今日我既晚餐照舊係食之無味既雪糕(脫智慧齒的關係),不過我依然煮左豐富既晚餐~~
因為老公有個朋友上黎,咁我咪做個好老婆煮餐家常便飯招呼老公既朋友啦
為左穩陣起見,我整左3款水準有番咁上下既餸,就係
香茅焗雞翼:我已經掌握到醃料份量,老公個朋友對雞翼讚不絕口,我見佢食左好多呢
呢期菜價貴,所以我都係選擇煮冬瓜炆火腩
最後就係上次既家常豆腐:上次用免治豬肉,今次用免治牛肉一樣咁好味喎~~
老公個朋友仲添飯喎,睇黎今餐無失威,老公又可以係朋友面前認下叻啦,幾有面子...哈哈
2006年8月31日 星期四
脫智慧齒 ~ 完結篇
時間飛逝,今日又係見牙醫既日子啦....
牙醫都事先聲明今次應該比上次痛...噢!驚驚呀
今次打既麻醉針好似比上次多好多喎...手術其間我略略感受到牙醫界開牙肉個一下,好多儀器既"吱吱"聲令我就算感覺唔到痛楚,心理上都覺得好似好痛咁~~經過20分鐘既努力,牙醫話已經成功脫左打橫生既智慧齒啦...牙醫仲讚我好叻無叫痛(我覺得自己好似小朋友睇醫生咁...哈哈),之後就要脫最後一隻啦,雖然呢隻生得好正常,不過比打橫生個隻痛d喎....我諗係因為無落重麻醉藥,我完全感覺到牙醫個種力的表現~~唔知點解我竟然流眼淚(其實又未至於痛到流眼淚個種,真奇怪
)
之後姑娘問我要唔要番隻牙,我照例話要...點知牙醫話隻牙切開左唔完整架啦,叫我唔好要...咁唔要就唔要啦,不過我都睇過佢一眼...原來係要切左個牙冠再脫牙腳架,唔怪之得d"吱吱"聲持續咁耐啦
下星期仲要去拆線先叫大功告成...今次牙醫叫我食既藥比上次仲要多,除左上次既消炎藥之外,仲開左粒超強勁既止痛藥比我,話有效24小時,如果其間都仲覺得痛,仲有幾粒藥可以加強藥力架...搞到我好驚麻醉藥力消散之後個種痛添
,唔知我頂唔頂得住呢
老公番到黎見到我仲話我塊面腫左...死啦,點解我先前唔覺既...好驚呀
2006年8月30日 星期三
溫馨接送
今日放工上船時,老公打黎話佢已經番左屋企,咁我話我都番緊黎啦,叫佢等下....
我落左船之後去左海港城一間做緊半價既廚具店行左一陣(不過都係無買野),之後去左百佳睇下有咩餸買黎整今晚既晚餐....行下行下又買左成一百蚊野,俾錢既時候,老公打黎問點解咁耐都未番
我話去左百佳買餸俾緊錢,宜家番黎架啦~~佢問我d野重唔重,要唔要出黎幫我拎,我話唔使啦(其實都係少少重,用不著要老公特登出黎接我)
咁我行下行下....行到屋企附近既隧道時,抬頭一望,迎面就見到老公向我呢邊走...個傻佬竟然等得太心急,忍唔住落街接我喎
...係個剎那,我個心都覺得幾甜架
跟住我問老公點解落黎接我,佢話驚我拎野太重,番到屋企會哦佢我拎得太辛苦喎
2006年8月29日 星期二
2006年8月28日 星期一
828的晚餐 ~ 三杯雞
今晚煮左兩味餸
首度嘗試既~三杯雞~....老公都話好香,同平時煮既餸唔同味,問我落左d咩添呀如果用沙煲煮相信更有風味.....味道都幾似樣呢
呢個係咖哩貢丸炒粉絲,純粹係見廚房有咩煮咩之下既菜式...粉絲都炒得幾入味呀
發火
一向我個人都好隨和,縱使工作上意見不一,我也保持禮貌
今天的一個電話讓我失去一向的風度,語氣用詞不再客氣...就連同事聽到都顯出驚訝的神情
事源今天老細同大老細要去同某政府高層面談我這個計劃的進展,因此我都知道要準備很多資料給他們!就連該部門的同事也找我給予資料以準備給其上司,這點我是極度明白的,我也樂意配合!一早我已經將相關的資料給予了他們某位同事,不久,又有另一位同事來詢問,雖然我覺得他們內部嚴重缺乏溝通,不過我還是友善的提供答案....
可惜,在我詳細解釋數字反映的情況時,這位同事似明非明的,最後她在向我命令的說:「不用再解釋給我聽了,我只要一個數字,給我就行了!」但是,我們的情況根本不能單純以一個數字去表達,我開始火光了,只說我不能單純給你一個數字...對方的態度開始惡化,向我質問怎麼我們的數字那麼混亂,不能給她答案!!
這下我忍不下去了,就大聲的反駁她
:「什麼混亂,我們一向每月遞交統計數字給你們...你們一直沒有要求那些數字...你問的問題,我亦已給你解答,只是你不明白當中含意....如果你硬要那麼一個數字,我只可以答你我沒有!!!就是那麼多,還有什麼問題?」可能她也料不到我會那麼反駁她,她也不再和我爭辯的就收了線....
這位同事的態度一向不太友善,而且常常咄咄逼人(常常掛在口邊對我說的就是:你是這個計劃的項目經理,你得負責/你得解決...)....我也由她的.....今次,可能因為我還剩2星期的時間就離開這裡,因此也就把不滿的情緒發洩了出來,感覺上她這人真的是欺善怕惡....
我也奇怪自己為什麼會大發脾氣,自己的同事也給嚇了一跳....希望沒有破壞與該部門之後的合作關係,當然我也立即和老細詳述剛才那一段對話,好等我被人投訴,他也知道是什麼一回事....
2006年8月27日 星期日
827的晚餐 ~ 家常豆腐
諗住今日可以休息啦,點知老公去完教堂番黎話帶佢去電腦節行下喎~~
咁我咪即係無得休息,去足四日...仲要空手而回,無他既,雖然價錢真係幾抵,不過買黎又無用,所以齋行lor....
出發之前,我一早已經煲落老火湯:椰子沙參玉竹紅蘿蔔湯...好耐無湯水落肚lu,清潤滋味~~
另外三味餸分別係梅菜蒸肉餅、茄汁肉醬炒蛋同埋家常豆腐
家常豆腐係我既新增食品,煮煮下,老公見到話好似麻婆豆腐,我話如果你想食我就加XO醬落去,於是我就加左D啦,雖然就無麻婆豆腐咁辣,不過我覺得好好味呀,豆腐好滑,加埋D汁撈飯食簡直一流(本來我對呢味餸無特別期望,點知咁驚喜
)...可能因為我鐘意食豆腐啦
826的晚餐
星期六繼續要去會展當值,而老公就要留守屋企,因為今日冷氣機送貨兼安裝
捱到放工直衝番屋企,途中仲要去超市補給物資...入到屋老公話剛剛裝完無耐咋,成屋都係塵,佢要打掃下...我企左2日真係太累啦,想幫老公手都係有心無力....攤下攤下又成7點幾,本來都諗住煮飯煲湯,不過好似好煩咁,結果我都係煮意粉算數,講真,我係鐘意整西餐多過中餐
今日再接再厲都係焗意粉,為左唔想又係椰汁,我決定加d咖哩粉,咁就成為
芝士焗椰汁咖哩雞意粉:我知老公唔食得辣,所以好輕手,都係見到d顏色就算數,今日我特登整多左汁(因為老公上次話佢鐘意多汁麻),佢就話今日呢個汁就perfect啦,不過我自己反而鐘意之前個隻creamy d既效果...
另外兜左幾粒蜜糖炒貢丸,好bbq風味呢
2006年8月25日 星期五
疲累‧偷懶
今日都幾疲累,一早番擋口....企、企、企......隻腳都幾甘(雖然已經著波鞋)
點知就黎放食晏時,老細打黎叫我出去開午餐會議...oh my god...點解唔放我一馬呀!
雖然餐飯老細請都係咁話.....到左3點半交更,我仲要番公司繼續做...於是就將我琴晚整個批叮熱請同事試下當下午茶~~嘩,番叮之下個批都依然好香喎....同事都話好味道,仲問我有無食譜添(中午既時候,老公打黎匯報都話個批好好味),我自己都試左少少,係唔錯呢
開心過後,老細又有命令話星期一大老細去開會要準備figure,時為5點半(放工啦喎)....唯有趕埋佢啦,結果今日一樣8點先番到屋企
可能琴日連氣整左2款食物,今日真係想休息下....所以今日停產叫外賣是也~~
訂閱：
文章 (Atom)