合家歡曼谷遊 ~ 高卡車大戰 Day 3.5

今晚另一個重點節目就係去ptt Speed Way玩室內高卡車勒~~

出發前屋企人已經話唔鐘意去觀光景點,所以皇宮呢d唔使列入行程….最好就係有齊吃喝玩樂…於是我問大家有無興趣去玩高卡車,大家即時舉手贊成,阿媽仲大叫好添喎~~

曼谷有2個高卡車場,一個室內一個室外,我當然選擇室內啦,唔使曬到變黑豬麻~~我上左ptt Speed Way既網頁睇,發現平日夜晚7至9係特價時段,所以就定左呢晚黎一場高卡車大戰勒~

因為塞車既關係,去到ptt Speed Way既所在地RCA商場已經進入左優惠時段,職員話宜家既優惠係買一送一,即係用一圈既價錢可以玩2個圈,同網頁上既優惠唔同左啦~~我地都係揸160cc既,大家要簽張聲明先,然後就有locker俾我地放私人物品,跟住就落去帶頭盔聽講解~~如果大家鐘意既話,其實可以換埋套賽車手衫架,不過我地連帶頭盔都論論盡盡,搞左好耐先可以聽講解呢~大戰前就當然要黎將大合照啦……

出賽啦,我地睇下電腦分配左幾多號既高卡車然後就對號入座勒(賽道上真係得我地一家人架咋)~~我架10號車係第一架呢~~初初以為玩一圈好快就完,點知原來一圈既定義係玩幾分鐘(我都唔知有幾多分鐘),我地賽左好多個圈呢~~第一圈只有老公爬左我頭,我當然力追啦,咁o岩細妹同阿爸架車又係前面喎,搞到出現撞車情況,細妹話我撞得佢好痛喎,之後係咁話我呀~~玩完啦,雙手因為揸左咁耐開始出現手震情況,我地坐左一陣就諗住拎番d野走啦…點知櫃檯職員話我地仲有一round未玩喎….下,原來仲有架,阿媽已經無力玩啦,於是佢去左觀眾席睇我地繼續大戰~~

呢一round係第一個彎位就出事啦,轉彎時細細妹係旁邊想爬頭喎,咁我又轉緊彎咪夾住左佢架車lor,於是佢架車就自轉左一圈啦…後面老公,阿爸同細妹佢地話好驚即刻收油喎,結果玩完出黎又俾細細妹話我衰啦,唉,無辜呀,關我咩事喎,唔夠位唔好過呀麻,又入我數~~第2 round 時我已經無咩手力啦,所以成績比第一圈差呢~~兩個圈都係老公第一名呀~~

我地好奇怪點解揸左幾十年車既阿爸成績咁差,阿爸話我地個個唔識死,一落場就係咁衝,佢都費事同我地爭~~仲話佢玩左半個圈先開始掌握到玩高卡車既技巧喎~~睇黎玩高卡車同識唔識揸車係無關係呢….哈哈哈~~

呢場高卡車大戰只係每人HK$90咋,都幾抵玩架~~

http://www.kartingstadium.com/thai_version/homepage.php