0409 ~ 老公同學聚會

話咁快又黎到假期既最後一日,本來今日無節目諗住休息下既點知老公既朋友打黎約會,咁又上左黎吳家玩wii啦~~

相信吳家都已經成為左wii既試玩天地,我同老公隻手既酸軟程度相當嚴重...及後我地轉戰四方城,不過只係玩左2舖,我第一舖就食出左,仲要係槓上自模呀,yeah~~

晚餐決定去富田解決,叫左好多野食呀,我推介滑蛋雜錦粥,非常足料而且味道好,正~~我地仲有叫魚生冷麪沙律、串燒拼盤、三文魚壽司x5、腐皮壽司x2、長蟹腳壽司x1、咖哩豬扒石鍋飯、火龍卷、和風牛肉卷、清酒煮大蜆...好飽呀~~人均消費$91,都唔算貴呀,而且老公既朋友請客,真係多謝晒

原來東亞信用卡係富田有9折優惠架,不過我地無人有帶係身,等我得閒申請張旁身先~~今日可以儲到3個印花,宜家有6個印花啦,下次黎食可以送碟金龍卷,唔知5月中之前我可唔可以儲到15個印花換VIP卡呢

雖然咁飽,我地依然再去松記食糖水,好多人呀,不過排左一陣就有位勒...我試左個新既甜品,就係CK酥~~,味道都算OK,不過好大舊,我真係食唔晒一個,最後要老公包底呢

放假既日子總是太短,明天又要返工啦,都係時候收拾心情,聽日又要早d起身先得啦