除左澳洲牛奶公司之外,老公都好鐘意去深水埗既維記食豬潤麫架~~
星期六老公話好耐無去食,於是就去滿足下佢既口腹之慾~~去到見佢3個舖位都排晒長龍,不過專登黎食就照排啦~~好彩流量快,都係等左一陣o者~~我地其實唔好豬潤,不過佢既豬潤湯底真係好唔錯,老公仲好鐘意佢煎既餐肉,所以就叫左個餐牛麪,而我就要左蛋牛通(各$20)....好大碗架,唔係好肚餓都未必食得晒~~不過我每次都飲好多豬潤湯架
...另外佢地既自制咖央都好唔錯架,所以老公再叫左個咖央西多($10),食得好滿足呢~~
至於是日既晚餐,老公話想去好時沙爹食佢另一至愛既海南雞飯($35)喎~~好時既海南雞的確係好滑又有雞味,我覺得比泰國水門街既更好...不過個湯就無水門街既出色~~
我見次次都食海南雞,今次我就試下佢既叻沙($30),都唔差呀~~佢旺到d 檯擺晒出去走廊呀,不過佢真係好味得黎又抵食,唔怪之得愈做愈旺啦~~
我都好鍾意去「維記」架, 妳搞到我好掛住佢個 潤牛麪 呀 !!
回覆刪除[版主回覆11/12/2007 22:43:00]咁你快d去食番碗啦~
維記o既豬潤麵好多豬潤，食完會好飽，不過又真係好好食呀！
回覆刪除好時係邊o架！你碗叻沙好似好正o甘，好想試呀！
[版主回覆11/12/2007 22:43:00]好時就係尖東既好時中心入面,搭一層扶手梯,間舖係角落位架,唔知可以問管理員~~好味又抵食,推介呢~~
呢兩日都係我想試而又無去過o既~~
回覆刪除最主要係老公唔多願排隊
[版主回覆11/12/2007 22:41:00]維記個日都好長龍架,不過好在排得快,10分鐘左右啦....至於好時呢,2個人唔使等太耐,如果多人就要耐d...搵日去試下啦,真係幾好味架~~
你地講到咁好食，但係個賣相真係差少少喎，而且喺深水埗添，如果我叫老公去，容乜易佢又迫我返99度架 ，no way la.......
回覆刪除[版主回覆11/13/2007 20:15:00]豬潤湯係好多呢d灰泡架,所以d麪賣相就差d lor~~
既然係咁,你就唔好要老公陪你去食啦,搵我地呢班fd同你去啦
我去食過啦~ 我覺得味道一般啫, 豬潤煮得太熟, 而且好鞋口, 冇晒鮮味
回覆刪除我自己都經常買豬潤滾下佢黎食~ 所以我覺得麻麻
[版主回覆11/14/2007 21:00:00]我都唔好豬潤,係欣賞佢個湯底咋~~
維記既潤牛麵同咖央多，加埋好時沙嗲既海南雞飯都係我好鍾意既美食呀！
回覆刪除[版主回覆11/18/2007 01:52:00]咁睇黎你同我老公既口味都好相似喎~~
係呀！鐵男同你老公的口味都幾似0架，仲要唔鍾意食菜添！ 我唔鍾意食豬潤，所以唔欣賞個湯底，0架央多就真的不錯呢！咁當然赤柱那間更精彩啦，不過深水步咁近我屋企好值得捧場。
回覆刪除[版主回覆11/19/2007 21:16:00]我老公都食好多菜既,不過係無肉不歡lor~~
赤柱邊度有好味既咖央食呀?
係赤柱0既「泗益」呀，0架央西多($13)香噴噴，質地鬆軟，一咬落去，0架央好似爆出0黎咁，正！不過係油膩左少少，自己落少D牛油就冇問題。雖然我唔鐘意飲奶茶冇試，但嗅到咁香濃的茶味，應該不錯！
回覆刪除黃昏五、六點就關門喇，在赤柱全新室內運動場對面。
[版主回覆11/19/2007 23:53:00]啊,有印象,好似係你個blog睇過~~
奶茶我都鐘意架,不過怕肥已經飲少左好多啦,不過久唔久都會飲番杯架~~下次入赤柱等我去試下先得~~