《愛情黎料》(Wedding Singer)

有線開多左一個HMC電影台,今日見做呢套戲,我印象中上映時都有興趣去睇,不過最後無睇到...宜家又可以當新戲咁睇勒

套戲既服裝造型都比較老土個隻,所以個故事唔多唔少都係一d老土既愛情橋段...不過永遠都令人鐘意睇~

不過呢套戲入面都幾多舊既英文歌聽...因為男主角就係一個wedding singer

0330的晚餐

今晚係節衣縮食下既一餐平價而又豐富既晚餐,好似好矛盾添

點解要節衣縮食呢事關我呢個慳家c9仔每月都有個吳家收支一覽表既,用途當然係監察吳家既財政狀況啦吳家既每月支出已經連續6個月都維持係5位數,可能大家覺得呢個數字好正常,不過對於我黎講始終唔係好鐘意,難得今個月埋數仲係4位數,捱多2日就踏入4月份啦,所以我好想成功繼續維持係4位數...

聽日星期六,唔多唔少都要預會使多少少錢,所以今餐要盡量平....結果當然又係睇中超市既特價品啦,之但係食物都可以多到蓋滿整隻碟,底下既白汁意粉全被遮蓋呢~~一樣飽到上心口

呢到二十蚊都仲有找,雖然今餐就求其左d,不過為左達到目標就食下貧餐啦...只多4月去食番d好野lor

Main St. Deli

好友sher是我其中一位可以充當飲食指南的朋友,港九新界食肆林立,不斷新舊交替,何時才吃得完呢

素來知道她有個長長的食店名單排著隊要遂一品嚐,以我所知朗廷酒店的Main St. Deli也應該是排在前列之中,礙於她和我一樣知慳識儉

,所以遲遲未嚐一試~~

前陣子看到blog友介紹Main St. Deli於七人欖球賽期間推出的套餐(今天起,一連3天),以及4月份推出「六六無窮」優惠獻禮,也就略略向她提及,由於想了解更多詳情,我就將這優惠佔了一篇網誌...雖然我也未嚐一試

,不過看來很吸引,我也想去吃一吃啊

香港朗廷酒店的Main St. Deli於四月份特別推出「六六無窮」優惠獻禮，邀請全城一同慶祝它的六歲生晨。
於四月一日至三十日期間，賓客可以八五折享用每週不同的六款「六六無窮精選」，其中包括了不少大受歡迎的招牌菜如：和牛鵝肝漢堡、龍蝦漢堡、磨菇薏米湯、紐約芝士餅以及特濃朱古力蛋糕等。
Main St. Deli「六六無窮精選」

第一週 (四月一至七日) 
磨菇薏米湯、 珍寶脆蟹餅、希臘沙律、龍蝦漢堡、七層朱古力蛋糕、特選美酒（杯裝）
第二週 (四月八至十四日)
雞肉麵條湯、和牛鵝肝漢堡、清新素菜薄餅、龍蝦奄列 、特濃朱古力蛋糕 
特選美酒（杯裝）
第三週  (四月十五至廿一日) 
綠豆湯、火雞沙律、香脆鱈魚漢堡、香辣芝士肉醬熱狗、紐約芝士餅、特選美酒（杯裝)
第四週 (四月廿二至三十日)
素菜漢堡、牛油果鮮蝦三文治、夏威夷薄餅、百老匯芝士通粉、傳統蛋白檸檬批、
特選美酒（杯裝)

額外獻禮
於四月份期間，賓客惠顧Main St. Deli堂食滿港幣六百元可獲贈限量版Main St. Deli迷你飛標套裝乙份。數量有限，送完即止。

訂座或查詢請電2375 1133。

新森林の焗飯專門店

可能因為個人呆下呆下,所以都無咩心情煮飯...而且又有強烈holiday mood喎,問老公今晚想食咩...佢話不如唔好咁辛苦,出街食喎~~

都好呀,我想食飯~~老公話好耐無去新森林,所以就去佢到食我偏愛既焗飯勒~~

我要左個芝士鴛鴦雞皇焗飯,一邊係黑椒汁,一邊係白汁....真材實料喎,好大兜呢

老公就要左個威靈頓鵝肝牛柳...即時令我諗起自己之前整個威靈頓羊仔柳呢...佢呢個比我個細喎,不過都好好味~~咁就放低左一百大洋勒~~

之後同老公去左永安plus行下佢個超市,好多台灣食品賣...之不過我好少整台灣菜,如果有需要,都知係邊到買到材料勒~~

 

0327 ~ CP舊同事聚會

終於約得成啦~~幾經辛苦,終於都夾到日子大家見見面,聚一聚啦~~所以就算病病地都唔可以錯過呢次約會

今次聚會去左食素既功德林,星期二所有菜式都半價,抵好多呢~~以素食黎講,味道都算唔錯呀~~

今次又可以聽到好多湊子女既心得...睇黎呢門學問真係好高深,而且仲要好多彈藥投放係佢地身上~~做人父母真係唔易呀~~

Ettusais一套五件試用裝

今晚約左舊同事去北京道一號既功德林食晚飯...所以我就兜一兜去Faces既Ettusais專櫃換領呢套試用裝勒

春天一到,睇黎都係差唔多時候要換護膚品啦~~

0327的晚餐 ~ 熱狗

今日雖然病左,不過都唔算嚴重,睡了整個下午感覺好多了...雖然人是有些呆滯

不過今晚難得約了舊同事晚飯,我還是決定赴會去~~不過為免老公不知吃什麼,我也整了兩客簡單的熱狗~~

除了必備的牛油、特製沙律醬及香腸外,我還加了以芥末炒過的咸牛肉醬...所以味道應該不錯的

身體‧差

唔知點解呢排成日病既呢

新年後病左一排,前2個星期又腸胃炎,現在又患上流感今次應該係我自工作以來,一個月內請了2日病假...唔通我身體差左,好在都係小病,休息夠就可以痊癒的了~~

從前這些小病我是懶得去看醫生請病假的,現在心態不同了,身體要緊,還是看看醫生比較安心....身體健康最緊要

0325的晚餐 ~ 方飽薄餅

今晚係屋企煮晚飯都係因為一包到期既麥包所致~~99與老爺琴日要去印尼3個星期,所以星期五晚就call左我地上去屋企俾左d食物我地,其中就係呢包今日到期既麥包勒~~

因為佢,我今晚就整左呢個方飽薄餅,好味道呢

屋企有包菠菜,配上煙火腿一齊焗...唔錯唔錯~~

而呢個麪包布丁就係老公要求既,佢食左都有3份2...飯後仲有無核青提子,都不失為豐富既一餐

Zenana facial (閨房)

想讚呢間facial好耐架啦~~要讚佢就要講番我做facial既歷程啦~~

話說我開始幫襯美容院做面部護理始於籌備結婚之時,為左想做個靚靚新娘子,婚前一年開始物色美容院做facial...我個時每間都去試d體驗價,即係第一次做只須百零蚊個d...我好受得住hard sell架,所以都試左好多間,例如Oasis Spa, Modern Beauty,32C, Covermark等.......有d係幾好,不過價錢都幾貴,又無d銀碼細既plan喎,我邊捨得呀...最後都唔知點解join左Orlane既facial course

初初都覺得orlane ok架,買左個10次既基本護理plan,好似係4千左右,仲送一次body treatment添~雖然係基本facial,不過包埋肩頸按摩同手部按摩,環境又唔錯...可惜後來d美容師愈黎愈hardsell,每次都sell我買多d,雖然我堅持唔買,不過都被迫聽佢sell起碼半小時...整整下,我都唔係好想去,結左婚仲剩低2次都放棄左,而且我去開旺角分店又搬左去荃灣喎,地點唔就腳更加唔想去啦...所以婚後就無再使錢出去做facial勒

婚後一年,銀根開始鬆動番少少(起碼結婚開支同新居裝修費都叫recover番少少),而自己既皮膚好似差左,都想出去做下facial架(除左貪靚之外,其實做facial都幾舒服,幾享受架)...咁o岩個時收到Zenana(中文叫閨房)既免費試做coupon(佢係Hair Culture旗下既,由於新開,而我又幫襯過hair culture咪寄俾我lor)...所以就去左試下啦~

地點都幾近我屋企,環境亦算唔錯....最重要服務好,唔hardsell~~以我既經驗,第一次去試做之後都sell得你幾勁架麻,個次當然都有sell啦,不過我覺得唔算好hard...我見個優惠都幾吸引,又用唔錯既護膚品牌,所以就join左啦~

我係上年10月join既,平均3個星期去做一次,到宜家都已經半年啦~~我通常都做佢個75分鐘valmont facial(第二貴個隻架啦),除左基本程序,仲包埋做儀器,肩頸按摩,修眉....好多美容師都幫我做過,個個既手勢都唔錯,成個過程又唔會sell你,個別可能會有意見提議,都係一句起兩句止,不過拒絕左就唔會再騷擾你....75分鐘既facial,通常都超時最少15分鐘,感覺又抵左d...做完亦好少會sell你,反而會問你感覺如何,有無幫助...通常講5分鐘都走得架啦,所以我真係幾鐘意呢間Zenana架

今日又係我去做facial既日子,今次做左Bio機....我覺得做完真係即刻容光煥發左架,有時都要對自己好d先得既

 

《魔幻廚房》

今晚無線播呢齣《魔幻廚房》,我未睇過,所以又當新戲一樣坐定定睇勒~~

久違了的鄭秀文,她演戲還是可以的...不過我愛聽她的歌多一點,她的新派台歌《愛情萬歲》也很不錯

可能這套片子是改編至小說,所以很多讀白在解說...好像小說的句子一樣,有點怪怪的,相信看小說的感覺會好一點~~老公在旁說內容太過從女性角度出發,所以他沒有興趣看

不過我最喜愛這片子道出「用心」就能煮出帶有幸福溫馨感覺的菜式~~

在網上看到太多太多廚藝一流的靚太,有時也會希望自己能像她們一樣煮得一手好菜...雖然每次老公的答案都大同小異,多半都說好味道,不過我心知還有很多需要改進的地方...可是每一次我都真的很「用心」地去煮,老公常常笑我一煮就不能停下來...哈哈,我很希望有多點菜式選擇,常常在家吃飯也不會覺得悶麻~~

雖然我煮的菜味道不夠好,但是希望老公能吃到帶有幸福溫馨感覺的菜式,看來吳家吾居也有一個魔幻廚房

 

 

 

 

Kuspy Kreme Dougnnuts

今日老公要番半畫,而我就約左媽咪去太古坊既彩雲軒飲茶~~食左叉燒腸粉、咸水角、鴨腳扎、蒸釀豆腐、菜乾豬骨粥...2個人食都好飽啦,埋單只係$66,好抵食呢

飲完茶番娘家坐下又八下屋企人既最新情況,原來細細妹已經係西環買左個單位啦,6月就可以搬得啦

媽咪就約左雀友2點鐘開檯攻打四方城,而我就等老公食完晏會合我...最後決定去銅鑼灣行下

今次無去sogo個邊,改左去行利園~~好似好高級添...其實我同老公都係第一次行利園架咋,周圍d人感覺上真係好似有錢d咁喎...本來想同老公去Zoe high tea,點知老公嫌貴...最後去左禮頓道既丹麥餅店食左一個漢堡飽同埋熱狗,各$6...我就鐘意漢堡飽多d,因為好明顯塊漢堡係人手制既,而老公就鐘意熱狗多d...不過我就覺得無咩特別...大家可以去試下~~

行下行下,最後去左呢間Kuspy Kreme Dougnnuts食冬甩...我要左個原味糖衣($10),老公要左個藍梅夾心($12),可惜冬甩唔係幾o岩我口味,雖然都覺得幾鬆軟,可惜太甜...而且又凍冰冰喎....見佢咁出名,試一次就夠啦

0323的晚餐 ~ 春雞兩味

琴日買左隻春雞番黎醃左一晚,今日可以焗黎食啦...都要焗成25-30分鐘,焗到個皮呈金黃就可以架啦~~

焗緊既其間就上個田園忌廉湯,係貴價罐頭湯(citysuper原價$16,特價$10)黎架...不過我手多加多少少水,所以稀左...其實味道唔錯,唔覺係罐頭呢~~

我比較貪心,難得有心情親手整焗雞,又想試多款味道,所以斬開左半隻,每邊醃一款味道,黎個一雞兩味

南乳脆雞:老公鐘意食濃味既,所以我一早已經預左俾呢個南乳脆雞俾老公...老公切左2舊俾我食,果然比我個款入味喎...而且入口就滲出淡淡南乳香,係口腔內迥盪...老公仲話隻雞好多汁添呀...成功左

香草蜜糖焗雞:呢個西式口味當然係我食啦~~初初睇佢好似仲焗得靚過老公個款,不過用刀叉切左雞胸黎食就麻麻地啦,好似無咩味咁既...已經醃左成晚啦喎~~好大原因係我唔食d雞皮(因為怕肥),d味道基本上都係集中係表面,所以入面既肉就比較淡...但係好奇怪,後來我放棄唔用刀叉食,直接用手拎黎食...個感覺即時好味左好多,唔通只係雞胸位有問題?...唯一連皮食既地方就係雞翼,嘩,簡直好味到唔停得口

今日心情好,仲連2碟既賣相都整唔同樣添...而且伴碟既小棠菜亦好好味,我都食晒呀...意粉亦好味道...真係好有成功感~~