2007年5月8日 星期二

0508的晚餐 ~ 白菜豬肉雲吞、粟米燒賣

今日下畫受女人既神經痛搞到好辛苦,痛到連老闆都見到....可能呢期我唔係太多野做,所以老闆叫我早d番屋企休息...所以3點半我就決定離開公司番屋企休息下~~

不過番屋企前都兜左去街市買餸,由於胃口又唔大,而且我想包雲吞好耐架啦,所以去左買雲吞皮...一場黎到就買左半斤上海雲吞皮,半斤廣東雲吞皮,承惠$12.5~~原來同樣半斤重,上海雲吞皮得25塊,廣東雲吞皮就多好多~~跟住買左十蚊免治豬肉~~

番到屋企即刻換番d舒適服休息下,跟住開始整點心...餡料未加白菜前就用黎做燒賣既餡,我為左Joey妹妹仲加左佢最愛既粟米粒入去...如果效果好既話,下次佢同Joey媽黎我屋企玩就可以加多個親子廚房環節,食佢自己親手包既燒賣勒

至於雲吞呢,身為上海人既我自小已經食好多親戚包既雲吞,我憑住小時候睇麻麻包雲吞既模糊印象又自己包起上黎...不過我覺得包得好醜樣呀,睇黎我都要搵日睇下正式應該係點包既先得~~5點半搞點晒我就上床休息等老公番黎先蒸燒賣,淥雲吞~~

今日真係好論盡,整點心時已經界親手指,點知蒸燒賣時又俾d蒸氣淥親,好鬼痛呀不過製成品唔錯喎~

粟米燒賣:味道都可以,我整左12粒,老公食左四分三呀~~

白菜豬肉雲吞:雖然包好左個樣好醜(老公竟然話包得似模似樣喎),不過淥好左個賣相又唔錯喎...原來自家制同買急凍個d雲吞真係差好遠架...我食左12隻,老公食左13隻...好飽呢



張貼者： 於
標籤：

28 則留言:

  1. Sa Sa週二 5月 08, 09:34:00 下午 2007

    粟米燒賣 ~ 好似好好味呢!! 個樣仲好得呀!!

     

    回覆刪除
  2. 吾家吳居週二 5月 08, 09:53:00 下午 2007

    Sa Sa :都好易整架咋~~

    回覆刪除
  3. jkfamily週三 5月 09, 09:15:00 上午 2007

    唔係喎，我覺得o的雲吞包得好靚喎 我好鍾意食雲吞水餃，不過老公唔鍾意，所以我唔使學包喇，次次都係買灣仔碼頭就ok

    回覆刪除
  4. 小東西週三 5月 09, 09:59:00 上午 2007

    唔係喎 你老公講得岩 真係有辦有眼似模似樣喎 見到都想食

    回覆刪除
  5. Kathy週三 5月 09, 10:03:00 上午 2007

    細個時都有跟阿媽學包雲吞，不過啲饀始終冇出面啲咁好食既

    回覆刪除
  6. 吾家吳居週三 5月 09, 11:09:00 上午 2007

    thy:係咩,我諗都係調味既問題...燒賣呢就同出面既味道淨d,不過雲吞我就覺得差唔多喎~ 江夫人の小小 :唔係架,真係包得好醜樣架
     
    JK:灣仔碼頭既都唔錯,不過自己包滿足感大d呢...你老公係唔鐘意食雲吞水餃入面d餡淨係唔鐘意食d皮呀?

    回覆刪除
  7. 敏敏敏週三 5月 09, 11:43:00 上午 2007

    d 燒賣包得好靚呀!

    回覆刪除
  8. SkyBlue週三 5月 09, 12:20:00 下午 2007

    粟米燒賣既賣相好吸引呀, 點整架???

    回覆刪除
  9. stephanie週三 5月 09, 12:32:00 下午 2007

    Wa, i love 水餃. Yummy!

    回覆刪除
  10. Sher週三 5月 09, 01:42:00 下午 2007

    包得好靚呀！你仲諗埋「親子粟米燒賣」環節添，真係掂！可以開playgroup添呀！  

    回覆刪除
  11. 吾家吳居週三 5月 09, 02:19:00 下午 2007

    Sher:哈哈,因為我屋企無咩玩具有得俾joey玩呀麻...咁咪諗d花臣野lor,有得玩有得食應該o岩佢地兩母女啦...我就教你整麪包布丁啦...好唔好呀 Miffy:我呢d係雲吞黎架...北方水餃d皮應該仲厚d呢~ Lover:粟米燒賣好易整架咋,醃好左免治豬肉再加入粟米粒搞到有黏性,將廣東雲吞皮剪成圓形,餡料放在雲吞皮中央,將周邊既雲吞皮圍住餡料包就得架啦...包好左拎去蒸就ok架啦~~ 敏敏敏:其實係中學個時既家政堂學包燒賣架

    回覆刪除
  12. INNIS週三 5月 09, 05:54:00 下午 2007

    我噙日留左言俾你, 但唔知點解無見到!  我話你真係好勁呀!  仲有咩唔識整架?  你老公真係好幸福!!!

    回覆刪除
  13. ¨承承媽週三 5月 09, 06:03:00 下午 2007

    唔係喎, 包得好靚喎, 似模似樣! 你覺得燒賣難包d定水餃難d呀? d餡料你除左豬肉, 粟米同白菜, 仲要落d咩呀?

    回覆刪除
  14. Kristine週三 5月 09, 06:30:00 下午 2007

    包雲吞？好厲害~~

    回覆刪除
  15. 朱太週三 5月 09, 10:37:00 下午 2007

    連燒賣都識, 叻!

    回覆刪除
  16. 吾家吳居週三 5月 09, 11:03:00 下午 2007

    朱太:其實我覺得燒賣易包過雲吞喎~~ 姬絲汀:好多blog友仲叻過我架~~ 珍納:可能燒賣以前上家政堂學過而雲吞就第一次包,所以我自己就覺得燒賣容易d...d餡料就係咁咋,不過其實你想食咩餡自己加就得架啦,好似冬菇,蘿蔔,雞肉,豆苗,韭菜....好多好多材料都可以用架~~ Innis:其實我老公係白老鼠先真...好多野都係第一次整架咋,好唔好味都要食呢~~

    回覆刪除
  17. vyvy週四 5月 10, 10:53:00 上午 2007

    係呀！自己整的同買的真係爭好遠架！！ 你包的一d都唔肉酸~講真！我仲包得核突過你，我求其鍊埋一舊就放落水度淥勒 但其實冇咩所謂啦！自己食之嘛！食左落肚咪仲肉酸 燒賣都做得好靚呀

    回覆刪除
  18. TamJoey週四 5月 10, 12:02:00 下午 2007

    「親子廚房」～～～～～～超感動！ 我要快啲帶Joey上黎先得，好多謝你咁有佢心。

    回覆刪除
  19. 露絲公關手記週四 5月 10, 12:07:00 下午 2007

    好好手勢咁喎

    回覆刪除
  20. Sher週四 5月 10, 01:37:00 下午 2007

    嘩！麵包布丁，你還記得真係感動呢！好期待呀！

    回覆刪除
  21. Little Bunny週四 5月 10, 02:14:00 下午 2007

    我鍾意個栗米燒賣呀！

    回覆刪除
  22. C9陳週四 5月 10, 02:21:00 下午 2007

    我都想試整燒賣呀, 但唔知個雲吞皮要點剪呢?

    回覆刪除
  23. Janice週四 5月 10, 03:31:00 下午 2007

    睇到我都想食啦！

    回覆刪除
  24. Ruby週四 5月 10, 04:46:00 下午 2007

    我從來都無諗過自己整呢兩樣食物，點知原來咁易整，而且睇落仲好好味添，搵日都要包來試下先．

    回覆刪除
  25. 吾家吳居週四 5月 10, 08:10:00 下午 2007

    木木太 :無錯,其實要整一d都唔難架~~ ♠pRiNcEsS jAnIcE♠ :多謝你既讚賞喎 c9july :其實都只係就咁將d皮剪成買形,總之就唔要有角就得架啦...如果你有圓形模,咁咪就咁吸lor... Little Bunny :咁你又試下整啦~~ Sher :記得呢d好少事o者...你快d上黎玩啦~ 露絲 :多謝,不過我覺得仲有進步既空間~~ Joey媽 :唔使感動咁誇張,只要你同Joey上黎玩就得勒 ... vyvy :咁又係,最後都係食落肚...希望下次包得靚仔d啦~

    回覆刪除
  26. Soldier週四 5月 10, 10:03:00 下午 2007

    都好耐冇包雲吞, 係鮮蝦豬肉,有幾年啦...

    回覆刪除
  27. Fiona週六 5月 12, 12:15:00 下午 2007

    阿yan 你的栗米燒賣好可愛呀!!

    回覆刪除
  28. 吾家吳居週六 5月 12, 07:47:00 下午 2007

    fiona:哈哈,我都無諗到可以用可愛黎形容喎~ Soldier :咁就要包一包佢啦~

    回覆刪除

訂閱： 張貼留言 (Atom)