泰式廚房午餐 + 老富昌下午茶

今日去左銀行入錢先,點知俾部存錢妥機激親,佢食左我d錢之後話故障喎,唔俾番d錢我,將存根又只係寫住$0~~激氣呀,去銀行報又要我排隊等填表,有無搞錯呀....宜家係你地部機有問題食左我d錢,仲要我等~~我當然嘈啦,起碼你都俾我一路排一路填啦...仲要星期一先可以開部機查喎...我決定左會寫信去投訴架啦,真係唔好以為我好好人

咁嬲當然要食番餐豐富既午餐補數啦,於是同老公去左厚福街一間新開既泰國餐廳《泰式廚房》,裝修到一間泰式小木屋咁,細細間都有d迫架,不過午餐唔貴,都係$38 - $45不等,仲有跟飲品~~

我要左個炭燒豬頸肉飯(跟咖哩汁)+一罐忌廉($38):好多炭燒豬頸肉呀,份量十足,而且都燒得唔錯...咖哩汁好微辣不過都好味,仲有粒粒薯仔同椒粒咁,都幾好味呀~

老公要左個泰式濕炒牛河+熱利賓立($38):老公呢個都好豐富,份量亦唔少,其實我地係大家share食既...好鬼飽呢~~

食完午餐,老公問左朋友借旅行日語既書,去北海道講日文就靠佢lu...跟住老公陪我做c9野~~搞點左就去行街,行到實在好勊啦...所以忍唔住想搵間野坐低,咁就去左坐得舒適,食得招積,價錢超值既老富昌勒

由於唔係好肚餓,所以我同老公都係叫最平既tea set,不過大家見加凍飲要成$8,飲湯都係加$10,所以我地都決定飲湯:

老公要左西多士+蕃茄雜菜湯($24):個西多士整得好靚呢,不過我就無食到...而個湯都幾好味~

我要左三色多士(吞拿魚沙律、蕃茄他他醬、煙三文魚)+忌廉湯($32):我覺得三款多士都好好味,味道清新又健康...而個忌廉湯一飲就停唔到添...

我對今日呢2餐都好滿意...飽到我今晚都唔想食晚飯呀~~