Caramba Mexican Cantina

前晚守夜食齋,琴日一早6點起身就去爺爺既出殯儀式,之後就上深圳大鵬灣落葬,爺爺可以入土為安啦~之後係小梅沙酒店食解穢酒,舟車勞動番到屋企已經5點鐘...梳洗更衣之後又要出發去九龍灣食做節晚飯~~一連兩餐都係中菜,食物又大同小異,老公同我今日堅決唔再食中餐

琴日咁辛苦,今日決定出走城外享受一頓悠閒午餐~~地點就係遠離煩囂既愉景灣Caramba Mexican Cantina勒

無啦啦點解會出走愉景灣因為今明兩日有免費船票推廣呀(

http://www.watermargin.com.hk/chi/happening.htm, http://www.watermargin.com.hk/edm/coupon.html),我印定2張coupon出黎就可以同老公免費搭船入去勒~~而且之前愉景灣既臨海食肆區水滸坊開幕既時候,我參加佢地既抽獎中左安慰獎,有張$200飲食禮劵同埋2張IFC戲院既禮劵...咁遲早都會入去食一次,就襯今次有免費船票推廣入去食lor

其實我對Zaks既興趣最大,不過張飲食禮劵並非所有餐廳適用,所以最後我決定去試下墨西哥菜~~

我叫左一個Brunch($99),有一杯特色飲品,我地要左Sanrgria,原來酒精極重,唔o岩我啦(我覺得好難飲),老公就ok,不過佢唔鐘意日光日白飲太多酒精既野,所以佢都係飲左半杯咋~~

跟住黎既係corn & jalapeno muffins:呢個muffin好特別,入面除左粟米之外仲有樣野辣辣地既,食類似蛋糕口感既muffin,但係又辣辣地咁,好搞野...不過都幾好味架喎~

brunch既主菜選左huevos rancheros:中文明明見到粟米皮既字樣,點知出黎好似普通早餐咁,香腸煎雙蛋再加d薯仔....原來塊粟米皮舖左係煎雙蛋既下面,不過一d特別之處都無...d腸就類似中國臘腸咁,硬硬地咸咸地,我就麻麻地勒...而薯仔呢亦不太特別....呢個主菜真係普通得滯~~

老公另外叫左個quesadilla chori($72),即係辣肉腸墨西哥薄餅...同我地平時食既pizza唔同,反而係似pizza既餡餅,幾得意...味道唔算辣,唔錯呀~

最後仲叫左個nachos grande($88),係墨西哥特色既粟米片...呢個好好味呢,雖然有好多餡料放面一齊焗,不過d粟米片依然非常香脆,加上新鮮蕃茄粒同埋綠色醬料,真係好正呢~~

除左個brunch既主菜有d失望之外,其他都好滿意...而且老公食得超慢,佢話係呢d環境一定要慢慢享受喎...o岩既,慢慢食慢慢嘆先似出走城外架麻

個brunch最後仲會包tea/coffee既,我地要左tea,慢慢飲,不知幾悠閒...so relax~~

埋單$285,不過扣左張飲食劵,呢餐最後實收只係$85咋...抵抵抵(而且張收據仲可以用黎換船票搭番出去中環架,每$100餐廳消費就可以換1張,不過最多只可以換收據上顯示既人客數目),跟住仲用收據去左換2張船票陣間搭番出去中環呢~~