今日老公打俾我話佢細佬有個朋友要搵神秘顧客,會俾$200拎去食飯,食完填番張問卷就可以架啦~~
咁筍梗係去啦,原來係去佐敦間麻酸樂試食,於是我同老公加埋細佬同奶奶就一齊去試啦~~我同老公食過一次,個時都只係得米線食架咋...宜家有埋西餐食喎~~
除左99叫左碗米線之外,我地3個都叫左佢個自選晚餐($58),佢地兩兄弟都要左牛扒做主菜,而我就叫左個芝士千島汁牛油果焗海鮮飯,除左餐湯麪包,仲有頭盤(我:芝士焗生蠔、老公:三文魚刺生、細佬:雞肉串燒),餐飲同埋芒果芝士餅~~
以呢個價錢,味道都算過得去,食物亦夠熱辣辣~~之不過環境就比較迫,但係扣除左$200津貼,實際上我地只係俾左$26,除開每人唔使$7....仲要填一份問卷就夠啦,而細佬話佢會搞點,咁基本上我地唔使做任何野就可以食左餐好豐富既晚餐勒...真係好抵呢
前幾日係鐵男個blog睇到佢介紹Mario strikers charged football呢個新遊戲,今日我就同老公提起,老公傻傻下仲話唔係6月先出咩...於是佢今日就即刻去睇game啦...仲買左呢2個game添~~
睇黎好似幾好玩咁喎...等我老公研究好教我玩先得
今日放天繼續去sogo超市入貨,買左勞太推薦既洋蔥蜆肉醬汁,另外見到款和風香菇醬又要左一包...之後見到有天使麪又買左包,平時係普通超市都唔覺眼有得買~~其他都係d方便食物,例如老公鐘意既味o曾湯底拉麪、鹽味雞串、豬肉腸、信州金菇同埋即食意粉....今日呢到平d,$110仲有找,慳左$50架
本來一心都係想煮意粉做晚餐既,不過諗番真係好耐無煮過家常便飯啦...結果好勉強咁將雪櫃既雪藏雞翼、雪藏豬頸肉同埋琴日買既辣味腸整左三味餸~~
豆豉雞翼:豆豉炒雞球就整過,用黎做雞翼就係第一次...老公話好入味,好好食喎~
XO醬炒豬頸肉:豬頸肉比豬扒就真係易煮好多,味道都唔錯~~
辣味腸炒菠菜:呢款辣味腸都真係幾辣,我就當然無問題啦,不過老公就話辣左少少...哈哈哈~~
雖然無湯,不過今餐都算係咁啦,好耐都無食飯啦
老公見我買左佢鐘意食既珍寶腸不知幾開心,仲問今晚係咪食熱狗~~我本來無預到整熱狗架,不過見老公咁興致勃勃就改整熱狗做晚餐~~
老公仲自動請纓話落街買熱狗飽,可見佢係幾咁想食
今次開左香草味同芝士味...老公話兩款都好好味,比上次係吉之島買既更加好味呢~~食完兩大個熱狗,真係飽到上心口呀~~
係sogo週年慶完結之前,我今日放工再去左sogo超市入貨...以上係我既戰利品~~
日清麻油2枝:屋企枝麻油剛剛用完,日清麻油一向都係好評如潮既...平時一枝都要$28.8,今日$27就有2枝啦~~抵~~
日本BB蛋黃醬:呢款蛋黃醬都好多人用既,平時賣$29.8架...今日只係$18,所以又買定遲d試下~~
Johnsonville珍寶腸:老公極愛食珍寶腸,上次係吉之島買既已經話好好味...我見平時呢款腸賣成$50一包,今次減到$36真係好抵...老公又鐘意食,於是買左3款味,分別係芝士、香草同埋辣味~~
咖哩烏冬:烏冬亦係老公既心頭好,雖然只係平左3蚊唔算多,不過都買一包試下~~
口辛咖哩:見日式咖哩醬特價$10就買一包放係廚房看門口~~
日清意粉醬:平時一包意粉醬賣成$17咁貴,所以我都唔會買既...不過今次見到特價$11,就買一包試下啦
用埋sogo visa之後,就係超市使左成$178啦...張單仲寫住慳左成一百蚊架~~不過我仲想去多次掃貨呢
星期二去唔成食高級餐廳,不過我見原來King Ludwig德國餐廳係有tea buffet既,每人$98+10%,唔算好貴...於是決定今日同老公去呢到食tea buffet..本來出發前諗住上網查清楚係尖東邊度,點知老公話佢知喎...結果當然係唔知係邊啦...好在我見好友茹時之前食過,就打去問佢...唔係都唔知幾時先有得食~~
2點3去到都已經有人食緊啦,我地就被安排係裡面既4人大檯...我個人覺得都幾多野食喎,佢出名既德國咸豬手都有得食,我覺得整得好香脆,唔錯唔錯~~德國腸就有兩款,其中一款係芝士腸,好味道呢
佢既甜品亦唔錯,仲有即叫即煮意粉,蝴蝶粉我平時都好少食呢,亦有南瓜忌廉湯,頭盤沙律,連雪糕都有呢~~每人仲有一杯飲品架...我同老公慢慢食,食到成4點幾先走...我決定今晚唔會食晚餐啦,因為真係好飽啦~~
對我黎講,呢度既tea buffet都好唔錯....食物款式亦唔算少,一百蚊其實都算抵呀...大家可以考慮去試下~~
天氣熱辣辣,我同老公都唔想出街...本來都諗過叫外賣,不過又唔知食咩...最後都係決定煮意粉,好似食左好多餐意粉,不過唔緊要啦,改下個煮法又當新野食~~
所以今次首次用白酒炒,唔錯喎...仲炒得幾乾身呢,同平時煮既意粉唔同味,好食呀
上次聚會時我病病地,難得Joey媽忙於湊女都相約上黎玩,真係開心勒~~
原來湊小朋友真係幾攰架喎..基本上真係每一秒都要睇住佢,望少一眼都驚佢會有意外
其實Joey妹妹都真係一個好乖既小朋友,又聰明...其實我都幾羨慕Joey媽...如果我第日有個咁叻咁可愛既女就好啦
佢仲不斷叫阿媽睇添呀~~我終於都明白點解做左人媽媽就無時間同朋友聚會啦...Joey妹妹,你要繼續咁乖呀~~
今晚既派對完滿結束,就紀錄番今日既美食啦
今日有三款食品係第一次整既,分別係
吞拿魚酥皮盒: 都叫成功啦,不過同一隻酥皮,但係無上次個酥皮撻升得咁靚喎~~
咕嚕釀豆卜:呢個都叫唔錯,其實魚肉釀豆卜細細個已經有幫阿媽整架啦,不過今次我係反轉左豆卜黎釀既,不過睇黎大家唔係好食得出個分別...而個咕嚕汁都算ok啦
雙色o者喱杯:呢個好成功呀,Joey妹妹第一次食o者喱咋
,佢似乎好鐘意食呢~~底層係芒果味,上層係士多啤梨味...唔錯唔錯
中途就係親子廚房環節,Joey妹妹落手落腳整架,仲帶左盒番屋企俾爸爸試下佢既手勢呢~~3對手一齊包好好玩,好快就包好晒啦...應該包左3打粟米燒賣呀
為求快捷再黎檸檬雞翼,不過老公話唔夠上次甜喎,不過無左上次既苦味,我覺得ok喎~~
仲有就係由茹時出手既麪包布丁啦...好受歡迎呢...Joey媽同佢個女食唔停口喎,其實咁易整,真係考慮下買個焗爐整黎食啦
其實仲有好大兜沙律同埋白果腐竹糖水,不過無影低佢...今日就係有呢d野食啦
收到sogo週年慶單張細閱後實在不得了,很多東西也很抵呢
本來今個月想忍手唔買野,等我可以留番d彈藥去北海道時先放血...HABA已經係北海道之旅既必買品(因為之前試過White Lady真係一試難忘,所以想買好耐架啦),點知今次Sogo出左呢套超抵套裝
SL保濕緊膚精華液 - 33ml
White Lady全效修護精華 - 30ml
傳說II細胞更新修護精華 - 10ml
現售$590(原價$1090)...我計過架啦,就算比係北海道買都仲要平大約$130,咁呢條數咁淺,我無理由唔宜家買架...而且呢set野又剛好可以係尖沙咀買,方便晒我啦~~仲要個sales俾多枝G lotion既sample我呢~~唔止喎,我有sogo visa仲再可以95折,實際都係$560.5咋
其實我仲睇中左RMK粉底套裝,Dior眼部抗皺套裝,不過都係銅鑼灣先有...所以就未買勒,不過我諗都係買唔到架啦,因為係限量呢,今日應該都俾人買晒啦~~唔緊要啦,等我去旅行先再買啦
今日係Sogo一年一度既週年慶開始之日,我睇左份宣傳單張之後就好想去買野勒...因為真係好抵呢~~
咁我去尖沙咀sogo就比較方便,今日就係sogo超市買左兩樣野...其實主角係呢個人蔘雞湯包,因為之前老公見過已經想買,不過個時未有特價,我覺得貴所以無買到...見到sogo大減價,今日$97就有3大包(3包原價$209.7架),一包內有一隻雞架...買緊隊既時間見到好多人買呢個博多即食麪,5包裝特價$19.9,所以順手拎埋...其實仲有好多野想買,不過3包人蔘雞湯包已經好鬼重,所以就收手...第日再去入貨~~
番到屋企叫老公幫手開一包加少少水煲滾佢,再落埋雪櫃包雲吞做人蔘雲吞雞湯當晚餐...而我就仲要趕去街市買野準備明天聚會既美食~~
為起今餐都係三十幾蚊,味道唔錯架,而且隻雞入面都有d飯架,真係有d似係韓國食既人蔘雞...老公話想拎包俾佢阿媽試添喎...大家不妨去買黎試下~~
今日本來唔打算煮飯既,因為見HSBC滋味星期二既半價食肆優惠就黎完,就諗住同老公搵番間平時好少機會會去食既貴價餐廳食下...其實都選定左去邊間架啦,點知老公遲遲都唔出門口...等多幾等,我就問老公係咪唔想郁呀...其實唔想郁,留係屋企都可以煮到野食既...點知,老公打蛇槌棍上即刻就話唔出去喎...咁我唯有將雪櫃僅餘既食材拎黎煮啦~~
煮得白汁多就改下個汁啦,雖然無蕃茄又唔想開罐茄醬,不過就咁用茄汁味道都ok喎...我再落左少少紅酒,效果唔錯呢...老公都話好味道,仲食左兩大碟...搞到我留得一個便當咋
