便所主題餐廳

「新屎坑，三日香」絕對可以形容今晚既晚餐~~

公司大型活動將近,呢期日日都要加班...所以無時間煮餸亦停左2日無寫blog~~今日雖然依舊加班了一小時,不過已經約好了老公出街舒舒氣

買左9點半既戲飛,行左陣街就去朗豪坊對面新開既食店試試...就係呢間便所主題餐廳~

呢間餐廳既賣點就係用廁所做餐廳既主題,而且用相關既食具盛載食物...例如馬桶、尿兜、洗手盆、米田共....好耐之前已經知道台灣有呢個主題餐廳,引入香港咪去試下lor~~

老公要左個招牌馬桶咖哩雞($50):有碗中湯,米田共內係豆乾小食...唔好睇個馬桶好似好大,老公碟咖哩雞其實好淺...味道正正常常喎~

呢個就係我既牛奶鍋($82):收咁貴自然個鍋比老公既咖哩雞深啦...湯底果然好有牛奶味喎,不過入面所有食材就淡茂茂,要靠點醬油或者辣醬先可以食得到碗飯呢~

馬桶入面唔知係咪有野興住d食物,所以食到尾依然熱辣辣...不過我同老公就食到一身汗,冷氣唔夠呢~

咁o岩我同老公個馬桶食具都係黑色,我見其他人有粉紅色又有白色架...而我地坐既亦係真馬桶,個蓋可以揭起添架,檯底係洗手盆呢~~

味道就麻麻,如果為左食好野唔使專登黎,不過想試下d gimmick就可以黎試下呀...我見人地叫既馬桶冰點好大盆(有雪糕同刨冰),起碼4人分食先得,每份$40除開就幾抵...味道如何就唔知,大家不妨試下~

宜家正值試業期間,所以有9折,埋單$118.8,不過只收現金...走時見好多人等位呢,慶幸我地早黎唔使排...不過應該都唔會專登再黎食野勒~~