今日又要開OT啦,因為要趕起本Annual Report...今日仲要係sign off既日子,點知老闆要早走,要我留守仲話由我sign off就可以啦...唔係呀,咁重要既Annual Report俾我sign off,有咩事我就大煲啦
對到眼都花埋,最後8點幾先番到屋企(其實都算快架啦,幾驚要做到11點呀
)
番到屋企都唔係好夠時間煮飯食,老公話煮個麪就算...不過我琴日買左雞扒,所以都想煮左佢做餸...今日唔想用中式醃法黎煮,所以決定用西式方法去醃,用檸檬汁,rosemary,黑椒,胡椒粉同少少橄欖油...唔使落油就咁落鑊煎,味道唔錯好清新,仲好香添喎...配碗出前一丁,飽晒....9點幾就食完啦,幾快
由新年至今,已經好多日無正式煮過晚餐啦...雖然今日要OT,自己又攰攰地...不過一諗起老公接近一個星期無飯盒帶番工,雪櫃碟賀年菜仲未食晒...我就決定要煮飯勒~~
今日新登場既菜式係
油豆腐粉絲湯:見到朱太整我又學人整啦
,我同老公都好鐘意食呢個餸架,又可以當湯飲,又有餸食,一舉兩得~~味道真係幾似係街食架喎
蒜茸白菜炒羊肉片:老公剛剛病愈,點都要煮碟菜俾佢食下...今次叫左老公摘菜,因為我想慳多d時間...有佢幫手點都會快d開飯~~
百花蜜煎雞翼:其實咪即係蜜糖煎雞翼lor,好好味呀~~
初九晚係小學同學既開年飯,今日唔算好多人,因為搞手都唔得閒打晒所有電話...無辦法啦,大家都忙於工作,不過都有9位出現,成績唔錯架啦~~
其中一位已經係失去聯絡10多年了,前幾日俾其中一位同學係街撞番寫低番個contact咋...我地好眼利啦,咁耐無見都認得番,仲要記得個中文名先勁呀~~呢位同學係美國工作,工作性質要周圍飛,有時都會飛番香港,佢聽日又要番去美國架啦...話時話,我地呢班小學同學真係遍佈世界各地,但係一個疊一個都可以約到大半班同學仔,都好厲害下
小學同學都係港島區人士,我當然就下大家啦,訂左係cwb泉章居八點半...雖然我呢排趕工要OT,不過我都番左娘家探下媽咪先再坐叮叮去食飯...好耐無坐叮叮啦,又可以懷舊下...哈哈
至於大肚同學已經於2月2日誕下左佢第2位公子啦,恭喜晒
...由於未坐完月就出席唔到啦,不過都有佢細妹黎,仲俾左BB相我地睇添喎~~
又過左愉快既一晚
呢個新年日日都有朋友上黎屋企拜年,後來又病左要係屋企休息,真係好想出去呼吸下其他地方既空氣~~
今日終於衝出吳家啦,直達火炭...之唔係每年一度去賀教授屋企拜年既日子lor
呢個係我地新亞書院ECONNA莊員既優良傳統,每一屆既莊員由大學一年級開始每逢新年就會上賀教授屋企團拜,好熱鬧架
...我年年都出席架,就算我地既莊員結婚,個個都一定會請賀教授去飲架~~呢個傳統係我地個系只係得新亞將之薪火相傳...我班同學仔個個都係金融界忙人,平時都好難約出黎...唯獨呢個聚會,大家一定自動自覺預留一日上教授屋企拜年...今日真係好開心
已經放低晒既經濟理論,每年一到呢個聚會就要拎番出黎講下...好似每年都要溫一次書咁...個感覺真係好搞野架...不過又好開心喎,好似回到讀大學既日子~~教授都已經退左休啦,我地都大個啦...時間真係過得好快
今日仲聽到好多好消息,我地既莊員"猩猩王",佢太太有左3個月啦....恭喜恭喜,下年拜年時可以見到BB啦~~另外我地既"小白馬王子"今年11月會成家立室啦...我已經mark低左日子啦~~
11點開始飲茶,食下傾下,不經不覺又已經2點半...真係快樂不知時日過~~而sally姐同阿雪就上我屋企坐下,順便玩下部Wii...之後仲同佢地去左富田食晚飯黎個深情對話,我地真係好耐都無好好咁傾計啦...不得不說多句"我今日真係好開心~~"
而老公今日就約左佢班同事去唱K,再直落去食泰國野...一樣咁節目豐富~~
琴晚師兄C上黎之前買左包特價$2既龍蝦味燒賣當小食都未post相添,係度post番,有成12粒架...好抵
老公食左一日藥,好番好多啦,起碼有番小小胃口想食野...所以今日既午餐我就整左老公至愛既椰汁焗雞~~
屋企無意粉,得包長通粉,所以今次就配長通粉成為呢個芝士椰汁焗雞球長通粉勒
自家制既好處就係足料成本低...食得好飽呀
老公今日請左病假,我因為公司有野趕,所以無可奈何之下都要番工...陪唔到老公休息添~~
老公睇左醫生休息左一日,精神好好多啦...佢約左班舊同事食晚飯都依然可以赴約,而我就約左師兄C及同學V(我係佢地既媒人啊)上黎打Wii見下面~~
哈哈,又多2位加入我個Mii廣場啦...玩到9點覺得肚餓就去左老趙食野,食完再繼續打...玩到11點幾先走呀~~難得師兄C又再請我食飯,我真係太鐘意d師兄啦...佢地都好自發咁請我食野,真係太錫我呢個師妹啦~~
所以話呢,都係識多d師兄著數d...點解同輩既男性朋友唔會主動請我食飯既呢
~~師弟就更加唔會啦,乘機屈我請就會
不過咁,我都請佢地飲左我個煲吳家靚湯(我見老公唔係幾舒服,所以放工之後買料煲老火湯...等佢今晚食完飯番黎有得飲)...今次係木瓜雞腳瘦肉湯,師兄C都話好味道...仲叫同學V飲多d,話木瓜補喎
除此之外,我仲派左利是俾佢地,希望好快就輪到佢地派啦...師兄C話佢竟然要收我封利是真係太唔應該啦...既然你咁講,我就祝你快d成家立室啦
年初二就輪到番娘家拜年,仲約左舅父、三伯父一家四口一齊去飲茶...之後上左娘家屋企坐左一陣,大家就出發去我屋企啦...因為大家想玩Wii呀麻
勁呀,爸爸媽媽都玩得好開心...連好固板既舅父都肯玩保齡,佢地三個玩保齡好勁呀...仲叻過我地三姊妹,真係百思不得其解我老公話佢地個年代最興就係玩保齡,所以玩得咁好喎...而我幫爸爸媽媽整既Mii樣,連佢地都話似,兩個細妹都話好似呀...不過我都係覺得爸爸個Mii似d,一睇到爸爸個Mii就想笑...除左玩Wii,老公之前買落既board game都大派用場...大家都話好玩添
玩下玩下...成凌晨一點鐘先肯走呀~~所以今朝既午餐繼續係煎年糕同蘿蔔糕,不過加多味媽媽琴日拎俾我既招牌賀年菜 ~「發財豬手」,真係得新年先有得食架,好好味呢
大年初一梗係要番老爺99到拜年啦,我地俾左5位數既利是99呀
,肉赤死我啦
今年99無俾利是我地喎,不過就俾左隻鑽石手鈪...於是今日就帶住呢隻鑽石手鈪去拜年啦~~99真係新潮啦,用鑽飾代利是...不過老公就無份分享啦
之後去左爺爺到拜年,唔知點解老爺掛住瞓覺唔去喎...之後再去姑丈屋企,食埋晚飯先番屋企...雖然結左婚,不過亦有長輩照舊派利是,今日都有10封收獲....當係幫補番少少咁啦
我老公同佢家姐一見面就互串,仲燒埋我個疊...好大聲同我老公講"你老婆都肥左好多喎"...你地互串唔好拉其他人落水呀麻...無啦啦話我肥,我好hurt架
