板前壽司

老公話想試下板前壽司,我見佢生日餐飯都唔係食得好貴,所以決定係佢今個生日週既最後一日去食...我地去左旺角家樂坊個間,7點去到拎籌係45...當時叫到351,叫到400先會由頭再叫...真係好誇張,於是我地就去行下街街先~~

終於8點9可以坐低叫野食啦...我地都叫得好豪下架:

火炙A5和牛壽司($30):呢個價錢係得1件架咋...出面一個快餐都係講緊$30咋喎...不過又真係好好味,係我老公既推介

馬肉壽司($30):都係一件既價錢,見無咩地方有得食就叫黎試下,老公咬唔開,所以就分唔到一半俾我試,不過老公話唔係太特別...唔試都無所謂喎

鵝肝壽司($25):呢個係我既心水推介,鵝肝煎得好甘香,估唔到配壽司食都好夾

火炙海鰻芝士壽司($25):好味呀...老公見個賣相幾靚,唔鐘意食魚既佢都話試下,食完佢都讚好味

薯煙豚肉芝士壽司($20):呢舊豚肉比較肥,老公就覺得似煙肉多d

意式鴨胸壽司($18):呢個都算ok

軟殼蟹卷($20):都唔錯~

海老箱押壽司($25):我好似係第一次食箱押壽司,都ok呀

親子卷($20):呢個老公食既,我覺得佢既外形好似花之戀,不過d魚子就係大粒個隻

玉子壽司,三文魚壽($9):雖然係最平凡既壽司,不過都好好味...d玉子整得好靚呀,好甜呢~~

豚肉壽司($12):呢個雖然平喎,不過我覺得幾好味~

奶油薯餅($12):都幾奶油架...外面好脆,不過一夾就會爛架啦

食得好飽呀...等左咁耐,所以點都要食個零鐘先走...埋單$276...好少食壽司食得咁貴架,不過又真係好好味喎,唔怪得咁多人排隊啦