炒咁乾,有d濕潤,味道仲好唔錯呢~~兩大碟既成本價係$18...又抵又好味

2007年9月27日星期四

0927的晚餐 ~ 北海道牛奶薯仔雞煲

今日我全面發揮工作小宇宙,2點郵車到之前入晒二百幾封信同封口,上畫仲開左個會,所以晏都無食係咁衝...終於搞點晒d野,覆晒所有電郵,留言,今日總算唔使留堂勒~~至於個條友仔竟然索性請假喎,佢係得既~

放到工就梗係去買餸煮飯啦,雖然放工已經唔想諗煮咩,不過都總算有新菜式:

北海道牛奶薯仔雞煲:係北海道買左個白汁番黎,原來係好似朱古力咁一格格架...呢道用左半盒,再落d牛奶一齊煮,好味道喎~~不過半盒整出黎都好多汁,所以我留起左一半,或者聽日可以用黎煮意粉~

另外加多個麻婆豆腐啦,同個雞煲味道兩極化,不過水準依然保持得幾好,yummy~

飯後仲有無核青提子食呢,老公有住家飯食不知幾風騒

2007年9月26日星期三

娘家做節@東蜆越南軒

本來媽咪係定上星期五晚做節既,不過因為要奔喪,所以我就出席唔到~~所以改左正日做節~~

正日酒樓爆晒啦,所以阿媽改左去食越南野...太古城既東蜆越南軒~

今餐就係傾我地全家既旅行大計,10月尾去曼谷呀

負責是次行程者就係我啦,百忙之中我已經訂好左package啦...遲d補番篇blog講package詳情啦~~

不過要等我搞掂公司單野先可以詳細計劃行程,如果各位有曼谷書記住借黎睇睇呀(因為我d珍藏曼谷書借左俾老公個朋友之後就無回頭啦)

今餐都唔係好貴,食物不過不失啦~~最重要都係同屋企人食o者

不和升級

點解有d人係要人發火先會收斂一下行為既呢

個位廢到唔恨既友仔(請容許我用一些比較粗鄙既形容詞去稱呼呢位ACO),今日中秋節竟然要我大動肝火

上年搞嘉年華,個二百幾封信根本就唔係我負責...自從同呢條友仔唔妥之後,我都費事搵佢幫手做野,琴日我已經自行搞點個二百幾封信~~之但係得我一個人搞咁大既嘉年華,真係唔得閒再將d時間用黎打信同印信(雖然d信係由director逐封簽),老闆亦有睇到我忙既程度同佢不相伯仲...於是琴晚我忍唔住要求老闆將呢二百幾封信既address label交俾個條友仔做,老闆一口答應~~

講真,我絕對覺得呢d工作應該由clerial既同事做,只係老闆唔得閒理同分配...而且個位人兄又唔係忙,日日係度搞自己既私事(唔係講裝修就係收傢私),再唔係就係度煲電話粥...俾d野佢做有咩問題呀~~

今朝一早老闆就同佢講叫佢幫手整label,聽到佢既語氣唔多好架啦,不過老闆叫到佢當然答應啦~~隨後老闆就去開會,大家應該估到呢條友仔有咩行動啦...無錯,咪就係打電話同人講我壞話lor~~

本來我都習以為常架啦,不過我真係忙到好"炆",仲要俾佢講我既壞話係度騒擾喎...大大聲話我唔早d準備名單,做唔切就拋俾佢做....嘩,激到我呀~~佢唔知個名單已經來來回回搞左幾個星期老闆先批就唔好係度話我無做野啦...又話個名單用唔到合併列印,唔整個excel~~呢樣野我都想話佢呀,個名單係用上年個份去更新既,而上年份softcopy咪就係佢負責架lor,就係因為用唔到合併列印搞到我要逐封剪貼印個二百幾封信出黎呀