今晚既派對完滿結束,就紀錄番今日既美食啦
今日有三款食品係第一次整既,分別係
吞拿魚酥皮盒: 都叫成功啦,不過同一隻酥皮,但係無上次個酥皮撻升得咁靚喎~~
咕嚕釀豆卜:呢個都叫唔錯,其實魚肉釀豆卜細細個已經有幫阿媽整架啦,不過今次我係反轉左豆卜黎釀既,不過睇黎大家唔係好食得出個分別...而個咕嚕汁都算ok啦
雙色o者喱杯:呢個好成功呀,Joey妹妹第一次食o者喱咋
,佢似乎好鐘意食呢~~底層係芒果味,上層係士多啤梨味...唔錯唔錯
中途就係親子廚房環節,Joey妹妹落手落腳整架,仲帶左盒番屋企俾爸爸試下佢既手勢呢~~3對手一齊包好好玩,好快就包好晒啦...應該包左3打粟米燒賣呀
為求快捷再黎檸檬雞翼,不過老公話唔夠上次甜喎,不過無左上次既苦味,我覺得ok喎~~
仲有就係由茹時出手既麪包布丁啦...好受歡迎呢
...Joey媽同佢個女食唔停口喎,其實咁易整,真係考慮下買個焗爐整黎食啦
其實仲有好大兜沙律同埋白果腐竹糖水,不過無影低佢...今日就係有呢d野食啦
派對晚餐有8樣食品咁多，真係好豐富呀，吃到捧著肚子呢！全部都好味道，真係好多謝吳太的招待，而打攪0左吳家一天的假期十分不好意思呢！ 檸檬雞翼和麵包布丁真係容易整又好食，雞翼少少酸有d檸檬味，味道剛剛好！麵包布丁其實大部份都係吳太整，我只係從中偷師，話俾大家知，吳太係廚房真係好快手0架，唔怪得平時煮咁多餸仲咁早食得飯啦！掂呀！ 親子廚房唔單止Joey玩得開心，連我都覺得好玩呀，雖然我包得唔靚，仲時大時細，哈哈，食落肚唔覺0既！ 將來我有自己的廚房一定會買焗爐0架，除了整麵包布丁，還有焗意&焗飯呢！
回覆刪除好正呀~~ 我好想食添~~
回覆刪除Bear:你整個d一樣令我口水流呀 Sher: 其實我好驚你地唔飽呀...樣樣份量都唔算好多呢~~你唔好咁客氣啦,第日就輪到我去打攪你架啦 ...況且你地又送Mrs Field曲奇又帶左2本北海道書俾我參考,應該係我講多謝先o岩呀 檸檬雞翼和麵包布丁你就記低佢,得閒整俾鐵男食啦...我見佢好似食左好少野,其他野係咪唔o岩佢食呀 你竟然覺得我快手...我嫌自己手慢喎...唔係就可以整到更多野食俾你地試下~~ 我覺得大家包既燒賣都幾靚呀...一齊整好快就包晒啦...唔知Joey爸食左未呢
回覆刪除吳太呀!!!! 若果有機會成為吳太 party 既坐上客~~~ 飽死都抵呀~~~~ 真係好吸引呀~ 衰鬼~~~~
回覆刪除真係利害! 一個人整咁多美食! 樣樣都想食呀!
回覆刪除V&E:都唔係我一個人整晒既~~朋友都有幫手架~~ 七七:相信會有機會既...可能好快有人發起blog友聚呢~~
回覆刪除嘩! 睇見都流晒口水呀, 個麵包布丁我都好想食呀))))))
回覆刪除我黎啦~~~~~ 各位吳家吾居blog既fans，我係有幸享用尋晚美食既人。我好想大聲話俾大家知： 「吳太煮既食物真係色香味俱全！」 每一樣食物都好好味，特別係麵包布丁，簡直一試難忘，攪到我都好想買番個焗爐玩下！ 感動事件： 第一：吳太難得一日放假，都要辛辛苦苦咁為我地盡備美食（仲要係前一晚已經開始準備）。見住你喺廚房行出行入，捧住一盤盤美食出黎，我愈黎愈覺得汗顏，話晒吳生都曾經講過唔想你辛苦，所以先婉拒佢班朋友提出叫你煮飯既要求，但我就咁厚顏無恥，主動叫你整野俾我地食。打搞你地大半日真係勁唔好意思，希望吳生無俾我地悶親。 第二：親子廚房真係勁感動！好多謝你咁有Joey心。唔單只佢玩得好開心，Joey爸夜晚喺雪櫃見到盒燒賣，知道係Joey整既時候，感動到差啲喊咁滯（絕無誇張！）所以我真係好多謝你！
回覆刪除麵包布丁真係好吸引 ... 有無食譜呢?
回覆刪除珍納:麪包布丁食譜如下: 1.預先將焗爐加熱至160度 2.白麪包去皮(5片)及塗上牛油,將麪包切粒並排列在焗盆中 3.雞蛋(4只)攪拌後加入牛奶(90ml)及白砂糖(70g),攪勻後倒在麪包上再撒上肉桂粉及提子乾 4.把焗盆放在注滿水既焗爐盆上,大約1小時或焗至金黃色即可 註:等麪包吸收蛋漿一陣先放入焗爐會好味d架~ Joey媽:邊有你講得咁誇張呀~~不過你可以考慮下買個焗爐呀 唔使感動咁誇張,煮野食最緊要有人欣賞鐘意食,見到你地讚到天上有地下無咁,我開心都黎唔切啦,一d都唔辛苦~~唔使理吳生啦,佢次次都係咁架啦...haha 連Joey爸都咁感動,睇黎我呢個親子廚房都幾成功喎~~ bluebluegirl:麪包布丁一d都唔難,如果有焗爐可以試下整~
回覆刪除如果我好番. 我都試下整先.
回覆刪除多謝吳生吳太既熱切款待，其實數下數下，我原來都食左好多野架喇： 白果腐竹糖水 x 2 cups 吞拿魚酥皮盒 x 3/4 pcs 咕嚕釀豆卜 x 5 pcs 檸檬雞翼 x 6/7 pcs (至愛雞翼既我當然係狂食啦) 麪包布丁 x 3 pcs 粟米燒賣 x 4 pcs 雙色啫喱杯 x 1 pc 最後真係捧住個肚返屋企呀，真係多謝晒呀！
回覆刪除好多美食呀！流o西口水添
回覆刪除little bunny:檸檬雞翼都係多得你先可以整咋 ironman:唔使客氣,不過睇你既紀錄真係唔算食左好多野咋喎...我仲以為你既食量好似我老公咁多添 ~~ fiona:你唔舒服咩?
回覆刪除