我今日唔係去Disneyland玩而係去工作,因為今日係去拍外景...無錯,原本放假既日子都變左返工,仲要係早上七點幾去到集合
,都咪話唔辛苦~~
不過我之前都無去過Disneyland,於是都帶左部相機影下野...架列車同月台果然幾靚喎!
因為係去做野,所以有幸從職員通道進入,深入夢幻背後不為人知既後台風光~~睇到佢個龐大服裝間,真係大得好誇張呀
我地要拍既就係呢個太空飛碟勒...我仲要客串扮玩添...不過我相信一定影唔到我
另一個拍攝點係馳車天地...其實佢既機動遊戲真係吸引力唔大,都係適合小朋友去...睇黎都係疊埋心水等佢開埋第二期先同老公去玩啦
一大早未有人,等我同巴斯光年影番張相先~~
下畫既外景就係宏偉既青馬大橋勒,仲了解到背後複雜既監察系統...其實好多野真係唔好睇表面以為理所當然...背後實在有好多不為人知既辛酸架...今日又見識多左啦
上一回講到我排左個歌手次序表約檔期,老闆對個名單無特別問題,佢話信我喎~~
今日同電台開會,電台同事話已經就我個名單開始約緊歌手,點知老闆突然問左一個令人滴汗既問題
「邊個係側田呀?」
下,點答呢...在坐人士靜默左片刻,同時茶水阿姐剛剛送我地叫左既飲品入黎,又聽到老闆問呢條問題...茶水阿姐果然天不怕地不怕...忍唔住笑左出黎
老闆問阿姐「你都識呀?」
阿姐答「側田好hit架喎」
多謝茶水阿姐幫我地行左第一步...於是我地紛紛形容俾老闆聽「時時都帶住cap帽既呢」,「有無睇同千嬅拍既KFC廣告呀」....老闆都估唔到,再問多個爆笑問題「側田係男淨係女?」我地唯有答係男啦
最後有人話側田係由英文名Justin繹既,老闆聽到Justin頓時恍然大悟咁「啊」左一聲...唔知老闆係咪真係知呢??又點解要講英文名先知呢?
今日6點9先離開公司,點知巴士又塞車,期間老公打黎問幾點番到去,仲話我咁辛苦,不如叫外賣食~~不過,叫外賣好似好肥膩,而且聽晚唔煮飯,所以我都想今晚照舊煮野食
真係太塞車啦,我係理工個站就落車算啦...行番屋企,一來當做運動,二來順路去超市買餸...今晚餐飯用左三十大元咋
粟米湯:雖然係罐頭貨色,不過我一向都鐘意飲...當然唔落蛋花就唔好味架啦
黑椒煎雞扒:幾惹味呢~~
肥牛貢丸粉絲煲:用左豬骨湯做湯底,老公話d粉絲索晒味道,好好食喎
呢d最好整又飽肚,o岩晒懶惰既我
仲加多碟冷盤:黑椒火腿腸...留左兩盒便當,其他都清晒架!好過叫外賣啦!
經過一星期既工作蜜月期,我老闆已經開始不繼將工作全權交低俾我啦...好忙好混亂添...因為實在太多火頭,邊個打邊個都唔係太記得...所以已經唔可以準時收工啦
不過我都唔會太夜收工,因為有頭家,我堅持要番屋企煮飯....不過宜家轉左搭巴士番屋企,由於個站係屋企對面,去買餸實在係唔順路...於是我都係將之前係超市掃落既貨拎黎煮算啦
今日就整左帶子蛋白炒飯,d蛋白好似唔係好明顯,因為我落左老抽上左色呢~~老公話好食呢我都覺得唔錯!
今日老公用埋我地剩餘既唯一一張燒肉卡換左$50燒肉做餸,另外我就整左香茅雞翼同冬瓜湯~~
另外仲煎左4隻荷包蛋,其實我好少煎荷包蛋,既,而且老公鐘意食太陽蛋...好在都煎得幾靚,而熟晒個隻係煎俾自己食既~~嘻嘻
今日休息唔煮飯,近近地同老公再去富田食晚餐,除左指定既三文魚壽司之外,今次試左3樣食品:
忌廉粟米薯餅($25):熱辣辣,味道都唔錯
魚生拉麪沙律($35):老公話唔想食飯,呢個拉麪沙律凍凍地幾開胃,而且份量好多呀...幾抵呢...魚生都唔算少呀,只係個麻醬咸左些少~~
另外仲叫左牛尾鍋($38):好香喎,牛尾都炆得幾淋,個汁既味道都唔錯...我同老公都覺得個汁好o岩撈飯食呢~~
上星期見勞太成功制作左好可愛既Hello Kitty冰皮月餅,我即晚放工就去7-11買呢個DIY package啦,$49可以整4個,都幾抵喎(本來之前我都諗住去買材料自制月餅架,套裝咁買都要成一百七十幾,好在多得勞太介紹,慳左唔少)
盒內既工具同材料,個月餅模連老公都話靚呀!仲可以留番個模整其他食物,正
跟住教法,好小心咁整左成半個鐘,終於都整好啦~~
除左第一個入模既月餅hello kitty樣比較模糊之外,其他都整得唔錯
放入食物盒,可以用黎送禮都得呢我呢個係白蓮蓉餡,另外仲有豆沙同抹茶餡賣架...想拎2個俾屋企人食,特別係細妹好鐘意Hello Kitty,佢見到一定會尖叫....哈哈
雪左一陣老公拎左個黎食,味道都唔錯喎,不過老公話如果個冰皮再薄d會仲好,我都試左幾啖,個冰皮幾有咬口,煙煙韌韌
而且瞬息萬變...呢一分鐘收到呢個消息,下一分鐘已經可能係另一回事~~
