0302 ~ ETnet開年飯@潮州名廚

ETnet就係我同老公初出茅廬第一間工作既公司,亦係我地邂逅既地方

唔知係咪第一份工既關係,同上司既關係好好...佢都算係我同老公既媒人啊每年新年又係我地聚舊既日子,可惜上司既囡囡突然發燒所以黎唔到,真係好可惜呀...相信在坐每一位最想見既都係佢~~如果我地早d知道,一定會改期就佢既~~不過其他同事就齊晒勒,我地既伴郎都有黎呢~~

我之前問上司想去邊度食,要求如下:

要圓檯

環境唔好太嘈

可以俾我地大大聲咁傾計

人均消費約$100

本來想訂北京道一號既潮樓,因為免茶免加一,不過諗起都幾嘈,而且就算訂左檯都有機會要等,所以又想搵間好d既...最後俾我醒係山林道盡頭一間叫《潮州名廚》既酒家,位置幾隱蔽,價錢亦不貴,味道亦唔錯(其實我好耐之前由另一位舊上司帶黎食過一次午飯咋),完全符合以上既條件就訂左呢度...因為老公係都要我用吳太名義訂檯,咁我今次就唯有就範啦...點知去到,我好順口就講左殷小姐7位勒...老公在旁叫道「係吳太呀」,我先醒起咋(原來早到既同事都係講殷小姐,所以待應已經知道殷小姐=吳太,我就算講錯左佢都識指示我啦)

呢間《潮州名廚》食物都幾好,同事仲話我叫既菜式好特別,佢地無食過喎~~

太極素菜羹:同事一見到一煲鮮綠色既物體就有d驚,好在飲左第一啖,大家都話唔錯

鹵水鵝片豆腐:食潮州野又點少得鹵水鵝呢,好味~~

碧綠川椒雞:我諗大家真係好少食潮州野,其實呢味小菜我都成日食既...大家都話好味道,連炸左既薄荷葉都讚好

蠔仔烙:一味潮州菜必叫既餸,味道也不錯

粉絲什菜煲:大家都話好入味,yummy~~

飯後仲有糖水送,叫綠豆爽...未黎之前大家都估緊係咪即係綠豆沙,原來係黃黃地色架,都唔錯呀~~埋單每人只係$60,完全做到上司既要求呀...勁

咁耐無見,當然要了解下大家既近況啦,好多人都轉左新工呀...最大發現係阿基佢竟然係X民黨既義務財政大臣,仲差d做埋特首候選人既競選經理~~唔知佢會唔會向政界發展呢相信一定會係明日既政壇新星

至於伴郎就入左Big 4工作,一個捱到不見天日既行業...佢話今日係佢入行以來最早放工既一日,咁就要多d約我地食飯啦...傾下講下笑下又10點鐘啦~~